Qëmekene Troa Cainöj, Loi e Troa Pane Thel
1. Pine nemene matre hna isa thawa la itre teritoare thenge la itre qene hlapa hna isa ithanatan?
1 Ame ngöne lo Penetekos 33 M.K., thupene la hnene la itretre drei Iesu hna kapa la uati hmitrötr, hnei angatre hna “qane troa ewekëne la ite xa qene hlapa kö” kowe la itre ka traqa qa ngöne la itre götrane gaa nanyi ne la fen. (Ite hu. 2:4) Ame hë la thangane lai, 3 000 lao atr hna bapataison. Kola mama laka ame asë hi la itre atr ka traqa, tre, itrotrohni hi angatr, pine laka, hetre ketre qene hlapa hnei angatre hna ce ithanatan, ene la qene Heberu maine qene Heleni pena. Ngo, hnei Iehova hna ajane tro la itre atr a drenge la maca ne la Baselaia ngöne la itre sipu qene hlapa i angatre kö. Tha sesëkötre kö së, ke, canga drenge kö la itre atr me kapa la maca ka loi e tro angatr a drenge eje ngöne la sipu qene hlapa i angatre kö. Celë hi matre, ame enehila, ame ngöne la itre götran hna mele ngön hnene la itre atr ka ithanatane la nyimu qene hlapa, tre, hna thawa la itre teritoare thenge la itre qene hlapa hna isa ithanatan. (Organisés, g. 107, par. 2-3) Pëkö teritoare hna kapa hnene la itre gurupe ka qaja la itre xa qene hlapa, ngo angatre a cainöje kowe la itre atr ka ithanatane la qene hlapa i angatr, lo itre ka lapa ngöne la teritoare ne la ekalesia i angatr, maine pena itre atr ka lapa ngöne la teritoare ne la itre xa ekalesia ne la nöj.
2. (a) Tune kaa la aqane troa thele angatr, nge ekaa ngön? (b) Troa ce huliwa tune kaa la itre ekalesia ngöne la itre götran ga nyimu qene hlapa? (c) Nemene la nyine tro sa kuca e traqa ju drei së hnene la ketre atr ka isa qene hlapa kö me easë?
2 Maine epuni a mele ngöne la götrane laka ca qene hlapa hi hna ithanatane hnene la itre atr, tro hi epuni a cainöje ngöne la ketre hnalapa koi ketre hnalapa. Ngo, maine epuni a mele ngöne la ketre götrane ga nyimu qene hlapa, tro fe la itre xa ekalesia ne la itre xa qene hlapa a hane cainöje fe ngöne la götrane hnei epuni hna cainöje ngön. Maine jë tro la itre ekalesia a hamë ithuemacanyi göne la itre atr hnei angatr hna cainöje kow ka ithanatane la qene hlapa i epun, ngo ame la atrekë hnëqane la troa thele la itre atr hnei epuni hna cainöje kow, ke, ekalesia maine gurupe i epun. (Wange ju la itre mekune hna eköhagen, hna hape, “Ce Huliwa Jë.”) Celë hi matre, nyipi ewekë troa pane catre thele hnyawa la itre hnalapa ne la itre atr ka ithanatane la qene hlapa i epun.
3. Nemene la ka troa amamane kowe la ekalesia maine gurup la hnë troa thele atr me etrune la traem hna troa xome thatraqane la huliwa cili?
3 Troa Hnëkë Hnyawa Troa Ithel: Hetrenyi la itre ewekë nyine troa wangatrun, ngöne la kola thele la etrune la traeme hna troa xom matre troa thele la itre atr ka ketre qene hlapa kö. Drei la ketre ceitun, ije atr ka qaja la qene hlapa? Ijetre la etrune la itre ka cainöj ngöne la götrane cili? Ije aderes hna xome hë hnene la ekalesia maine gurupe pena? Tha nyipi ewekë kö troa thele hnene la ekalesia la nöjei götrane asë ga hetre atr ka qaja lai qene hlapa, ngo maine jë tro hi a iëne me metrötrëne la itre ifego ne la itre götrane ga tru atr ka ithanatane lai qene hlapa, nge itre götran ga tha nanyi menu kö. Ngo eje hi lai laka, ka nyipi ewekë catr troa hnëkë hnyawa matre troa thele la nöjei aqane troa ketr la itre atr ka alanyim, me aijijë angatr troa hane hëne la ëje i Iehova.—Rom. 10:13, 14.
