“Itönejë La Nyipici, Nge The Itöne Tije Hmaca Kö”

1, 2. (a) Nemene la ewekë ka sisitria ngöne la mele së? (b) Nemene la itre trenge nyipici hne së hna wangatrun, nge pine nemen? (Wange ju la pane iatr.)

NEMENE la ewekë ka sisitria ngöne la mele së? Ame koi së itre ka nyihlue i Iehova, tre, ene la aqane imelekeu së me Nyidrë. Thatreine kö së troa itöne trij ej. Ketre, easa wangatrune la nyipici qa hnine la Tusi Hmitrötr, pine laka, celë hi ka aijijë së troa ce sinee me Iehova Akötresie.—Kolose 1:9, 10.

² Iehova la Atre Ini së, nge Nyidrëti a hamë së la itre ini ka jui qa hnine Wesi Ula i Nyidrë, ene la Tusi Hmitrötr. Nyidrëti fe a qaja koi së la enyipiewekëne la ëje i Nyidrë, me amamane koi së la itre thiina ka lolo i Nyidrë. Ketre, hnei Iehova hna amamane la etrune la ihnimi Nyidrë, ngöne lo kola meci hnene la Neköne hnimina i Nyidrë. Hnei Iehova fe hna hamëne la itre ithuemacany göne la Baselaia i Nyidrë. Hetrenyi la itre hna iëne hnei Iehova matre troa mel e koho hnengödrai. Nge ame la itre “xa mamoe,” tre, angatr a troa mel e celë fen ngöne la Paradraiso. (Ioane 10:16) Hnei Iehova hna qejepengöne la mele së elany. Celë hi matre, easa wangatrune la itre trenge nyipici celë, pine laka, kola acatrene la aqane imelekeu së me Nyidrë, Atre Xupi së. Itre eje fe a amamane koi së la sipu aliene la mel.

3. Hapeu, Iehova kö a upi së troa itöne la nyipici?

³ Ame Iehova, tre, Akötresieti ka hame Nyidrë. Hnei Nyidrëti hna huujëne la Nekö i Nyidrëti ka caasi thatraqai së. Ketre, Iehova a xatuane la itre atr ka thele la nyipici. Tha Nyidrëti kö a upi së troa itöne la nyipici. Ame la ketre ijin, hnei Simona hna li manie koi Peteru aposetolo, matre troa itöne la menene la uati hmitrötr. Ngo hnei Peteru hna haji Simona, me hape: “Hnëjinë hë la mani ’ö me eö, qa ngöne la hnei ’ö hna mekune troa itö maniëne la hnei Akötesieti hna hamëne gufan.” (Ite Huliwa 8:18-20) Haawe, nemene la aliene la hna hape, “itönejë la nyipici”?

ALIENE LA HNA HAPE, “ITÖNEJË LA NYIPICI”

4. Nemene la hne së hna troa inine göne la nyipici, ngöne la tane mekune celë?

⁴ E jë la Ite Edomë 23:23. Nyipiewekë troa nue trengecatr, matre troa atre la nyipici qa hnine la Tusi Hmitrötr. Hetre itre xaa ewekë nyine tro sa nuetrij göne la nyipici. Thupene la hna ‘itöne la nyipici,’ maine inine la nyipici, ke, tha tro pi kö sa “itöne tije” maine trotrije pena. Nemene la aqane tro sa ‘itöne’ la nyipici qa hnine Tusi Hmitrötr? Ka hetre thupene kö? Tro la aqane sa la itre hnyinge celë, a xatua së troa wangatrune la nyipici me xölehuje catrën ej. Tro hë sa öhne laka, ka sisitria catre kö la nyipici Iehova.

5, 6. (a) Nemene la aqane tro sa itöne la nyipici? Qejepengöne jë. (b) Nemene la eloine la nyipici?

