Nyitipune Jë La Aqane Ipië i Iehova

1. Hnauëne laka, easa haine la aqane ipië i Iehova?

TUNE kaa la itre atr ka trene mus enehila? Itre ka ipië kö angatr? Waea. Ame kö Iehova, ngacama ka tru trenge men, ngo ka ipië Nyidrë. (Sal. 113:​5-8) Pëkö atr ka ipië tui Iehova, nge patre kö thei Nyidrë la pi tru me pi draië. Ame ngöne la tane mekune celë, tro sa ce wang la 4 lao thiina ka mingöming ka amamane laka, ka ipië Nyidrë. Tro fe sa ce wang la aqane nyitipune Iesu la ipië i Iehova. Tro lai a xatua së troa easenyi koi Nyidrë, me catr nyitipune la ipië i Nyidrë.

THA XOU SË KÖ TROA EASENYI IEHOVA

2. Nemene la ini hne së hna xom qa ngöne la Salamo 62:8 göi Iehova? (Wange ju fe la icetrön.)

² Pëkö ka pi ithanata memine la itre atr ka pi tru. Ka ngazo la aqane ujë i angatr, ke ame koi angatr, sisitria kö angatr hu itre xan. Matre itre xan a ananyi angatr. Tha celë kö aqane ujë i Iehova! Ka ipië Nyidrë, matre Nyidrëti a hë së troa fe la hni së koi Nyidrë. (E jë la Salamo 62:8.) Madrine catre la kem la nekönatr a fe la hni nyëne koi nyidrë. Ketre tun, Iehova a madrine troa dreng la itre thithi ne la itre hlue i Nyidrë. Celë hi matre, hnei Nyidrëti hna amë la itre thith ne la itre xaa hlue i Nyidrë ngöne la Tusi Hmitrötr. Kolo hi lai a amamane laka, tru la aja i Nyidrë troa dreng la itre thithi së. (Ios. 10:​12-​14; 1 Sam. 1:​10-​18) Ngo nemene la nyine tro sa kuca, e easa mekun ka hape, tha ijiji së kö troa ithanata koi Iehova?

3. Pine nemene matre xecie koi së laka, aja i Iehova tro sa thithi lapa koi Nyidrë?

³ Ijiji së hi troa ithanata koi Iehova, ngacama ame koi së, tha hnimi së kö hnei Nyidrë. Hnauëne la easa qaja lai? Ame ngöne la ceitune i Iesu göne lo nekötrahmanyi ka patr, hnei nyidrë hna aceitunë Iehova memine lo kem ka tru ihnimin. Kola mekun hnene la nekötrahmanyi laka, tha ijiji angeice hmaca kö troa sine la fami angatr. Ame la angeic a bëeke hmaca koi hnalapa, nemene la hna kuca hnene la kem? Öni Iesu, ame la kem a öhnyi angeic, hnei nyidrë hna “nyinyap, me haluthi angeic, me dremi angeic.” (Luka 15:​17-​20) Ceitu Iehova memine la kem cili. Ame la Nyidrëti a dreng la thithi ne la atr ka akötr, maine ka hace fë la ngazo i angeic, maine ka hnehengazo, Nyidrëti a drei angeice hnyawa. (It. t. Iere. 3:​19, 20) Tru la utipine i Nyidrë, matre tune la kem ka nyinyap kowe la nekö i nyidrë, kösë Iehova a nyinyap koi së troa amamane la ihnimi Nyidrë, me akeukawanyi së. (Isa. 57:15) Tune kaa la aqane “nyinyap” Iehova koi së enehila? Nyidrëti a upe la itre qatre thup, maine ketre sinee së ka nyihlue i Nyidrë, maine ketre trejin troa akeukawanyi së. (Iako. 5:​14, 15) Nyidrëti a xatua së ke, aja i Nyidrë tro sa easenyi Nyidrë.

