TANE MEKUN 49

Hapeu, Tro Kö Iehova a Sa La Itre Thithing?

“Tro nyipunie a hë ni, me tro mate thithi koi ni, ame hnenge hna troa dei nyipunie.”—IERE. 29:12.

NYIMA 41 Epi Shamatine La Thithing

MEKUN KA TRUa

1-2. Hnauën laka, easa mekun e itre xaa ijin ka hape, tha Iehova kö a sa la itre thithi së?

“MADINEJË eö koi Iehova, nge tro nyidëti a hamë eö la ite hna sipone hnene la hni ’ö.” (Sal. 37:4) Ketre hna thingehnaeane lai ka mingöming! Ngo hapeu, Iehova kö a canga hamën la itre hne së hna sipon? Pine nemene matre ka nyipiewekë la hnyinge celë? Pane mekune jë la: Ketre trejin föe ka tha faipoipo a thith matre sine la Ini Koi Itre Ka Cainöj. Ngo kola tro la itre macatre, nge tha hë angeice kö troa sine la Ini cili. Ketre trejin nekötrahmanyi a sipo Iehova troa aloine la meci angeic, matre tro angeic a catre huliwa ngöne la ekalesia. Ngo tha loi kö la meci angeic. Ketre keme me thin a thith matre tro la nekö i nyidro a lapa ngöne la nyipici. Ngo nyën a trotriji Iehova.

² Ma hetre hnei epuni mina fe hna sipon koi Iehova, ngo tha kapa palakö epun. Matre öni epuni ka hape, “Iehova a kapa la thithi itre xan, ngo tha eni fe kö.” Maine epuni pena a mekun ka hape, hetre ewekë ka ngazo hnei epuni hna kuca. Celë hi hna mekun hnei Janiceb ketre trejin föe. Hnei angeic memine la föi angeic hna thith koi Iehova matre troa hane huliwa ngöne la Bethela. Öni angeic: “Xecie koi ni laka, easenyi hë troa hë nyio kowe la Bethela.” Ngo kola tro la itre drai me itre macatre, nge tha kapa palakö la sipo i nyio. Öni Janice: “Akötre catre ni. Ame koi ni, hetre ewekë ka ngazo hnenge hna kuca matre tha sa kö Iehova. Hnenge hna qaja hnyawan koi Nyidrë la ajang troa tro kowe la Bethela. Hnauën laka, tha sa kö Nyidrë?”

3. Nemene la hne së hna troa ce wang ngöne la tane mekune celë?

³ Ame itre xaa ijin, easa hnying ka hape, ‘Iehova kö a dreng la itre thithi së?’ Celë fe hi mekuna ne la itre xaa hlue i Iehova ekö. (Iobu 30:20; Sal. 22:2; Hab. 1:2) Nemene la ka troa amamane koi së laka, Iehova a sa la itre thithi së? (Sal. 65:2) Loi e tro sa ce ithanatane la köni hnyinge celë: (1) Nemene la hnei Iehova hna troa kuca koi së? (2) Nemene la hnei Iehova hna ajan tro sa kuca? (3) Hnauëne laka, loi e tro sa saze la itre xaa sipo së?

NEMENE LA HNEI IEHOVA HNA TROA KUCA KOI SË?

4. Thenge la Ieremia 29:12, nemene la hnei Iehova hna troa kuca?

⁴ Iehova a qaja ka hape, tro kö Nyidrëti a dreng la itre thithi së. (E jë la Ieremia 29:12.) Pine laka, tru la ihnimi Iehova kowe la itre hlue i Nyidrë ka mele nyipici, matre tha tro kö Nyidrëti lai a drei simine la itre thithi angatr. (Sal. 10:17; 37:28) Ngo tha kolo kö lai a qaja ka hape, tro Nyidrëti a kapa asë la nöjei sipo së. Ame la itre xaa sipo së, ke tro kö së lai a kapa elany, ngöne la fen ka hnyipixe.

5. Nemene la hnei Iehova hna pane mekun qëmeken troa sa la itre thithi së? Qejepengöne jë.

⁵ Iehova a pane mekun la aja i Nyidrë qëmeken troa sa la itre thithi së. (Is. 55:8, 9) Ame la aja i Nyidrë, ke tro la itre atr ka madrin me cas a mel ngöne la ihnadro, fene la musi Nyidrë. Ngo hnei Satana hna qaja ka hape, loi e tro la atr a ketre sipu mus koi angeice kö. (Gen. 3:1-5) Haawe, Iehova a nue la itre atr troa mus, matre amamane ka hape, ka thoi lae Satana. Tru la itre jol enehila ka xulu qa ngöne la musi atr. (Ate cai. 8:9) Easa trotrohnine laka, tha tro kö Iehova a apatrene la itre jol cili, qëmekene la drai hnei Nyidrëti hna sa. Wanga tro itre xan a mekun ka hape, hetre eloine la musi atr, nge ijiji eje hi troa nyinyine la nöjei jol.

