Aqane Troa Maca Ngöne La Hna Cainöj​—Kola Hnëkën La Iwai Ka Troa Xulu

ENYIPIEWEKËN:

Ceitune la nyipici memine la itre itine feja, laka, aja së troa fi itre ej matre troa cia. (1 Kor. 3:6) Ame la easa cainöj kowe la ketre atr ka dreng la maca, loi e tro sa amë pe la ketre hnying nyine troa sa ngöne la easa troa iwai hmaca. Kolo hi lai a aijijë së troa sisedrëne la porotrik, nge tro ha hmaloi koi së troa hnëkëne la iwai ka troa xulu. Ame hë la easa iwai hmaca, ijije tro sa qaja koi angeic ka hape, hetrenyi lo itre mekune ka troa sa lo hnying hna amë pe ngöne lo iwai hnapan.

AQANE TROA KUCA:

• Ame la easa hnëkë troa cainöje ngöne itre hnalapa trootro, loi e tro sa hnëkëne la ketre hnying nyine tro sa ce wang memine la atr e traqa ju angeic kapa la maca. Maine jë ketre mekune hne së hna xom qa hnine la ketre itus hne së hna tro fë, matre troa sa lai hnying. Maine pena, tro sa xom la ketre hnying laka, ame la itre mekune ka sa, tre itre ej e hnine la ketre itus hne së hna ini ngön. Kolo hi matre troa xome elanyi ngöne la easa troa iwai hmaca.

• Ame la easa nyipune la porotrike së memine la atr ka drei së, easa amë ju pe lo hnying hne së hna hnëkëne hë matre troa sa ngöne la kola troa iwai hmaca. Xome jë la itre xaa ithuemacany e ijij.

• Maine hne së hna isapui me angeic, loi e tro sa eatrën.—Mat. 5:37.