Itre Nyine Amekunë Së Göne La Asabele 2015
Hawa Ne Icasikeu: Kola troa fe la itre qëhnelö e 7h00 e hmakany. Nge ame ngöne asë hi lai lue drai ne asabele, kola troa ahone la miuzik ne nyiqaane e 8h20. Hawa ne tro hë së lai a isa lapa göhnen, qëmekene troa nyiqaane la huliwa së, thenge la ekeukawane me ehmitrötrene ej. Kola troa nyima ne nyipun me thith e 4h35 e hnaipajö e Mecixen, nge 3h10 e Sabath.
‘Atrunyi Iehova Jë Hnene La Nyima’: Qaan ekö, hnene pala hi la itre hlue i Iehova hna atrunyi Nyidrë hnene la itre nyima; a uti pala hi enehila. (Sal. 28:7) Celë hi matre, ame ngöne la ijine asabele, kolo pala hi a nyiqaane la huliwa së hnei miuzik. Easa dreng la miuzik ka hnëkën la hni së troa hmi koi Iehova me inine la pengö i Nyidrë. Qa ngöne lai, ame la kola qaja hnene la ceaman koi së ka hape, kola troa nyiqaane la miuzik, ke tro sa isa lapa göhnen me dreng. Maine tro sa kuca tune lai, easë hi lai a amamane la hni ne ole së kowe la orkes ne la Sosiete Watchower. Itre trejin trahmanyi me föe a alua tro ngöne la macatre Patterson eë e New York troa hnëkëne la itre miuzik thatraqai së. Angatre kö la ka nyithupene la pases i angatr. Thupene hë la hna dreng la miuzik hna hnëkën, loi e tro asë hi së a ce thinge la nyima nyine atrunyi Iehova.
Hna Acili Loto: Ame e koilo ngöne la hna asabele, hetre itre ka tro kö a amekötine la aqane troa acili loto; pëkö thupen, nge ame la ka traqa pa, tre ka canga hetre göhnen. Ame ngöne la itre xa götran, tha tru kö la hnë acili loto; celë hi matre maine ijije hi, tre loi e troa ce ti loto. Ame lo itre ka trene carte hna hamëne hnei musi göi itre ka sinatr, tre angatre hmekuje hi la ka ijije troa acili loto ngöne la itre göhnë hna hnëkëne hë thatraqai angatr.
Göi Göhnë Hnine La Iuma Ne Drai: Ame la kola troa fe la itre qëhnelö ne la iuma ne drai, kola sipone tha tro kö a ielo göhnë. Loi e tro sa hane imeku, me thele la loi itre xan, ke celë hi hatrene la nyipi Keresiano lai, nge matre tro la itre xa atr a atrunyi Akötresie, hnene la aqane ujë së. (Ioane 13:34, 35; 1 Kor. 13:5; 1 Pet. 2:12) Loi e troa ami göhnë thatraqane hmekuje hi la itre atrene la hnalapa së, maine itre ka ce ti loto me easë, maine thatraqane pena la itre hne së hna ini Tusi memin. Hetre göhnë hë hna hnëkëne thatraqane la itre qatr me itre ka kucakuca. Pine laka, tha tru kö la göhne i nyudren, kola sipone tro hmekuje hi a ce lapa me nyudren hnene la ala casi maine ala lue.
Aqane Heetr: Loi e troa lolo la aqane heetre së, me ihmeku memine la huliwa së, ngo tha tro kö sa nyitipune la itre aqane heetr ne la itre atr ne fen. (1Tim. 2:9) Ame la easa lö pi me lö jë ngöne hôtel, maine pane ngenu qëmekene troa asabele, maine e thupene pena, tha tro kö sa heetr qene hmo. Tro pe sa madrine troa amë pala hi la badge së, me cainöje kowe la itre atr, e ijij. Tro hë la itre atr a pi drenge la maca ne mel qa hnine la Tusi Hmitrötr, qa ngöne la hna goeëne la thiina së, me aqane ujë së ngöne lai ijine asabele, nge tro lai a amadrinë Iehova.—Zef. 3:17.
Thiina Me Mo: Ame la easa nyiqaane la asabele, troa thupëne matre tha tro kö la mobilis maine ketre ewekë kö a ajolëne la itre atrene la asabele. Maine easa ajane troa xomi foto maine video pena, maine huliwane la tablete së maine ketre ewekë kö, loi e tro sa thupën tha tro kö a ajolëne maine thunge la itre atr. Ketre mina fe, tro sa thupëne tha tro kö së a cinyany jëne mobilis e pëkö nyipi kepin.
Xeni Hnaipajö: Kola sipone troa isa traqa fë nyine hutihut, hune la troa lö pi qa ngöne la hna asabele me thele xeni e kuhu trön. Ijije tro epuni a xome trongëne la neköi glacière ka co, me amë fene la icea i epun. Ame pë hë la itre glacière atraqatr, memine la itre verres, tre hna wathebone troa lö fë kowe la hna icasikeu.
Itre Ahnahna: Ijije tro sa amamane la hni ne ole së kowe la itre hna kuca thatraqane la asabele, jëne la itre ahnahna hne së hna hamën. Ame göi itre chèques, kola sipone troa sija göi “Association Chrétienne Les Témoins de Jéhovah de Nouvelle-Calédonie.”
Itre Drösinöe: Maine hetre wene kas nyine tro epuni a xom, haawe, isa traqa fë pi, ke tha kolo kö a troa hamëne la itre wene kas cili ngöne la hna asabele. Ame göi itre ka diabet nge ka ithiny, troa trije la itre nyine ithiny ngöne la itre poubelles hna hnëkëne kö thatraqane lai, ngo tha tro kö a trije menune ngöne la itre xa poubelles ngöne lai hna asabele maine hôtel pena.
Itre Eatr: Kola sipone troa xometrije la itre xa ewekë, wanga jele jë la waca ne la itre xa trejin, maine ucici pena.
Itre Nyine Uku Medreng: Tha tro kö a xom trongëne la itre nyine uku medrenge kowe la hnë asabele. Ngo maine hetre cea i nekönatr, ijije hi troa xome matre troa atë ngöne la icea ezi keme me thin.
Sine Pepa Hna Hape “Veuillez suivre l’intérêt” (S-43): Maine hetre hnei epuni hna cainöje kow ngöne la ijine asabele, ange hane ju nyi aliene lo sine pepa hna hape, “Veuillez suivre l’intérêt.” Maine ase hë epuni fejan asë la itre ithuemacany, tro fë jë hë kowe lo hna hape, Ewekë Hna Öhn, maine pena hamëne ju kowe la seketere ne la ekalesia i epun.
Itre Ka Ajane Troa Ixatua: Ame la ka trene mekun, tre loi e troa wange la trejin atrekë hnëqane lai. Ame la itre nekönatr ka co uti hë 16 lao macatre, ijije tro nyudren a hane ixatua, ngo loi e troa ce me nyudren hnei kem maine thin, maine ketre ka tru pena.