4. Nemene la ka amamane laka, tha xou kö la itre atr troa tro koi Iesu?

⁴ Iesu a nyitipu Iehova. Ka ipië Iesu tui Iehova. Celë hi matre, ame lo nyidrëti e celë fen, tha cile kö la itre atr troa tro koi nyidrë. Tha xou angatre kö troa hnyinge koi nyidrë. (Mar. 4:​10, 11) Nge ame la nyidrëti a hnyinge koi angatr, angatr a qaja la aliene hni angatr. (Mat. 16:​13-​16) Ketre, ame la angatr a tria, atre hi angatr laka, tha tro kö Iesu lai a wesitr, ke ka menyik nyidrë, me itrotrohni, me ka xomihni. (Mat. 17:​24-​27) Pine laka, ka ceitu la aqane ujë i Iesu me Iehova, matre hnene la itretre dreng hna atrepengöi Iehova hnyawa. (Ioa. 14:9) Hnei angatr hna öhne laka, tha ceitu Iehova kö memine la itre he ne hmi ka ngazo thiina, me pi tru, me nyi ka meköt. Ka ipië Iehova, matre tha xou së kö troa easenyi Nyidrë.

5. Hnauëne laka, tha xou kö itre xan troa tro kowe la itre atr ka ipië?

⁵ Tro sa nyitipu Iehova tune kaa? Tro la itre atr a easenyi së, e ka ipië së. Maine tha ka ipië kö së, troa mama the së la itre thiina ka ngazo, tune la troa piine la itre xan, me mekune laka, sisitria kö së hui angatr, me xele ma nue la ngazo. Drei fe la ka hane pi ce tro memine la itre atr ka ujë tun? Ngo e ka ipië së, tro së lai a loi thiina, me xomihni, me nue la ngazo i itre xan. Ame e cili, tro la itre atr a nyisinee së. (Kol. 3:​12-​14) Nyipiewekë catr la thiina cili kowe la itre qatre thup. Eje hi, tha tro pi kö la itre trejin a xou troa wai angatr, me ithanata me angatr. Nemene la nyine tro la itre qatre thup a kuca? Loi e tro angatr a ce tro lapa memine la itre trejin. Ketre, tro angatr a isine troa sine la itre icasikeu ngöne la Uma Ne Baselaia, ngo tha jëne visioconférence kö. Loi e tro fe angatr a ce tro memine la itre trejin troa cainöj ngöne la itre hnalapa trootro. Ame e cili, tro la itre trejin a atre angatr hnyawa, me majem koi angatr. Nge tro ha hmaloi kowe la itre trejin troa ithanata me angatr.

KA ATREINE WAIEWEKË IEHOVA

6-7. Nemene la ka amamane ka hape, Iehova a dreng la sipo ne la itre hlue i Nyidrë? Qaja jë la ketre hna melën.

⁶ Ame la itre ka pi tru, kösë atre asë hi angatr koilo, nge itre ka catre fë mekun. Ngo ame Iehova, ka sisitria Nyidrë, nge atre asë hi Nyidrë la nöjei ewekë. Ngo pine laka, ka ipië Nyidrë, matre Nyidrëti a dreng la hna qaja hnei itre xan, me saze mekun. Tro sa ce wang la aqane ujë i Nyidrë koi Miriama, xa i Mose. Hnei eahlo me Arona hna xöjetriji Mose, lo ka nyitrengewekë i Iehova. Hnei Miriama e cili hna pë metrötr koi Iehova. Tha madrine kö Nyidrë koi eahlo, matre hnei Nyidrë hna lepi eahlo hnei lepera. Hnei Arona hna sipo Mose troa xëwe sai Miriama koi Iehova. Matre hnei Mose hna sipo iele Iehova troa amele eahlo. Nemene la hnei Iehova hna kuca? Ame la atr ka pi tru, ke tha tro kö angeic a saze mekun. Ngo tha celë kö aqane ujë i Iehova. Pine laka, ka ipië Nyidrë, hnei Nyidrë hna drei Mose me aloine la meci Miriama.​—Num. 12:​1-​15.

