Aqane Ujë Ka Atrunyi Akötresie
1. Pine nemene matre canga tro hi a öhne la Itretre Anyipici Iehova ngöne la nöj hna hnen ngöne la asabele ne distrik me itre xa asabele ka tru?
1 Ame la easa sine la asabele ne distrik, maine ketre asabele ka tru catre pena, tre wang atrehmekunyi së kö hnei itre atr. Ame ngöne la nöje hna hnen ngöne la itre asabele ka tune lai, tre easa öhne ngöne televizio maine drenge ngöne radio pena la kola qeje së. Kola tiqa la itre hôtel me itre restaurant hnene la Itretre Anyipici Iehova ka traqa qa cili itre xa nöj, nge canga öhne hi la itre atrene la nöje hna hnen ngöne la asabele, la kola ami badge hnene la itre trejine me easë cili. Hane hi cahu itre xa nyine troa kuca hna amekunë së, matre tro sa atrunyi Akötresie jëne la thiina së ka lolo ngöne la nöje hna hnen ngöne la asabele.—1 Pet. 2:12.
2. Tro sa atrunyi Akötresieti tune kaa, ngöne la nöj hna troa hnene ngön la asabele?
2 Qahmihmi: Nyipici laka ame la easa hnëkë qëmekene troa tro kowe la hna asabele, nyipi ewekë tro sa heetr ngöne la qahmihmi. Ngo, tro fe sa thupëne la aqane heetre së ngöne la easa traqa ngöne hôtel troa wai göhnë, me xeni ngöne restaurant, me komisio, ke tha sihngödri kö lai kowe la itre atr. Ngacama tha nyipi ewekë kö tro sa heetre tune la easa heetre ne troa icasikeu, ngo loi e tro sa heetr ngöne la qahmihmi, me heetre hnyawa, ngo tha tro kö sa heetre tune la easa heetre ne lapa hnalapa. Loi e troa canga mama kowe la itre atr ka hape, isapengöi së kö memine la itre atr ka tha ce hmi kö me easë. (Rom. 12:2) Ketre, loi e tro fe sa amë la badge së, ke ketre jëne tro hi së lai a hëne la itre atr, me cainöje koi angatr, me aijijëne la Itretre Anyipicin qa ngöne la itre xa nöje troa wang atrehmekunyi së.
3. Tro sa xomihni ahoeanyi me loi thiina tune kaa?
3 Xomihni Ahoeany, Me Loi Thiina: Ala nyimu enehila la itre atr e celë fene ka hnimi angatre kö, me pë hni ne ole; ngo maine hetrenyi së la xomihni ahoeany, nge lolo la thiina së, tro ha madrine hnene la itre atr ka goeë së, ene la itre ka huliwa ngöne hôtel, maine restaurant pena. (2 Tim. 3:1-5) Ame la easa ami göhnë ngöne la hna asabele, maine icilenyi göi troa xomi itus ka hnyipixe pena, epi tro sa thele la loi ketre, hu së kö. (1 Kor. 10:23, 24) Thupene jë hi la hna xötrei sine la asabele hnene la ketre trahmany, öni nyidrëti ka hape: “Thëthëhmine hë ni la itre cainöje hna cile fë ngöne la ijine cili, ngo casi la ka ketri ni hnyawa, ene la aqane ujë ne la Itretre Anyipicin.”
4. Pine nemene matre loi e tro sa hane ixatua ngöne la ijine asabele?
4 Itre Ka Ajane Troa Ixatua: Ame la troa ixatua, tre pengöne la nyipi Keresiano lai. (Sal. 110:3) Hapeu, tro fe kö nyipunieti a ixatua ngöne la ijine asabele? Ame ngöne la ketre macatre, qëmekene la ketre asabele, hna traqa itronyi hnene la ala 600 lao trejine trahmanyi me föe, matre troa nyihnyawane la uma ne drai. Kola qaja hnene la ketre atr ka huliwa ngöne lai götrane hna nyihnyawane hnene la itre trejine ka hape: “Ketre ewekë la! Eni petre hi a haine la eni a öhne la kola isa traqa la itre atr troa ixatua, nge hnei angatre kö hna ketre sipu mekun.” Easë pe hi la a e drai matre hane jë së sine la asabele ka tru ne la macatre 2013, nge matre tro fe sa drenge me kapa la itre ini qaathei Akötresie, me atrunyi Nyidrë.
[Hna eköhagen götran 3-10]
Itre Nyine Amekunë Së Göi Asabele Ne Distrik 2013
◼ Hawa Ne Icasikeu: Kola troa fe la itre qëhnelö e 8 h 00 e hmakany. Nge ame ngöne asë hi lai köni drai ne asabele, kola troa ahone la miuzik ne nyiqaane e 9 h 20. Hawa ne tro hë së lai a isa lapa gohnen, qëmekene troa nyiqaane la huliwa së, thenge la ekeukawane me ehmitrötren ej. Kola troa nyima ne nyipun, me thith e 4 h 50 e hnaipajö e Drai Ka Tru me Mecixen; ngo 3 h 35 pe e Sabath.
