AQANE TROA THIPETRIJE LA IMETHINË

4 | Troa Thipetrije La Imethinë Jëne La Ixatua I Akötresie

Öni Tusi Hmitrötr:

“Ame la wene ne la ua, tre, ihnim, me madrin, me tingeting, me atreine itreqe, me loi hni, me lolo thiina, me lapaun, me menyik, me xomehnöth.”—GALATIA 5:22, 23.

Aliene La Xötr:

Ijije hi tro sa thipetrije la imethinë jëne la ixatua i Akötresie. Eje hi, uati hmitrötre i Akötresie a aijijë së troa hetrenyi la itre thiina ka lolo. Celë hi matre, tha tro kö sa mekun laka, ijije hi tro sa thipetrije la imethinë hnene la sipu trengecatre së. Loi e tro pe sa mejiune kowe la ixatua i Akötresie. E cili, tro hë sa qaja tui Paulo aposetolo ka hape: “Ngöne la nöjei ewekë asë, hetre trengecatreng qaathene la atre hamë men koi ni.” (Filipi 4:13) Nge tro fe sa hane qaja ka hape: “Iehova la ate xatua ni.”—Salamo 121:2.

Nyine Tro Sa Kuca:

“Hnei Iehova hna xatua ni matre tha tro hmaca kö ni a isi. Eni ha thele tingeting.”—WALDO

Loi e tro sa thith me sipo Iehova la uati hmitrötre i Nyidrë. (Luka 11:13) Loi e tro fe sa sipo Iehova matre xatua së troa eënyine la itre thiina i Nyidrë. Ketre, tro fe sa inine la Tusi Hmitrötr, matre atre la itre thiina ka isazikeu memine la imethinë, tune la ihnim, tingeting, atreine itreqe, me xomehnöth. Thupene lai, tro sa thele la aqane troa amamane la itre thiina cili ngöne la mele së, me ce tro memine la itre atr ka eënyine la itre thiina cili. Tro hë angatr a xatua së troa “aciane la ihnim me itre huliwa ka loi.”—Heberu 10:24.

Hna Melën Hnei—WALDO

Thipetrije La Isi Me Imethinë

Tha ka hmaloi kö la mele i Waldo lo angeic a co, matre hnei angeic hna nyiqane imethinë. Öni angeic: “Hnenge palahi hna isi memine la itre ka salemë dorog . . . Ame la ketre ijin, hnene la he ne la ketre gurup hna nyithupene la ketre trahmany matre troa humuthi ni. Hnei angeic hna thinyi ni hnei hele, ngo hnenge hna kötr.”

Hnene la föe i Waldo hna nyiqane ini Tusi Hmitrötr memine la itre Temoë Iehova, ngo tha madrine kö Waldo. Öni angeic: “Eni a methinëne la itre Temoë Iehova. Hnenge hna lapa qaqa angatr me ithanata akökötrenyi koi angatr. Ngo pëkö hnei angatr hna qaja.”

Ame e thupen, hnei Waldo hna nyiqane inine la Tusi Hmitrötr. Öni angeic: “Tha ka hmaloi kö troa trongëne la itre hnenge hna inin. Ame koi ni, thatreine kö ni troa xomehnöthe la elëhning.” Ngo hna xatua angeic hnene la ketre mekun qa hnine la Tusi Hmitrötr.

Öni Waldo: “Ame la ketre ijin, hnei Alejandro, lo ka iujine la ini tusing, hna upi ni troa e la Galatia 5:22, 23. . . . Öni Alejandro ka hape, thatreine kö ni troa eënyine la itre thiina ka lolo hnene la sipu trengecatreng, ngo jëne la ixatua ne la uati hmitrötre i Akötresie. E cili, kolo ha saze la aqane waiewekëng!”

Hnei Waldo hna mejiune kowe la ixatua i Akötresie, matre tha imethinë hë angeic. Öni Waldo: “Kola sesëkötre hnene la itre atrene la faming me itre sineeng ekö la aqane saze la meleng. Hnei Iehova hna xatua ni matre tha tro hmaca kö ni a isi. Eni ha thele tingeting.”