Aqane Sa Iehova La Itre Thithi Së

1-2. Nemene la hne së hna mekune e itre xaa ijin?

HNA hane kö traqa koi epun troa mekune ka hape, tha Iehova kö a sa la itre thithi epun? Maine eje hi, tha epuni casi kö. Alanyimu la itre trejin ka hane mekune tun ngöne la angatr a cile kowe la itre jol. Ame la easa akötr, tha öhne kö së la aqane sa Iehova la itre thithi së.

² Ame ngöne la tane mekune celë, tro sa ce wange la kepin matre Iehova palahi a sa la itre thithi ne la itre hlue i Nyidrë. (1 Ioane 5:15) Tro mina fe sa ce wange la kepin matre easa mekun ka hape, tha Iehova kö a sa la itre thithi së memine la itre aqane sa i Nyidrë.

IEHOVA A SA LA THITHI SË NGO THA THENGE KÖ LA MEKUNA SË

3. Pine nemene matre aja i Iehova tro sa thele ixatua thei Nyidrë?

³ Öni Tusi Hmitrötr, tru la ihnimi Iehova koi së nge Nyidrëti a wangatrunyi së. (Hag. 2:7; 1 Ioane 4:10) Celë hi matre Nyidrëti a upi së troa thele ixatua thei Nyidrë jëne la thith. (1 Pet. 5:6, 7) Aja i Nyidrë troa xatua së troa cile kowe la itre jol me easenyi koi Nyidrë.

4. Hne së hna atre tune kaa ka hape, Iehova a sa la itre thithi ne la itre hlue i Nyidrë? (Wange ju fe la iatr.)

⁴ Nyimutre la itre hna melëne e hnine la Tusi Hmitrötr ka amamane ka hape, Iehova a sa la itre thith ne la itre hlue i Nyidrë. Tui drei? Tui Dravita. Qaane ekö hetre ithupëjia palahi ka cile koi angeic. Nge hnei angeic palahi hna sipo ixatua koi Iehova jëne la thith. Ame la ketre ijin, hnei angeic hna treije koi Iehova me hape: “Iehova fe, [drenge] ju la thithing ; [drenge ju] la itre xëweng ; [sa jë] koi ni ngöne la nyipici cilie me thina ka meköti cilie.” (Sal. 143:1) Nge hnei Iehova hna sa la thithi Dravita me amele angeic qaathene la itre ithupëjia. (1 Sam. 19:10, 18-20; 2 Sam. 5:17-25) Celë hi matre öni Dravita: “Eashenyi Iehova koi angat’ asë angete hë nyidë.” Ijije hi tro fe sa hane mekune tui Dravita.​—Sal. 145:18.

5. Hapeu, hnei Iehova kö hna sa la itre thithi ne la itre hlue i Nyidrëti ekö thenge la mekuna i angatr? Qaja jë la ketre ceitun. (Wange ju fe la iatr.)

⁵ Ame itre xaa ijin, Iehova a sa la itre thithi së ngo tha thenge kö la hne së hna mekun. Celë hi la ka traqa koi Paulo aposetolo. Hnei angeic hna sipo Iehova troa xometrije la ketre ‘ka ithinyi ngöne la ngönetrei angeic.’ Akönia sipo iele Iehova jë kö hnei angeic. Hapeu, hnei Iehova kö hna sa la itre thithi angeic? Öö, ngo tha thenge kö la mekuna i Paulo. Tha hnei Iehova kö hna apatrene la jole ka ej thei angeic. Ngo hnei Nyidrëti pe hna hamë angeic la trengecatr matre tro palahi a nyihlue i Nyidrë.​—2 Kor. 12:7-10.

6. Pine nemen matre easa mekune ka hape, tha Iehova kö a sa la itre thithi së?

⁶ Maine jë, hnei Iehova hna sa la thithi së ngo tha thenge kö lo hne së hna mekun. Nge xecie koi së laka, atre kö Iehova la ka loi koi së. Goi atre fe Nyidrë “hamëne atrune hune la itre ewekë hne së hna sipon, maine mekun.” (Efe. 3:20) Celë hi matre, ame itre xaa ijin kola asesëkötrë së hnene la aqane sa Nyidrë la itre thithi së.

