Itre Ini Qaathene La Itre Joxu Ne Isaraela

1-2. Nemene la hna qaja hnei Tusi Hmitrötr göne la itre xaa joxu ne Isaraela?

TUSI HMITRÖTR a qaja la ëjen la 40 lao trahmany hna acil troa joxu e Isaraela.a Ej a qaja hnyawane la itre huliwa hnei angatr hna isa kuca, memine la itre huliwa ka ngazo hna kuca hnene la itre joxu ka lolo. Öni Iehova göi Dravita joxu ka hape: “Atre nyihlueng qa kuhu hni . . . me kuca hmekuje hi la ka meköt koi ni.” (1 It. Jo. 14:8) Ngo ame pe, angeice hi lo ka nyixetë memine la ketre föe me iup troa humuthe la föi eahlo ngöne la isi.​—2 Sam. 11:​4, 14, 15.

² Ame pena la itre joxu ka ngazo, ke hnei angatr hna hane kuca la itre huliwa ka loi, tui Reoboama. Ame pe, ame koi Iehova, hnei angeic “hna kuca la ngazo.” (2 Aq. Jo. 12:14) Ngo hnei angeic hna drengethenge Iehova, la Nyidrëti a upi angeic troa nue la 10 lao tribu troa acile la ketre baselaia. Ketre, hnei angeic hna thupëne la nöj me acatrene hmaca la itre traon ngöne la götrane Iudra me Beniamina.​—1 It. Jo. 12:​21-​24; 2 Aq. Jo. 11:​5-​12.

3. Nemene la hninge ka nyipiewekë nyine tro sa ce sa, nge nemene la hne së hna troa ce wange ngöne la tane mekun celë?

³ Maine hnene la itre joxu ne Isaraela hna kuca la itre ewekë ka loi maine ka ngazo, ngo nemene la hnei Iehova hna goeëne thei angatr, matre jelemeköti angatr? Tro la hninge celë a xatua së troa trotrohnine la hnei Iehova hna thel thei easë. Ame ngöne la tane mekun celë, tro sa ce wange la köni ewekë hnei Iehova hna goeën thene la itre joxu ne Isaraela ka mele nyipici: ene la hni angatr, itre ka ietra, me aqane wangatrune angatr la nyipi hmi.

KA PEXEJE LA HNI ANGATR KOI IEHOVA

4. Nemene la eisapengönene la itre joxu ka lolo me itre joxu ka ngazo?

⁴ Ame la itre joxu ka amadrinë Iehova, ke hnei angatr hna nyihlue i Nyidrë cememine la hni ka pexej.b Hnei Iehosafata joxu “hna thele Iehova hnene la hni nyidrë ka pexej.” (2 Aq. Jo. 22:9) Tusi Hmitrötr a qeje Iosea ka hape: “Thene lo itre joxu ka pane mus, pëkö ka tui Iosea, ka bëeke koi Iehova hnene la hni ka pexej.” (2 It. Jo. 23:25) Nge tune kaa Solomona, lo ka kuca la ngazo ngöne la pune la mele i nyidrë? “Tha pexeje hë la hni nyidrëti koi Iehova.” (1 It. Jo. 11:4) Öni Tusi Hmitrötr göi Abiama ketre joxu ka ngazo ka hape: “Tha pexeje kö la hni nyidrë koi Iehova.”​—1 It. Jo. 15:3.

5. Kola hapeue la troa nyihlue i Iehova cememine la hni ka pexej?

⁵ Kola hapeue la troa nyihlue i Iehova cememine la hni ka pexej? Ame la atr ka hetre hni ka pexej, tha angeice kö a nyihlue i Akötresie, ke hnëqa i angeic. Angeic pe a nyihlue i Nyidrë, ke tru la ihnimi angeic koi Nyidrë. Ketre, ngöne la mele i angeic, tro palahi angeic a hnimi Nyidrë me fedre koi Nyidrë.

6. Nemene la nyine tro sa kuca matre troa hetre hni ka pexej koi Iehova? (Itre Edromë 4:​23; Mataio 5:​29, 30)

⁶ Tune kaa la aqane tro sa nyitipune la itre joxu ka lolo, me hetre hni ka pexej koi Iehova? Loi e tro sa neëne la itre ewekë ka ngazo, tune la itre nyine iamadrinë ka ngazo. Tro itre eje lai a thapa la hni së qaathei Iehova. Ceitune fe hi lai memine la itre sinatro ka ngazo, memine la pi aja mo. Maine easa öhne laka, ketre ewekë a nyiqane apujene la ihnimi easë koi Iehova, ke loi e tro sa canga lepetrij la ewekë cili.​—E jë la Itre Edromë 4:​23; Mataio 5:​29, 30.

