Xome Jë La Itre Mekun Ka Amadrinë Iehova

1. Nemene la hne së hna kuca e nöjei drai?

AME e nöjei drai, easa xomi mekun. Ame la itre xan, ke tha itre mekun ka tru kö, tune la nyine tro sa iji triin maine hawa ne meköl. Ngo jole troa xome la itre xaa mekun, ke ka hetre thangan kowe la mele së, me kowe la fami së, me kowe la imelekeu së me Iehova. Aja së tro la itre mekun hne së hna xom a hetre thangan ka loi koi së, me kowe la fami së. Nge tro fe itre ej a amadrinë Iehova.​—Roma 12:​1, 2.

2. Nemene la nyine tro eö a kuca matre xomi mekun ka loi?

² Tro eö a atreine xome la itre mekun ka loi e (1) tro eö a ithele hnyawa, (2) tro eö a atre la mekuna i Iehova, nge (3) tro eö a mekune hnyawan la itre thangan ka loi me ka ngazo. Ame ngöne la tane mekun celë, tro sa ce wang la köni mekun e caha, me aqane tro sa atreine waiewekë.​—It. Ed. 2:​11.

THELE JË LA ITRE ITHUEMACANY KA NYIPIEWEKË

3. Qaja jë la ketre ceitun ka amamane laka, loi e troa pane ithel qëmeken troa xomi mekun.

³ Tro sa atreine xomi mekun ka loi, e tro sa pane ithel me atre hnyawa la nyine tro sa kuca. Hane hi la ketre ceitun. Kola wai droketre hnene la ketre atr ka tru mecin. Hapeu, tro kö la droketre a canga hamë drösinöe, nge tha hna pane waipengöi angeice kö maine hnying? Waea. Ketre tune, tro eö a atreine xomi mekun hnyawa, e tro eö a pane ithel me atre hnyawa la jole ka ej thei eö. Nemene la aqane tro eö a kuca?

4. Thenge la Itre Edromë 18:​13, nemene la aqane tro eö a ithel me atre hnyawa koilo? (Wange ju fe la foto.)

⁴ Tro sa atre hnyawa koilo, e tro sa hnying. Pane mekune jë laka, kola hë eö kowe la ketre feet. Tro kö eö lai a hane sine maine waea? Maine thatre kö eö la atr ka cilëne lai feet, memine la hna troa kuca, ke hnyinge jë ka hape: “Eu nge ekaa la götran hnë feet? Ala ije la hna hën? Drei la ka cilëne lai feet? Drei la ka troa traqa? Nemene la hna troa kuca? Tro kö a hetre kahaitr?” Tro la itre hnyinge cili a xatua eö troa xomi mekun ka loi.​—E jë la Itre Edromë 18:13.

5. E lualai hë koi eö la itre nyine tro eö a atre, nemene la nyine tro eö a kuca?

⁵ E lualai hë koi eö la hnei eö hna ithel, loi e tro eö a atre la nyine tro eö a kuca, e traqa ju la ketre ewekë. Nemene la nyine tro eö a kuca e kola sine lai feet hnene la itre atrene fen? Maine kola iji menu la kahaitr nge pëkö ka thupën? Tro kö a tro ngazo lai feet? (1 Pet. 4:3) Nge tune kaa nge kolo pe lo ijine icasikeu? Maine kolo pena a ajolë eö troa sine la huliwa ne cainöj, tune la hnei eö hna majemin? E mama hnyawa ha koi eö la itre ewekë cili, ke tro ha hmaloi koi eö troa xomi mekun ka loi. Ngo tha eje hmekuje kö lai! Aqane waiewekë i eö lai, ngo nyipiewekë tro eö a atre la aqane waiewekë i Iehova.​—It. Ed. 2:6.

THELE JË LA MEKUNA I IEHOVA

6. Thenge la Iakobo 1:​5, pine nemene matre tha tro kö sa cil troa sipo ixatua koi Iehova?

⁶ Sipo Iehova jë troa xatua eö troa atre la mekuna i Nyidrë göne la ewekë cili. Ase hë Nyidrëti qaja ka hape, tro kö Nyidrëti a hamë së la inamacan matre troa atre la mekuna i Nyidrë. Nyidrëti a ‘hamën atrune la inamacane cili koi nöjei atr, nge tha ka thele gele së kö.’​—E jë la Iakobo 1:5.