4. (a) Nemene la aqane troa eköthe la huliwa ne ithel? (b) Nemene la itre xa aqane troa thele la itre atr ka ithanatane la qene hlapa i epun?
4 Nyipi ewekë tro la itre qatre thup, memine la atre thupëne la huliwa ne cainöj, a hnëkëne me elemekene hnyawa la huliwa ne ithel, matre tha tro kö a tru menu la trenge catre hna xome matre troa cainöj ngöne lai itre götrane cili. (1 Kor. 9:26) Ame ngöne la itre gurup ne qene hlapa, tro la ketre trejine ka macaj ngöne la götrane la ua, ketre qatre thup maine drikona pena hna iëne hnene la lapa ne la itre qatre thup ne la ekalesia, a elemekene lai gurup. Nyimutre la itre ekalesia me gurup ka kuca la itre xa aqane ithel, maine jë troa xome la itre agenda maine jëne ëternet pena, me thele la ëj ne la itre atr ngöne la qene hlapa. Thupene lai, troa sisedrën la huliwa ne ithel hnene la hna telefon maine troa wange pena lai itre atr hna siji ëjen, matre troa amë la itre aderesi angatr ngöne la teritoar. Maine ka loi hi troa huliwa tune lai, tro la lapa ne la itre qatre thup ne la ekalesia hna hnen lai gurup a kuca matre tro asë hi la ekalesia a xome ngöne la itre xa ijin la huliwa ne ithel.—Wange ju la itre mekune hna eköhagen, hna hape “Nemene la aqane tro epuni a thele la itre atr ka ithanatane la qene hlapa ne la ekalesia maine gurupe i epuni pena.”
5. (a) Nemene la itre xa mekune nyine ixatua hna troa xom hnene la itretre cainöj ngöne la angatr a xome la huliwa ne thele atr? (b) Nemene la nyine tro sa qaja ngöne la easa thele atr?
5 Loi e troa mama hnyawa la hne së hna ajane troa kuca ngöne la nöjei easa troa isa xome la huliwa ne thele atr. Pine laka, ame la huliwa celë, tre, ketre igötranene la huliwa ne cainöj, loi e tro sa heetr tune lo easa tro troa cainöj. Nyimutre la itre ka öhne laka ame la angatr a xome lapane la itre aqane nyiqaane ithanata me qaja la qene hlapa ngöne la angatr a thele atr, tre, kola xatua angatr troa madrine me atreine ithanatane hnyawa la qene hlapa. Ijije hi tro sa hane amë fe hnine la rapor ne cainöje së la traem hne së hna xom troa ithel, ngo tha ene fe kö la traem hna xom matre troa hnëkëne la itre teritoar me itre ëj ne la itre atr. Ame ngöne la easa öhne la ketre atr ka ithanatane la qene hlapa, loi e tro sa catre troa cainöje koi angeice, nge thupene lai, troa canga thuemacane la ka thupëne la huliwa ne cainöj maine ketre trejine pena hnei angeice hna iën, matre troa sija pala hi la itre atr hna xötrei öhn ngöne lai teritoar. Ngacama hna kepe epuni ju hë hnene lai atr, ngo loi e troa hane sija fe la ëje i angeic. Maine nyipici laka, ka nyipi ewekë la huliwa ne thele atr, ngo loi tro sa atreine tuluth la aqane tro sa huliwa me hane xome fe lo itre xa aqane troa cainöj.—Wange ju la itre mekune hna eköhagen, hna hape, “Nemene La Nyine Troa Qaja Ngöne La Kola Thele Atr.”
