“Loi e Thina Ka Loi Nyipunie Qëmeke Ne La Nöjei Ethen”

1. Nemene la enyipiewekëne la troa loi thiina ngöne la ijine easa troa sine la asabele?

¹ Ame la easa asabele e nöjei macatre, tre kola goeë së hnene la itre atr, celë hi kepine matre, nyipi ewekë troa ihmeku la aqane ujë së memine la pengöne la Akötresie hne së hna hmi kow. (Lev. 20:26) Loi e troa mama ngöne la thiina së ka loi, memine la aqane heetr me aqane iseji së, ka hape, easë hi la itre ka xötrethenge Keriso. Easenyi hë la itre asabele së; ngo tune kaa la aqane tro sa ‘thina ka loi qëmekene la nöjei atr,’ matre qaja aloinyi Tretretroti jë hnei angatr?—1 Pet. 2:12.

2. Nemene la aqane tro sa amamane ka hape, itre Keresiano së ngöne la ijine asabele?

² Pengöne La Keresiano: Isapengöi së kö memine la fen, ke tro hi a canga mama kowe la itre atr la aqane ihnimikeu së, memine la aqane ujë së “thei angat’ e kuhu.” (Kol. 3:10; 4:5; 2 Tim. 3:1-5) Maine hetre hnepe jole së memine la itre ka huliwa ngöne restaurant, maine ngöne hôtel pena, epi tro sa loi thiina, me atreine itreqe. Ame ngöne la itre xa nöj, hna goeën aloine la atr ka kuië ahnahna kowe la itre ka huliwa.

3. Nemene la qa i keme me thin, nge pine nemen?

³ Nyipi ewekë tro la itre keme me thin a isa goeë kuku ngöne la hnë asabele, me ngöne restaurants, me ngöne hôtel. (Ite edomë 29:15) Önine la hene ka tru ne la ketre hôtel kowe la lue xa trefëne ka hape: “Ekölö hi ni epun. Lolo catre la thiina i epun me itre nekö i epun. Tha mano kö la itre ka huliwa e celë qeje epun, nge maine traqa ju epuni troa meköle e celë e nöjei Mecixeni me Sabath, ke pëkö ejolene koi eahun.”

4. Nemene la ketre ewekë nyine tro sa thupëne hnyawa ngöne lai götrane hne së hna troa asabele ngön?

⁴ Aqane Heetr: Loi e troa lolo la aqane heetr së, me ihmeku memine la huliwa së, ngo tha tro kö sa nyitipune la itre aqane heetr ne la itre atr ne fen. (1 Tim. 2:9) Ame la easa lö pi me lö jë ngöne hôtel, maine pane ngenu qëmekene troa asabele, maine e thupene pena, tha tro kö sa heetr qene hmo. Tro pe sa madrine troa amë pala hi la badge së, me cainöje kowe la itre atr, e ijij. Tro hë la itre atr a pi drenge la maca ne mel qa hnine la Tusi Hmitrötr, qa ngöne la hna goeëne la thiina së, me aqane ujë së ngöne lai ijine asabele, nge tro lai a amadrinë Iehova.—Zef. 3:17.

Itre Nyine Amekunë Së Göne La Asabele e 2014

◼ Hawa Ne Icasikeu: Kola troa fe la itre qëhnelö e 7h e hmakany. Nge ame ngön asë hi lai lue drai ne asabele, kola troa ahone la miuzik ne nyiqaane e 8h20. Hawa ne tro hë së lai a isa lapa göhnen, qëmekene troa nyiqaane la huliwa së, thenge la ekeukawane me ehmitrötren ej. Kola troa nyima ne nyipun, me thith e 3h55 e hnaipajö, e Mecixen, ngo 2h50 pe e Sabath.

◼ Itre Asabele Ka Tru: Ame ngöne la itre xa nöj, tre hetrenyi lo itre asabele ka tru. Qanyine kö la hnalapa ne thewe huliwa iëne la itre ekalesia qa cailo ka troa hane sin lai asabele, ke göi göhnë ngöne la hnë asabele, me hnë acili loto, me itre göhnë ngöne hôtel. Maine troa traqa la itre xa trejine kowe lai asabele ka tru, ngo tha hna hane pe hë angatr, tro ha ipepetrenyi la iatr. Maine hetre ewekë ka ajolë nyipunie troa sine la asabele ngöne la götrane hna amekötine koi nyipunie, troa thele la ketre hnë asabele, ngo the tro kö kowe lai asabele ka tru.