6. Pine nemene matre loi e troa xecie koi së laka, ka meköt me ka ihnim la aqane ujë i Iehova?

⁶ Tha ceitu kö la aqane sa Iehova la itre thith. Ame lo kola tru la meci Hezekia joxu, hnei angeic hna sipo iele Iehova troa aloine la meci angeic. Hnei Iehova hna sa la thithi angeic me aloine la meci angeic. (2 Ite jo. 20:1-6) Ngo ame la Paulo aposetolo a sipo iele Iehova troa xometrij qaathei angeic la ‘ka ithinyi ngöne la ngönetrei [angeic],’ ma ketre sine mec, ke tha hna aloinyi angeice kö hnei Nyidrë. (2 Kor. 12:7-9) Tro fe sa qeje Iakobo me Peteru. Herodra joxu a thel troa humuthi nyidroti asë. Hnene la ekalesia hna thithi sai Peteru, me Iakobo mina fe. Ngo Iakobo hmekuje hi la hna humuth, nge ame pë hë Peteru, ke hna amele angeic hnene la ketre angela. (Itre hu. 12:1-11) Maine jë, easa isa hnying ka hape, ‘Hnauëne la Iehova a amele Peteru, me nue Iakobo troa mec?’ Pëkö hna qaja hnei Tusi Hmitrötr.c Ngo ka xecie koi së laka, ka “meköti” palahi la itre jë i Iehova. (Deu. 32:4) Nge atre hi easë ka hape, tru la ihnimi Iehova koi Peteru me Iakobo. (Hna ama. 21:14) Ame itre xaa ijin, tha Iehova kö a sa la itre thithi së thenge la aja së. Ngo pine laka, xecie koi së laka, ka meköt me ka ihnim la aqane ujë i Nyidrë koi së, matre tha easë kö a thele kepin la aqane axecië mekune i Nyidrë.—Iobu 33:13.

7. Nemene la nyine tha tro kö sa kuca, nge pine nemen?

⁷ Tha tro kö sa aceitunëne la hne së hna melën memine la hna melën hnene la itre xaa trejin. Pane mekune jë la: hne së hna sipo Iehova troa xatua së göne la ketre jol, ngo tha sa kö Nyidrë. E thupen, easa dreng ka hape, hnene la ketre trejin hna hane sipon lai ewekë cili, nge hnei Iehova hna sa la sipo i angeic. Celë hi hna melën hnei Anna, ketre trejin föe. Hnei angeic hna thith matre troa aloine la cancer i Matthew, föi angeic. Nge ame ngöne la ijine cili, hna hane tithi fe la lue trejin qatre föe hnene la cancer. Matre hnei Anna hna catre thithi sai Matthew memine la lue trejin föe. Hna egöcatre hmaca hnene la lue trejin föe, ngo meci pë hë Matthew. Ame lo xötrei, Anna a hnying ka hape, ‘Maine Iehova la ka aloine la lue trejin föe, nga hnauën laka, tha hnei Nyidrëti kö hna aloine la meci ne la föeng?’ Thatre kö së la kepin matre egöcatre hmaca lo lue trejin föe. Ngo ame la ka xecie koi së, ke easenyi hë tro Iehova a apatrene la nöjei akötr, me amelene la itre sinee i Nyidrë ka mec.—Iobu 14:15.

8. (a) Thenge la tusi Isaia 43:2, Iehova a xatua së tune kaa? (b) Tro la thith a xatua së tune kaa ngöne la itupath? (Wange ju la video La prière peut nous aider à endurer une épreuve.)