⁷ Hna mama fe la ipië i Iehova ngöne la aqane ujë i Nyidrë koi Hezekia joxu. Hnei Iehova hna upi Isaia perofeta troa thuemacanyi angeic laka, tro hë angeic a mec. Ngo hnei Hezekia hna treij koi Iehova, matre troa aloine la meci angeic. Nemene la hnei Nyidrëti hna kuca? Tru la utipine i Iehova, matre hnei Nyidrë hna ahuëne la mele i angeic koi 15 lao macatre. (2 It. Jo. 20:​1, 5, 6) Pine laka, ka itrotrohni Iehova, me ka ipië, matre Nyidrëti a dreng la itre atr.

8. Nemene la ka amamane ka hape, tha ka catre fë mekune kö Iesu? (Mareko 3:​1-6)

⁸ Iesu a nyitipu Iehova. Ame lo Iesu e celë fen, tha hnei nyidrëti kö hna catre fë mekun. Tha cil kö nyidrë troa xatua itre xan, ngacama hetre wathebo hna acil. Hnei nyidrëti hna aloine la meci ne la itre atr ngöne la drai Sabath, ngacama tha madrine kö la itre he ne hmi, itre ka ngazo thiina. Iesu a amamane e cili ka hape, nyidrëti a hnim la itre atr me atreine waiewekë. (E jë la Mareko 3:​1-6.) Iesu pala hi enehila a amamane la ihnimi nyidrë me atreine waiewekë, ngöne la aqane iujine nyidrë la itre ekalesia. Ame la ketre trejin a kei kowe la ngazo, Iesu a nue ijine koi angeic troa saze.​—Hna Am. 2:​2-5.

9. Tune kaa la aqane tro sa atreine waiewekë? (Goeëne ju fe la itre foto.)

⁹ Tro sa nyitipu Iehova tune kaa? Tha ka catrehnine kö la itre mekun me aqane ujë i Iehova. Matre loi e tro sa isine troa nyitipu Nyidrë. (Iako. 3:​17) Loi e tro la itre kem me thin a atreine waiewekë. Tha tro kö angatr a upe la itre nekönatr troa kuca la itre ewekë hnei nyudren hna thatreine kuca. Celë hi aqane ujë i Iakobo kowe la itre nekö i nyidrë ngöne Genese 33:​12-​14. Ketre, tha tro kö la itre kem me thin a xome ceitunën la itre nekö i angatr. Nge nyipiewekë fe tro la itre qatre thup a atreine waiewekë. Tha tro kö la qatre thup a catre fë mekun. Tro pe nyidrëti a kapa la mekun hna axeciën hnene la lapa ne la itre qatre thup, me ce huliwa me angatr. (1 Tim. 3:​2, 3) Nge loi e tro së isa ala cas a thel troa trotrohnine la mekuna i itre xan, ngacama ka isazikeu memine la mekuna së. (Roma 14:1) Eje hi, nyipiewekë tro la ekalesia asë a isine matre troa “mama cile kowe la nöjei atr ka hape, itre ka atreine tulu ewekë” së.​—Fil. 4:5.

KA ATREINE ITREQE IEHOVA

10. Nemene la ka amamane ka hape, ka atreine itreqe Iehova?

¹⁰ Ame la itre atr ka pi tru, ke ka xele ma itreqe. Isapengöi angatre catr me Iehova, ka atreine itreqe. Ame ngöne la hneijine i Noa, hnei Nyidrëti hna qaja ka hape, tro Nyidrëti a treqene la 120 lao macatre, qëmekene troa apatrene la itre atr ka ngazo. (Gen. 6:3) Matre hetre ijine i Noa troa hiane la itre nekö i angeic, me cane la aka memine la fami angeic. Nge ame lo Aberahama a hnying göi Sodroma me Gomora, hnene la angela i Iehova hna drei nyidrëti hnyawa. Maine atre ka pi tru ju, tro angeic a qaja ka hape, ‘Drei ö matre troa hnying koi ni?’ Ngo tui Iehova, hnene la angela hna treqene hnyawane tro Aberahama a ase ithanata.​—Gen. 18:​20-​33.

