“Catre Jë Trongëne La Nyipici”

1. Nemene la eloine e tro sa ce thawa la aqane atre së “la nyipici”?

“HNEI epun hna atre tune kaa la nyipici?” Ma anyimua sa ha epun la hnyinge celë. Celë hi hne së hna hnyingëne kowe la ketre trejin ngöne la easa ajane troa atre angeic hnyawa. Pi tro catre së a dreng la itre trejin a qaja la aqane atre Iehova hnei angatr. Easë fe a ajane troa ce thawa me angatr la madrine së la easa atre la nyipici. (Rom. 1:11) Tro la itre porotrike cili a amamane koi së laka, ketre manathith ka tru la troa atre la nyipici. Ketre, easa isine troa “catre trongëne la nyipici,” ene la troa mele thenge la aja i Iehova me kepe manathith qa ngön.​—3 Ioane 4.

2. Nemene la hne së hna troa ce wang ngöne la tane mekune celë?

² Ame ngöne la tane mekune celë, tro sa ce wang la itre xaa kepine matre ka tru koi së la nyipici. Ketre, tro sa ce wang la aqane tro sa amamane laka, easa wangatrun la ahnahna cili. Tro la ini celë a acatrene la ole së kowe la hnei Iehova hna kuca, ene la troa e së kowe la nyipici. (Ioane 6:44) Nge, tro fe lai a thue aja së troa tro fë la nyipici koi itre xan.

KEPIN MATRE EASA WANGATRUN “LA NYIPICI”

3. Nemene la pane kepin matre easa wangatrun la nyipici?

³ Nyimu kepin matre easa wangatrun la nyipici. Ngo ame la pane kepin, ke hnene la ihnimi së koi Iehova, Atrekë Ewekëne la nyipici. Jëne la Tusi Hmitrötr, tha easë hmekuje kö a atre Nyidrë tune la Atre Xup la nöjei ewekë, ngo tune fe la Keme së ka ihnim. (1 Pet. 5:7) Ketre, Akötresie “ka utipin nge ka itrotrohni, nge ka hmitre troa elëhni, nge ka tru trenge ihnimi nyipici, me nyipici.” (Eso. 34:6) Aja i Iehova la meköt. (Is. 61:8) Akötre catre Nyidrë la Nyidrëti a goeë së a akötr, matre tro kö Nyidrëti a apatrene la itre akötre së ngöne la nyipi ijin. (Iere. 29:11) Hapeu, tha ketre mejiune kö la, ka amadrinë së? Celë hi ka acatren la ihnimi së koi Iehova!

4-5. Hnauëne la Paulo aposetolo a aceitunëne la mejiune së memine la iuhni?

⁴ Nemene la ketre kepin matre easa wangatrun la nyipici? Ame la ketre kepin, ke hetre eloine la troa atre la nyipici. Ame la nyipici qa hnine la Tusi Hmitrötr, ke kolo fe a qaja la mejiune së kowe la itre drai elany. Hnei Paulo aposetolo hna qaja la enyipiewekëne la mejiune cili. Öni angeic: “Nge the së la mejiune cili kösë iuhni kowe la mele së, iuhni ka tha uk nge ka catr.” (Heb. 6:19) Tune la ketre iuhni ka cilaxome la he, tro la mejiune së hna nyitrepene hnei Tusi Hmitrötr a xatua së troa cile catr ngöne la itre jol.

⁵ Ame e celë, Paulo a qaja la mejiun ne la itre keresiano hna iën ka troa mel e koho hnengödrai. Ngo thatraqane mina fe la itre keresiano ka mejiun troa mele palua ngöne la paradraiso e celë fen. (Ioane 3:16) Eje hi, ame la easa atre la mejiun kowe la mel ka pë pun, ke hetre aliene hë la mele së.

6-7. Nemene la eloin la hnei Yvonne hna atre la nyipici göne la itre drai elany?

⁶ Tro sa ce wang la hna melëne hnene la ketre trejin Yvonne. Tha hna hetru angeic kö ngöne la nyipici, nge ame lo angeic a co, ke xele angeic ma mec. Mekune palahi angeic la hnei angeic hna e ngöne la ketre itus ka hape: “Tro asë hi sa mec.” Öni angeic: “Thatreine hë ni meköl e jidr, ke eni palahi a mekune la itre ka troa traqa elany. Öning, ‘Hnauëne laka, eni pi hi la? Ma hetre nyipi aliene la mel.’ Xele ni ma mec!”

⁷ Ame hë lo angeic a tru, hnei angeic hna iöhny memine la itre Temoë Iehova. Öni angeic: “Hetre mejiuneng hë enehila, ene la troa mele palua ngöne la paradraiso.” Nemene la thangane la hnei Yvonne hna atre la nyipici? Öni angeic: “Meköle hnyawa ha ni e jidr, ke tha xounge hmaca kö troa mec, memine la itre drai elany.” Ka wangatrune catre Yvonne la nyipici, nge angeic a madrine troa ce thawa la mejiune i angeic me itre xan.​—1 Tim. 4:16.