⁸ Tro palahi Iehova a xatua së. Pine laka, Keme ka ihnim Iehova, xele Nyidrë tro sa akötr. (Is. 63:9) Ngo tha kolo kö lai a hape, tro palahi Nyidrëti a amele së qa ngöne la itre itupath ka traqa koi së, ka ceitu me hneopegejë me eë. (E jë la Isaia 43:2.) Ame pe, öni Nyidrë, tro kö Nyidrëti a ‘eatrongë’ së. Nge tha tro kö Nyidrëti a nue la itre itupath cili troa angazone la aqane imelekeu së me Nyidrë. Ketre, Iehova a hamë së la uati hmitrötr matre tro sa atreine cile catr qëmekene la itre itupath. (Luka 11:13; Fil. 4:13) Haawe, xecie koi së laka, tro palahi Nyidrëti a xatua së troa cile catr, me mele nyipici koi Nyidrë.d

NEMENE LA HNEI IEHOVA HNA AJAN TRO SA KUCA?

9. Thenge la Iakobo 1:6, 7, pine nemene matre xecie koi së laka, tro kö Iehova a xatua së?

⁹ Iehova a ajan tro sa mejiune koi Nyidrë. (Heb. 11:6) Ame itre xaa ijin, easa mekun ka hape, thatreine kö së cil kowe la ketre itupath. Tro hë së lai a luelue laka, tha tro kö Iehova a xatua së. Ngo Tusi Hmitrötr a ithuecatre koi së laka, jëne la trengecatre i Nyidrë, tro sa “sheshë shashaithe la hna xupi hage.” (Sal. 18:29) Haawe, the luelue kö, ngo thithi jë pe, ke tro kö Iehova a sa la itre thithi së.—E jë la Iakobo 1:6, 7.

10. Qejepengöne jë jëne la ketre ceitun la aqane tro sa huliwa thenge la itre thithi së.

¹⁰ Aja i Iehova tro sa huliwa thenge la itre thithi së. Tro sa xome la ketre ceitun: Ketre trejin a sipo Iehova troa xatua angeic troa sipo drai ne mano, matre sine la asabele katru. Tro Iehova a sa tune kaa la thithi angeic? Tro Iehova a hamë trengecatre i angeic matre troa ithanata kowe la maseta i angeic. Ngo loi e tro la trejin a huliwa thenge la itre thithi angeic, me wai maseta. Maine jë, tro angeic a anyimua sipo kowe la maseta. Tro angeic a sipo troa saze la drai ne huliwa i angeic memine la ketre sine huliwa. Maine pena, tro angeic a xomi drai ne mano, nge tha hna nyithupene kö.

11. Hnauëne laka, loi e tro sa qaja lapane koi Iehova la ka ej e kuhu hni së?

¹¹ Aja i Iehova tro sa qaja lapane koi Nyidrë la ka ej e kuhu hni së. (1 Thes. 5:17) Öni Iesu, tha tro kö a canga kapa la itre xaa aja së. (Luka 11:9) Haawe, the cile kö! Catre jë thithi lapa qa kuhu hni. (Luka 18:1-7) Ame la easa qaja lapane koi Iehova la hne së hna ajan, ke easë hi lai a amamane koi Nyidrë ka hape, ka nyipiewekë catre lai koi së. Easë mina fe a amamane ka hape, easa lapaune koi Nyidrë.

HNAUËNE LAKA, LOI E TRO SA SAZE LA ITRE XAA SIPO SË?

12. (a) Nemene la pane hnying nyine tro sa isa hnyingën göne la itre sipo së, nge pine nemen? (b) Nemene la aqane tro ni a metrötrë Iehova la eni a thith koi Nyidrë? (Wange ju la hna eköhagen “Eni Kö a Metrötrë Iehova La Eni a Thithi Koi Nyidrë?”)

¹² Maine tha hamëne kö Iehova la hne së hna sipon, loi e tro sa isa hnyingëne la köni hnying. Ame la pane hnying ke, ‘Ka nyipiewekë kö la hnenge hna sipon?’ Ame itre xaa ijin, easa mekun ka hape, atre kö së la ka loi koi së. Ngo ame la hne së hna sipon, ke tha ka loi kö koi së elany. Maine jë hetre aqane nyinyine kö la jole cili, nge ka loi ju kö hune lo hne së hna qaja ngöne la thithi së. Nge ame la itre xaa ewekë hne së hna sipon, ke tha ka ihmeku kö memine la aja i Nyidrë. (1 Ioane 5:14) Ka tune lo keme me thin e kula, ka sipone koi Iehova matre tro kö la nekö i nyidro a lapa ngöne la nyipici. Kösë mekun ka loi la hnei nyidroti hna sipon. Ngo ame pe, tha Iehova kö a musinë së troa nyihlue i Nyidrë. Aja i Nyidrë tro së isa ala cas, me itre nekö së fe, a sipu iëne troa nyihlue i Nyidrë. (Deu. 10:12, 13; 30:19, 20) Haawe, loi pe tro la itre keme thine a sipo Iehova troa xatua angatr troa ketr la hni ne la itre nekö i angatr, matre tro nyudren a hnimi Nyidrë me nyisinee i Nyidrë.—Ite edomë 22:6; Efe. 6:4.

