Atre Fe Hi Epun?

Ka tune kaa la ikatr hna tith hnene la atre Aithiope, lo Filipo a itronyi me angeic?

AME la hnaewekë hna hape “ikatr” ngöne la Tusi Hmitrötr Fene Ka Hnyipixe, ke kola qaja la nyimu pengöne ikatr. (Itre hu. 8:​28, 29, 38) Ngo ame kö la ikatr hna tithe hnene la atre Aithiope, ke ka tru catre kö hune la itre ikatr ne isi me iwaja. Tro sa ce wange la ka amamane lai.

Ame la atre Aithiope, ke ketre atr ka draië nge ka nyapëne la itre gojeny gaa nany. Angeic la ketre “atre ka draië fei Kanadaki, isola ne Aithiope, ke angeic a thupëne la itre mo i eahlo.” (Itre hu. 8:​27) Ame la nöje Aithiope ekö, ke ej a tro qa Soudan uti hë la götrane kolopi ne Aigupito. Tha ca ikatre kö la hnei angeic hna tith. Nge tiqa catre hnei trengetrenge i angeic, ke ka nanyi la gojeny. Ame la itre xaa ikatr ekö ngöne la hneijine la itre pane keresiano, ke ka hetre ihakun, nge 4 lao iwilen. Önine la ketre itus ka qejepengöne la tusi Itre Huliwa ka hape, “Ijije hi troa amë e hnine la itre ikatre cili la nyimu trengetreng, nge tha ka jole kö troa nyapëne la itre gojeny ka nany.”

Atre Aithiope a e tus la Filipo a itronyi me angeic. Öni Tusi Hmitrötr, “Filipo a nyinyape pi me drei angeic a e catrëne la hna cinyihan hnei Isaia perofeta.” (Itre hu. 8:​30) Ame la itre ikatr göi troa nyapëne la itre gojeny ga nany, ke tha ka nyinyape catre kö. Celë hi lai matre, atreine hi la Eunuka troa e tus nge tha jole kö koi Filipo troa weje huzune lai ikatr.

Hnene la atre Aithiope hna “iele Filipo troa elë, me pane lapa ezi angeic.” (Itre hu. 8:​31) Tha ka ceitu kö la itre ikatr ne iwaja me itre ikatr ne nyapëne la itre gojeny ga nany. Ame la itre ikatr ne iwaja, ke tro la itre ka tith a cil, ngo ame kö lo ketre, ke ka tru la itre göhnë. Celë hi matre, ijije hi tro la Eunuka me Filipo a lapa.

Thenge la tusi Itre Huliwa mekene 8 memine la itre hna ithel, itre itusi së enehila a amamane la atre Aithiope e hnine la ikatr ka tru, ngo tha e hnine kö la ikatr ne isi maine iwaja.