7. Pine nemen matre loi e tro sa saze la itre sipo së koi Iehova? Qaja jë la ketre ceitun.

⁷ Ame la easa trotrohnine la aja i Iehova, ke easa saze la itre sipo së. Tro sa ce wange la hna melëne hnei trejin Martin Poetzinger. Thupene la nyidrëti a faipoipo, hna akalabusi nyidrë ngöne la ketre camp de concentration nazi. Ame lo xötrei, nyidrëti palahi a sipo Iehova troa nue nyidrë qa ngöne la kalabus matre tro nyidrëti a thupëne la föi nyidrë me sisedrëne la huliwa ne cainöj. Ngo thupene la lue wiik, pëkö hnei Iehova hna kuca. Matre hnei nyidrëti pë hë hna thithi ka hape: “Iehova fe, amamai ni jë la hnei nyipëti hna ajan tro ni a kuca.” Thupene lai, hnei nyidrëti hna öhne la itre jol hna melëne hnene la itre xaa trejin e cili. Angatr a mekune la itre föe me itre nekö i angatr. Matre öni nyidrëti jë hi koi Iehova: “Iehova, oleti kowe la huliwa hnei nyipëti hna hamë ni. Xatua ni jë troa aegöcatrene la itre trejine e celë.” Nge celë hi hnei nyidrëti hna kuca ngöne la 9 lao macatre ne lapa nyidrëti ngöne la kalabus!

8. Nemene la nyine tro sa mekune hnyawa ngöne la easa thith?

⁸ Loi e tro sa mekune hnyawa laka, hetre aja i Iehova, nge tro kö Nyidrëti a eatrëne ej ngöne la ijine hnei Nyidrëti hna sa. Tro kö Nyidrëti a apatrene paluane la itre jole ka akötrë së enehila, tune la itre hulö, itre sine mec, memine la mec. Nge troa eatrëne lai jëne la Baselaia i Nyidrë. (Dan. 2:44; Hna ama. 21:3, 4) Ngo Nyidrëti a pane nue ijine koi Satana troa musinëne la fen.b (Ioane 12:31; Hna ama. 12:9) Maine tro Iehova a apatrene enehila la itre jole ne la fen, ke tro la itre atr a mekune ka hape, ka loi hi la musi Satana. Celë hi matre loi e tro sa treqene hnyawane la ijine tro Iehova eatrëne la hnei Nyidrëti hna thingehnaean. Ngo tha kolo kö lai a hape, Nyidrëti a nuaxöji së. Tro sa ce wange la itre xaa aqane xatua së hnei Nyidrë.

AQANE SA IEHOVA LA ITRE THITHI SË

9. Iehova a xatua së tune kaa la easa axecië mekun? Qaja jë la ketre ceitun.

⁹ Nyidrëti a hamë së la inamacan. Aja i Iehova troa hamë së la inamacan matre tro sa axecië mekune hnyawa. Nyipiewekë tro sa hetre inamacan la easa axeciëne la ketre mekune ka tru, tune la troa faipoipo maine tha faipoipo pena. (Iako. 1:5) Hane hi la hna melëne hnei Maria, ketre trejine föe ka tha faipoipo palakö.c Ka pionie angeic, nge ka madrine catre angeic ngöne la huliwa i Iehova. Ame ngöne la ijine cili, hnei angeic hna nyiqane iatre memine la ketre trejin trahmany. Öni angeic: “Kolo ha kökötre la ihnimi nyio. Ngo atre hi ni laka, loi e tro ni a axecië mekun. Matre hnenge hna pane fe la hninge koi Iehova. Eni a ajan tro Nyidrë a xatua ni, ngo eje hi laka, qanyinge kö axecië mekun.” Öhne hi Maria laka, hnei Iehova hna sa la itre thithi angeic me hamë angeic la inamacan. Hna tune kaa? Hnei Maria hna ithel ngöne la itre itusi së me öhne la itre tane mekune ka sa la itre hnyinge i angeic. Hnei angeic fe hna drenge la itre eamo hna hamëne hnene la thine i angeic ka mele nyipici koi Iehova. Celë hi ka xatua angeic troa waipengöne la ihnimi angeic kowe lai trejin. Jëne la itre ixatua cili, hnei angeic hna axecië mekune hnyawa.

