“Tro Ni a Trongëne La Nyipici Cilie”

1-3. (a) Nemene la aqane tro sa goeëne la nyipici qa hnine la Tusi Hmitrötr? Qaja jë la ketre ceitun. (Wange ju la pane iatr.) (b) Nemene la hne së hna troa ce wang ngöne la tane mekune celë?

AME enehila, nyimutre la itre atr ka itö, nge thupene lai, angatr a bëeke fë hmaca la itre hnei angatre hna itön. Ketre tune fe la angatr a itö jëne ëternet. Maine jë, tha celë kö lo hnei angatre hna ajan, maine hetre engazone pena. Celë hi matre, angatr a thele troa saze la ewekë maine të hmaca la manie.

² Tha tro kö sa ujë tune lai ngöne la easa atre la nyipici qa hnine la Tusi Hmitrötr. E ase hë së ‘itöne’ la nyipici, tha ajane kö së troa ‘salemëne’ ej maine trotrije pena. (E jë la Ite Edomë 23:23; 1 Timoteo 2:4) Tune lo hne së hna ce ithanatane hë, tru la traeme hne së hna xom matre troa atre la nyipici. Hne së fe hna nue la ketre huliwa hna nyithupene hnyawa. Ketre, hne së hna saze la aqane imelekeu së me itre xan, me saze la aqane mekun me aqane ujë së, me nuetrije la itre hna majemine kuca hna xelen hnei Iehova. Ngo xecie hnyawa koi së laka, sisitria kö la itre manathith hne së hna kapa ngöne la easa inine la nyipici, hune la itre ewekë hne së hna nuetrij.

³ Hnei Iesu hna hamëne la ceitune ne la atre itö, kola thele la itre penina ka lolo. Ame la angeic a öhne la ketre penina ka tru alameken, angeic a salemën asë la itre hnei angeic hna hetreny, matre troa itöne la penina. Ceitune hi la penina cili memine la nyipici göne la Baselaia i Akötresie. Iesu a amamane la enyipiewekëne la nyipici kowe la angetre thel ej. (Mataio 13:45, 46) Ame lo easa xötrei atre la nyipici qa hnine la Tusi Hmitrötr, tune la nyipici göne la Baselaia i Akötresie, hne së fe hna nuetrij la itre xaa ewekë matre troa kapa la nyipici. Maine tro palahi sa wangatrune la nyipici, thatreine jë kö tro sa trotrije la nyipici. Ame pe, hetre itre xaa hlue i Akötresie ka wangacone la nyipici me trotrij. Tha aja së kö troa tui angatr! Loi e tro sa trongëne la eamo hna hamën hnei Tusi Hmitrötr ka hape, troa “trongëne la nyipici.” (E jë la 3 Ioane 2-4.) Kola qaja ka hape, tro sa amë panëne la nyipici, nge loi e troa mama ngöne la mele së. Ngo nemene la aqane tro la ketre atr a ‘salemën’ maine trotrije la nyipici, nge pine nemen? Nemene la ka troa xatua së matre tha tro kö sa hane trotrije la nyipici? Nge nemene la nyine tro sa kuca matre tro sa catre “trongëne la nyipici”?

KEPIN ME AQANE ‘SALEMËN’ LA NYIPICI

4. Pine nemene matre itre xan a trotrije la nyipici ngöne lo hneijine i Iesu?

⁴ Ame ngöne lo hneijine i Iesu, nyimutre thene lo itre ka kapa la nyipici ekö, ka trotrij ej e thupen. Drei la ketre ceitun. Thupene lo Iesu a kuca la ketre iamamanyikeu me ithuane la itre atr ka alanyim, hnei angatr hna xötrethenge nyidrë utihë la traqa kowe la hnagejë e Galilaia. Ngo hna asesëkötrë angatr hnene la hnei Iesu hna qaja e thupen. Öni nyidrë: “Maine tha xeni kö nyipunie la ngönetei ne la Nekö i ate, me iji la madra i angeic tha hetenyi kö la mele e kuhu ite hni nyipunie.” Tha hnei angatre kö hna sipo ixatua koi Iesu, matre trotrohnine la hnei nyidrëti hna qaja. Öni angatr: “Hace la tenge ewekë cili; nge dei la ate ateine troa deng?” Ame la pun, “ala nyimu la angete dei nyidëti a hmaca pe, tha ce tro hmaca kö me nyidë.”—Ioane 6:53-66.

5, 6. (a) Pine nemene matre itre xan a trotrije la nyipici enehila? (b) Nemene la aqane tro la ketre atr a iananyi memine la nyipici?