6. Nemene la itre jole ka tru hne së hna cile kow ngöne la kola thele la itre ka simi hnangenyë?
6 Troa Thele La Itre Ka Simi Hnangenyë: Tha ka hmaloi kö troa thele la itre atr ka simi hnangenyë, hetre trenge catre nyine troa kuca nge loi e troa catre xome pala hi la huliwa. Tha easë kö a wangatrehmekune la ka simi hnangenyë hnene la aqane qaja la ëje i angeic, maine hnene la ngönetrei maine hnei aqane heetre pena. Maine jë tro la itre atrene la hnepe lapa i angeic me itre sine i angeic a thele troa thupë angeic, ene pe tro hë angatr a luelue troa hamëne la itre mekune kowe la trejine ka sipo ithuemacany. Ame la itre mekune nyine ixatua hna hnëkëne ngöne la kola thele la itre ka simi hnangenyë, tre, ijije fe troa hane xome itre ej, ngöne la kola thele la itre ka ithanatane la ketre qene hlapa kö.
7. (a) Nemene la itre hna kuca ngöne la itre götran hna meköle ngön hnene la itre atr, matre troa thele la itre ka simi hnangenyë? (b) Tune kaa la aqane troa kuca matre tha tro kö a luelue la atr?
7 Hetre thangane la hna ithel hnene la itre ekalesia memine la itre gurup ngöne la itre uma hnë meköl hnene la itre atr. Maine jë hna öhne hnene la ketre atr la ka lapa ezi angeic a qene hum, maine ketre sine ce huliwa maine sine ce ini pena. Maine jë hna öhne pena la ketre pano ezine gojeny, nyine hmekëne la itre atr ka hape, hetre nekönatr ka simi hnangenyë. Maine jë hetre sinee ka simi hnangenyë. Mekune hnyawa kö laka, ame itre xan tro angatr a mekune ka hape, hetre mekune ka ngazo hne së hna traqa fë. Ngo ijije hi tro epuni a kuca matre tha tro kö a hnehengazo menu la atr, maine jë hnene la aqane thiina ka menyike i epun memine laka, tha hna qea menu kö la hna ithanata, nge ketre, hetre hni ne metrötr ngöne la kola ithanata. Ame itre xan, hetre thangane la huliwa qa ngöne laka, hnei angatr hna amamane la Tusi Hmitrötr maine itre xa DVD, nge hnei angatre hna hnyingëne kowe lai atr maine hetre hnei angeice hna atre ka simi hnangenyë. Thupene lai, angatr a qaja la aja i angatr troa hane ce thawa memine la itre xa atr la mejiune kowe la Tusi Hmitrötr. Maine kola luelue la atr troa hamë ithuemacany, maine jë troa hmala pena hnei angeice troa xome la aderesi epun, maine pepa ne ihë göi troa icasikeu hna troa hamëne kowe la sinee maine atrene la lapa ka simi hnangenyë.
8. Tune kaa la aqane tro la ketre ekalesia ka lapa easenyine la ekalesia ne la itre ka simi hnangenyë, a hane ixatua?
8 Ame ngöne la cas maine lue drai ngöne la macatre, tro la ekalesia thatraqane la itre ka simi hnangenyë a könëne la ketre ekalesia ka ketre qene hlapa kö nge ka tha nanyi kö qaa cili, matre troa ixatua thele atr ngöne la ketre traon. Troa kuca la ketre icasikeu ne cainöj hnene la ekalesia ne la itre simi hnangenyë; troa ce wange la itre hna amekötin thatraqane lai, me kuca la ketre iamacany. E ca loto, tre, troa ce tro memine la ca ka cainöj ka simi hnangenyë, nge troa hamëne la ketre map ka amamane la götran hna troa thele atre ngön.
9. Tune kaa la aqane troa xome la huliwa ne thele ka simi hnangenyë ngöne la itre götrane hnei angatr hna majemine tro kow, tune la itre asosiasio me itre xa götrane ju kö?