10. Thenge la Filipi 4:13, Iehova a xatuane tune kaa la itre hlue i Nyidrë? Qaja jë la ketre ceitun. (Wange ju fe la iatr.)

¹⁰ Nyidrëti a hamë së la trengecatr. Tui Paulo aposetolo, Iehova a hamë së la trengecatr matre troa atreine xomihnine la itre jol. (E jë la Filipi 4:13.) Nge hna jelenyipicine lai hnei Benjamin, ketre trejine trahmany. Qea catr la hnei angeic me fami angeic hna lapa ngöne la itre camps de réfugiés e Afrique. Öni angeic: “Tha mano kö ni thithi koi Iehova. Hnenge hna sipo Nyidrë troa hamë ni la trengecatr matre tro palahi ni a kuca la loi. Hnei Iehova hna sa la itre thithing. Hnei Nyidrëti hna hamë ni la tingeting, me trengecatr troa cainöj. Hnei Nyidrëti fe hna hamë ni la itre itus ka acatrene la imelekeung me Nyidrë.” Öni angeic fe: “Ame la eni a e la itre hna melëne hnene la itre xaa trejin memine la aqane xatua angatr hnei Iehova, ke kola xatua ni troa mele nyipici koi Nyidrë.”

11-12. Iehova a xatua së tune kaa jëne la itre trejin? (Wange ju fe la iatr.)

¹¹ Nyidrëti a xatua së jëne la itre trejin. Ame lo jidr qëmeken tro Iesu a mec, hnei nyidrëti hna catre thith koi Iehova. Hnei nyidrëti hna treij koi Iehova, ke xele nyidrë tro la itre atr ka mekune ka hape, nyidrëti a jelengazo Iehova. Ame hnei Iehova hna xatua Iesu. Hnei Nyidrëti hna upe la ketre angela, ketre trejine me Iesu matre troa ithuecatre koi nyidrë. (Luka 22:42, 43) Ketre tun, tro Iehova a upe la itre trejine me easë troa hë maine wai së ngöne la easa kucakuca. Loi e tro asë hi sa thel la aqane troa “amadinën” la itre trejin jëne la itre “tenge ewekë ka loi.”​—Ite edomë 12:25.

¹² Tro sa ce wange la ka traqa koi Miriam, ketre trejine föe. Itre wiike hë ne meci la föi eahlo, nge hace catre eahlo ke, eahlo casi pe hi ngöne la hnalapa i eahlo. Eahlo pala pe hi a treij. Nge pëkö atr nyine tro eahlo a ithanata memin. Öni eahlo: “Goi pë fe trengecatreng troa hëne la ketre atr, matre hnenge hna thithi koi Iehova. Ame palakö la eni a treij me thith, ke hë jë hi la ketre qatre thup nge sineenge hi.” Hna akeukawanyi Miriam hnene lai qatr thup me föi nyidrë. Xecie koi eahlo laka, Iehova la ka upe lai qatre thup troa hë eahlo.

13. Qaja jë la ketre ceitun ka amamane ka hape, Iehova a xatua së jëne la itre atr ka thatre Nyidrë.

¹³ Nyidrëti a xatua së jëne la itre atr ka thatre Nyidrë. (Ite edomë 21:1) Ame itre xaa ijin, Iehova a sa la itre thithi së jëne la itre atr ka tha nyihlue i Nyidrëti kö. Tui Aretaseta joxu. Hnei Iehova hna uku nyidrë matre nue Nehemia troa bëek a tro Ierusalema, me xupe hmaca la traon. (Neh. 2:3-6) Ame enehila mina fe, Nyidrëti a ukune la itre atr ka tha nyihlue i Nyidrë troa xatua së.

