Acatrene Jë La “Eë Qaathei Ia”

1. Tune kaa la aqane qejepengöne Tusi Hmitrötr la nyipi ihnim?

“AME la eë [ne la ihnim] tre, eë ka idreuth, eë qaathei Ia. Thatreine kö la timi atraqatre troa apine la ihnim, nge thatreine kö la hneopegejë troa huli ej.” b (NY. I. S. 8:6, 7, NWT) Ka mingöminge catr la aqane qejepengöne la nyipi ihnim e celë! Tro la xötre celë a akeukawane la lue trefën, laka ijije hi troa cile hut la ihnimi nyidro.

2. Nemene la nyine troa kuca hnene lue trefën matre tha tro kö a nanazije la ihnimi nyidro?

² Nyipiewekë tro la lue trefën a isa nue trengecatr matre tro la ihnimi nyidro a cile hut. Tro sa xome la ceitun ne la eë. Tro eje lai a mel, e hne së hna nyieen me ipicon. Ngo e tha ipicone hë së, ke tro eje lai a pi. Ketre tune la ihnim ka ej thene la lue trefën, ijije hi tro ej a cile hut utihë epin. Ngo nyipiewekë tro palahi nyidroti a acatrene ej. Ame itre xaa ijin, kola mekune hnene la lue trefën ka hape, nanazije hë la ihnimi nyidro. Celë hi ka traqa ngöne la nyidroti a cile kowe la itre jol göi mani, maine wezipo, maine ngöne la nyidroti a hetrune la itre nekönatr. Haawe, tro epun me föi epun a acatrene tune kaa la “eë qaathei Ia”? Ame ngöne la tane mekune celë, tro sa ce wange la 3 aqane tro sa acatrene la imelekeu së memine la föi easë, me aqane tro sa ce madrine me angeic.c

ACATRENE JË LA IMELEKEU I EPUN ME IEHOVA

3. Hnauëne laka, loi e tro la lue trefëne a pane imelekeu hnyawa me Iehova, matre acatrene la ihnimi nyidro? (Ate Cainöj 4:12) (Wange ju fe la iatr.)

³ Nyipiewekë tro la trahmany me föe a isa acatrene la aqane imelekeu i nyidro me Iehova, matre tro palahi a mele la “eë qaathei Ia.” Pine nemen? Ke ame la lue trefën ka wangatrune la aqane imelekeu i nyidro me Iehova, ke ka canga trongëne la itre eamo i Nyidrë. Matre nyidroti a neëne la itre jole ka troa ananazijëne la ihnimi nyidro. (E jë la Ate Cainöj 4:12.) Ketre, ame la itre atr ka imelekeu hnyawa me Iehova, ke ka thel troa nyitipune la itre thiina i Nyidrë tune la troa loi thiina, me xomihni, me nue la ngazo i ketre. (Efe. 4:32–5:1) Matre e tro la lue trefën a huliwane la itre thiina cili, ke tro hë lai a akökötrene la ihnimi nyidro. Öni Lena, ketre trejine föe ka faipoipo a 25 hë lao macatre enehila ka hape, “Hmaloi hi troa hnim me metrötrëne la atr ka imelekeu hnyawa me Iehova.”

4. Pine nemene matre hnei Iehova hna ië Iosefa me Maria troa nyi kem me thin ne la Mesia?

⁴ Tro sa ce wange la ketre hna melëne e hnine la Tusi Hmitrötr. Hnei Iehova hna iëne la lue trefën troa nyi kem me thine ne la Mesia. Nge ame thene la itre matra i Dravita, hnei Nyidrëti hna ië Iosefa me Maria. Pine nemen? Ke ka imelekeu hnyawa nyidro me Nyidrë. Nge atre hi Nyidrë laka, ihnimi nyidroti koi Nyidrë la ka troa nyitrepene la faipoipo i nyidro. Nemene la ini nyine tro la itre trefën a xome qaathei Iosefa me Maria?

