Tro Sa Waiewekë Tui Iehova Me Iesu

1-2. Tune kaa la aqane tro sa hnimi Iehova, nge tune kaa la aqane amamane Iesu laka, nyidrëti a hnimi Iehova cememine la mekune ka pexej?

HNEI Iesu hna qaja la wathebo ka sisitria ngöne la Trenge wathebo i Mose lo nyidrëti a hape, “Qa i eö troa hnimi Iehova Akötresi eö hnene la hni eö ka pexej, me mele i eö ka pexej, me trengecatre i eö ka pexej, me mekuna i eö ka pexej.” (Luka 10:27) Matre loi e tro sa hnimi Iehova hnene la hne së hna hetreny, me hnene la mele së ka pexej. Kolo hi lai a qaja la itre aja së, me itre aliene hni së, me trengecatre së. Ngo kolo fe a qaja la mekuna së. Eje hi, thatreine jë kö së trotrohnine hnyawane la mekuna i Iehova. Ngo tro sa atrein, e tro sa inine “la aqane waiewekë i Keriso,” ke atre hnyawa hi nyidrë la mekuna ne la Keme i nyidrë, nge casi hi la aqane waiewekë i nyidro.—1 Kor. 2:16.

² Iesu a hnimi Iehova hnene la mekuna i nyidrë ka pexej. Atre hi Iesu la hnei Iehova hna ajan tro Iesu a kuca, nge xecie koi Iesu troa kuca la aja i Iehova, ngacama tro nyidrëti a akötr pine la meköt. Ame la ka tro pa ngöne la mele i Iesu, ke ene la aja i Iehova. Nge tha hnei Iesu kö hna nue la ketre ewekë troa sewe nyidrë troa kuca la aja i Iehova.

3. Nemene la ini hnei Peteru hna xom qaathei Iesu, nge nemene la ithuecatr hnei angeic hna hamëne kowe la itre keresiano? (1 Peteru 4:1)

³ Hnei Peteru me itre xaa aposetolo hna ce tro lapa me Iesu matre atre hi angatr la aqane waiewekë i nyidrë. Ame ngöne la pane tusi Peteru, hnei angeic hna ithuecatr kowe la itre keresiano troa ‘hnëkë matre atreine waiewekë tui Keriso.’ (E jë la 1 Peteru 4:1.) Ame la hnaewekë “hnëkë jë,” ke hna huliwan ngöne la hna sooc. Matre e tro la itre keresiano a xome la aqane waiewekë, maine aqane mekune i Iesu, ke tro angatr lai a hetreny la jia ne isi ka troa xatua angatr troa cile kowe la itre aja ka ngazo me kowe la fen hna musinën hnei Satana.—2 Kor. 10:3-5; Efe. 6:12.

4. Tro la tane mekune celë a xatua së tune kaa troa trongëne la eamo i Peteru?

⁴ Ame ngöne la tane mekune celë, tro sa ce wange la aqane waiewekë i Iesu, me aqane tro sa mekun tui nyidrë. Celë hi matre tro sa ce ithanatane la aqane (1) tro sa mekune tui Iehova, nge ka troa aijijë së troa ca mekun, (2) tro sa ipië, me (3) tro sa atreine tulu ewekë, ene la troa mejiune koi Iehova jëne la thith.

ININE JË TROA WAIEWEKË TUI IEHOVA

5. Eu la ijine kola isazikeu la aqane waiewekë i Peteru me Iehova?

⁵ Ame itre xaa ijin, tha hnei Peteru kö hna waiewekë tui Iehova. Hnei Iesu hna qejepengöne kowe la itre aposetolo ka hape, tro nyidrëti a pane tro Ierusalema, nge e cili troa kootrë nyidrë hnene la itre he ne hmi, me axösisi nyidrë, nge e thupen troa humuthi nyidrë. (Mat. 16:21) Ma jole jë koi Peteru troa mekune ka hape, tro Iehova a nue Iesu, lo atr ka troa amele Isaraela me Mesia hna thingehnaean, troa mec. (Mat. 16:16) Matre hnei angeic hna nango hën aconyi Iesu me hape: “Waea Joxu, the nue nyipëti kö troa akötr. Tha tro kö a traqa lai koi nyipë!” (Mat. 16:22) Pine laka, isazikeu kö la aqane waiewekë i Peteru me Iehova, matre tha kapa kö angeic la hnei Iesu hna qaja.