⁵ Tha hnene kö laka, ka pë thupen la ewekë ke, ka gufa maine ka tha nyipiewekë. Ame la hnaewekë qene Heberu ‘itön’ ngöne Ite Edomë 23:23, tre, kolo fe a hape, “hna hetreny.” Kola amamane hnene la lue hnaewekë celë laka, kola nue la ketre ewekë maine trengecatre pena, matre troa hetreny me kapa la ketre ewekë ka sisitria. Hane hi la ketre ceitun ka troa xatua së troa trotrohnine la aqane troa itöne la nyipici. Pane mekune jë së laka, kola thuemacanyi së ka hape, ame ngöne la hna maketr, ke kola hamëne gufane la itre ijemune wahnawa. Hapeu, tro kö a traqa xan la itre ijehmune wahnawa ngöne la hnalapa së? Ohea, nyipiewekë tro sa tro troa xome ngöne la hna maketr. Ngacama pëkö thupen la itre wahnawa, ngo nyipiewekë tro sa nue trengecatr matre troa hetreny itre ej. Ka ceitune hi lai memine la nyipici. Tha easa kö a itön ej hnei manie, ngo nyipiewekë tro sa nue trengecatr matre tro sa hetrenyi la nyipici qaathei Iehova.

⁶ E jë la Isaia 55:1-3. Iehova a xatua së troa trotrohnine la aliene la hna hape, “itönejë la nyipici.” Nyidrëti a aceitunëne la Wesi Ula i Nyidrë memine la tim, melek, me waina. Kola aceitunëne la nyipici memine la timi ka lepany laka, kola aegöcatrene la atr ka pi ij. Ame la nekönatr, tre, nyën a tru hna iji melek. Ketre tune mina fe, hnene la nyipici matre kola acatrene la aqane imelekeu së me Iehova. Iehova mina fe a aceitunëne la itre trengewekë i Nyidrë memine la waina. Pine nemen? Tusi Hmitrötr a qaja, ka hape, ame la waina, tre, ka amadrinëne la hni ne la atr. (Salamo 104:15) Haawe, ame la Iehova a upi së troa ‘itöne la waina,’ tre, Nyidrëti a amamane laka, maine tro sa xötrethenge la itre hna amekötin, tro hë sa madrin. (Salamo 19:8) Jëne la itre ceitune celë, Iehova a amamane la eloine la troa inin me melëne la nyipici. Tro sa ce wang la faifi lao ewekë hne së hna nue matre troa itöne la nyipici.

ITRE EWEKË HNA NUE MATRE TROA ITÖNE LA NYIPICI

7, 8. (a) Pine nemene matre nyipiewekë troa xomi ijin troa atre la nyipici? (b) Nemene la hna kuca hnene la ketre hnainin, nge nemene la thangan?

⁷ Traem. Nyipiewekë troa xomi ijin, matre troa dreng la maca ne la Baselaia, me e Tusi Hmitrötr memine la itre itusi së. Tro fe sa xomi ijine matre troa ini Tusi Hmitrötr memine la Itretre Anyipici Iehova, me hnëkëne me sine la itre icasikeu. Itre ewekë lai ka troa xom la traeme së, matre easë pëhë a nue la itre xaa ewekë ka tha nyipiewekë kö. (E jë la Efeso 5:15, 16.) Ije hawa ne tro sa inine la nyipici qa hnine la Tusi Hmitrötr? Tha ceitun asë kö la itre atr. Thatreine kö tro sa atre asë la inamacane i Iehova, me aja i Nyidrë, memine la itre xaa huliwa i Nyidrë. (Roma 11:33) Ame ngöne lo pane Ita Ne Thup, hna aceitunëne la nyipici memine “la ketre neköi iengen.” Kola hape: “Ka tiqa hnei iengen, matre tha tro kö sa jeane hi la caas. Jean atrune jë.” Loi e tro sa isa hnying ka hape, ‘Nemene la hnenge hna inine göi Iehova?” Ngacama tro sa mel epine palua elany, ngo tro palakö sa inine troa atrepengöi Iehova hnyawa. Haawe, loi e tro sa xomi ijin enehila matre thele troa atre Nyidrëti hnyawa. Hanawang la ketre ceitun.