11. Thenge la 2 Peteru 3:​9, hnauëne la Iehova a itreqe enehila?

¹¹ Iehova pala hi enehila a itreqe. Nyidrëti a treqene la drai hnei Nyidrëti hna sa, matre troa apatrene la fene celë. Hnauëne la Nyidrëti a itreqe? “Ke xele kö Nyidrë troa apatrene la ketre e nyipunie, ngo loi e tro pe nyipunieti asë a ietra.” (E jë la 2 Peteru 3:9.) Ka hetre thangane kö la itreqe i Iehova? Öö! Qane ekö uti hë enehila, traqa koi itre milio lao atr ka easenyi Nyidrë. Nge easa ajan tro hmaca kö la itre xan a nyisinee i Nyidrë. Ngo ka hetre ifegone la atreine itreqe i Iehova. Iehova a hnim la itre atr, ngo tha tro kö Nyidrëti a nue angatr troa isa kuci mekun. Tha tro kö Nyidrëti a nue paluane la ngazo.—Habak. 2:3.

12. Tune kaa la aqane nyitipune Iesu la atreine itreqe i Iehova?

¹² Iesu a nyitipu Iehova. Qan ekö, Iesu a nyitipune la aqane itreqe i Iehova. Ekö hë nyidrëti dreng la Satana a qaja angazo Iehova, memine la itre hlue i Nyidrë ka mele nyipici. (Gen. 3:​4, 5; Iobu 1:​11; Hna Am. 12:10) Ketre, öhne hi nyidrë la itre akötr ka traqa kowe la itre atr. Tru catr la aja i Iesu troa “lep apatrene la itre huliwa i Diabolo”! (1 Ioa. 3:8) Nemene la ka xatua nyidrë troa treqene hnyawane la ijin hna sa? Pine laka, ka ipië nyidrë, atre hi nyidrë laka, qanyi Iehova kö axeciëne la ijin troa traqa la pun.​—It. Hu. 1:7.

13. Ame lo Iesu e celë fen, tune kaa la aqane amamane nyidrë laka, ka atreine itreqe, nge pine nemen?

¹³ Ame lo Iesu e celë fen, hnei nyidrëti hna amamane ka hape, ka atreine itreqe nyidrë, lo nyidrëti a xomihnine la itre aposetolo. Angatr pala hi a isi pi ka tru. Ngo, tha ase kö Iesu mekun ka hape, ka luzi hë angatr. Hnei nyidrëti pe hna catre itreqe. (Luka 9:​46; 22:​24-​27) Xecie koi nyidrë laka, ijiji angatr troa saze me ipië. Hapeu, jole kö koi eö troa saze la ketre thiina i eö ka ngazo? Maine eje hi, tru la madrine së, ke ka ipië me atreine itreqe la joxu së.

14. Tune kaa la aqane tro sa atreine itreqe?

¹⁴ Tro sa nyitipu Iehova tune kaa? Maine tro sa xom “la aqane waiewekë i Keriso,” tro së lai a mekun me ujë tui Iehova. (1 Kor. 2:​16) Tro sa xom tune kaa la aqane waiewekë i Keriso? Tro sa e la itre Evangelia. E thupen, loi e tro sa xomi ijine troa lapa mekun la hne së hna e, me thele la aqane waiewekë i Iesu. Nge nyipiewekë fe tro sa sipo Iehova troa xatua së troa mekun me ipië tui Iesu. Maine tro sa xom la aqane waiewekë i Keriso, tro hë së lai a tui Iehova, me atreine itreqe. Tro së lai a trotrohnine laka, loi e troa nue ijin koi së me koi itre trejin, troa mekun me ujë tui Iehova.​—Mat. 18:​26-​30, 35.