9 Ijije mina fe troa thele la itre ka simi hnangenyë ngöne la itre götran hnei angatr hna majemine troa tro kow; maine jë ngöne itre asosiasio, me itre hnë troa ce elo, maine itre hnë troa kapa la itre xa ixatua. Loi e troa heetr thenge la itre götrane hna tro kow. Maine jë ka loi kö e troa ithanata memine la cas maine lue ka simi hnangenyë ngo tha tro kö a cainöj kowe la ka alanyimu menu pala ha. Maine hetre thangane hi la hna porotrik, maine jë troa ihamënekeun la itre aderes me itre xa ithuemacany.
10. Nemene la aqane tro la itre ka cainöj a thele la itre hna salem me hna itö ngöne la nöj?
10 Ame la ketre aqane troa ithel, tre, ene la troa hnëkëne la itre map ka amamane la itre huliwa ngöne la nöj, nge troa wai angatre ngöne la ketre ijine ka ijij. Maine eje ngöne la ketre map la itre xa hna xomi sas. Ame ketre, tre, itre hna wasi mano, me itre hnë xen, me itre otel, me itre xa ewekë ju kö. Maine ca pengöne huliwa hi ngöne la map, haawe, tro la itre ka cainöj a xome la aqane cainöj ka cas me thele troa maca. Drei la ketre ceitun, pine laka, kolo fe a hane kapa hnene la itre otel la itre atr ka simi hnangenyë, loi e tro sa pane qeje pengöne la huliwa së kowe la ka ikep, me hamëne la ketre pak ka qatreng la ketre DVD me ketre pepa ne ihë troa icasikeu. Ame ngöne la itre xa hna itö me hna salem, loi e tro hi sa hnyingën maine kola qene hum la itre ka huliwa maine itre ka traqa lapa troa itö. Maine hetre uma ne ini thatraqane la itre ka simi hnangenyë ngöne la götran hne së hna cainöje ngön, ijije hi tro sa hamëne koi angatr la itre xa DVD së matre tro angatr a xeen ngöne la hna ami itus.
11. Pine nemen matre ka nyipi ewekë catre la thele atr ngöne la easa cainöj?
11 Ketre Huliwa Ka Nyipi ewekë Catr: Tha ka hmaloi kö la troa thele la itre atr ka ithanatane la qene hlapa së. Ketre, ame ngöne la itre kartie, kola traqa la itre xa atr, nge kola tro la itre xan, matre thatreine kö troa sija hutine la ëje i angatr. Ngo kola mama hnyawa ngöne la itre xa götran, laka, ame la huliwa ne thele atr, ke, ka nyipi ewekë catr ej ngöne la kola cainöj. Iehova la ka upi së troa cainöj, nge tha ka ië hnahnime kö Nyidrë. (Ite Huliwa 10:34) Nyidrëti lo Atre “ajane la nöjei ate asëjëihë troa mele me wangate hmekune la nyipici.” (1 Tim. 2:3, 4) Haawe, epi tro sa ce huliwa me Iehova me ce xome la huliwa easë itre trejin matre troa thele la itre atr asë ka ithanatane la itre qene hlapa, nge ka “hni ka loi me nyipici.”—Luka 8:15.
[Na eköhagen götran 5]
Ce Huliwa Jë
Maine kola ajane hnene la ekalesia maine gurupe pena troa ixatua troa thel la itre atr ka qaja la qene hlapa i angatr, tro la atre thupëne la huliwa ne cainöj a pane wange la itre qatre thup ne la itre ekalesia ka easeny. Ka loi e troa ithanata memine la itre ekalesia ka tha nanyi menu kö maine ga tru atr ka qaja la qene hlapa së. Tro pë hë la itre ekalesia cili a ithuemacanyi kowe la itre ka cainöje asë, laka, maine tro angatr a öhne la ketre atr ka qaja la qene hlapa së, tro angatr a cinyihane la aderes me hamëne kowe la atre thupëne la huliwa ne cainöj, nge tro pë hë nyidrë a iupi fë kowe la ekalesia maine gurup ka aja ixatua. Loi e tro la itre qatre thup ka thupëne la huliwa ne cainöj ngöne la itre ekalesia cili, a eköthe la ketre aqane ce huliwa ka lolo matre troa cengöne kuca hnyawa la itre götrane ga tru qene hlapa me ea la itre atr ka hni ka ajan kowe la ekalesia maine gurup ka ithanatane la qene hlapa i nyudren.