⁸ Hnei Mariko,a (wange ju la ithuemacany) ketre neköjajiny qa Zapo, hna tro Etazini matre troa ini e Neweyok. Ame la ketre drai, hna traqa hnene la ketre pionie troa cainöj koi angeic. Ka hmi hë Mariko, ngo hnei angeic hna nyiqane ini Tusi Hmitrötr memine lai trejin. Madrine catre angeic la itre ini hnei angeic hna kapa, matre hnei angeic hna sipone troa alua ini tus ngöne la wiik. Ngacama tru catre hnei jole i Mariko ngöne la hnaini me ngöne hna huliwa, ngo hnei angeic palahi hna sine la itre icasikeu. Hnei angeic hna xomi traem ngöne la itre ijine mano, matre troa inine la nyipici. Catrecatre hë la aqane imelekeu i Mariko me Iehova, matre tha caa macatre ju kö, nge angeice ha xomi bapataiso. Thupene la 6 lao treu, hnei angeice hna xom la huliwa ne pionie, qaane lo macatre 2006 utihë enehila.

9, 10. (a) Nemene la aqane tro la nyipici a saze la aqane waiewekë së göne la itre mo? (b) Nemene la hna nuetrij hnei Maria, nge nemene la mekuna i angeic göne lai?

⁹ Itre mo. Ame lo easa atre la nyipici, maine jë hne së hna nuetrij la ketre huliwa hna nyithupene hnyawa, maine ketre göhnë ka tru. Celë hi hna kuca hnei Peteru me Anederea. Lue ka nyi ie nyidroti ekö, ngo ame lo Iesu a hë nyidro troa xötrethenge nyidrë, hnei nyidroti hna nue la huliwa i nyidro. (Mataio 4:18-20) Tha kolo kö a qaja ka hape, ame la easa atre la nyipici ke, tro hë sa nuetrije la huliwa së. Nyipiewekë tro sa hetre huliwa matre troa thupëne la hnepe lapa së. (1 Timoteo 5:8) Ame la easa atre la nyipici, kola saze la aqane waiewekë së göne la itre mo. Öhne hë së la ka nyipiewekë ngöne la mele së. Öni Iesu: “The amë kö thatraqai nyipunie la tenga mo e celë fen.” Hnei nyidrëti hna ithuecatre koi së, ka hape: “Amëjë thatraqai nyipunie la tenga mo e koho hnengödrai.” (Mataio 6:19, 20) Celë hi hna kuca hnei Maria, ketre neköjajiny.

¹⁰ Qaane lo Maria a co, ka pi elo golf catre angeic. Ame ngöne lycée, pëkö ka atreine ngaa angeic. Ame hna hamëne koi angeic la ketre bourse göi université. Ame la aja i Maria, tre, troa elo golf me kapa la itre trengene manie ka tru. Ngo hnei angeice hna nyiqane ini Tusi Hmitrötr. Madrine catre Maria la itre ini, matre angeic a trongëne ngöne la mele i angeic. Öni angeic, “Ame la eni a saze la aqane ujëng me mele thenge la itre trepene meköti ne la Tusi Hmitrötr, atraqatre la madrineng.” Trotrohnine hë Maria laka, jole troa acatrene la aqane imelekeu i angeic me Iehova me elo golf. (Mataio 6:24) E cili, hnei angeic hna nue la elo golf. Ketre pionie hë Maria enehila, nge öni angeic, “lolo nge hetre aliene hë la meleng.”