6. Tune kaa la aqane amamane i Iesu ka hape, casi hi la aqane mekuna i nyidrë me Iehova?

⁶ Casi hi la aqane waiewekë i Iesu me Keme i nyidrë. Öni nyidrë koi Peteru: “Eö e hutröng Satana! Eö a pi sewe ni, ke tha eö kö a mekune la itre mekuna i Akötresie, ngo mekuna i atre pe.” (Mat. 16:23) Peteru a thele la loi koi Iesu, ngo hnei nyidrë hna lepetrij la eamo i angeic. Ketre ini lai koi së! Eje hi atre hi Iesu laka, aja i Iehova tro nyidrëti a nu asë kowe la huliwa i Iehova. Ame e cili, trotrohnine ju hi Peteru la enyipiewekën troa mekune tui Akötresie.

7. Nemene la ka amamane ka hape, Peteru a thel troa mekun tui Iehova? (Wange icetrön.)

⁷ E thupen hnei Peteru hna thel troa mekune tui Iehova. Hna traqa la ijin laka, hna hane aijijëne la itre atrene fen troa sine la nöje i Akötresie. Hna upi Peteru troa cainöj koi Konelio, pane atrene fen ka kapa la hmi keresiano. Ngo pine laka, angetre Iudra a methinëne la itre atrene fen, matre Peteru a aja ixatua qëmekene troa eatrëne la hnëqa cili. Ame hë la angeic a trotrohnine la aja i Akötresie, hna saze la aqane waiewekë i angeic. Matre ame ‘la kola trothei’ angeic, hnei angeic hna ‘traqa, nge tha qeje jole kö’ angeic. (It. Hu. 10:28, 29) Hnei Peteru hna cainöj koi Konelio me fami angeic, nge hnei angatr hna xomi bapataiso.—It. Hu. 10:21-23, 34, 35, 44-48.

8. Nemene la ka troa amaman ka hape, hne së hna xom la aqane waiewekë i Iehova? (1 Peteru 3:8)

⁸ E thupen, hnei Peteru hna ithuecatr kowe la itre keresiano “troa ca mekun.” (E jë la 1 Peteru 3:8.) Ame easë itre ka nyihlue i Iehova, tro sa ca mekun, e tro sa xome la aqane waiewekë i Nyidrë ka mama e hnine la Tusi Hmitrötr. Hane hi la ketre ceitun, hnei Iesu hna ithuecatr kowe la itretre drei nyidrë troa amë panëne la Baselaia ngöne la mele i angatr. (Mat. 6:33) Maine jë, tro la ketre trejin a mekune troa huliwa i Iehova drai ka pexej. Nemene la nyine tro sa kuca? Tha tro kö sa sewe angeic. Loi e tro pe sa qaja aloinyi angeic me xatua angeic.

TROA IPIË

9-10. Tune kaa la aqane amamane Iesu la ipië?

⁹ Ame lo jidr qëmeken troa humuthi Iesu, hnei nyidrëti hna amamane koi Peteru me itre xaa aposetolo la enyipiewekën troa ipië. Ame lo drai cili, hnei nyidrëti hna upi Peteru me Ioane troa hnëkëne la hnahag hnë tro nyidrë me itre aposetolo a ce xen, qëmeken tro nyidrëti a mec. Hnei nyidro hna hnëkën la ketre baketr me itre trawel matre troa wasine la lue ca ne la itre hna hën, qëmekene tro angatr a xen. Ngo drei jë la ka troa cil matre wasine la waca i itre xan?