7. Tro eö a atre tune kaa la mekuna i Iehova göne la ketre hnying? Qaja jë la ketre ceitun.

⁷ E ase hë eö sipo ixatua koi Iehova, thele jë la aqane sa i Nyidrë. Pane mekune jë laka, eö a ngenu ngöne la ketre nöj, nge thatre hë eö la gojeny, matre eö a sipo ixatua kowe la ketre atrene la nöj. Tro kö eö lai a ananyi angeic nge tha ase pala kö angeice sa koi eö? Waea. Tro eö lai a drenge hnyawan la hnei angeic hna qaja. Ketre tune mina fe, e ase hë eö sipo inamacan koi Iehova, thele jë la itre wathebo me itre trepene meköt ka ihmeku memine la hnyinge i eö. Haawe, qëmeken tro eö a axeciëne troa sine la ketre feet, thele jë la hna qaja hnei Tusi Hmitrötr göne la itre feet qenahmo, me itre sinatro ka ngazo, memine la enyipiewekëne troa amë panëne la Baselaia.​—Mat. 6:​33; Roma 13:13; 1 Kor. 15:33.

8. Nemene la nyine tro eö a kuca matre troa öhne la itre wathebo me itre trepene meköt ka troa xatua eö? (Wange ju fe la foto.)

⁸ Ame itre xaa ijin, tro eö lai a sipo ixatua kowe la ketre trejin ka macaj, matre troa öhne la itre wathebo me itre trepene meköt ka troa xatua eö. Ngo loi e tro fe eö a hane ithel. Hetrenyi la itre nyine ithel tune la itus, Nyine Thele Mekun Ne La Itretre Anyipici Iehova me Versets pour la vie chrétienne ka troa xatua eö. Nge the thëthëhmine kö laka, aja i eö troa xom la ketre mekun ka troa amadrinë Iehova.

9. Tro sa atre tune kaa ka hape, ka amadrinë Iehova la mekun hne së hna xom? (Efeso 5:​17)

⁹ Tro sa atre tune kaa ka hape, ka amadrinë Iehova la mekun hne së hna xom? Ame la hnapan, loi e tro sa atre Nyidrëti hnyawa. Öni Tusi Hmitrötr: “Ame la troa atre la Ka Nyipi Hmitrötr, ke celë hi trotrohnin.” (It. Ed. 9:​10) Eje hi, tro sa inamacan me hetre trotrohnin, e tro sa atre la itre thiina i Iehova, me aja i Nyidrë, me itre hnei Nyidrëti hna hnim me methinën. Isa hnyinge jë ka hape, ‘Thenge la hnenge hna atre göi Iehova, tro kö la mekun cili a amadrinë Nyidrë?’​—E jë la Efeso 5:​17.

10. Pine nemene matre ka nyipiewekë catre kö la itre trepene meköt qa hnine la Tusi Hmitrötr, hune la itre aja i kem me thin me qenenöj?

¹⁰ Ame itre xaa ijin, kola akötrëne la itre sinee së la easa amadrinë Iehova. Maine jë, tro la kem me thin a ukune la nekö i nyidro jajiny troa faipoipo memine la ketre trejin trahmany ka trene mani, ngo tha ka catre kö la imelekeu i xapo me Iehova. Nyipici laka, nyidroti a ajane troa tro loi la mele ne la nekö i nyidro, ngo tune kaa pë hë kowe la imelekeu i angeic me Iehova? Nemene la mekuna i Iehova? Ej e cili ngöne Mataio 6:​33. Kola ithuecatr e celë kowe la itretre drei i Iesu troa ‘thele panëne la Baselaia.’ Nyipici laka, ka nyipiewekë troa metrötrëne la kem me thin me itre sinee, ngo ame kö la ka sisitria, ke ene la troa amadrinë Iehova.

PANE WANGE JË LA KA NYIPIEWEKË

11. Thenge la Filipi 1:​9, 10, troa xatua eö tune kaa hnene la atreine waiewekë?

¹¹ E atre hë eö la itre trepene meköt ka troa xatua eö, pane mekune hnyawa jë la itre thangane ka loi me ka ngazo. (E jë la Filipi 1:​9, 10.) Tro la atreine waiewekë a xatua eö troa canga atre la itre ewekë ka troa traqa e thupen. Ame itre xaa ijin, atre hi së la mekun nyine troa xom. Ngo ame la itre xaa mekun, ke jole troa xom. Ame e cili, tro la atreine waiewekë a xatua së.

12-13. Maine eö a thele huliwa, tro la atreine waiewekë a xatua eö tune kaa troa axecië mekun?