11. Tune kaa la aqane imelekeu së memine la itre xaa sinee së, ngöne la easa atre la nyipici?

¹¹ Aqane imelekeu së me itre xan. Ame la easa trongëne la hna qaja ngöne la Tusi Hmitrötr, tre, kola saze la aqane imelekeu së me itre sinee së. Hnei Iesu hna thith thatraqane la itretre drei nyidrë, me hape: “Ahmitötë angate hnene la nyipici cilie; Wesi Ula i cilie la nyipici.” (Ioane 17:17) Ame la troa “ahmitötë,” tre, kola qaja la troa “iananyi.” Ame la easa trongëne la hna qaja ngöne la Tusi Hmitrötr me melëne la nyipici, easa iananyi memine la fen ke, isapengö së hë me itre xan. Ngacama easa ajane troa ce mele hnyawa memine la itre sinee së, ngo ame itre xan, tre, xele hë angatr ma wai së, nge angatr a icilekeu me easë. Tha tro kö sa sesëkötr. Öni Iesu: “Ame la nöjei ithupëjia memine la ate, te, it’ eje kö ngöne la hnalapa i angeice kö.” (Mataio 10:36) Ngo hnei Iesu hna thingehnaean ka hape, ngacama nyimutre la itre ewekë hne së hna nue pine la nyipici, ngo tru catre kö la itre manathith hne së hna troa kapa!—E jë la Mareko 10:28-30.

12. Nemene la hna nue hnene la ketre trejine qa Iuda göne la nyipici?

¹² Aaron la ketre atre Iuda ka mekune hë ekö laka, hmitrötre troa qaja la ëje i Akötresie. Ngo tru catre la aja i nyidrë troa atre la nyipici göi Akötresie. Ame la ketre drai, önine la ketre trejin ka hape, maine troa ami mataitus föe ngöne la ëje i Akötresie qene Heberu hna qaja e hnine la Tusi Hmitrötr, ijije hë troa qaja ka hape, “Iehova.” Atraqatr la madrine i Aaron, matre hnei nyidrëti hna tro kowe la sunago, matre troa thuemacane la itre hene ne hmi angetre Iuda! Maine ju, tro angatr a madrin ke, öhne hë nyidrëti la nyipici göne la ëje i Akötresie. Ngo hnei angatr hna hnyijuëne me helë nyidrë. Ketre tha madrine kö la hnepe lapa i Aaron. Ngo tha hnei nyidrëti kö hna nue la itre ewekë cili troa sewe nyidrë troa atre Iehova hnyawa. Hnei Aaron hna nue la mele i nyidrë troa nyihlue i Iehova. Eje hi, tro fe a saze la aqane imelekeu së me itre xan, hnene la nyipici.

13, 14. Nemene la itre nyine tro sa saze ngöne la easa atre la nyipici? Qaja jë la ketre ceitun.

¹³ Itre mekun me itre aqane ujë ka ngazo. Ame la easa atre la nyipici, easa trongëne la itre hna amekötin hnei Tusi Hmitrötr, nge loi e tro fe sa saze la aqane mekuna së me aqane ujë së. Öni Peteru aposetolo: “Loi e cei tui nyipunie memine la ite ka idei, nge the cei tune kö memine la aja ka hekö i nyipunie, lo jidi pete kö. Ngo tro nyipunie a hmitöte ngöne la nöjei thina i nyipunie asë.” (1 Peteru 1:14, 15) Ame e Korinito ekö, nyimutre la itre atr ka kuci ngazo. Nyipiewekë tro la itre atr e cili a saze matre troa wië xajawa i Iehova. (1 Korinito 6:9-11) Ame fe enehila, nyimutre la itre ka saze göne la nyipici. Celë hi hna qaja hnei Peteru ka hape: “Ea loiju hë la hna kuca la aja i angete etheni ngöne la ite ijine ka pat, lo hna trongëne la qene tratraij, me ite meciun, me iji waina atrun, me pelulu, me agö menu, me thithi kowe la ite idola ka sis.”—1 Peteru 4:3.