⁵ Ame fe enehila, hetre itre ka trotrije la nyipici. Pine nemen? Maine jë, hnene laka, tha trotrohnine kö angatr la ketre xötre ne la Tusi Hmitrötr, maine pena hetre hna qaja maine kuca hnene la ketre trejin. Ame itre xan, tha kapa kö angatr la eamo hna hamën hnene la ketre trejin. Maine pena hna iwesitrë memine la ketre trejin. Itre xan a drenge lo itre hna qaja hnene la itre ka iamenumenu, me itre ka silitrengathoi së. Celë hi itre xaa kepin matre itre xan a iananyi me Iehova memine la ekalesia. (Heberu 3:12-14) Ka lolo catr la tulu i Peteru; hnei angeic hna mejiune koi Iesu. Ame lo itre xan a trotrije Iesu pine la itre hnei nyidrëti hna qaja, hnei nyidrë hna hnyingëne kowe la itre aposetolo ka hape, tro fe kö angatr a tro. Öni Peteru: ‘Joxu, tro huni a tro koi drei? Thei cilieti la nöjei wesi ula ne mele ka tha ase palua kö.’—Ioane 6:67-69.

⁶ Ame itre xan, tha öhne kö angatr laka, angatr a iananyi trootro memine la nyipici. Ceitui angatre hi memine la he ka kötr qa ngöne la hna qale hnei he. Tusi Hmitrötr a hmekë së, “wanga uthi shë pi.” (Heberu 2:1) Eje hi laka, tha aja i angatre kö troa iananyi memine la nyipici. Ngo hnei angatre hna nue troa nanazij la lapaune i angatr, utihë la angatr a trotriji Iehova. Nemene la nyine troa kuca matre tha tro kö a hane traqa koi së la ewekë cili?

IXATUA MATRE THA TRO KÖ A SALEMËNE LA NYIPICI

7. Nemene la ka troa xatua së matre tha tro kö sa salemëne la nyipici?

⁷ Maine easa ajane tro palahi a tro ngöne la nyipici, nyipiewekë tro sa drengethenge me trongën asë la itre hna amekötin hnei Iehova. Loi e tro sa amë panëne la nyipici ngöne la mele së. Hnei Davita joxu hna thith me thingehnaean koi Iehova, ka hape: “Tro ni a trongëne la nyipici cili.” (Salamo 86:11) Davita a ajane tro palahi a tro ngöne la nyipici, ketre tu së fe hi. Maine tha celë kö aqane mekuna së, tro hë sa bëeke kowe lo itre ewekë hne së hna nuetrij ekö. Ketre, thatreine kö tro sa iëne la itre trepene meköti hne së hna troa trongën. Loi e tro sa trongëne “la ite nyipici asë.” (Ioane 16:13) Ame ngöne la tane mekun celë, tro sa ce wang la faifi lao ewekë hne së hna nue matre troa inine la nyipici. Tro fe sa ce wang la nyine tro sa kuca, matre tha tro hmaca kö sa bëek kowe la itre ewekë hne së hna nue.—Mataio 6:19.

8. Pine nemene matre loi e tro sa huliwane hnyawa la traeme së, matre tro palahi sa easenyi koi Iehova? Qaja jë la ketre ceitun.

⁸ Traem. Maine tro sa huliwane inamacanëne la traeme së, tha tro hë sa trotrije la nyipici. Maine tha hmeke kö së, tro hë sa aluzi traeme hnene la itre nyine iamadrinë, tune la itre elo ngöne ëternet, maine troa goeë televizio pena. Eje hi laka, tha ka ngazo kö la itre ewekë cili, ngo e tha hmeke kö së, tro hë itre ej a xome la traem hne së hna nue matre troa ini tusi me cainöje trootro. Celë hi ka traqa koi Emma.a (Wange ju la ithuemacany.) Qaane lo angeic a co, caasi hi la hnei angeic hna ajan, ene la troa ti hoos. Ngo hna nyiqane huliwa la mekuthetheu i angeic ke, tru catre palaha la traeme hna xom troa ti hoos. E cili, angeic a mekun troa saze. Hna xatua Emma hnei Cory Wells, ketre trejin ka ti hoos ekö ngöne la itre rodéo.b (Wange ju la ithuemacany.) Ame hë enehila, Emma a catre huliwa i Iehova, nge hetre ijine i angeice hë troa lapa memine la hnepe lapa i angeic me itre trejin. Catrecatre la aqane imelekeu i angeic me Akötresie. Ketre tru la madrine i angeic ke, hnei angeic hna huliwane inamacanëne la traem.