Eni Kö a Metrötrë Iehova La Eni a Thithi Koi Nyidrë?

Iehova la Keme së, Nyidrëti a hnimi së nge aja i Nyidrë troa sa la itre thithi së. Nyidrëti fe la Atre Xupi së, matre meköt tro sa metrötrë Nyidrë. (Hna ama. 4:11) Tune kaa la aqane tro epuni a metrötrë Nyidrë, la epuni a sipone la ketre ewekë koi Nyidrë?

Loi e tro sa sipone la itre ewekë thenge la aja i Akötresie, me kuca cememine la hni ka loi. (1 Ioane 5:14) Tha tro kö sa thith thatraqai së hmekuje hi, me mekune hi la itre sipu aja së. Hnei Iakobo hna hmekëne la itre keresiano ne la hneijine i angeic laka, tha tro kö Iehova a sa la itre sipo i angatr, e tro angatr a thithi fë la “aja ka ngazo,” kola qaja la itre mekun ka pi tru.—Iako. 4:3.
Tha tro kö së a sasaithi tulu la easa thith. (Mat. 4:7) Loi e xecie koi së laka, atre kö Iehova la aqane tro Nyidrëti a sa la itre thithi së. Nge, ame itre xaa ijin, ke ketrepengöne kö la aqane sa i Nyidrë memine la aja së.—Efe. 3:20.
Loi e tro palahi sa olene kowe la itre ewekë hnei Nyidrëti hna hamë së e nöjei drai. Pane mekune jë së la madrine ka eje thei Nyidrë, la easa qaja la ole së koi Nyidrë.—Kol. 3:15; 1 Thes. 5:17, 18.

13. Thenge la Heberu 4:16, eu la ijine tro Iehova a xatua së? Qejepengöne jë.

¹³ Ame la hnaaluene hnying ke, ‘Ijine hë tro Iehova a sa la thithing?’ Aja i easë tro Iehova a canga sa la thithi së. Ngo atre kö Nyidrë la ijine troa xatua së. (E jë la Heberu 4:16.) Maine tha canga sa kö Iehova la thithi së, tro së a mekun e cili ka hape, ‘Tha aja i Nyidrëti kö.’ Ngo maine jë, troa eatre pë hë e thupen. Pane mekune jë lo trejin trahmany ka thith e kula, matre troa aloine la meci angeic. Maine kuca ju Iehova la ketre iamamanyikeu, tro Satana lai a qaja ka hape, angeic a nyihlue i Iehova, ke hnei Nyidrë hna aloinyi angeic. (Iobu 1:9-11; 2:4) Ketre, ase hë Iehova sa la ijin tro Nyidrëti a apatrene la nöjei mec. (Is. 33:24; Hna ama. 21:3, 4) Matre, the mekune pi kö së laka, tro Iehova a kuca la ketre iamamanyikeu koi së. Loi pe tro lai trejin a sipo Iehova troa hamëne la trengecatr me tingeting matre xomihnine la meci angeic, me catre nyihlue i Nyidrë.—Sal. 29:11.

14. Nemene la ini hne së hna xome qa ngöne la hna melëne hnei Janice?

¹⁴ Tro hmaca sa qeje Janice, lo trejin ka thith troa lö kowe la Bethela. Thupene la faif lao macatre, angeic petre hi a trotrohnine la aqane sa Iehova lo itre thithi angeic. Öni angeic: “Hnei Iehova hna nue la itre ijine cili troa ini ni me xatua ni troa ketre keresiano ka lolo. Tro fe eni a inine troa catre mejiun koi Nyidrë me catre ini Tusi cas. Ketre, hnenge hna inine tro palahi a madrin ngöne la nöjei götrane hnenge hna nyihlue Iehova.” Ame e thupen, hna hë Janice me föe i angeic troa huliwa ngöne la sirkoskripsio. Öni Janice: “Ngacama tha hnei Iehova kö hna sa lo itre thithing thenge la ajang, ngo hnei Nyidrëti kö hna sa. Eni pë hë a öhne e thupene laka, ketre ahnahna ka lolo la aqane sa i Iehova. Eni a olene kowe la aqane hnimi ni hnei Nyidrë.”