◼ Hna Acili Loto: Ame e koilo ngöne la hna asabele, hetre itre ka tro kö a amekötine la aqane troa acili loto; pëkö thupen, nge ame la ka traqa pa, tre ka canga hetre göhnen. Ame ngöne la itre xa götran, tha tru kö la hnë acili loto; celë hi matre maine ijije hi, tre loi e troa ce ti loto. Ame lo itre ka trene carte hna hamëne hnei musi göi itre ka sinatr, tre angatre hmekuje hi la ka ijije troa acili loto ngöne la itre göhnë hna hnëkëne hë thatraqai angatr.
◼ Göi Göhnë Hnine La Iuma Ne Drai: Loi e troa ami göhnë thatraqane hmekuje hi la itre atrene la hnalapa së, maine itre ka ce ti loto me easë, maine thatraqane pena la itre hne së hna ini Tusi memin.—1 Kor. 13:5.
◼ Xeni Hnaipajö: Kola sipone troa isa traqa fë nyine hutihut, hune la troa lö pi qa ngöne la hna asabele me thele xeni e kuhu trön. Ijije tro nyipunieti a xome trongëne la neköi glacière ka co, me amë fene la icea i nyipunie. Ame pë hë la itre glacière atraqatr, memine la itre verres, tre hna wathebone troa lö fë kowe la hna icasikeu.
◼ Itre Ahnahna: Ijije tro sa amamane la hni ne ole së kowe la itre hna kuca thatraqane la asabele, jëne la itre ahnahna hne së hna hamën. Ame göi itre chèques, kola sipone troa sija göi “Association chrétienne Les Témoins de Jéhovah de Nouvelle-Calédonie” maine “A.S.T.J.”.
◼ Itre Eatr Me Itre Sine Mec: Maine troa eatr la ketre atr ngöne la hna asabele, canga wange ju la ketre trejine ka ikep, matre tro angeic a thuemacane la itre atrene lo hna hape, Pane Ixatua, matre tro angatr a waipengöne lai ka eatr. Maine tru la eatr, tro kö angatr a hëne la 18, matre tha tro kö a tru menu la itre ka hëne la numero cili.
◼ Itre Drösinöe: Maine hetre wene kas nyine tro nyipunieti a xom, haawe, isa traqa fë pi, ke pëkö wene kas hna troa hamëne ngöne la hna asabele. Ame göi itre ka diabet nge ka ithiny, tre tha tro kö a trije menune ngöne la itre xa poubelles, ngo troa trije la itre nyine ithiny ngöne la itre poubelles hna hnëkëne kö thatraqane lai.
◼ Göi Itre Ka Nango Jol Troa Dreng: Ijije troa drenge la itre cainöje jëne la ketre radio hna saane kö ngöne la hna asabele. Maine ajane nyipunie, isa traqa fë pi lo hna hape récepteur FM, memine lo casque nyine dreng.
◼ Itre Nyine Uku Medreng: Tha tro kö a xom trongëne la itre nyine uku medrenge kowe la hnë asabele. Ngo maine hetre cea i nekönatr, ijije hi troa xome matre troa atë ngöne la icea ezi keme me thin.
◼ Senitr: Ame la itre xa asabele, tre hna hnen ngöne la itre uma ka peixet, nge hna ami fifikë matre nango ufeuf. Qa ngöne lai, tro sa hane mekune la itre xa atr, me neëne troa tha senitr pala ju pë hë, wanga löthe jë la he i angatr, nge traqa pi la hmanono.—1 Kor. 10:24.
◼ Itre Sine Pepa Hna Hape, “Veuillez suivre l’intérêt” (S-43): Maine hetre hnei nyipunieti hna cainöje kow ngöne la ijine asabele, ange hane ju nyi aliene lo sine pepa hna hape, “Veuillez suivre l’intérêt.” Maine ase hë nyipunieti fejan asë la itre ithuemacany, tro fë jë hë kowe lo hna hape, Objets trouvés, maine pena hamëne jë kowe la seketere ne la ekalesia i nyipunie.
◼ Restaurants: Maine nyipunieti a tro koi restaurants, epi tro nyipunieti atrunyi Iehova jëne la aqane ujë i nyipunie. Loi e troa mama ngöne la aqane heetre i nyipunie, ka hape, itre Keresiano nyipunie.
◼ Itre Ka Ajane Troa Ixatua: Ame la ka trene mekun, tre loi e troa wange la trejin atrekë hnëqane lai. Ame la itre nekönatr ka co uti hë 16 lao macatre, tre ijije tro angatr a hane ixatua, ngo loi e troa ce me nyudren hnei kem maine thin, maine ketre ka tru pena.