Catre Jë Tro Thenge La Lapaun

1. Pine nemen matre madrine catre Paulo kowe la mele i angeic?

ATRE hi Paulo aposetolo laka, easenyi hë tro angeic a mec. Ngo ame la angeic a mekun hmaca la mele i angeic, ke madrine catre angeic. Öni angeic: “Ase hë ni . . . sine la iwaja uti hë la hna ie, me melën la lapaun.” (2 Tim. 4:6-8) Ame ngöne la mele i angeic, hnei angeic hna axeciën la itre mekun ka loi, matre xecie koi angeic laka, madrine catre Iehova koi angeic. Ketre tu së fe, aja së troa xomi mekun ka loi me amadrinë Iehova. Troa tune kaa?

2. Kola hapeu la troa “tro thenge la lapaun”?

² Paulo a qeje angeic me itre xaa keresiano ka mele nyipici ka hape: “[Eahuni] a tro thenge la lapaun, ngo tha thenge kö la hna goeën.” (2 Kor. 5:7) Kola hapeue lai? Ame itre xaa ijin, kola xom la hnaewekë “tro” ngöne la Tusi Hmitrötr, matre troa qaja la aqane huliwane la ketre atr la mele i angeic. Ame la atr ‘ka tro thenge la hna goeën,’ ke angeic a axecië mekun thenge la hnei angeic hna öhn, me dreng, me aliene hni angeic. Ngo ame kö la atr ka tro thenge la lapaun, ke angeic a nyitrepene la itre mekun hnei angeic hna xom hnene la mejiune i angeic koi Iehova. Itre huliwa i angeic a amamane ka hape, nyine loi koi angeic la itre eamo qa hnine la Tusi Hmitrötr, nge tro kö Iehova a amanathithi angeic.—Sal. 119:66; Heb. 11:6.

3. Nemene la itre manathith hne së hna troa kapa e tro sa tro thenge la lapaun? (2 Korinito 4:18)

³ Eje hi, ame itre xaa ijin, easa xomi mekun thenge la hne së hna öhn, me dreng, me aliene hni së. Ngo e tro hi sa mejiune kowe la hne së hna öhn me dreng la easa axeciën la itre mekun ka tru, ke tro së lai a ixelë me jol. Pine nemen? Pine laka, ijije hi tro itre ej a amenu së. Ketre, e tro hi sa tro thenge la hna goeën, ke tro së lai a wangacon la itre eamo i Akötresie, me ena la itre wathebo. (A. Cai. 11:9; Mat. 24:37-39) Ngo e tro sa tro thenge la lapaun, ke tro së lai a xom la itre mekun ka “amadri Joxu.” (Efe. 5:10) Nge e tro sa trongëne la itre hna amekötin hnei Nyidrë, tro ha tingeting me madrin la mele së. (Sal. 16:8, 9; Isa. 48:17, 18) Ketre, e tro sa catre tro thenge la lapaun, tro së lai a kapa la mel ka pë pun.—E jë la 2 Korinito 4:18.

4. Tro sa atre tune kaa ka hape, easë kö a tro thenge la lapaun maine thenge la hne së hna goeën?

⁴ Tro sa atre tune kaa ka hape, easë kö a tro thenge la lapaun, maine thenge la hne së hna goeën? Loi e tro sa isa hnying ka hape: Nemene la ka uku ni troa xome la mekune cili? Kolo hmekuje hi la hnenge hna goeën? Maine mejiuneng koi Iehova me itre eamo i Nyidrë? Ame ngöne la tane mekun celë, tro sa ce wang la aqane tro sa tro thenge la lapaun ngöne la easa thele huliwa, me ngöne la easa thele föi easë, me ngöne la easa kapa la itre hna amekötin ka hnyipixe qaathene la organizasio i Iehova. Ame ngöne la köni götrane celë, tro sa wang la itre ewekë nyine tro sa pane atre, qëmekene troa xomi mekun ka loi.

LA EASA THELE HULIWA

5. Nemene la ewekë nyine tro sa pane goeën la easa thele huliwa?

⁵ Aja i easë asë hi troa thupëne la fami së, me hetrenyi la ka nyipiewekë koi së. (A. Cai. 7:12; 1 Tim. 5:8) Ame la itre xaa huliwa, ke hna nyithupene hnyawan. Ame la itre atr ka hetre huliwa ka tun, ke ijiji angatr troa itön la hnei angatr hna ajan, me ami mani acon. Ngo ame kö la itre xaa huliwa, ke ijije hi troa itön la ka nyipiewekë kowe la fami. Celë hi matre ala nyimu la itre atr ka pane goeëne la etrune la thupe i angatr, qëmeken troa kapa la ketre huliwa. Maine eje pe hi lai hne së hna goeën la easë a thele huliwa, ke easë hi lai a tro thenge la hna goeën.

