Hane Ju Amamane Lo Sit

Ketre jia ne huliwa ka lolo catr la sit Ëternet göi troa tro fë trongëne la maca ka loi “uti hë la cane la fene hnengödrai.” (Ite hu. 1:8) Tru catr la itre atr ka thatre kö, ka hape hetrenyi lai sit jw.org. Angatr a atre, ke hnene la ka cainöje koi angatr hna amamai angatr.

Hnene la ketre atre thup ka iwai trootro hna xom kowe la mobilis i nyidrë, lo video hna hape, Hnauëne La Troa Inine La Tusi Hmitrötr?, me amamane kowe la itre atr hnei nyidrëti hna cainöje kow. E cile mina nyidrë ngöne la ketre hnalapa, nyidrëti a qaja ka hape: “Eni a tro koi epun, ke eni a ajan troa xatua epun troa sa la köni hnying celë, ka hape: Hnauëne laka tru catr la itre jol ngöne la fen? Tro Akötresie a apatrene tune kaa la itre jol cili? Nge nemene la ka troa xatua së troa cile kowe la itre jole cili? Kola sa lai köni hnying hnene la neköi video celë.” Nyidrëti pë hë a canga amelene ju lai video, me goeë angeic. Pine laka, lolo catre la aqane kuca lai video, itre atr a goeën hnyawa uti hë la kola ase. Ame e cili, önine jë hi lai atre thup ka iwai trootro ka hape: “Ma drenge hi epuni e celë ngöne video la kola qaja ka hape, ijije tro sa tro ngöne ëternet me sipone troa hane ini Tusi Hmitrötr. Eni a pi amamane koi epun la aqane ini Tusi eahun me itre atr.” Maine ajane hi lai atrekë hnalapan, nyidrëti pë hë a xome jë lo boroshür Maca Ka Lolo, me amamane koi angeic. Maine tha ijije kö la traem, nyidrëti a sipone ju troa bëek hmaca, matre göi troa ce wange hmaca pë hë e thupen. Maine nyidrëti a pane tro kowe lo hna iji kofi, nge ca atr ka lapa ezi nyidrë, nyidrëti pë hë a nango porotrike jë memin, me amamane ju fe lo video. Epuni fe kö a hane amamane la sit jw.org kowe la itre atr hnei epuni hna cainöje kow?