¹² Pane mekune jë laka, eö a thele huliwa matre troa thupëne la fami i eö. Lue huliwa hnei eö hna öhn. Ame e cili, eö a pane goeëne hnyawane la lue huliwa, memine la porogarame i eö, memine la enanyine la huliwa me hnalapa i eö, me itre xaa ewekë ju kö. Ka lolo hi la lue huliwa cili kowe la keresiano. Matre eö a iëne lai ketre, ke hna nyithupene hnyawa nge thatraqai eö hnyawa hi. Ngo hetre xaa ewekë kö nyine tro eö a waipengöne hnyawa.

¹³ Hapeu, tro kö la huliwa cili a aijijë eö troa sine la itre icasikeu ngöne la ekalesia i eö? Nge tro kö a hetre ijine i eö kowe la fami i eö, me acatrene la imelekeu i angatre me Iehova? Tro la itre hnying cili a xatua eö troa amë panëne “la ka nyipiewekë,” ene la hmi i eö, me fami i eö, nge pine pë hë la itre mo ne fen. Tro hë Iehova lai a amanathithin la mekun hnei eö hna xom.

14. Nemene la thangane e tro sa atreine waiewekë me ihnim?

¹⁴ Tro la atreine waiewekë a xatua së troa atre hnyawa la thangane la mekun hne së hna xom koi itre xan. Tha aja i easë kö troa “akeinyi ketre.” (Fil. 1:​10) Nyipiewekë tro sa trongëne la trepene meköti celë, la easa xomi mekun göne la aqane heetr me pengö së. Maine jë, hetre hne së hna pi ajane ngöne la itre götrane cili. Ngo hapeu, tro kö lai a akein la itre trejin me easë me itre xaa atr? Tro la atreine waiewekë a xatua së troa metrötrë itre xan. Nge tro la ihnim a uku së troa thele la loi “koi itre xan,” me tulu ewekë. (1 Kor. 10:​23, 24, 32; 1 Tim. 2:​9, 10) Tro hë së lai a axecië mekun ka amamane la ihnimi së me metrötre së koi itre xan.

15. Nemene la nyine tro eö a pane wang qëmeken troa axeciëne la ketre mekun ka tru?

¹⁵ Maine hetre mekun ka tru nyine tro eö a xom, nemene la nyine tro eö a kuca? Hnei Iesu hna ithuecatre kowe la itretre dreng ka hape, qëmeken troa kuca la ketre ewekë, loi e troa pane “mekune hnyawa la thupen.” (Luka 14:28) Matre isa hnyinge jë së ka hape, ije hawa, me mani, me trengecatr hnenge hna troa nu, göne troa eatrëne la mekunang. Ame itre xaa ijin, loi e tro eö a ce wang memine la itre atrene la fami i eö, la nyine tro epuni a isa kuca, matre troa eatrëne la mekun cili. Pine nemene matre ka nyipiewekë? Maine tro eö a trongëne la itre mekun e caha, tro hë eö lai a öhne laka, loi e troa pane saze la mekuna i eö, maine xom la ketre mekun. Maine tro eö a hnying kowe la fami i eö me dreng la mekuna i angatr, tro angatre lai a ce huliwa me eö, matre eatr la mekun hnei eö hna xom.​—It. Ed. 15:22.

XOME JË LA ITRE MEKUN KA LOI

16. Nemene la ka troa xatua eö troa xom la ketre mekun ka loi? (Wange ju fe la hna eköhagen, “Aqane Troa Xomi Mekun Ka Loi.”)

¹⁶ Hnei eö kö hna trongëne la itre eamo hna qaja e caha? Hnei eö kö hna ithel? Hnei eö kö hna trongëne la itre trepene meköt ka troa xatua eö troa xome la ketre mekun ka amadrinë Iehova? Maine eje hi, axecië mekune jë hë! Nge sipo Iehova jë troa aeatrëne la mekun hnei eö hna xom.

17. Nemene la ka troa xatua eö troa xom la itre mekun ka loi?

¹⁷ Ngacama hnei eö hna xom la itre mekun ka loi ekö, ngo the thëthëhmine kö laka, ame la ka xatua eö troa axecië mekun ka loi, ke inamacane i Iehova, ngo tha sipu inamacane i eö kö maine hnei eö hna melën. Iehova hmekuje hi la ka hamën la atrehmekun, me inamacan, me atreine waiewekë. Nge celë hi lai nyipi inamacan. (It. Ed. 2:​1-5) Tro kö Iehova a xatua eö troa xom la itre mekun ka troa amadrinë Nyidrë.​—Sal. 23:​2, 3.