¹⁴ Itre macatre ne Devynn me Jasmine a iji menu la kahaitr. Ngacama ketre comptable ka lolo lae Devynn, ngo pëkö huliwa i angeic ke, tru palaha la hnei angeic hna iji kahaitr. Ka elëhni me iakötrë pala pe hi Jasmine. Ame la ketre drai ne Jasmine a iji kahaitr, hnei angeic hna ixelë memine la lue trejin mesinare. Hnei nyidroti hna sipone troa ini Tusi Hmitrötr me angeic. Ngo ame la nyidroti a traqa, ka mo hnyawa Jasmine me Devynn. Tha mekune kö nyidroti laka, troa traqa hnene la lue mesinare. Ame la kola bëeke hmaca hnene lo lue mesinare, saze hë Jasmine me Devynn. Aja i nyidroti troa atre la nyipici qa hnine la Tusi Hmitrötr, nge saqe hi nyidroti trongëne la hnei nyidroti hna inin. Thupene la köni treu, tha iji kahaitr hmaca kö nyidro, nge hnei nyidroti hna faipoipo. Nyimutre la itre atr ka öhn la aqane saze la mele i Jasmine me Devynn. Celë hi ka thue aja i angatr troa hane ini tus.

15. Nemene la ewekë ka jole troa nue thatraqane la nyipici, nge pine nemen?

¹⁵ Itre hna majemin hna xelen hnei Akötresie. Ame la ketre ewekë ka jole troa saze, tre, ene la troa nuetrij la itre hna majemin hna xelen hnei Akötresie. Ngacama atre hi itre xan la mekuna i Iehova, ngo ka jole koi angatr troa nuetrije la itre feete cili. Angatr a hnehengazone la aqane mekun ne la hnepe lapa i angatr, itre sine huliwa, maine itre sinee pena. Atre hi angatr laka, ka catr thene la itre atr la itre hna majemin, tune la troa atrune la itre ka mec. (Deuteronomi 14:1) Haawe, nemene la ka xatua së troa saze? Hetre ini hne së hna troa xom qa ngöne la tulu ne la itre ka saze aqane mel ekö la angatr a atre la nyipici, tune la itre pane keresiano ne Efeso.

16. Nemene la itre xaa ewekë hna xometrij hnene la angetre Efeso?

¹⁶ Ame e Efeso ekö, ka majemine la itre atr troa kuci iöni. Nemene la hna kuca hnene la itre atr ka kuci iöni, la angatr a atre la nyipici? Öni Tusi Hmitrötr: “Ala nyimu fe angete nyinyithina a icasikeune la ite tusi angat, me deuthe tije it’ eje qëmeke ne la nöjei ate asë; nge angat’ a e la thupen’ it’ ej, nge ate hë, te, luate nge luepi la o thausane la ite hnepe sileva.” (Ite Huliwa 19:19, 20) Tha hnei angatre kö hna cil troa xometrij la itre itusi angatr ne kuci haze, nge hnei Iehova hna amanathithi angatr.

17. (a) Nemene la itre xaa ewekë hne së hna troa nuetrij thatraqane la nyipici? (b) Nemene la lue hnying hne së hna troa ce wang ngöne la ketre tane mekun?

¹⁷ Nemene la itre ewekë hnei epuni hna nuetrij thatraqane la nyipici? Easa nue la traeme së. Ame itre xan e easë, tre, hnei angatr hna nue la ketre huliwa hna nyithupene hnyawa. Nge saze hë la aqane imelekeu së memine la itre xan. Nyimutre thei easë la itre ka saze aqane mekun me aqane ujë, me nuetrij la itre hna majemin hna xelen hnei Iehova. Ngo ame pe, xecie hnyawa koi së laka, ka sisitria catre kö la nyipici qa hnine la Tusi Hmitrötr, hune la nöjei ewekë hne së hna nu. Jëne la nyipici qa hnine la Tusi Hmitrötr, easa imelekeu hnyawa me Iehova, nge pëkö xaa ewekë ka sisitria. Maine tro sa mekune la nöjei manathith hne së hna kapa qa ngöne la easa atre la nyipici, jole koi së troa mekun ka hape, tro ketre atr a “salemën” ej. Pine nemene matre itre xan a “itöne tije” la nyipici? Nemene la ka troa xatua së, matre tha tro kö sa “itöne tije” la nyipici? Troa sa la lue hnyinge celë ngöne la ketre tane mekun.