5. Nemene la ini nyine tro la itre trahmanyi a xome qa ngöne la tulu i Iosefa?

⁵ Ketre trahmanyi ka lolo thiina Iosefa, ke ka canga drengethenge la itre hna amekötine hnei Iehova. Akönia hamëne jë kö Iehova la itre hna amekötine göne la fami angeic. Ngacama tha ka hmaloi kö koi angeic, ngo hnei angeic hna canga idrengethenge. (Mat. 1:20, 24; 2:13-15, 19-21) Nge jëne lai, angeice a thupë Maria. Ketre, kolo fe lai a acatrene la ihnim me metrötre i Maria koi angeic! Itre trahmanyi fe, xötrethenge jë la tulu i Iosefa, ene la troa thele la itre eamo qa hnine la Tusi Hmitrötr göne la aqane troa thupëne la fami epun.d Nge ame la epuni a trongëne itre ej ngacama tha ka hmaloi kö, ke epun hi lai a amamane la ihnimi epun kowe la föi epun me acatrene la imelekeu i epon. Önine la ketre trejine föe qa Vanuatu ka faipoipo a 20 hë lao macatre enehila, ka hape: “Ame la föeng a thel me trongëne la itre eamo qaathei Iehova, ke tru catr la metrötreng koi nyidrë. Ame la nyidrëti axecië mekun, ke mejiune ni koi nyidrë nge ka tingetinge la hning.”

6. Nemene la ini nyine tro la itre föe a xome qa ngöne la tulu i Maria?

⁶ Ngacama ka faipoipo ju hë Maria, ngo hnei angeic palahi hna acatrene la imelekeu i angeic me Iehova. Atre hnyawa hi angeic la Itre Hna Cinyihan. (Wange ju la Ita Ne Thup ne Febuare 2016, g. 15 par. 17) Hnei angeic palahi hna xomi ijin troa lapa mekun la itre hnei angeic hna e. (Luka 2:19, 51) Hnene la aqane imelekeu i angeic me Iehova matre hna qaja aloinyi angeic. Ame enehila, alanyim la itre föe ka xötrethenge la tulu i angeic. Tui Emiko. Öni eahlo: “Ame lo tha faipoipo palakö ni, hnenge palahi hna acatrene la aqane imelekeung me Iehova. Ngo ame hë la eni a faipoipo, eni ha öhne laka, pëhë imelekeung me Iehova, ke föeng pë hë la ka thith koi nyio me kuca la nöjei götrane la hmi. Trotrohnine hë ni laka, eni kö la ka troa acatrene la imelekeunge me Iehova. Matre ame hë enehila, eni a xomi ijine troa thithi cas, me e la Tusi Hmitrötr, me lapa mekune la itre mekuna i Iehova.” (Gal. 6:5) Itre föe fe, acatrene jë la aqane imelekeu i epuni me Iehova, nge tro hë la itre föi epun a qaja aloinyi epun me hnimi epuni catr.​—Ite edomë 31:30.

7. Nemene la ini nyine tro la lue trefën a xom qa ngöne la tulu i Iosefa me Maria göne la enyipiewekëne troa ce nyihlue i Iehova?

⁷ Hnei Iosefa me Maria palahi hna isine troa acatrene la aqane imelekeu i nyidro me Iehova. Atre hi nyidro, la enyipiewekën tro nyidro memine la fami nyidro a ce atrunyi Iehova. (Luka 2:22-24, 41; 4:16) Maine jë, tha ka hmaloi kö ke kola tru trootro la fami, ngo hnei nyidro palahi hna eatrëne la hnëqa i nyidro. Ketre tulu lai ka lolo, kowe la itre trefën enehila! Maine hetre neköi epun tui Iosefa me Maria, maine jë jole koi epun troa sine la itre icasikeu me kuca lapane la hmi ne la fami. Nge jole catre fe koi epun me föi epun troa öhnyi ijin troa e Tusi Hmitrötr me ce thith. Ngo the thëthëhmine kö laka, ame la epuni a ce nyihlue i Iehova, ke epuni hi lai a easenyi koi Nyidrë me kowe la föi epun. Haawe, amë panë Iehova jë ngöne la mele i epon.