7. Pine nemene matre nyipiewekë tro sa neëne la itre ewekë ka ngazo?

⁷ Loi e tro sa canga xometrije la itre ewekë ka troa ananyi së qaathei Iehova. E tha hmeke kö së, tro së lai a mekun ka hape, pine laka easa huliwa catre koi Iehova, tha nyipiewekë kö tro sa neëne la itre ewekë ka ngazo. Hane hi la ketre ceitun, ase hë epun pane nyidrawane hnyawane la uma i epun. Tro kö epuni lai a fe la mamalama me qëhnelö matre tro hmaca la dro me wanamamik, a lö e koho hnine uma? Waea. Ke tro hmaca lai a dro la uma i epun. Nemene la ini? Ceitune hi lai memine la imelekeu i easë me Iehova. Tha tro hmekuje kö sa kuca la itre huliwa ka loi koi Nyidrë, ngo loi e tro mina fe sa neëne la itre ewekë ka ngazo, ka ceitu memine la dro. Haawe, tha tro kö sa nue la itre ewekë ka ngazo qaathene la fene i Satana troa apujene la ihnimi së koi Iehova.​—Efe. 2:2.

HNEI ANGATR HNA IETRA

8-9. Tune kaa la aqane ujë i Dravita me Hezekia lo kola ameköti nyidro? (Wange ju la pane iatr.)

⁸ Tune lo hnei easë hna ce wang e kula, hnei Dravita hna kuca la itre huliwa ka ngazo. Ngo ame la Nathana a ameköti angeic, ke hnei angeic hna ipië me ietra. (2 Sam. 12:13) Tha ase kö Dravita thë troa hleuhleu qëmekei Nathana göi qaja hi. (Sal. 51:​3, 4, 17, texte de présentation du Psaume.) Kola mama la aqane ietra i angeic ngöne la Salamo 51.

⁹ Hnei Hezekia joxu hna hane kuca la ngazo qëmekei Iehova. Tusi Hmitrötr a qeje nyidrë ka hape: “Pi tru hë la hni nyidrë, ame hnei Akötresie hna wesitre koi Hezekia me koi Iudra me Ierusalema.” (2 Aq. Jo. 32:25) Hnauëne la pi tru jë Hezekia? Ma angeice jë a mekune ka hape, sisitria kö angeic hu itre xan, ke tru la itre mo i angeic, nge hnei angeic hna ngaane la angetre Asuria, nge hnei Iehova hna aloine la mec i angeic. Hnene la pi tru matre hnei angeic hna wesiwesi fë la itre mo i angeic qëmekene la angetre Babulona. Kepine hi lai matre hna ameköti angeic hnei Isaia perofeta. (2 It. Jo. 20:​12-​18) Ngo tui Dravita, hnei Hezekia hna ipië me ietra. (2 Aq. Jo. 32:26) Celë hi matre hnei Iehova hna goeë angeic tune la ketre joxu ka lolo ka “ kuca la loi koi [Nyidrë].”​—2 It. Jo. 18:3.

10. Tune kaa la aqane ujë i Amazia la kola ameköti angeic?

¹⁰ Tha ceitu kö Amazia joxu ne Iudra me Dravita me Hezekia. Angeic a kuca la loi qëmekei Iehova “ngo tha hnene kö la hni la pexej.” (2 Aq. Jo. 25:2) Nemene la jol? Thupene la hnei Iehova hna xatua angeic troa isi memine la angetre Edroma, hnei Amazia hna nyiqane thil kowe la itre haze i angatr.c Nge ame la perofeta i Iehova a ameköti angeic, xele kö angeic ma dreng, nge hna helëne lai perofeta.​—2 Aq. Jo. 25:​14-​16.

11. Thenge la 2 Korinito 7:​9, 11, nemene la nyine tro sa kuca matre tro Iehova a nue la itre ngazo së? (Goeëne ju fe la itre iatr.)