6. Tune kaa la aqane tro sa tro thenge la lapaun, la easa thele huliwa? (Heberu 13:5)

⁶ Maine easë la itre ka tro thenge la lapaun, tro së lai a pane wang la thangane la huliwa cili kowe la imelekeu së me Iehova. Loi e tro sa isa hnying ka hape: ‘Hapeu, tro kö la huliwa celë a uku ni troa kuca la itre huliwa hnei Iehova hna xel ma wang?’ (It. Ed. 6:16-19) ‘Tro kö ej a sewe ni troa nyihlue i Iehova hnyawa maine ananyi ni memine la faming?’ (Fil. 1:10) Maine eje hi, loi e troa thipëne la huliwa cili, ngacama jole troa öhnyi xaa huliwa. Maine easë la itre ka tro thenge la lapaun, tro së lai a axeciëne la itre mekun ka amamane ka hape, xecie koi së laka, tro kö Iehova a thupë së.—Mat. 6:33; E jë la Heberu 13:5.

7-8. Nemene la hna kuca hnene la ketre trejin qa Amérique du Sud matre tro thenge la lapaun? (Wange ju fe la foto.)

⁷ Hnei Javier,a ketre trejin qa Amérique du Sud hna trotrohnin la enyipiewekën troa tro thenge la lapaun. Öni angeic: “Hnenge hna öhne la ketre huliwa ka lolo, nge ame la thupen, ke troa alu hune lo hnenge hna kapa ekö, nge tro ni a kepe madrin qa ngön.” Ngo tru la aja i Javier troa pionie, matre öni angeic: “Hna hë ni troa ithanatane la huliwa cili memine la ketre hene ka tru. Qëmekene tro ni a tro, hnenge hna thithi koi Iehova, ke xecie koi ni laka, atre kö Nyidrë la ka loi koi ni. Eni a ajan troa hetre huliwa ka loi, ngo xele ni tro la huliwa cili a sewe ni troa huliwa catr koi Iehova.”

⁸ Öni Javier: “Hnenge hna ithanata memine lo hene ka tru, nge hnei nyidrëti hna qaja koi ni ka hape, tro pala hi ni a huliwa tar. Hnenge hna sa ka hape, tha ijijinge kö, ke hetre huliwange fe koi Akötresie.” Matre tha kapa kö Javier la huliwa cili. Lue wiik thupen, hnei angeic hna xome la huliwa ne pionie. Ame ju kö ngöne la macatre cili, hnei angeic hna öhne la ketre huliwa sine la drai. Öni angeic: “Hnei Iehova hna sa la itre thithing, me hamë ni la ketre huliwa ka aijijë ni troa pionie. Madrine catre ni kowe la huliwa cili, ke ej a aijijë ni troa nyihlue i Iehova, me xatuane la itre trejin.”

9. Nemene la hna ini së hnene la tulu i Trésor?

⁹ Nemene la nyine tro sa kuca e öhne hi së laka, huliwa së a sewe së troa tro thenge la lapaun? Tro sa ce wange la hna melën hnei Trésor ka mel e Congo. Öni angeic: “Pëkö xaa huliwa ka lolo tune la huliwang. Ame la thupen, ke troa akön hune lo hnenge hna kapa ekö, nge itre atr a metrötrë ni.” Ngo Trésor a triane la itre icasikeu, ke angeic a huliwa tar. Ketre, itre sine huliwa i angeic a uku angeic troa juetrëne la itre aqane huliwa qenatrekënö hna kuca e hnine la entreprise. Pi tro hi Trésor a nue la huliwa cili, ngo xou i angeic troa pë huliwa. Nemene la ka xatua angeic? Öni angeic: “Hnene la tusi Habakuka 3:17-19 hna xatua ni troa trotrohnine laka, ngacama troa pë huliwang ngo tro kö Iehova a thupë ni. Hnenge pë hë hna nue lai huliwa. Itre maseta a mekun ka hape, tro la itre atr a wangacon la mele ne fami i angatr, me hmi i angatr, me nu asë kowe la itre huliwa hna nyithupene hnyawa. Madrine catre ni, ke hnenge hna thupën la imelekeung me Akötresie, me imelekeung me faming. Ame lo macatre thupen, hnei Iehova hna xatua ni troa öhne la ketre huliwa ka lolo, ka aijijë ni troa melën la hna hetreny, me huliwa catr koi Nyidrë.” Ame la easa amë panën la hmi Iehova ngöne la mele së, ke tro së lai a hetre jol göi mani lo xötrei, ngo tro kö Iehova a thupë së. Maine tro sa mejiun kowe la itre eamo me itre hnei Nyidrëti hna thingehnaean, tro pala hi së lai a tro thenge la lapaun, nge tro Nyidrëti a amanathithi së.