8-9. (a) Ame ngöne la ceitune i Iesu, tune kaa la aqane goeën la atr la trengamo hnei angeic hna öhn? (b) Tune kaa la aqane goeëne epun la nyipici?

⁸ Ame la nyipici qa hnine la Tusi Hmitrötr, ke kolo fe a qaja la maca ka lolo ne la Baselaia i Akötresie. Hnei Iesu hna aceitunëne la nyipici göne la Baselaia memine la trengamo hna kelem. Ame ngöne Mataio 13:44, öni Iesu: “Ame la Baselaia ne hnengödrai, tre tune la trengamo hna kelem ngöne la ketre hlapa, nge hna öhn hnene la ketre atr, me juetrëne hmaca. Atraqatre la trenge madrine i angeic, ame hnei angeic hna salemën asë la itre ewekë i angeic, matre itöne la hlapa cili.” Ame ngöne la ceitune celë, tha hnene kö la atr hna thel la trengamo. Ngo ame la angeic a öhne ej, hnei angeic hna salemën asë la itre ewekë i angeic. Pine nemen? Atre hi angeic la enyipiewekëne la trengamo cili. Tru kö la hnei angeic hna kapa hune la hnei angeic hna nue pe.

⁹ Tha celë kö la aqane goeëne epun la nyipici? Ö, eje hi! Atre hi së laka, thatreine kö la fene celë troa hamë së la nyipi madrin. Ke ame la nyipi madrin, ke kola xulu qa ngöne la hne së nyihlue i Iehova, memine la mejiun troa kapa la mele ka pë pun elany, fen la Baselaia i Akötresie. Sisitria kö la imelekeu së me Iehova hune la nöjei ewekë hne së hna nu. Ame la aja së, ke troa “amadrinë nyidrë.”​—Kol. 1:10.

10-11. Nemene la ka uku Michael troa saze la mele i angeic?

¹⁰ Alanyimu the së la ka nue trengecatr matre amadrinë Iehova. Hnei itre xan hna nuetrij la itre huliwa i angatr hna nyithupene hnyawa. Ame pena la itre xan, tha angatr hmaca kö a thele troa trenamo. Nge itre xan a saze la aqane mele i angatr, la angatr a atre Iehova. Celë hi la hna melën hnei Michael. Tha hna hetru angeic kö ngöne la nyipici. Ame lo angeic a nekötrahmany, hna ini angeic troa kuci karaté. Öni angeic: “Eni a isine matre troa lolo la ngönetreing. Nge pëkö hneng hna xouen.” Ngo ame hë la angeic a nyiqane ini Tusi Hmitrötr, ke trotrohnine hë angeic la mekuna i Iehova göne la isi. (Sal. 11:5) Öni angeic göne la lue trefëne ka ini Tus me angeic, ka hape: “Tha hnei nyidroti kö hna qaja koi ni troa nuetrij la karaté, ngo hnei nyidroti pe hna catre ini ni la nyipici qa hnine la Tusi Hmitrötr.”

¹¹ Kola tru trootro la ihnimi Michael koi Iehova ngöne la angeic a catr inine la Tusi Hmitrötr. Hna ketri angeic hnene la aqane utipine Iehova la itre hlue i Nyidrë. Ame e thupen, trotrohnine hë Michael laka, loi e tro angeic a saze la aqane mele i angeic. Öni angeic, “Ame la ka jole catre koi ni, ke ene la troa nuetrij la karaté. Ngo atre hi ni ka hape , tro lai a amadrinë Iehova, nge ame koi ni, ka loi ju kö troa nyihlue i Iehova hune la troa kuci karaté.” Michael ha wangatrune la nyipici, nge celë hi ka uku angeic troa saze la mele i angeic.​—Iako. 1:25.

12-13. Tune kaa la aqane xatua Mayli hnene la nyipici qa hnine la Tusi Hmitrötr?