¹⁰ Hnei Iesu hna canga cil, matre amamane koi angatr la aqane troa ipië. Kola sesëkötr la itre aposetolo, ke nyidrëti a kuca la huliwa ne la hlu. Hnei nyidrëti hna pane una la iheetr ka qea i nyidrë, me sili göne la itrawel. Nyidrëti pa nyialiene jë la baketr hnei tim me nyiqane wasine la lue ca i angatr. (Ioa. 13:4, 5) Ma qea pi hë la ijine nyidrëti a wasine la waca ne la ala 12, nge Iudra fe hi cili, lo ka troa salemë nyidrë. Ngo hnei Iesu hna kuca hnyawane la huliwa cili utihë la kola ase hnyawa. Thupene lai, nyidrëti a qaja jë ka hape: “Trotrohnine kö nyipunieti la hnenge hna kuca koi nyipunie? Nyipunie a hë ni ka hape, ‘Atre Ini’ me ‘Joxu,’ nge nyipici nyipunieti hi, ke eni hi lai. Haawe, maine tro la Joxu me Atre Ini a köle la lue ca i nyipunie, nga qa i nyipunieti fe troa hane köle la lue ca i ketre me ketre.”—Ioa. 13:12-14.

11. Nemene la ka amamane ka hape, hnei Peteru hna inine troa ipië? (1 Peteru 5:5) (Wange ju fe la foto.)

¹¹ Hna ketri Peteru hnene la aqane ipië Iesu. Ame hë lo Iesu a elë hnengödrai, hnei Peteru hna aloine la ketre trahmany ka genyi ca qane lo kola hnahon. (It. Hu. 1:8, 9; 3:2, 6-8) Thupene la kola kuca la iamamanyikeu cili, kola traqa itrony la itre atr. (It. Hu. 3:11) Ame la angetre Iudra, ke itre ka pi mama me ka thele troa lapane la itre göhnë ka tru. Matre hapeu, hnei Peteru kö hna hane pi mama? Waea, xele kö angeic troa atrunyi angeic. Hnei angeice pe hna amamane ka hape, qaathei Iehova me Iesu la iamamanyikeu cili. Öni angeic: “Jëne la ëje i Iesu, nge pine la mejiune i nyio kowe la ëje i nyidrë, egöcatre pi hi la lue ca ne la atre ce, ene lo hnei nyipunieti hna öhne me atrepengön.” (It. Hu. 3:12-16) E thupen hnei Peteru hna qaja la enyipiewekën troa ipië, lo angeic a cinyanyine ngöne la ketre itusi angeic ka hape, “oteëneju la thina ka ipië.” Kola amekunën lo ijine Iesu a otreën maine sili göne la ketre itrawel me wasine la lue ca ne la itre aposetolo.—E jë la 1 Peteru 5:5, Bible Lifu.

12. Tro sa xötrethenge tune kaa la tulu i Peteru me catre huliwane la ipië?

¹² Tro sa xötrethenge la tulu i Peteru e tro sa huliwane la ipië. Ame la ipië, ke tha ka mama hmekuje kö ngöne la itre hne së hna qaja. Ame la aliene la hnaewekë hnei Peteru hna huliwan goi “ipië,” ke kola qaja la itre mekun ka ej e kuhu hni së. Ame la easa xatua itre xan, ke tha göne kö matre troa pi mama, ngo hnene laka, tru la ihnimi së koi angatr me koi Iehova. E tro sa catre nyihlue i Iehova me xatuane la itre trejin, ngacama pëkö ka öhnyi së, ke easë hi lai a amamane ka hape, itre ka ipië së.—Mat. 6:1-4.

TROA “ATREINE TULU EWEKË”

13. Ka tune kaa la atr ka “atreine tulu ewekë”?

¹³ Ka tune kaa la atr ka “atreine tulu ewekë”? (1 Pet. 4:7) Ame la keresiano ka atreine tulu ewekë, ke angeic a isine troa axeciëne la itre mekun ka amadrinë Iehova. Nge ame la ka sisitria ngöne la mele i angeic, ke ene la imelekeu i angeic me Iehova. Tha angeice kö a wangatrunyi angeice pala ha, nge atre hi angeic laka, hetre nyine tro pala hi angeic a inin. Ketre, angeic a amamane la mejiune i angeic koi Iehova la angeic a thithi lapa matre sipo ixatua.a

