Hnauëne La Tro Sa Thele Eamo?

1. Nemene la ka troa xatua së troa axecië mekune hnyawa me eatrëne la itre projet së? (Itre Edromë 13:10; 15:22)

AJA së asë hi troa axecië mekune ka loi. Nge aja i easë troa eatrëne la itre projet së. Tusi Hmitrötr a qaja la aqane tro sa eatrëne la lue mekune cili.​—E jë la Itre Edromë 13:10; 15:22.

2. Nemene la hnei Iehova hna qaja ha koi së?

² Maine aja së troa inamacan me öhnyi eamo, loi e tro sa thele ixatua thene la Keme së, Iehova. Ase hë Nyidrëti lo qaja ka hape, tro Nyidrëti a ce me easë. Öni Nyidrë: “Pi tro ni a eamo eö, me thupë eö.” (Sal. 32:8) Nyidrëti e celë a amaman ka hape, tha Nyidrëti hmekuje kö a hamë së la itre eamo, ngo Nyidrëti fe a hnimi së me xatua së troa trongën itre ej.

3. Nemene la itre hnying hne së hna troa sa ngöne la tane mekun celë?

³ Ame ngöne la tane mekun celë, tro së a sa la foa lao hnying jëne la Tusi Hmitrötr: (1) Nemene la lue thiina ka troa xatua ni troa kapa hnyawane la itre eamo? (2) Drei la ka ijij troa hamë eamo ka lolo koi ni? (3) Tune kaa la aqane tro ni a kapa hnyawane la itre eamo? (4) Pine nemen matre tha tro kö ni a sipo itre xan troa axecië mekune koi ni?

NEMENE LA LUE THIINA NYINE TRO NI A HETRENY?

4. Nemene la lue thiina ka troa xatua së troa kapa hnyawan la itre eamo?

⁴ Maine aja së troa xomi ini qa ngöne la itre eamo hne së hna kapa, loi e tro sa ipië me atre la itre ifego së. Eje hi, hna nyi ifegone hi la inamacane së, nge thatre hnyawa kö së koilo. Haawe, loi e tro sa atrehmekune laka, easa aja ixatua matre axecië mekune ka loi. Maine tha ka ipië kö së maine easa sasaithi tulu, ke tha tro kö Iehova lai a xatua së. Ngacama xomi ini ju hë së qa ngöne la hne së hna e Tusi Hmitrötre, ngo ka gufa lai. (Mika 6:8; 1 Pet. 5:5) Ngo e ka ipië së nge atre hi së la itre ifego së, ke tro së lai a kapa la itre eamo qa hnine la Tusi Hmitrötr me canga trongëne itre ej.

5. Maine ju, nemen la itre ewekë ka troa uku Dravita troa pi mama?

⁵ Tro sa ce wang la tulu i Dravita joxu. Maine ju, tro angeic a pi mama fë la itre talane i angeic, me itre hnei angeic hna kuca. Qëmeken tro angeic a joxu, ka hlemu catre angeic, ke ka atreine catre angeic elo miuzik. Goi upi angeice fe troa elo miuzik koi joxu. (1 Sam. 16:​18, 19) Thupen la kola sië angeic troa joxu, hnei Iehova hna hamë angeic la uati hmitrötre i Nyidrë. Qaane ju hi lai, hetre trenge catre i angeice jë hi. (1 Sam. 16:​11-​13) Hna atre angeic hnene la nöj, jëne la itre hnei angeic hna kuca ngöne la hna isi. Tune lo angeic a ngaa Goliatha, ketre atre Filisiti ka tru hmae. (1 Sam. 17:​37, 50; 18:7) Hapeu, hnei angeic kö hna pi mama fë la itre ewekë ka tru hnei angeic hna kuca me qaja ka hape, tha angeic kö a aja ixatua? Waea, hnei angeic hna ipië.

6. Nemene la ka amaman ka hape ka kepe eamo lae Dravita? (Wange ju icetrön.)

⁶ Ame hë la Dravita a joxu, hnei angeic pala hi hna thele eamo thene la itre xan. (1 Aq. Jo. 27:​32-​34) Tha sesëkötre kö së, ke hnei angeic pala hi hna dreng la kola hamë eamo. Hnei angeic hna kapa la itre eamo qathene la itre trahmany, ngo qathene fe la ketre föe, Abigaila la ëjen. Kolo föi Nabala ketre trahmany ka pë metrötr me pi tru, nge ka xeni cipa. Hnei Dravita hna trongëne la itre eamo i Abigaila, matre tha kuca ju kö angeic la ketre ngazo ka tru.​—1 Sam. 25:​2, 3, 21-​25, 32-​34.

7. Nemene la itre ini hne së hna xom qa ngöne la tulu i Dravita? (Atre Cainöj 4:​13) (Wange ju fe la itre foto.)

⁷ Hetre ini nyine tro sa xome qa ngöne la tulu i Dravita. Maine hetre talane së maine hnëqa së pena ka tru, tha tro kö së pi nyi ka atre maine qaja ka hape, tha easë kö a aja eamo. Hamë eamo ju hë koi së hnei ketre maine ketre, ngo loi e tro sa kapa tui Dravita. (E jë la Atre Cainöj 4:​13.) E tro sa ujë tun, ke tha tro kö së lai a kuca la ketre ewekë ka ngazo, ka troa akötrë së me itre xan.

DREI LA KA IJIJ TROA HAMË EAMO KOI NI?

8. Pine nemen matre Ionathana hi la ka ijij troa hamë eamo ka lolo koi Dravita?

⁸ Nemene la ketre ini nyine tro sa xome qa ngöne la tulu i Dravita? Hnei Dravita hna drenge la itre eamo qathene la itre atr ka imelekeu hnyawa me Iehova, nge ka atre hnyawa fe la hna melën hnei angeic. Ame lo angeic a thele troa hetre imelekeu hmaca me Saulo joxu, hnei angeic hna dreng la itre eamo i Ionathana, nekö i Saulo. Pine nemen matre Ionathana la ka ijij troa hamë eamo ka lolo koi angeic? Pine laka, ka lolo la aqane imelekeu Ionathana me Iehova, nge atre hnyawa hi angeic la keme i angeic. (1 Sam. 20:​9-​13) Nemene la ini hne së hna troa xom?

9. Drei la hne së hna troa wang la easa aja eamo? (Itre Edromë 13:20)

⁹ Ame la easa aja eamo, ke easa thele ixatua thene la ketre atr ka hnimi Iehova, nge ka atre hnyawa fe la pengöne la ewekë hne së hna ajan.a (E jë la Itre Edromë 13:20.) