Jëne Manathith La Troa Hnime La Itre Xan

Ketre hnamiatr kaka ngöne la Église Unie e Canada. Ame e nöjei wiik, nyidrëti a upi ni memine la xaa i eni koi catéchisme, nge e thupen, nyio a ce sine me nyidrëti la hmi e 11h. Ame hnaipajö, nyio pena a ce tro me nenë troa icasikeu ngöne la Uma Ne Baselaia. Matre canga öhne hi nyio la eisapengönene la lue hmi.

Hnei nenë hna hane cainöj kowe la lue sinee i eahlo, Bob me Marion Hutcheson. Nge e thupen, hnei nyidroti fe hë hna Temoë Iehova. Ame lo 1958, hnenge hna ce tro me nyidro memine la 3 nekö i nyidroti trahmany a tro New-York, troa hane sine la Asabele Koi Itre Nöje Ka Nyimutre ka 8 lao drai. Ame la tane lai asabele cili ke, “La volonté divine.” Eni pë hë a wangatrehmekune enehila, la itre trengecatr hna kuca hnene la fami cili, matre tro ni a ce sine me angatr la asabele. Nge itre ijine lai ka tru catr koi ni.

HNENE LA IXATUA NE LA ITRE TREJIN HNA SAZE LA MELENG

Ame lo eni a nekötrahmany, eahuni a mel ngöne la ketre ferme nge pi tro catre ni a thupëne la itre öni. Matre hnenge hna hane mekun troa vétérinaire. Nge hnei nenë hna ce ithanatane lai, memine la ketre qatre thup ne la ekalesia. Hnene lai qatre thup hna amekunë ni ka hape, easa melëne la “itre drai ne la pun,” matre tro lai a angazone la imelekeung me Iehova, e tro ni a ini aqeanyi. (2 Tim. 3:1) Matre tha tro ju kö ni koi université.

Ame pe, thatre kö ni la nyine tro ni a kuca e thupen. Ngacama eni a cainöj e nöjei pune wiik, ngo tha ajange kö troa cainöj, nge the qaja palaha la troa pionie. Ketre, hna uku ni fe hnei kaka memine la jini nyidrë ka tha hmi kö, troa huliwa drai ka pexej kowe la ketre compagnie d’assurance e Toronto. Nge pine laka ketre hene ka tru la jini kaka ngöne la compagnie cili, matre hnenge hna kapa la huliwa.

Tru catre la itre huliwa, matre pëhë ijinenge troa cainöj me sine la itre icasikeu. Ketre, eni palahi a ce tro memine la itre atr ka tha nyihlue i Iehova. Ame lo xötrei, hnenge hna lapa thene la qaaqaang ka tha hmi kö. Ngo ame hë la nyidrëti a mec, ke eni pa ketre thele hnalapang jë.

Kösë pi lo kem me thineng la lue trefën Hutchesons, lo lue ka hane thei eni ekö kowe lo Asabele Koi Itre Nöje Ka Nyimutre lo 1958. Hnei nyidroti hna hë ni troa ce lapa me angatr, nge celë hi ka xatua ni troa acatrene hmaca la imelekeung me Iehova. Ame lo 1960, hnenge hna ce xomi bapataiso me John, nekö i nyidroti trahmany. E thupen, hnei John hna hane xome la huliwa ne pionie, nge celë hi ka ithuecatr koi ni troa catre cainöj. Hnene la itre trejin ne la ekalesia hna öhne la itre trengecatreng matre hna acili ni troa atre thupëne la Icasikeu Mel Me Huliwa Ne Cainöj.

KETRE SINATRO KA MINGÖMING, ME HULIWA KA HNYIPIXE

Ame lo 1966, hnenge hna faipoipo me Randi Berge, ketre pionie ka ajan troa cainöj ngöne la itre götran ka aja ixatua. Hnene la atre thupëne la sirkoskripsio hna ithuecatr koi nyio troa xatuane la ekalesia ne Orillia (Ontario). Matre hnei nyio hna fek a tro cili.

Ame hë la nyio a traqa e Orillia, ke hnenge hna xome la huliwa ne pionie tui Randi. Madrine catre ni! Nge the qaja palaha, la eni a huliwane la Tusi Hmitrötr, me xatuane la itre atr troa atre Iehova! Ame e Orillia, hnei nyio hna xatuane la lue trefën troa saze la mele i nyidro utihë la nyidroti a hane nyihlue i Iehova. Tha aqane madrine kö nyio la ijine cili!

KETRE QENE HLAPA A SAZE LA AQANE WAIEWEKË I NYIO

Ame lo eni a traqa e Toronto, hnenge hna iöhnyi me Arnold MacNamara, ketre trejin ka huliwa ngöne la Bethela. Hnei nyidrëti hna hnyingë nyio, ka hape, aja i nyio kö troa hane pionie hut. Canga sa jë hi ni ka hape: “Kaloi! Xaa götran, ngo tha Québec kö!” Hnenge hna xome la aqane waiewekë ka ngazo ne la itre ka qene Papale e Canada, göne la itre ka qene Wiwi e Québec. Ame ngöne la ijine cili, itre atr a icilekeu memine la mus, ke aja i angatr troa ëdepadas. Celë hi matre kolo palahi a gomegome la nöj.

Sa jë hi Arnold ka hape, “Ame enehila, ke Bethela hmekuje hi a upe la itre pionie hut a tro Québec.” Hnenge hna canga kapa troa tro, ke atre hi ni laka, tro lai a amadrinë Randi. Nge eni pë hë a öhne e thupen ka hape, ketre mekune lai ka lolo hnei nyio hna xom!

Hnenge me Randi, memine la lue xaa trefën, hna fek a tro Rimouski, ketre traone ngöne la götrane kolopi ne Montréal, laka 540 lao kilomet la enanyin. Qëmeken tro nyio a tro, hnei nyio hna pane inine la qene Wiwi ngöne la 5 lao wiik. Ngo ame pe, tha maca hnyawa pala kö nyio. Ame lo ketre ijin, lo eni a cile fë la itre ithuemacany, hnenge pena hna qaja ka hape, “Alanyimu la itre délégués autruches” ka troa hane sine la asabele. Ngo tro pe a qaja ka hape, “itre délégués autrichiens.”

Hnene la 4 lao trejine föe ka tha faipoipo kö, me trejin Huberdeaus memine la föi nyidrë, memine la lue nekö i nyidroti jajiny, hna hane fek a tro Rimouski. Hnene la fami Huberdeau hna xome la ketre uma, ka 7 lao hnahag, nge hna hëne ka hape, “la Maison-Blanche” ke, ka wië la uma. Itre pionie la ka lapa e cili, nge angatr a ce nyithupen la uma. Traqa jë kö hun koi 12 maine 14 lao ka lapa e cili. Pine laka, lue pionie huti nyio, eni me Randi a cainöj ngöne la drai ka pexej. Matre madrine catre nyio, ke hetre sinatronge i nyio palahi, uti fe hë lo itre heji ne drai hnötr.

Hnime catre nyio la itre pionie, matre kösë fami nyio hë angatr. Ame itre xaa ijin, eahuni a ce lapa ezine la eë e kuhu qëhnelö. Hetre ijine kö ne huni hna hëne ka hape, “journées pierogi” ke eahuni a ce kuci “ravioles farcies.” Nge ame itre mecixen e hej, eahuni a fia me nyima, ke hetre trejin ka atreine elo miuzik thei eahun.

Ketre teritoare ka lolo catr e Rimouski! Ame ngöne la 5 lao macatre, alanyim la itre ka ini Tus ka xomi bapataiso. Nge traqa jë kö koi 35 lao ka cainöj ngöne la ekalesia.

Hetre ini ka lolo hnei nyio hna kapa qa ngöne la hnei nyio hna cainöj e Québec. Hnei Iehova hna xatua nyio ngöne la huliwa ne cainöj, me ngöne la mele i nyio. Ketre, hnei nyio hna inine troa hnime la itre atr ka qene Wiwi, memine la qene hlapa me qenenöje i angatr. Celë hi ka xatua nyio troa atre la itre xaa aqane mel.—2 Kor. 6:13.

Hna asesëkötrë nyio la kola upi nyio hnene la Bethela, troa fek a tro Tracadie, götrane koië ne Nouveau-Brunswick. Ka jole pi hë, ke nyio petre hi a xom la ketre uma. Ka monitöre ni, sine la drai, ngöne la ketre uma ne ini. Nge ame la itre xaa ka ini Tus me nyio, ke angatre petre hi a hane cainöj. Ketre, eahuni a xupe la Uma Ne Baselaia, nge tha hna afenesine palakö.

Hnei nyio hna thith göne lai, nge qa i nyio hna wange la traone cili. Ka isapengöne catre e cili, me Rimouski. Ngo pine laka aja i Iehova tro nyio a tro cili, matre nyio pa feke jë a tro kowe lai. Hnei nyio hna mejiune koi Iehova, nge öhne hi nyio laka, ce Nyidrëti palahi me nyio. (Mal. 3:10) Pine laka, ka catrecatre la imelekeu i Randi me Iehova, nge tru la ihnimi angeic kowe la itre atr, matre hmaloi hi koi nyio troa fek a tro cili.

Ame ngöne la ekalesia i nyio ka hnyipixe, Robert Ross hi la qatre thup. Ka pionie nyidrëti ekö e cili me föi nyidrë, Linda. Ngo e thupen la kola hnahone la pane nekö i nyidro, nyidroti pa lapa huti ju hë e cili. Ngacama ka tru ejolen la troa thupëne la nekönatr, ngo hnei nyidroti palahi hna ithuecatr koi ni me Randi, jëne la aqane ikep i nyidro, me catre cainöj.

ENI A MADRINE TROA KUCA LA ITRE HNËQANG

Thupene la hnei nyio hna pionie e Tracadie koi lue macatre, hna upi nyio troa xome la huliwa ne thupë sirkoskripsio. Hnei nyio hna tro troa wange la itre ekalesia ka qene Papale ngöne la 7 lao macatre. Nge e thupen, hna upi nyio troa wange la itre ekalesia ka qene Wiwi e Québec. Hnei Léonce Crépeault, ketre atre thupëne la district ne Québec, hna lapa qaja aloine la itre cainöjeng. Ngo e thupen, öni nyidrë, “Tune kaa la aqane tro la itre cainöje i eö a ukune la itre atr troa trongëne la hnei angatr hna dreng?”a Hnene la eamo i nyidrëti celë, hna xatua ni troa ahmaloeëne la aqane hamë ining.

Thatreine kö ni thëthëhmine lo Asabele Koi Itre Nöje Ka Nyimutre hnenge hna sine e Montréal lo 1978, hna hape, “La foi victorieuse.” Hna sipo ni troa cilëne la cafétéria. Eahuni a treqene la 80 000 lao atre ka troa sine la asabele. Nge hetre itre hna amekötine ka hnyipixe, tune la aqane huliwane la itre matériel, me aqane troa hnëkëne la itre xen, me itre menu. Traqa jë kö koi 20 lao kamio ikalepany, ngo tha ka nyipi loi kö e itre xaa ijin. Ame lo jidr qëmeken la asabele, hetre ka kuci elo e hnine la stade, matre hne huni hna itreqe utihë e hnenyipajidr göne troa hnëkëne la asabele. Nge ame pena lo itre ifurno, ke loi e troa amelen e hmahmakanyi sine jidr göi iji tri! Ngacama hace catr la huliwa, ngo hnenge hna inin troa catre huliwa, me atreine waiewekë, me ihnyima memine la itre trejine ka ce huliwa me ni. Itre nyipi sinee palahi huni enehila. Madrine catre nyio troa hane sine la asabele cili e Québec, kolo götrane hna axösisine lo itre trejin ekö ngöne lo itre macatre 1940 koi 1960!

Hnenge hna xomi ini qaathene la itre trejin ka cilëne la itre asabele katru e Montréal. Ame ekö, hnei David Splane, ketre atrene la Lapa Ne Xomi Meköti enehila, hna hane cilëne ekö la biero ne asabele. Ame hë lo macatre thupen, eni pena la ka xome la hnëqa cili. Nge hnei David hna xatua ni.

Ame lo 2011, thupene la 36 lao macatre ne xome nyio la huliwa ne sirkoskripsio, hna acili ni troa hane hamë ini ngöne la Ini Koi Itre Qatre Thupe Ne La Ekalesia. Ame ngöne la lue macatre, traqa jë kö koi 75 lao ili hnei nyio hna mekölen. Ame pe, tha ka gufa kö la itre trengecatr hna nu. Ame hë la kola ase ini hnene la itre qatre thup, tru la hni ne ole i angatr kowe la aqane hnim me thupë angatr hnene la Lapa Ne Xomi Meköt.

E thupen, hna acili ni troa hamë Ini Koi Itre Ka Cainöj. Kucakuca catre la itre trejin ka ini, ke tru palaha hnei huliwa i angatr. Ame ngöne la drai, ke 7 lao hawa ne ini, nge köni hawa ne kuci qa e nöjei hej. Nge traqa jë kö koi 4 maine 5 lao hnëqa nyine tro angatr a hnëkëne ngöne la wiik. Hneng memine la ketre ka hamë ini, hna qejepengöne koi angatr laka, thatreine jë kö angatre lai troa eatrën asë, e pëkö ixatua i Iehova. Tha tro jë kö ni a thëthëhmine la kola öhne hnene la itre trejin ka ini, la aqane xatua angatr hnei Iehova troa eatrëne la itre huliwa hnei angatr hna thatreine kuca.

JËNE MANATHITH LA TROA HNIME LA ITRE XAN

Tru la ihnimi nenë koi itre xan. Nge celë hi ka xatuane la itre ka ini Tus me eahlo troa hane nyihlue i Iehova, me xatua kaka troa saze la aqane goeëne nyidrë la itre Temoë Iehova. Köni drai thupene la kola meci hnei nenë, eahuni a sesëkötr troa öhnyi kaka a traqa ngöne la Uma Ne Baselaia troa hane drenge la cainöj. Nge ame ngöne la 26 lao macatre thupen, pëkö icasikeu hnei nyidrëti hna trian. Tha hnei kaka kö hna hane xomi bapataiso. Ngo önine la itre qatre thup ka hape, nyidrëti palahi la ka traqa pa ngöne la itre icasikeu.

Hetre thangane fe la tulu i nenë kowe la itre nekö i eahlo. Ame la köni xa i eni, ke angatr a hane nyihlue i Iehova me itre föi angatr. Ala lu la ka huliwa ngöne la Bethela, ketre e Portugal nge ketre e Haïti.

Ame enehila, eni me Randi a pionie hut e Hamilton (Ontario). Ame lo nyio a huliwa ngöne la sirkoskripsio, madrine catre nyio troa ce tro memine la itre trejin troa wange hmaca la itre atr hnei angatr hna cainöj, me ini Tusi kow. Ame enehila, madrine catre nyio troa öhne la itre hnei nyio hna ini Tusi kow, a hane hnimi Iehova. Hnime catre nyio la itre trejin ne la ekalesia i nyio ka hnyipixe. Nge hna ithuecatre fe koi nyio, la nyio a öhne laka, ce Iehova me angatr ngöne la itre ijine loi, me ngazo.

Tru catre la hni ne ole i nyio kowe la itre trejin ka hnimi nyio. Ketre, hnei nyio hna amamane la hnimi nyio kowe la itre trejin, la nyio a xatua angatr troa catre nyihlue i Iehova. (2 Kor. 7:6, 7) Ame ngöne la ketre fami, ka pionie la thin me lue nekö i eahlo. Hnenge hna hnyingëne kowe la kem ka hape, tha aja i nyidrëti kö troa hane pionie. Sa jë hi nyidrë: “Eni hë la a xatuane la köni pionie.” Matre, öninge jë hi koi nyidrë: “Hapeu, tha ijiji Iehova kö troa xatua angatr?” Hnenge hna ithuecatre koi nyidrë troa hane atre la madrine ka eje thene la fami nyidrë. Sikis lao treu thupen, ketre pionie hë nyidrë.

Tro palahi ni me Randi “a amamane [ . . . ] kowe la xöte [thupen],” la itre “huliwa i [Iehova] nyine hain.” Aja i nyio tro angatr a madrine ngöne la huliwa i Iehova, tui nyio.—Sal. 71:17, 18.