8. Nemene la nyine tro la lue trefëne a kuca ngöne la hmi ne la fami matre troa acatrene hmaca la imelekeu i nyidro?

⁸ Nemene la nyine tro epuni a kuca e tha ka loi kö la mele ne trefën i epun? Maine jë, tha ajane kö epun troa ce kuca la hmi ne la fami. Maine eje hi lai, ke pane ahopatrene ju hi la hawa ne hmi ne la fami, nge iëne jë la ketre tane mekune hnei epone asë hna ajan troa ce wang. Tro lai a acatrene la imelekeu i epon, memine la aja i epon troa ce huliwa i Iehova.

XOMI IJINE JË KOI EPON

9. Pine nemene matre nyipiewekë tro la lue trefën a xomi ijin koi nyidro?

⁹ Nyipiewekë tro palahi epon a ce tro matre troa acatrene la ihnimi epon. Tro lai a xatua epon tro palahi a cas, me atre la mekune me aliene ne hni ketre. (Gen. 2:24) Hane hi la hna öhne hnei Lilia me Ruslan thupene la faipoipo i nyidro, a 15 hë lao macatre enehila. Öni Lilia: “Nyio a atrehmekune laka, tha hnei nyio kö hna lapa xomi ijin koi nyio. Tha öhne kö nyio la kola tro la itre drai, hnene la huliwa i nyio, me itre jol ngöne la hnalapa, me itre nekönatr. Atre hi nyio laka, e tha nyio kö a xomi ijine koi nyio, ke tro hë nyio lai a ianany.”

10. Tro la lue trefën a trongëne tune kaa la eamo ka mama ngöne Efeso 5:15, 16?

¹⁰ Nemene la nyine tro la lue trefëne a kuca matre troa xomi ijine koi nyidro? Nyipiewekë tro nyidroti a iëne la ijine ka loi koi nyidro. (E jë la Efeso 5:15, 16.) Öni Uzondu, ketre trejine trahmanyi qa Nigéria ka hape: “Ame la eni a kuca la porogarameng, ke eni a amë la itre ijine tro ni a ce tro memine la föeng, nge itre ijine lai ka tru koi ni.” (Fil. 1:10) Hane hi la aqane huliwan hnyawane Anastasia la traeme i eahlo. Eahlo la föe ne la ketre atre thupëne la sirkoskripsio ne Moldavie. Öni eahlo: “Ame la föeng a kuca la itre huliwa ne la ekalesia, ke eni a canga kuca la itre joleng. Matre ame e thupen, hetre ijine i nyio hë.” Ngo tune kaa e tru palaha hnei huliwa i epon?

11. Nemene la itre huliwa hnei Akula me Perisila hna ce kuca?

¹¹ Akula me Perisila, la lue tulu ka lolo kowe la itre trefëne enehila. Hna qaja aloinyi nyidro hnene la itre keresiano ekö. (Rom. 16:3, 4) Tha hnei Tusi Hmitrötr kö hna qaja asë la mele ne trefëne i nyidro, ngo ame pe, ka ce huliwa palahi nyidro, me ce cainöj, me ce xatuane la itre xan. (Itre hu. 18:2, 3, 24-26) Ame la Tusi Hmitrötr a qeje Akula me Perisila, ke kolo palahi a ce qeje nyidro.