9. Pine nemene matre itre xan a amë panëne la itre mo?

⁹ Itre mo. Maine easa ajane tro palahi sa tro ngöne la nyipici, tha tro pi kö sa amë panëne la itre mo. Ame lo easa atre la nyipici, hne së hna inin laka, ka sisitria catre kö la troa huliwa i Iehova, hune la troa thele mo. Tru la madrine së troa nuetrije la itre ewekë cili thatraqane la nyipici. Ngo kola tro la itre drai, nge easa öhne la madrinene la itre ka itö ewekë. Maine jë, tro sa mekune laka, hetre ewekë ka pë the së. Tha mejihnine hë së la itre hna hetreny, ngo easë pena a wangatrune la itre mo hune la huliwa i Iehova. Ceitune hi memine lo ka traqa koi Dema. “Angeic’ a hnine la fen,” matre hnei angeic hna nue la hnëqa i angeic me Paulo aposetolo. (2 Timoteo 4:10) Maine jë, ka tru koi Dema la itre ewekë ne fen, nge co pë hë la huliwa i Akötresie. Celë hi matre, xele hë angeic ma ce huliwa me Paulo. Nemene la hna ini së? Maine jë, hne së fe hna hane aja mo ekö. Maine tha hmeke kö së, troa kökötre hmaca la aja cili e kuhu hni së, nge troa nanazij la ihnimi së kowe la nyipici.

10. Drei la itre atr ka troa ajojezi së?

¹⁰ Aqane imelekeu së me itre xan. Maine easa ajane tro palahi a tro ngöne la nyipici, tha tro kö sa nue la itre ka tha nyihlue i Iehova troa ajojezi së. Ame lo easa atre la nyipici, hna saze la aqane imelekeu së memine la itre sinee së me fami së ka tha hmi kö. Itre xan a metrötrëne la hmi së, ngo ame itre xan, angatr a icilekeu me easë. (1 Peteru 4:4) Eje hi laka, aja së troa lolo la aqane imelekeu së memine la itre fami së. Ngo thatreine kö tro sa wangesixane la itre hna amekötin hnei Iehova ke, easa ajane troa amadrinë angatr. Tune la hna qaja ngöne 1 Korinito 15:33, loi e tro sa ce sinee memine la itre ka hnimi Iehova.

11. Nemene la ka troa xatua së, matre tha tro kö sa kei kowe la ngazo?

¹¹ Itre mekun me aqane ujë ka ngazo. Maine easa ajane tro palahi a tro ngöne la nyipici, nyipiewekë tro sa wië xajawa i Iehova. (Isaia 35:8; e jë la 1 Peteru 1:14-16.) Ame lo easa atre la nyipici, hne së hna saze aqane mel, matre trongëne la hna qaja hnei Tusi Hmitrötr. Ame itre xan, tru catre la itre ewekë hnei angatre hna saze. Ngo nyipiewekë tro sa hmek, matre tha tro kö sa kei kowe la ngazo, me kuca la itre huliwa ka sis. Nemene la ka troa xatua së troa cile catr kowe la itre itupath, me thupë së qa ngöne la itre huliwa ka sis? Pane mekune jë së la itre hna hamën hnei Iehova, matre tro sa wië xajawa i Nyidrë. Hnei Iehova hna huujëne la mele i Iesu Keriso, Nekö Hnimina i Nyidrë! (1 Peteru 1:18, 19) Eje hi, maine tro sa lapa mekune la enyipiewekëne la meci Iesu, tro palahi sa wië xajawa i Iehova.

12, 13. (a) Pine nemene matre loi e tro sa ce mekun me Iehova göne la itre feet? (b) Nemene la hne së hna troa ce wang?

¹² Itre hna majemin me itre huliwa hna sisin hnei Akötresie. Maine jë, troa hë së troa sine la itre feet hnene la fami së, me sine huliwa së maine sine ini së pena. Nemene la ka troa xatua së matre tha tro kö sa hane sine la itre hna majemin me itre feet hna sisine hnei Iehova? Nyipiewekë tro sa atre la kepin, matre tha hna kapa kö hnei Iehova la itre feet cili. Loi e tro sa ithel e hnine la itre itusi së, matre troa atre la qaane la itre feet cili. Ame la easa lapa mekun la itre kepin hna qaja hnei Tusi Hmitrötr, easë hi lai a amamane laka, easa tro ngöne la gojeny “nyine amadi Joxu.” (Efeso 5:10) Maine tro sa mejiune koi Iehova me kowe la Wesi Ula i Nyidrë, tha tro hë sa xoue atr.—Ite Edomë 29:25.