◼ Hna Acili Loto: Ame e koilo ngöne la hna asabele, hetre itre ka tro kö a amekötine la aqane troa acili loto; pëkö thupen, nge ame la ka traqa pa, tre ka canga hetre göhnen. Ame ngöne la itre xa götran, tha tru kö la hnë acili loto; celë hi matre maine ijije hi, tre loi e troa ce ti loto. Ame lo itre ka trene carte hna hamëne hnei musi göi itre ka sinatr, tre angatre hmekuje hi la ka ijije troa acili loto ngöne la itre göhnë hna hnëkëne hë thatraqai angatr.

◼ Göi Göhnë Hnine La Iuma Ne Drai: Ame la kola troa fe la itre qëhnelö ne la iuma ne drai, kola sipone tha tro kö a ielo göhnë. Loi e tro sa hane imeku, me thele la loi itre xan, ke celë hi hatrene la itre nyipi Kereisiano lai; nge matre tro la itre xa atr a atrunyi Akötresie, hnene la aqane ujë së. (Ioane 13:34, 35; 1 Kor. 13:4, 5; 1 Pet. 2:12) Loi e troa ami göhnë thatraqane hmekuje hi la itre atrene la hnalapa së, maine itre ka ce ti loto me easë, maine thatraqane pena la itre hne së hna ini Tusi memin. Hetre göhnë kö hna hnëkëne thatraqane la itre qatr me itre ka kucakuca. Pine laka, tha tru kö la göhne i nyudren, kola sipone tro hmekuje hi a ce lapa me nyudren hnene la ala casi maine ala lue.

◼ Xeni Hnaipajö: Kola sipone troa isa traqa fë nyine hutihut, hune la troa lö pi qa ngöne la hna asabele me thele xeni e kuhu trön. Ijije tro nyipunieti a xome trongëne la neköi glacière ka co, me amë fene la icea i nyipunie. Ame pë hë la itre glacière atraqatr, memine la itre verres, tre hna wathebone troa lö fë kowe la hna icasikeu.

◼ Itre Ahnahna: Ijije tro sa amamane la hni ne ole së kowe la itre hna kuca thatraqane la asabele, jëne la itre ahnahna hne së hna hamën. Ame göi itre chèques, kola sipone troa sija göi “Association Chrétienne Les Témoins de Jéhovah de Nouvelle-Calédonie” maine “A.S.T.J.”.

◼ Itre Drösinöe: Maine hetre wene kas nyine tro nyipunieti a xom, haawe, isa traqa fë pi, ke pëkö wene kas hna troa hamëne ngöne la hna asabele. Ame göi itre ka diabet nge ka ithiny, tre tha tro kö a trije menune ngöne la itre xa poubelles, ngo troa trije la itre nyine ithiny ngöne la itre poubelles hna hnëkëne kö thatraqane lai.

◼ Itre Eatr: Kola sipone troa xometrije la itre xa ewekë, wanga jele jë la waca ne la itre xa trejin, maine ucici pena. Ame ngöne la nöjei macatre, kolo fe a eatr hnene la itre atr, pine la itre buutr hna otreën, ka tune lo itre talons ka draië catre pala ha. Qa ngöne lai, kola sipone troa otreëne hi la itre buutr ka troa aijijë nyipunie troa tro hnyawa ngöne la itre escaliers, maine itre gradins pena.

◼ Itre Nyine Uku Medreng: Tha tro kö a xom trongëne la itre nyine uku medrenge kowe la hnë asabele. Ngo maine hetre cea i nekönatr, ijije hi troa xome matre troa atë ngöne la icea ezi keme me thin.

◼ Sine Pepa Hna Hape “Veuillez suivre l’intérêt” (S-43): Maine hetre hnei nyipunieti hna cainöje kow ngöne la ijine asabele, ange hane ju nyi aliene lo sine pepa hna hape, “Veuillez suivre l’intérêt.” Maine ase hë nyipunieti fejan asë la itre ithuemacany, tro fë jë hë kowe lo hna hape, Objets trouvés, maine pena hamëne jë kowe la seketere ne la ekalesia i nyipunie.

◼ Restaurants: Loi e tro sa hane atrune la ëje i Iehova ngöne la itre restaurants, jëne la thiina së. Loi e tro sa heetr tune la aqane heetr ne la Keresiano. Maine hna majemine troa kuië ahnahna kowe la itre ka huliwa ngöne lai götrane hnë asabele, kuca tune ju lai.

◼ Itre Ka Ajane Troa Ixatua: Ame la ka trene mekun, tre loi e troa wange la trejin atrekë hnëqane lai. Ame la itre nekönatr ka co uti hë 16 lao macatre, tre ijije tro angatr a hane ixatua, ngo loi e troa ce me nyudren hnei kem maine thin, maine ketre ka tru pena.