LA EASA THELE FÖI EASË

10. Tune kaa la aqane tro la ka pi faipoipo a tro thenge la hna goeën?

¹⁰ Ketre ahnahna qaathei Iehova la faipoipo, nge meköt e troa pi faipoipo. Ame la trejin föe ka mekun troa faipoipo, ke tro xapo lai a canga goeën la emingömingöne la trejin trahmany, me aqane ujë i angeic, me aqane goeë angeic hnei itre xan, me aqane huliwane la mani, me aqane thupëne la fami angeic. Ka nyipiewekë troa goeëne hnyawan la itre götrane cili. Ngo maine tro hi angeic a goeëne lai, ke angeice hi lai a tro thenge la hna goeën.b

11. Tune kaa la aqane tro la ketre atr ka pi faipoipo a tro thenge la lapaun? (1 Korinito 7:39)

¹¹ Drei jë kö la madrine i Iehova la itre trejin a wangatrune la itre eamo i Nyidrë la angatr a thele föi angatr. Angatr a pane sasaith lo ijin hna hape, “xötrei tru” qëmeken troa iatre. (1 Kor. 7:36) Nge ame la hnei angatr hna thel thene la ketre atr, ke ene lo itre thiina i Iehova ka amamane ka hape, ketre trahmanyi lai ka lolo maine föe ka loi thiina. (It. Ed. 31:10-13, 26-28; Efe. 5:33; 1 Tim. 5:8) Nge maine tro la ketre atr ka tha hmi kö a thele ihanyi me angatr, ke angatr a trongën la eamo hna hape, troa faipoipo “thei Joxu hmekuje hi” ka ej ngöne 1 Korinito 7:39. (E jë.) Angatre pala hi a tro thenge la lapaun, ke xecie koi angatr laka, tro kö Iehova a hamëne la hnei angatr hna ajan.—Sal. 55:22.

12. Nemene la hna ini së hnene la hna melën hnei Rosa?

¹² Rosa la ketre pionie ka mel e Colombie. Ame koilo hna huliwa, ke kola wesiwesi koi angeic hnene la ketre nekö trahmany ka tha hmi kö. Nge Rosa a madrin la kola wesiwes koi angeic hnene la nekö trahmany cili. Öni Rosa: “Ka lolo catr angeic. Angeic a xatuane la nöjei atr, nge ka lolo la mele i angeic. Nge ka lolo la aqane ujë i angeic koi ni. Hetrenyi asë thei angeic la itre thiina hnenge hna thel thene la trahmany. Ngazo pe, tha ka Temoë kö angeic.” Öni Rosa hmaca jë hi: “Jole catr koi ni troa thipëne la sipo i angeic, ke ajane hi la hning. Ame ngöne la ijine cili, eni a pi faipoipo, ngo pëkö trejin trahmany hnenge hna öhn.” Eloine pe, tha hnei Rosa kö hna xomi mekun ‘thenge la hnei angeic hna goeën.’ Hnei angeic hna lapa mekun la thangane lai kowe la imelekeu i angeic me Iehova. Hnei angeic hna ananyine la nekö trahmanyi cili, me catre huliwa koi Iehova. E thupen, hna hane hë angeic troa sine la Ini Koi Itre Ka Cainöj. Ketre pionie huti hë Rosa enehila. Öni angeic: “Hnei Iehova hna atiqane la hning hnei madrin.” Tha ka hmaloi kö tro pala hi a tro thenge la lapaun ngöne la itre götran laka, kola huli së hnene la hni së. Ngo hetre manathith hne së hna troa kapa.

LA EASA KAPA LA ITRE HNA AMEKÖTIN KA HNYIPIXE

13. Tro la atr ka tro thenge la hna goeën a ujë tune kaa kowe la itre hna amekötin hnene la organizasio i Iehova?

¹³ Organizasio i Iehova a hamëne pala hi koi së la itre hna amekötin göne la hmi së. Easa kapa itre ej qaathene la itre qatre thup, maine atre thupën la sirkoskripsio, maine qaathene la Bethela, maine Lapa Ne Xomi Meköt. Ngo tune kaa e tha trotrohnine kö së la kepin matre kola hamën la itre hna amekötin cili? Loi e tro sa thupëne matre tha tro kö sa goeëne la itre götrane ka ngazo, maine itre tria ne la itre trejin ka hamën itre ej.