14. Nemene la ka ketri epun ngöne la hna melëne hnei Soo Hing? (Wange ju fe la iatr.)

¹⁴ Xecie koi Soo Hing, ketre trejine föe ka hape, hnei Iehova hna sa la itre thithi eahlo jëne la ketre droketre. Hna tithe la neköi eahlo trahmany hnene la ketre mec hna hape, troubles mentaux. Nge, hna hnai angeic matre hnei eahlo me föi eahlo hna isa nue la huliwa i nyidro göne troa thupë angeic. Ame hna traqa koi angatr la itre jol göi mani. Nge thatre hë Soo Hing la nyine troa kuca. Matre hnei eahlo hna fe la hni eahlo koi Iehova me sipo ixatua koi Nyidrë. E cili, hnene la ketre droketre hna xatua angatr. Matre hnei angatr hna kapa la itre ixatua qaathei mus me öhnyi hnalapa ka co thupen. Öni Soo Hing: “Öhne catre hun la iwanakoime i Iehova ngöne la ijine cili. Nyidrëti hnyawa hi la ‘Atre drenge la thithi’ së.”​—Sal. 65:2.

TROA HETRE LAPAUNE MATRE ÖHNE ME KAPA LA AQANE SA IEHOVA

15. Nemene la hna kuca hnene la ketre trejine matre öhne la aqane sa Iehova la itre thithi eahlo?

¹⁵ Nyipici, tha Iehova kö a sa la itre thithi së jëne la itre iamamanyikeu. Ngo tro la aqane sa i Nyidrë, a xatua së troa mele nyipici koi Nyidrë. Celë hi matre loi e tro sa thele la aqane sa Iehova la itre thithi së. Ame koi Yoko, ketre trejine föe, tha Iehova kö a sa la itre thithi eahlo. Matre hnei eahlo hna nyiqane cinyanyin ngöne la ketre carnet la itre sipo i eahlo. Ame hë e thupen, hnei eahlo hna goeëne hmaca lai carnet me öhne ka hape, ase hë Iehova sa la itre thithi eahlo, uti fe hë lo itre thith hnei eahlo hna thëthëhmin. Haawe, loi e tro fe sa xomi ijin troa lapa mekune la aqane sa Iehova la itre thithi së.​—Sal. 66:19, 20.

16. Hnauëne laka, nyipiewekë troa hetre lapaune matre kapa la aqane sa Iehova la itre thithi së? (Heberu 11:6)

¹⁶ Nyipiewekë troa hetre lapaune matre troa thithi koi Iehova me kapa la aqane sa Nyidrë la itre thithi së. (E jë la Heberu 11:6.) Tro sa ce wange la hna melën hnei Mike me Chrissy, föi nyidrë. Aja i nyidro troa huliwa ngöne la Bethela. Öni Mike, “E nöjei macatre nyio a nyialiene la pepa ne sipo troa huliwa ngöne la Bethela, me catre thith göne lai. Ngo tha hna hane kö hë nyio troa huliwa ngöne la Bethela.” Xecie koi Mike me Chrissy laka, atre kö Iehova la ka loi koi nyidro. Hnei nyidroti hna kuca asë la hnei nyidroti hna atrein, ene la troa pionie ngöne la ketre götrane ka aja ixatua me hane xupi Uma Ne Baselaia. Ame enehila, nyidroti a thupë sirkoskripsio. Öni Mike, “Hnei Iehova hna sa la itre thithi nyio ngo tha thenge kö lo mekuna i nyio. Nge ame la aqane sa Nyidrë, ke ka tru catr hmaca kö hune lo hnei nyio hna sipon.”

17-18. Thenge la Salamo 86:6, 7, nemen la ka xecie koi së?

¹⁷ E jë la Salamo 86:6, 7. Xecie koi Dravita, atre cinyihane la Salamo celë ka hape, Iehova a drenge me sa la itre thithi angeic. Nge loi e tro fe sa tui Dravita. Ame ngöne la tane mekune celë, hne së hna ce wange la itre tulu ka amamane ka hape, Iehova a hamë së la inamacan me trengecatr matre xomihnine la itre jol. Nge Nyidrëti fe a xatua së jëne la itre trejin memine la itre atre ka tha nyihlue i Nyidrë.

¹⁸ Ngacama tha Iehova kö a sa la itre thithi së thenge la mekuna së, ngo xecie koi së laka, Nyidrëti a sa. Nge Nyidrëti a hamë së la ka nyipiewekë ngöne la nyipi ijin. Celë hi matre catre jë së thithi koi Iehova me mejiune laka, tro kö Nyidrëti a thupë së enehila, me kapa la aja ne la ‘nöjei ka mele’ ngöne la fen ka hnyipixe elany.​—Sal. 145:16.