14. Eue la ijine la Peteru a tha mejiune koi Iehova?

¹⁴ Ame lo jidr qëmekene tro Iesu a mec, öni nyidrë kowe la itretre dreng ka hape: “Pine la ewekë ka troa traqa koi ni, tro asë hi nyipunieti a kei ngöne la heji celë.” Canga öni Peteru jë hi: “Maine tro asë hi angatre la a nuetriji nyipë, ngo tha tro kö ni a hane nuetriji nyipë!” Ngo ame ngöne la jidri cili, hnei Iesu hna qaja kowe la itre xaa atre dreng ka hape: “Hmeke jë nyipunie, nge catre jë thith.” (Mat. 26:31, 33, 41) Maine trongëne ju Peteru la eamo i Iesu, ke tha tro kö angeic a hmahma troa qaja ka hape, angeice hi la ketre atre drei Iesu. Ngazo pe hnei angeic hna qaja ka hape, thatre Iesu kö hnei angeic, nge hnei angeic hna hace fë e thupen.—Mat. 26:69-75.

15. Tune kaa la aqane tulu ewekë Iesu lo jidr tixenuë i nyidrëti e celë fen?

¹⁵ Hnei Iesu pala hi hna mejiune koi Iehova. Ngacama ka pexej nyidrë, ngo tha mano kö nyidrëti thith. Celë hi ka thue trengecatre i nyidrë troa kuca la aja i Iehova. (Mat. 26:39, 42, 44; Ioa. 18:4, 5) Tha thëthëhmine kö Peteru lo itre ijine Iesu a catre thith.

16. Nemene la ka amaman ka hape, atreine hë Peteru tulu ewekë? (1 Peteru 4:7)

¹⁶ Ame hë e thupen, hnei Peteru hna inine troa mejiune koi Iehova me catre thith. Thupene la kola amele Iesu hmaca, hnei nyidrëti hna qaja koi Peteru me itre xaa aposetolo laka, tro angatr a kapa la uati hmitrötr matre xatua angatr troa cainöj. Ngo hnei nyidrëti hna amekötine tro angatr a lapa e Ierusalema treqene tro nyidrëti a hamëne la uati hmitrötr. (Luka 24:49; It. Hu. 1:4, 5) Tune kaa la aqane huliwane Peteru la hnepe ijine cili? Hnei angeic me itre xaa keresiano hna “catre thith.” (It. Hu. 1:13, 14) Ame pë hë e thupen ngöne la pane tusi angeic, hnei angeic hna ithuecatr kowe la itre keresiano troa atreine tulu ewekë me catre thith koi Iehova. (E jë la 1 Peteru 4:7.) Hnei angeic hna inine troa mejiun koi Iehova, nge ketre ikapa hë angeic ngöne la ekalesia.—Gal. 2:9.

17. Nemene la nyine tro sa kuca, ngacama ka atreine ju hë së maine ka thatrein? (Wange ju fe la foto.)

¹⁷ Tro sa ujë tune la atr ka atreine tulu ewekë, e tro sa thithi lapa koi Iehova. The thëthëhmine kö së laka, nyipiewekë tro sa thith, ngacama itre ka atreine ju hë së maine ka thatrein. Celë hi matre, e hetre mekune ka tru nyine tro sa axeciën, sipo Nyidrëti jë troa amamai gojenyi koi së, ke atre kö Nyidrë la ka loi koi së.

18. Nemene la nyine tro sa catre kuca?

¹⁸ Easa olene koi Iehova, ke hnei Nyidrëti hna xupi së cememine la atreine troa nyitipune la itre thiina i Nyidrë. (Gen. 1:26) Eje hi laka, thatreine kö së nyitipu Nyidrëti hnyawa. (Isa. 55:9) Ngo tui Peteru, ijiji së troa trotrohnine la aqane mekune i Iehova. Haawe, loi e tro sa thel troa mekune tui Nyidrë, me huliwane la ipië, me atreine tulu ewekë.