14. Tune kaa la aqane tro sa tro thenge la lapaun la easa kapa la itre hna amekötin qaathene la organizasio i Iehova? (Heberu 13:17)

¹⁴ Maine easa tro thenge la lapaun, ke troa xecie koi së laka, Iehova la ka iujin la organizasio, nge atre kö Nyidrë la hne së hna melën. Tro hë së lai a canga idrengethenge, me madrin troa kuca. (E jë la Heberu 13:17.) Tro fe së lai a trotrohnine laka, nyipiewekë tro sa idrengethenge, matre acatrene la cas ne la ekalesia. (Efe. 4:2, 3) Ngacama ka tha pexeje kö la itre trejin ka elemeken, ngo tro kö Iehova a amanathithi së e tro sa idrengethenge. (1 Sam. 15:22) E hetre ewekë nyine troa saze, tro kö Iehova a amekötin ngöne la nyipi ijin.—Mika 7:7.

15-16. Nemene la ka xatuane la ketre trejin troa tro thenge la lapaun la angeic a kapa la ketre hna amekötin ka hnyipixe? (Wange ju fe la foto.)

¹⁵ Tro sa ce wange la ketre ewekë ka traqa, nge ka amamane laka, hetre thangane la troa tro thenge la lapaun. Ame e Pérou, qene Espagnol la qene hlapa ka tru. Ngo ala nyimu la itre atr e cili, ka ithanatane la sipu qene hlapa i angatr. Ame la ketre, ke kolo qene Quechua. Qaan ekö, hnene la itre ka cainöj qene Quechua, hna thele la itre atr ka qaja la qene hlapa cili ngöne la teritoare i angatr. Ngo pine laka hetre hna amekötine ka hnyipixe qaathei mus, hna saze la aqane cainöje cili. (Roma 13:1) Nge hnene la itre xan hna mekun ka hape, tro lai a hetre thangane ka ngazo kowe la huliwa ne cainöj. Ngo hnene la itre trejin hna idrengethenge matre hnei Iehova hna amanathithine la itre trengecatre i angatr troa thele la itre atr ka qene Quechua.

¹⁶ Kevin la ketre qatre thup ne la ekalesia ka qene Quechua, nge hnei angeice fe hna hane luelu. Öni angeic: “Eni a qaja e kuhu hning ka hape, ‘Tro jë së lai a tune kaa, matre öhne la itre atr ka qene Quechua?’ ” Nemene hë la hnei angeic hna kuca? Öni angeic: “Hnenge hna mekun la tusi Itre Edromë 3:5. Nge mekune hmaca jë hi ni la tulu i Mose. Hnei Mose hna thepe angetre Isaraela qa Aigupito, me tro sai angatr kowe la ketre götran laka, pëkö jëne kötr. Kösë kola nue angatr hmaca kowe la angetre Aigupito. Eloine pe, hnei Mose hna idrengethenge, nge tha nyine qaja kö la aqane amanathithi angeic hnei Iehova.” (Eso. 14:1, 2, 9-11, 21, 22) Thupene lai, hnei Kevin hna saze la aqane cainöje i angeic. Nemene hë la thangan? Öni angeic: “Eni a hain la aqane amanathithi hun hnei Iehova. Ame ekö, tru la hnei eahun hna trongë ihnadro, nge casi hi maine lue atr ka qene Quechua hnei eahuni hna öhn. Ngo ame hë enehila, eahuni a cainöj ngöne la itre teritoar laka, tru hnei atr ka qaja la qene hlapa cili. Matre alanyim la itre atr hnei eahun hna porotrik memin, me wang hmaca, me ini Tusi memin. Nge ala nyimu la itre atr ka pi atre la nyipici ka hane sine la itre icasikeu.” Eje hi laka, e tro sa tro thenge la lapaun, ke tro pala hi Iehova a amanathithi së.

17. Nemene la hne së hna ce wang ngöne la tane mekun celë?

¹⁷ Hne së hna ce wang la aqane tro sa tro thenge la lapaun ngöne la köni götran ka nyipiewekë. Ngo loi e tro sa tro thenge la lapaun ngöne la nöjei götrane la mele së, tune la itre nyine iamadrinë, itre ini aqeany, me aqane troa hian la itre nekönatr. Ame la itre mekun hne së hna troa axeciën, ke loi e troa nyitrepen itre ej hnene la imelekeu së me Iehova, itre eamo i Nyidrë, me hnei Nyidrëti hna thingehnaean, ene la troa thupë së. Haawe, tro së lai a “tro ngöne la ëje i Iehova Akötresi së uti hë epine palua.”—Mika 4:5.