¹¹ Nemene la ini hne së hna xome qa ngöne la hna melëne hnei Dravita, me Hezekia, me Amazia? Nyipiewekë tro sa ietra me isine matre tha tro hmaca kö sa kuca la ngazo. Maine itre qatre thup a hamë eamo koi së göne la ketre ewekë ka co, tha tro pi kö sa mekun ka hape, angatr me Iehova a xele ma wai së. Hna hane fe amekötin me eamon la itre xaa joxu ne Isaraela. (Heb. 12:6) Haawe, e kola haji së (1) catre jë së ipië, (2) loi e tro sa thele troa saze (3) catre jë së nyihlue i Iehova memine la hni ka pexej. Maine tro sa ietra, tro kö Iehova a nue la itre ngazo së.​—E jë la 2 Korinito 7:​9, 11.

HNEI ANGATR HNA WANGATRUNE LA NYIPI HMI

12. Nemene la ka ej thene la itre joxu ka lolo?

¹² Ame koi Iehova ka lolo la joxu, e tro angeic a wangatrune la nyipi hmi, me thuecatre kowe la nöj troa hane ujë tun. Eje hi laka, itre ka tria fe la itre joxu, ngo pëkö ka atreine thë la imelekeu i angatr me Iehova. Ketre, hnei angatr fe hna isine troa apatrene la kuci idrola qa ngöne la nöj.d

13. Pine nemen matre ame koi Iehova, ketre joxu ka ngazo Ahaba?

¹³ Pine nemene matre, ame koi Iehova, ka ngazo la itre xaa joxu? Nyipici laka, tha ka ngazo asë kö la itre huliwa i angatr. Ame Ahaba joxu ka ngazo, hnei angeice fe hna ipië me hace fë la meci Nabotha. (1 It. Jo. 21:​27-​29) Hnei angeic mina fe hna xup la itre traon kowe la nöj me lepe la itre ithupëjia. (1 It. Jo. 20:​21, 29; 22:39) Ngo hnei angeic hna drenge la föi angeic me haöth la nöj hnei hmi ka thoi. Nge tha ase kö angeic ietra.​—1 It. Jo. 21:​25, 26.

14. (a) Pine nemen matre ame koi Iehova, joxu ka ngazo Reoboama? (b) Nemene la ka amamane ka hape, ka ngazo la musi ne la ketre joxu?

¹⁴ Tro sa ce wange la hna kuca hnene la ketre joxu ka ngazo, ene Reoboama. Tune la hnei easë hna ce wang, hnei angeic hna kuca la itre ewekë ka lolo lo angeic a joxu. Ngo ame hë la kola catr la musi angeic, xele hë angeic ma dreng la wathebo i Iehova, nge hnei angeic hna thil kowe la itre xaa haze. (2 Aq. Jo. 12:1) Ame e cili, angeic ha ce xom la nyipi hmi me hmi ka thoi. (1 It. Jo. 14:​21-​24) Tha Reoboama casi kö me Ahaba la ka nuetrij la nyipi hmi. Ame asë hi la itre joxu ka ngazo, ke itre ka ukun la itre atrene la nöj kowe la hmi ka thoi. Easa trotrohnine e celë ka hape, ame koi Iehova, ka ngazo la ketre joxu, e tha wangatrune kö angeic la nyipi hmi.

15. Pine nemene matre ka nyipiewekë koi Iehova tro la itre ka nyihlue i Nyidrë a wangatrune la nyipi hmi?

¹⁵ Pine nemene matre ka nyipiewekë koi Iehova tro la itre joxu a wangatrune la nyipi hmi? Ame la pane kepin, hnei Nyidrë hna upi angatr troa elemeken la nöje i Nyidrë, matre troa angatr a nyihlue i Nyidrë thenge la aja i Nyidrë. Nge, tro la hmi ka thoi a uku angatr troa kuca la itre ngazo ka tru, me itre ewekë ka tha meköti kö. (Hos. 4:​1, 2) Ketre, ame la itre joxu me itre atrene la nöj, ke itre ka nue mel koi Iehova. Celë hi matre Tusi Hmitrötr a aceitunëne la kuci idrola me nyixetë. (Iere. 3:​8, 9) Ame la atr ka nyixetë, angeic a kuca la ngazo me akötrëne la föi angeic. Ketre tune mina fe, ame la atr ka nue mel koi Iehova, nge ka thil kowe la itre xaa haze, angeic a kuca la ngazo me akötrë Iehova.e​—Dreut. 4:​23, 24.