12. Nemene la nyine tro la lue trefëne a kuca matre tro palahi a hetre ijine i nyidro? (Wange ju fe la iatr.)

¹² Tune kaa la aqane tro la itre trefën a nyitipu Akula me Perisila? Mekune jë la itre jol nyine tro epun me föi epun a kuca. Ame lo itre jol hnei epun hna mekune troa kuca casin, ke ce kuca jë me angeic. Ka ce cainöj palahi Akula me Perisila. Hapeu, epuni kö a hane xomi ijine troa ce cainöj? Ketre, ka ce huliwa palahi nyidro. Ngacama isa huliwa i epun kö me föi epun, ngo ijije hi tro epuni a ce nyidrawa uma. (Ate cai. 4:9) Ame la epuni a itö ixatua, ke itre ijine hi lai epuni a ce huliwa me porotrik. Öni Robert ka faipoipo me Linda, a 50 hë lao macatre enehila, ka hape: “Nyipici, tha ase kö nyio xomi ijine troa ce madrin. Ngo ame la eni a wasi peleitr, nge föeng a köle aweliwelën, nge maine eni a wakeca nge eahlo a hlem ke, madrine catre ni. Ame la nyio a ce kuca la itre jole ke, kola easenyi nyio, nge kolo fe a acatrene la ihnimi nyio.”

13. Nemene la nyine tro la lue trefën a kuca matre tro nyidro a cas?

¹³ Tha hnene kö laka, ce epuni palahi memine la föi epun, matre ka casi hi epon. Önine la ketre trejine föe ne Brésil ka faipoipo, ka hape: “Ame enehila, canga tro hi sa mekune ka hape, ka casi së me föi easë, ke ce easë palahi ngöne la uma. Ngo easa isa kuci telefon. Matre loi e tro fe sa nyipiewekën la föi easë.” Ame pena Bruno me Tays föi nyidrë, nyidroti palahi a isine troa amamane la ihnimi nyidro. Öni Bruno: “Ame lo itre ijine mano, nyio a pane amë acon la telefone i nyio, matre troa ce porotrik.”

14. Nemene la nyine tro la lue trefën a kuca, e xele kö ketre troa xomi ijine koi ketre?

¹⁴ Nemene la nyine tro epuni a kuca, e xele kö la föi epun troa xomi ijin koi epun? Maine jë, isa hetre hnei epon kö hna pi kuca, maine pena ka canga iwesitrë epon. Ame e cili, nemene la nyine troa kuca? Tro hmaca sa xome lo ceitune lo eë. Ame la easa nyiqane amelen, ke tha ka mele catre kö ej. Matre tro së lai a pane line la itre neköi sinöe ka co nge e thupen, tro së amë la itre sinöe ka tru. Ketre tun, nyiqane jë memine la ca neköi hawa e nöjei drai matre troa ce lapa memine la föi epun. Kuca jë lo itre ewekë hnei epon hna pi kuca, ngo thupëne kö la itre ewekë ka troa aciane la iwesitrë. (Iako. 3:18) Aqane tro hi epone lai a akökötrene hmaca la ihnimi epon.

IMETRÖTREKEU JË

15. Hnauëne laka, tro la lue trefën a imetrötrekeu, matre troa acatrene la ihnimi nyidro?

¹⁵ Ka nyipiewekë tro la lue trefën a imetrötrë. Ceitune hi lai memine la oxygène ka xatuane la eë troa mele catr. E pëkö oxygène, troa canga pi la eë. Ketre tun, e tha ka imetrötrë kö la lue trefën, ke troa patre trootro la ihnimi nyidro. Ngo maine tro palahi nyidroti a isine troa imetrötrekeu, ke tro ha catre la ihnimi nyidro. Ame la ka nyipiewekë ke, tha ene kö la tro epuni a mekune ka hape, epuni a metrötrëne la föi epun, ngo ene la tro la föi epuni a öhne laka, epuni a metrötrë angeic. Öni Penny ka faipoipo me Aret a 25 hë lao macatre enehila, ka hape: “Pine laka nyio a imetrötrekeu, matre ka tingetinge la mele i nyio e celë hnalapa. Tha xou nyio kö troa isa qeje mekun, ke atre hi nyio laka, tro ketre a wangatrune la mekuna i ketre.” Nemene la nyine tro epuni a kuca matre tro la föi epuni a öhne ka hape, epuni a metrötrë angeic? Tro sa ce wange la tulu i Aberahama me Sara.

