Hna Hnëkë Së Troa Cainöj

Tune la hnei Iehova hna kuca kowe la angetre Isaraela, Nyidrë a hnëkë së enehila troa kuca la aja i Nyidrë. Ngöne la fene hnengödrai asë, itre Bethela, me itre sirkoskripsio, me itre ekalesia, me itre gurup ne cainöj a ce huliwa göi troa tro fë la maca ka loi. Nge easa cainöj koi nöjei atr asë, memine fe la itre atr ka tha ithanatane kö la qene hlapa së.—Ama 14:6, 7.

Hnei eö kö hna mekun troa inine la ketre qene hlapa, matre xatuane la itre atr troa atre la nyipici? Maine tha ijiji eö kö troa inine la ketre qene hlapa, pane inine jë la aqane nyiqane cainöj jëne lo application hna hape, JW Language. Pane tupathe jë ngöne la hna cainöj, nge tro kö eö lai a öhn. Tro eö a madrine tune la itre pane keresiano. Tune la ka traqa koi angatr, tro la itre atr a madrine la kola drenge “la itre ewekë nyine haine i Akötresie” ngöne la sipu qene hlapa i angatr.—Hu 2:7-11.

GOEËNE JË LA VIDEO NYI SINEE I IEHOVA JË—TROA CAINÖJ NGÖNE LA KETRE QENE HLAPA, NGE SA JË CAHU ITRE HNYING:

• 

  Eue la tro eö a huliwane la application JW Language?

• 

  Qejepengöne jë la application cili.

• 

  Nemene la itre qene hlapa hna ithanatan ngöne la teritoare i eö?

• Nemene la nyine troa kuca e kola pi atre la nyipici hnene la ketre atr ka qaja la ketre qene hlapa?—od 94-95 par. 39-41