Maine tro la itre ka cainöj a öhne la ketre atr ka ithanatane la ketre qene hlapa, nge ka hetre hni ne ajan (maine atr ka simi hnangenyë), loi e tro angatr a canga nyialien la pepa hna hape Personne qui demande à être visitée (S-43) nge hamëne jë kowe la seketere ne la ekalesia. Kolo hi matre troa canga xatuane lai atr ngöne la götrane la ua.—Wange ju km 11/5 g. 3.
[Na eköhagen götran 6]
Troa Thele Tune Kaa La Itre Atr Ka Qaja La Qene Hlapa i Epun
• Hnyinge jë kowe la itre xan, maine itre hnainin, me itre atrene la lapa i epun, maine itre sine ce huliwa me itre xane ju kö.
• Xome jë la annuaire ne telefon matre troa thele la ëje ne la itre atr hna majemine hëne ngöne la qene hlapa. Hetrenyi fe lo itre annuaire hna cinyihane wengëne ngön la itre ëje thenge la itre aderes, maine jë ijije troa xome hnine ëternet maine jëne pena la ketre sasaiatri ka kuci telefon.
• Troa tro kowe la itre götran ka hamë ixatua kowe la ka alanyim, tune lo itre hna ami itusi ne la nöj, me itre biero i mus, me itre iniversite.
• Wange ju la zonal matre troa atre la itre hna troa kuca hnene la itre atrene la ketre qene hlapa.
• Wange jë la itre setroa me itre hna salem me hna itö ka qaja la ketre qene hlapa.
• Troa sipone kowe la itre atrekë hnëqan, matre troa ami itusi hune la ketre laulau ngöne la hna huliwa, maine ngöne iniversite, maine ngöne hna treqe kar pena, ene lo hna traqa itronyi hnene la itre atr ka qaja la qene hlapa së.
• Maine pëkö wathebo ne la nöj ka sewe së troa itöne la ketre anier ne itö me salem, maine troa thel jëne ëternet la itre götrane ga tru atr.
[Na eköhagen götran 7]
Nemene La Nyine Troa Qaja Ngöne La Kola Thele Atr
Loi e troa thiina ka menyike me hnyima hnyima ngöne la kola xötrei ithanata kowe la atr, matre tha tro kö angeic a mekuhni menu. Ka loi e itre xa ijin troa pane amamane la itre itusi ngöne la qene hlapa.
Thupene la hna ibozu, qaja jë ka hape: “Eahuni a thele la itre atr ka qene Drehu, matre troa ce thawa me angatr la mejiune qa hnine la Tusi Hmitrötr. Hetre hnei epuni kö hna atre ka qaja la qene Drehu?”
Ame ngöne la kola thele la itre ka simi hnangenyë, qaja jë ka hape: “Hapeue lai. Eni a pi amamane koi epuni la ketre ewekë. [Xome jë la ketre video, me amë la ketre mekene tus qaa hnine la Tusi Hmitrötr Traduction du Monde Nouveau—DVD.] Hane la ketre götranene la Tusi Hmitrötr qene Faras thatraqane la itre ka simi hnangenyë. Tha Tusi Hmitrötre hmekuje kö, ngo hetrenyi fe la itre video ka pëkö thupen hna kuca thatraqane la itre aja ne la itre ka simi hnangenyë ngöne la götrane la ua. Hetre hnei epuni kö hna atre ka simi hnangenyë maine ka tha drenge hnyawa kö nge ka atreine qene hum?” Maine thëthëhmine hë lai atr, ma ka loi troa pane hamëne koi angeice la itre ceitun ne götran hnei angeice hna öhne la ketre ka simi hnangenyë, maine ngöne hna huliwa, maine ngöne hna ini, maine ezine la hnei angeice pena hna lapa.