Tro Jë Kowe La Sit jw.org Ngöne La Hna Cainöj—“Deviens l’ami de Jéhovah”

Ame ngöne la sit jw.org, ke hetre götrane hna hape “La Bible et vous”, hna eköthe thatraqane la itre nekönatr, nge hna hëne ka hape, “Deviens l’ami de Jéhovah.” Ej e cili la itre nyima me itre video, me itre xa ewekë ju kö. Hane kö epuni tro kowe la götrane cili ngöne la epuni a cainöj? Maine epuni a inine la Tusi Hmitrötr memine la ketre kem maine thin ka trene nekönatr, ka lolo catr troa amamane koi angeic la video cili. Tro fe hë angeice lai a hane tro kowe lai sit me hane goeëne la itre xaa video.

Ame ngöne la kola tro fë hnene la ketre trejine trahmany la tarak hna hape, Itre Ithuemacanyi Ne La Baselaia Na. 38, hnei angeic hna hane hamëne la tarake cili kowe la ketre föe; canga xome hi eahlo me e. Alanyimu la itre neköi eahlo ka co, nyudreni a hane pi goeëne lai tarak. Celë hi matre nyidrëti a pane ce ithanatane jë me angatr la aliene la tarak me amamane la hune tusi ne lai sit. Pine laka kola kapa hnene la föe, ene pe nyidrëti a xome jë la tablete i nyidrë me amamane koi eahlo me haneköi eahlo la ketre video i Caleb.

Hnene la ketre trejine föe hna ce ithanatane memine la ketre sine huliwa i eahlo ka trene nekönatr, la site së memine la itre ithuemacanyi ka ej e hnin thatraqane la itre hnepe lapa. Hnene la föe hna tro kowe lai sit jw.org me ce wange la itre video memine la itre neköi eahlo. Kolo pë hë a qaja e thupene hnei eahlo kowe la trejine föe, ka hape, haneköi eahlo a nyenyape kanothe la uma me thinge la nyima hna hape “Prêche la parole,” ene lo ketre nyima hna xome qa ngöne lo götrane hna hape “Deviens l’ami de Jéhovah.”

Majemine jë tro kowe lai sit jw.org me télécharger la itre video, me itre nyima, me itre xa ewekë ju kö ngöne la tablet. Tro ha hmaloi koi epuni troa xome la sit jw.org ngöne la hna cainöje trootro. Drei la ketre jiane huliwa ka lolo catr ka troa xatua së troa nyihluene la Joxu!—Ite Huliwa 20:19.