Loi e Troa Hmaloi La Aqane Hamë Ini Së
1. Nemene la ewekë ka sisitria göi troa nualai me hetre thangane la aqane hamë ini së?
1 Ka nyipi ewekë catr troa hmaloi la aqane hamë ini së, matre troa hetre thangane la hne së hna inine la itre atr. Maine tro sa ce wange la aqane hamë ini ne lo Atre Ini Ka Sisitria, ene Iesu, tre, celë hi lai ka troa xatua së troa maca ngöne la “ini” së.—2 Tim. 4:2; Ioane 13:13.
2. Nemene la nyine tro sa kuca, matre troa hmaloi la aqane hamëne së la ini, nge nemene la itre thangane la aqane hamë ini cili?
2 Loi e Troa Hmaloi La Aqane Ithanata Së: Hetrenyi ngöne la Cainöje hune la Wetr la itre xaa nyipici ka jui catr hna qaja hnene lai atr cili; nge hmaloi hnyawa la aqane qejepengöne nyidrë la itre nyipici cili. (Mat., mek. 5-7) Hnene la ka ala nyim ka drei Iesu hna “haine atraqate . . . la ini nyidë.” Ketre, hnene lo itre hene ne isi hna upe troa xölehuji Iesu hna qaja, ka hape: “Pëkö ate ewekë tune lai.” (Mat. 7:28, 29; Ioane 7:46) Maine easa ajane tro la nyipici a ketr la hni ne la itre xan, tre, thaa nyipi ewekë kö troa xome la itre hnëewekë nyine hain, maine itre xötre hnëewekë ka jole troa trotrohnin, maine itre ceitun pena hna qejepengön’ atrun. Troa nualai la aqane qejepengöne së la nyipici, e hne së hna xome la itre hnëewekë hna majemine qaja.
3. Pine nemene matre hetre itre xan ka qaja atrune pala ha la itre ithuemacany kowe la itre ka drei angatr, nge tune kaa la aqane troa neëne lai?
3 Tuluthe Jë La Etrune La Itre Ithuemacany Hna Troa Hamën: Hnei Iesu hna wanga atrune la pengöne la itre atr ka drei nyidrë, matre troa tuluthe la etrune la itre ithuemacany hna troa hamë angatr ngöne la drai. (Ioane 16:12) Nyipi ewekë tro mina fe sa atreine waiewekë me trotrohnine la itre aja ne la itre atr hne së hna cainöje kow, tune la itre sinee së, me itre ka xötrei atre la nyipici, maine itre nekönatre pena. Ketre, ngacama kola drei së hnyawa hnene la itre atr, ngo loi e tro sa thupën wanga tru catre jë la itre ithuemacany hne së hna qaja. Tro hi la itre atr ka hni ka nyipici a catre troa atrepengöne la nyipi Akötresie, ene Iehova.—Ioane 17:3; 1 Kor. 3:6.
4. Pine nemene matre hetre thangane ka loi, e troa lapa hmekuje hi ngöne la itre mekune ka sisitria?
4 Loi e Troa Lapa Hmekuje Hi Ngöne La Itre Mekune Ka Sisitria: Thaa hnei Iesu kö hna nyi ejolene la ini hnei nyidrëti hna hamën, hnene la hna qaja atrune pala ha la itre mekun. Ame ngöne lo nyidrëti a hape, “Tro la nöjei ate ngöne la ite hua a . . . tropi,” tre, thaa hnei nyidrëti kö hna qejepengöne la lue aqane troa amelene hmaca la itre ka mec, ke, thaa ijine petre kö. (Ioane 5:28, 29) Ame la easa xomiujine la itre etid, tre, loi e tro sa lapa hmekuje hi ngöne la itre mekune ka tru, nge nuetrije pë hë la itre mekune ka thaa nyipi ewekë kö kowe la porotrike së.
5. Nemene la manathithi hne së hna kapa, e troa ahmaloeëne la aqane hamëne së la ini?
5 Drei la hni ne ole së koi Iehova, laka, hmaloi hi la aqane hamëne Nyidrë la itre ini hne së hna ajane troa atre! (Mat. 11:25) Epi tro fe sa hane catr troa ahmaloeëne la aqane hamëne së la ini, me hane melëne la itre manathithi qa ngöne la ketre huliwa ne cainöj ka hetre thangan.