16. Ame koi Iehova, nemene la eisapengönene la atr ka meköt memine la atr ka ngazo?

¹⁶ Nemene la ini? Loi e tro sa nuetrij la nöjei ewekë ne la hmi ka thoi. Ketre, loi e tro sa wangatrune la nyipi hmi me catre huliwa koi Akötresie. Hnei Malaki perofeta hna qaja la eisapengönene la atr ka ngazo me atr ka meköt qëmekei Iehova. Öni angeic: “Tro hmaca epuni a öhne la eisapengönene la atr ka meköt memine la atr ka ngazo, me eisapengönene la atr ka nyihlue i Akötresie memine la atr ka tha nyihlue i nyidrëti kö.” (Mal. 3:​18) Celë hi matre, the nue pi kö la pengö së atr ka ngazo, me itre tria së, troa sewe së troa nyihlue i Iehova. Ame la atr ka nuetriji Iehova, ke angeice lai a kuca la ketre ngazo ka tru.

17. Pine nemene matre nyipiewekë tro sa iëne hnyawane la föi easë?

¹⁷ Maine eö a ajan troa faipoipo, tro la hna qaja hnei Malaki a xatua eö tune kaa troa iëne hnyawane la föi eö? Maine ka loi thiina la ketre atr, ngo tha ka nyihlue i Akötresieti kö, hapeu, ka meköti kö angeic qëmekei Nyidrë? (2 Kor. 6:​14) Maine tro eö a faipoipo memine la ketre atr ka tha nyihlue i Iehova kö, tro kö angeic a xatua eö troa catre imelekeu me Nyidrë? Pane mekune jë la tulu i Solomona joxu. Maine jë, ka loi thiina la itre föi nyidrë ka hmi koi itre xaa haze. Ngo pine laka, tha ka nyihlue i Iehova kö angatr, matre hnei angatr hna ajeane la hni Solomona troa nyihluene la itre xaa haze.​—1 It. Jo. 11:​1, 4.

18. Nemene la nyine tro la itre keme me thin a inin kowe la itre nekö i angatr?

¹⁸ Itre keme me thine fe, amamane jë kowe la itre nekö i epun la hna qaja hnei Tusi Hmitrötr göne la itre joxu ne Isaraela, matre troa thue aja koi nyudren troa catre nyihlue i Iehova. Qaja jë koi nyudren ka hape, ame koi Iehova, ka lolo la ketre joxu ke, angeic a wangatrune me isigöline la nyipi hmi. Jëne la aqane ujë i epun, me itre hnei epun hna qaja, amamane jë koi nyudren laka, loi e troa tro pa la itre huliwa i Akötresie tune la troa ini Tusi Hmitrötr, me sine la itre icasikeu, me cainöj, hune la itre xaa ewekë. (Mat. 6:​33) Wanga tro jë nyudreni a mekun ka hape, ame la troa Temoë Iehova ke, tro hi a ce tro me kaka me nenë troa hmi. Nge tro pë hë nyudreni a wangacone la nyipi hmi, maine nuetriji eje pena.

19. Ijije kö troa nyisinee i Iehova hmaca hnene la ketre atr ka nuetriji Nyidrë? (Wange ju la hna eköhagen hna hape, “Ijiji Eö Fe Hi Troa Bëeke Koi Iehova!”)

¹⁹ Maine tro la ketre atr a nuetriji Iehova, hapeu, ijiji angeice hmaca kö troa nyisinee i Nyidrë? Öö, ke ijiji angeic troa ietra me bëeke hmaca kowe la nyipi hmi. Nyipiewekë tro angeic a ipië, me kapa la ixatua ne la itre qatre thup. (Iako. 5:​14) Eje hi, pëkö ewekë ka sisitria hune la troa nyisinee i Iehova!

20. Maine tro sa nyitipune la itre joxu ka lolo, tune kaa la aqane tro Iehova a goeë së?

²⁰ Nemene la ini hne së hna xom qaathene la itre joxu ne Isaraela? Tro sa tune la itre joxu ka lolo, e tro palahi sa hni ka pexeje koi Iehova. Haawe, loi e tro sa xomi ini qa ngöne la itre tria së, me ietra, me saze la aqane ujë së. Nge the thëthëhmine kö së laka, nyipiewekë tro sa wangatrune la nyipi hmi. Maine tro eö a lapa qale koi Iehova, tro Nyidrëti goeë eö ceitu me ketre atr ka kuca la loi qëmekei Nyidrë.