¹² Tusi Hmitrötr a qaja la enyipiewekëne la nyipici, ngöne la kola aceitunën ej memine la ketre laam ka mele ngöne la jidr. (Sal. 119:105; Efe. 5:8) Hnei Mayli qa Azerbaijan hna öhne la aqane saze la mele i angeic hnene la Tusi Hmitrötr. Ame la kem ke ka Musulman, nge ame la thin ke ka Juive. Öni angeic: “Atre hi ni laka, hetre Akötresie, ngo eni palahi a hnying ka hape, ‘Hnauëne la Akötresie a xupi së matre tro sa akötr, me dreuth amele së e thupen, e hnine la ifereno?’ Itre atr a qaja ka hape, ame la itre ewekë ka traqa ke zöi Akötresie, matre öning, ‘Akötresieti kö a hnöthe la mele së, me madrin la easa akötr?’ ”

¹³ Hnei Mayli palahi hna thel troa sa la itre hnyinge i angeic. Ame hë thupen hnei angeic hna ini Tus me xomi bapataiso. Öni angeic, “Hnene la Tusi Hmitrötr hna saze la aqane waiewekëng. Jëne la itre ini hnenge hna kapa, tingetinge hë ni enehila.” Tui Mayli, easa ce atrunyi Iehova, “la atre hë [së] qa ngöne la jidr, kowe la elolone la lai i nyidrë.”​—1 Pet. 2:9.

14. Tune kaa la aqane tro sa acatrene la ihnimi së kowe la nyipici? (Wange ju la hna eköhagen, hna hape “Itre Xaa Ceitun.”)

¹⁴ Tha angatre casi kö la ka öhne la enyipiewekëne la nyipici. Maine jë hetre atr hnei epuni hna atre ka hane melëne lai. Ame la epuni a ini Tusi cas, thele jë la itre xaa kepin, matre loi e tro epuni a wangatrune la nyipici. Maine tro sa wangatrune la nyipici, tro së lai a thele la itre aqane troa amaman la ihnimi së kowe ej.

AQANE TROA AMAMANE LAKA, EASA WANGATRUN LA NYIPICI

15. Tune kaa la aqane tro sa amaman laka, easa wangatrun la nyipici?

¹⁵ Easa amaman laka, easa wangatrun la nyipici ngöne la easa e lapane la Tusi Hmitrötr memine la itre itusi së. Ngacama ka hekö hë së ngöne la nyipici, ngo hetre nyine tro palakö sa inin. Hna qaja e hnine la pane Ita Ne Thup ekö ka hape: “Ame la nyipici, ke kösë neköi iengen hna juetrëne hnene la itre hnitr. Tro epuni a öhne la iengene cili, e tro epuni a ithele hnyawa. . . . E öhne hë epun, loi e tro epuni a thil matre jean ej. Tha tro kö epuni lai a jeane hi la ca iengen. . . . Ceitune hi lai memine la nyipici, loi e tro sa ithel matre tro sa öhne la itre xaa nyipici e hnine la Tusi Hmitrötr.” Tha ka hmaloi kö tro sa thel ajuine la Tusi Hmitrötr, ngo emele së hi lai.

16. Nemene la aqane ini Tusi epun? (Ite Edomë 2:4-6)

¹⁶ Ame itre xan, ke tha ka pi e tusi kö me ithel. Ngo Iehova a ajan tro palahi sa “thel” troa trotrohnine hnyawane la nyipici qa hnine la Tusi Hmitrötr. (E jë la Ite Edomë 2:4-6.) Maine tro sa catre ithel, tro hë së lai a kepe thangan qa ngön. Ame la Corey a e Tusi Hmitrötr, ke angeic a pane ithel ngöne hi la ca xötr. Öni angeic: “Eni a e la itre ithuemacany ka mama e kuhu fen, me xome la itre xötr ka mama ngöne la itre neköi mataitus me ithele ngöne la itre xaa itus. . . . Tru catre la thangane koi ni la aqane ini Tusi celë!” Nyipiewekë tro sa ini Tusi cas. Ame la easa xomi ijine troa ini Tusi cas, easë hi lai a amamane laka, easa wangatrun la nyipici.​—Sal. 1:1-3.

17. Kola hapeu la troa melëne la nyipici? (Iakobo 1:25)

¹⁷ Eje hi, tha tro hmekuje kö sa inine la itre nyipici qa hnine la Tusi Hmitrötr. Nyipiewekë tro fe sa melëne itre ej, ene la troa trongëne ngöne la mele së. Nge e cili hi la tro sa kapa la nyipi madrin. (E jë la Iakobo 1:25.) Easa atre tune kaa laka, easa melëne la nyipici? Önine la ketre trejin trahmany ka hape, loi e troa isawaipengö së, matre atre la nyine troa saze. Öni Paulo aposetolo mina fe ka hape: “Pine laka hne së asë hi hna kökötr ngöne la lapaun, loi e tro pala hi së a isa nyinyape hnyawa ngöne la iwaja ka cas.”​—Fil. 3:16.

18. Pine nemen matre tro sa “catre trongëne la nyipici”?

¹⁸ Pane mekune jë la itre manathith hne së hna troa kapa, e tro sa “catre trongëne la nyipici”! Tro hë së lai a hetre mele ka loi me amadrinë Iehova me itre trejin. (Ite edomë 27:11; 3 Ioane 4) Hapeu, hetre ketre kepine kö matre tro sa wangatrun me trongëne la nyipici?