IEHOVA A WANGATRUNE LA ITRE KA IPIË

15. Tune kaa la aqane amamane Iehova laka, Nyidrëti a hnim la itre ka ipië? (Salamo 138:6)

¹⁵ E jë la Salamo 138:6. Pane mekune jë la: Ngacama Iehova la Atre Ka Sisitria ne la fen asë, ngo Nyidrëti a wangatrune la itre atr ka ipië! Tro sa ce wang la itre atr hnei Iehova hna hane wangatrun ekö, ngacama tha hna nyipiewekë angatre kö hnei itre xan. Thatre angatre hnyawa kö së, ngo hnei Iehova hna amë la ëje i angatr ngöne la Tusi Hmitrötr. Jëne Mose, hnei Iehova hna qeje Debora, lo föe ka thupë Rebeka. Hnei eahlo hna nyihluene la lapa i Isaaka, me lapa i Iakobo e thupen. Traqa koi 125 lao macatre ne huliwa eahlo koi angatr! Ngacama thatre hnyawa kö së la föe cili ka nyipici, ngo hnei Iehova hna amamane ngöne la Tusi Hmitrötr laka, ketre föe lai hna hnim catrën. (Gen. 24:59; 35:​8, ith.) Itre macatre thupen, hnei Iehova hna acili Dravita, ketre nekö trahmanyi ka thupë mamoe, troa joxu ne la nöje Isaraela. (2 Sam. 22:​1, 36) Ketre, ame lo kola hnaho Iesu, hnei Iehova hna up la itre angela troa thuemacanyine la itre ka thupë mamoe laka, mala ha la Mesia ngöne la traon e Bethelema. Angatre hi la ka pane kapa la ithuemacanyi cili. (Luka 2:​8-​11) Nge ame la Iosefa me Maria a tro sai Iesu kowe la uma ne hmi, hnei Iehova hna aijijëne la lue qatr, ene Simeona me Ana, troa öhne la Nekö i Nyidrë. (Luka 2:​25-​30, 36-​38) Eje hi, “ngacama ka draië Iehova, ngo öhne hi nyidrëti la itre ka ipië”!

16. Tune kaa la aqane nyitipune Iesu la aqane ujë i Iehova kowe la itre atr?

¹⁶ Iesu a nyitipu Iehova. Tui Iehova, Iesu a wangatrune la itre atr ka ipië. Hnei nyidrë hna inine la itre nyipici ne la Baselaia i Akötresie kowe la itre “atre ka thatre tusi.” (It. Hu. 4:​13; Mat. 11:25) Hnei nyidrëti fe hna aloine la itre atr ka wezipo me metrötrë angatr. (Luka 5:​13) Nge ame lo hej qëmekene tro nyidrëti a mec, hnei nyidrëti hna wasine la waca ne la itre aposetolo, hnëqa hna kuca hnene la itre hlu. (Ioa. 13:5) Ketre, qëmekene tro nyidrëti a elë a tro hnengödrai, hnei nyidrëti hna ahnith kowe la itretre dreng, me koi së fe enehila, la ketre hnëqa ka sisitria, ene la troa xatuane la itre atr troa kapa la mel ka pë pun.​—Mat. 28:​19, 20.

17. Tune kaa la aqane tro sa wangatrune la itre xan? (Wange ju fe la foto.)

¹⁷ Tro sa nyitipu Iehova tune kaa? Easa wangatrune la itre atr, la easa cainöj koi angatr, ngacama isa nöje së kö, me hane ngönetrei, maine ka ini aqenyi maine ka tha hane kö ini. Nge easa wangatrune la itre trejin la easa goeë angatr kösë ka sisitria kö angatr hu së, ngacama hetre hne së hna atreine kuca, maine hetre hnëqa së ngöne la ekalesia. (Fil. 2:3) Madrine catre Iehova la easa ipië “me pa troa metrötrë” itre xan e nöjei ijin.​—Roma 12:10; Zefa. 3:​12.

18. Hnauëne laka, aja i eö troa ipië tui Iehova?

¹⁸ Maine tro sa ipië tui Iehova, tha tro kö la itre atr a xou troa easenyi së, nge tro sa atreine waiewekë me itreqe. Ketre, tro së lai a wangatrune la itre xan tui Iehova. Nge the thëthëhmine kö laka, e tro sa catre easenyi Iehova, tro pala hi Nyidrëti a hnimi së!​—Isa. 43:4.