¹³ Easa ajane tro palahi sa tro ngöne la nyipici utihë epine palua. Nemene la ka troa xatua së? Hanawang la köni ewekë nyine tro sa kuca.

CATRE JË TRO NGÖNE LA NYIPICI

14. (a) Nemene la aqane tro la ini tus a xatua së matre tha tro kö sa nuetrije la nyipici? (b) Pine nemene matre loi e tro sa itöne la inamacan me ini me trotrohnin?

¹⁴ Ame la hnapan, loi e tro sa xomi ijine matre troa catre inine me lapa mekune la hna qaja hnei Tusi Hmitrötr. Ame la easa ini tus, tre, kola acatrene la ihnimi së kowe la nyipici, nge e cili, tha tro kö sa nuetrij ej. Kola qaja ngöne Ite Edomë 23:23 ka hape, tro sa ‘itöne la nyipici,’ me itöne “la inamacan, me ini, me trotrohnin.” Tha kolo kö a qaja ka hape, tro hi sa atre la nyipici qa hnine la Tusi Hmitrötr. Loi e tro fe sa trongën ej ngöne la mele së. Ame la trotrohnin, tre, kola qaja la troa mekun la itre ewekë hne së hna atre hë memine la itre ewekë hne së hna inin. Ame la atr ka inamacan, tre, angeic a ujë thenge la itre hnei angeic hna atre. Ame itre xaa ijin, kola ameköti së hnene la nyipici, me amamane la itre nyine tro sa saze. Loi e tro sa kapa la hna amekötin hnene la nyipici ke, öni Tusi Hmitrötr, ka sisitria catre kö hune la sileva.—Ite Edomë 8:10.

15. Nemene la aqane thupë së hnene la nyipici, tune la beletr?

¹⁵ Ame la hnaaluen, tro sa catre trongëne la nyipici ngöne la mele së. Tusi Hmitrötr a aceitunëne la nyipici memine la beletre ne la sooc. (Efeso 6:14) Ame ekö, kola thupëne la mele ne la sooc hnene la beletre i angeic ngöne la hna isi. Ngo loi e troa hnöth catrëne la beletr, wanga luzi pi angeic. Nemene la aqane thupë së hnene la nyipici, tune la beletr? Loi e tro palahi sa trongëne la nyipici ngöne la mele së, matre thupë së qa ngöne la itre mekun ka ngazo, me xatua së troa axecië mekune hnyawa. Ame ngöne la kola traqa la ketre jol maine ketre itupath ka tru, tre, kola xatua së hnene la nyipici troa catre kuca la loi. Ame la sooc ka tro troa isi, tre, angeic palahi a othe hnyawa la beletre i angeic. Ketre tu së fe, loi e tro sa catre trongëne la nyipici qa hnine la Tusi Hmitrötr, ngöne la mele së. Ketre, ame la sooc, angeic a line la taua ngöne la beletr. Tro sa ce wang la aqane tro sa nyitipu angeic.

16. Nemene la aqane tro la huliwa ne cainöj a xatua së troa cile hut ngöne la nyipici?

¹⁶ Ame la hnaakönin, tro sa catre cainöjëne la nyipici qa hnine la Tusi Hmitrötr. Hna aceitunëne la Tusi Hmitrötr memine la taua. Ame la sooc, tre, angeic a hnöthe hnyawa la taua ngöne la gö i angeic. Ketre tune fe, loi e troa ej e kuhu hni së la Wesi Ula i Akötresie. (Efeso 6:17) Ijiji së asë hi troa atreine tro fë me “thawa hnyawa la wesi ula ka nyipici.” (2 Timoteo 2:15) Ame la easa xome la Tusi Hmitrötr matre troa inine la itre xan, tre, kola acatrene la ihnimi së kowe la nyipici. Nge e cili, kola acatrene la aja së troa cile hut ngöne la nyipici.

17. Pine nemene matre easa wangatrune la nyipici?

¹⁷ Ame la nyipici, tre, ketre ahnahna lai qaathei Iehova. Kola aijijë së troa easenyi kowe la Keme së e koho hnengödrai. Celë hi ewekë hne së hna wangatrune catrën. Nyimutre hë la itre ini hne së hna kapa qaathei Iehova, ngo hetre itre xan palakö! Hnei Nyidrëti hna thingehnaean ka hape, Nyidrëti a troa ini së utihë epine palua. Haawe, hniine jë la nyipici, tune la ketre penina ka tru alameken. Catre jë së ‘itöne la nyipici, nge the salemëne hmaca kö.’ E cili, tro hë sa tui Davita me qaja koi Iehova, ka hape: “Tro ni a trongëne la nyipici cilie.”—Salamo 86:11.