Iatr: 1. Lue trejine föe a isa nyialiene la pepa ne sipo kowe la Ini Koi Itre Ka Cainöj. Nyidro a isa thith qëmekene troa iupifë la sipo i nyidro. 2. Madrine catr la ketre trejin föe troa amamane kowe la itre trejin ne la ekalesia memine lo ketre trejin ka nyialiene fe la pepa ne sipo, la itus ka hë angeic kowe la Ini Koi Itre Ka Cainöj. 3. Hnene la trejin föe hna tha hën kowe la ini a thithi koi Iehova, me cinyanyi tus. E thupen, angeic a cainöj ngöne la ketre götran gaa aja ixatua, me huliwa ngöne la hnë xupi uma. — Maine epuni a mekun ka hape, tha sa kö Iehova la thithi epun, ke sipo Nyidrëti jë la ketre ewekë (Wange ju la paragarafe 15)f

15. Pine nemen matre tha tro kö sa cile e itre xaa ijine troa sipo Iehova la itre xaa ewekë? (Wange ju fe la iatr.)

¹⁵ Ame la hnaakönine hnying ke, ‘Tro kö ni a sipo itre xaa ewekë koi Iehova?’ Loi e tro sa qaja hnyawane koi Iehova la itre aja së. Ame itre xaa ijin, tha tro kö sa cile troa sipo Iehova la itre xaa ewekë, matre öhne la aja Nyidrëti koi së. Mekune hmaca jë së lo trejine föe ka tha faipoipo kö, ka thith matre hane sine la Ini Koi Itre Ka Cainöj. Aja i angeic troa cainöj ngöne la itre götrane ka aja ixatua. Ngacama angeic palahi a thith matre sine la Ini cili, ngo loi fe tro angeic a sipo Iehova la itre xaa aqane troa akökötrene la huliwa ne cainöje i angeic. (Itre hu. 16:9, 10) E thupen, loi e tro angeic a thele troa eatrëne la itre thithi angeic me hnyingëne kowe la atre thupëne la sirkoskripsio, la ketre ekalesia ne la nöj ka aja pionie. Maine pena, troa cinyany kowe la Bethela ne la nöjei angeic, maine ketre Bethela matre atre la itre götrane ka aja ixatua.e

16. Nemene la ka xecie koi së?

¹⁶ Tune la hne së hna ce wang, xecie koi së laka, tro kö Iehova a sa la itre thithi së thenge la meköt me ihnim. (Sal. 4:3; Is. 30:18) Ame itre xaa ijin, tha sa kö Nyidrë la itre thithi së thenge la aja së. Ngo tha tro pi kö Nyidrëti a drei simine la itre sipo së. Tru catre la ihnimi Nyidrëti koi së, nge tha tro jë kö Nyidrëti a nuetriji së. (Sal. 9:10) Haawe, catre jë së ‘lapaune o drai koi nyidrë’ me fe la hni së koi Nyidrë.—Sal. 62:8.

NYIMA 43 Thithi Ne Ole

a Ame ngöne la tane mekune celë, tro sa ce wang laka, Iehova palahi a dreng la itre thithi së, nge ka meköt me ihnim la aqane sa i Nyidrë.

b Hna saze la itre ëj.

c Wange ju la tane mekun “Easë Kö a Mejiune Kowe La Itre Jë i Iehova?” ngöne la Ita Ne Thup ne Febuare 2022, par. 3-6.

d Maine epun i ajan la itre xaa ithuemacany göne la aqane xatua së hnei Iehova troa cil kowe la itre itupath, wange ju la video La prière peut nous aider à endurer une épreuve ngöne jw.org.

e Tro epuni a öhne la itre hna amekötine göne la nyine troa kuca matre cainöj ngöne la itre götrane ka aja ixatua, ngöne la itus Organizasio Ka Kuca La Aja i Iehova, mek. 10 par. 6-9.

f ITRE FOTO: Lue trejin föe a thith qëmeken troa nyialiene la pepa ne sipo troa hane sine la Ini Koi Itre Ka Cainöj. Ame e thupen, kola hëne la ketre e nyidro troa hane sine la ini cili, ngo tha ketre fe kö. Tha hleuhleu kö la trejine föe ka tha hane sine la ini, ngo angeice pe a sipo Iehova la itre xaa aqane troa akökötrene la huliwa ne cainöje i angeic. Thupen, angeic a cinyanyi tus kowe la Bethela, matre cainöj ngöne la itre götran ka aja ixatua.