16. Nemene la ini nyine tro la itre trahmanyi a xome qaathei Aberahama? (1 Peteru 3:7) (Wange ju fe la iatr.)

¹⁶ Hnei Aberahama palahi hna metrötrë Sara. Hnei nyidrëti palahi hna wangatrune la itre mekune me aliene hni eahlo. Ame la ketre ijin, seseu catre Sara matre hnei eahlo hna qaja asë la itre aliene hni eahlo koi Aberahama, goi upezö nyidrëti fe hnei eahlo. Hapeu, hnei Aberahama kö hna elëhni koi eahlo? Waea. Atre hi nyidrë ka hape, Sara la ketre föe ka idrengethenge me ka ixatua. Matre hnei nyidrëti hna drei eahlo me thele troa nyinyine la jol. (Gen. 16:5, 6) Nemene la ini? Itre trahmanyi fe, hnëqa i epun troa axecië mekune kowe la fami epun. (1 Kor. 11:3) Qëmeken troa axecië mekun, loi e tro epuni a pane ithanata memine la föi epun ke, tro fe lai a hetre thangane koi eahlo. Aqane tro hi epuni lai a amamane la ihnimi epun kowe la föi epun. (1 Kor. 13:4, 5) Tune kaa e kola seseu la föi epun, nge eahlo a pi fe la hni eahlo? Epuni kö a wangatrunyi eahlo me drei eahlo hnyawa? (E jë la 1 Peteru 3:7.) Traqa koi 30 lao macatre ne faipoipo Angela me Dmitry. Eahlo a qaja la aqane metrötrë eahlo hnei nyidrë. Öni eahlo: “Ame la eni a hnehengazo, me kucakuca, nge eni a pi ithanata, ke Dmitry palahi a drei ni. Nge ame la eni nyiqan elëhni, ke nyidrëti a xomihni ni.”

17. Nemene la ini nyine tro la itre föe a xome qaathei Sara? (1 Peteru 3:5, 6)

¹⁷ Tru la metrötre i Sara koi Aberahama. Matre eahlo a keithenge la itre mekun hnei nyidrëti hna axeciën. (Gen. 12:5) Ame lo ketre ijin, xulu xan pi hi la itre trenyiwa thei nyidro. Hnei Aberahama hna upi Sara troa pane nue la jole i eahlo me sa falawa koi angatr. (Gen. 18:6) Hnei Sara hna drei Aberahama me canga kuca la hna upi eahlo troa kuca. Itre föe fe, epuni a nyitipu Sara la epuni a drengethenge la hna axeciëne hnene la föi epun. Aqane tro hi epuni lai a acatrene la ihnimi epon. (E jë la 1 Peteru 3:5, 6.) Dmitry, lo hna qaja ha e caha, a qejepengöne la aqane metrötrë nyidrë hnei föi nyidrë. Öni nyidrë: “Eni a madrine la Angela a drengethenge la itre mekun hnenge hna axeciën, ngacama tha mekuna i angeic kö. Nge e ka tria ju hë la mekune hnenge hna axeciën, ngo tha angeice kö a qajangazo ni. Pi tro kö sa hnime la atr ka metrötrë së!

18. Nemene la itre thangane ka loi hna troa kapa hnene la lue trefën ka acatrene la ihnimi nyidro?

¹⁸ Satana a thele troa ananazijën la ihnimin ka ej thene la lue trefëne ka nyihlue i Iehova. Atre hi angeic ka hape, e pëhë ihnimi nyidro, ke tro hë nyidroti a iananyi me Iehova. Ngo ame la nyipi ihnim, ke ka cile hut! Haawe, epi tro la ihnim ka eje thei epun me föi epun a catr tune la ihnim hna qaja ngöne la Nyima i Solomona. Isine jë troa amë panëne la aja i Iehova ngöne la mele ne trefëne i epon. Xomi ijine jë kowe la föi epun, nge metrötrëne ju la itre aja me aliene hni angeic. Maine celë hi la hnei epone hna kuca, ke tro la faipoipo i epon a atrunyi Iehova, Atrekë Ewekëne la nyipi ihnim. Nge tune la eë hna ali sinöe me ipicone lapan, tro la ihnimi epon a cile hut uti hë epine palua.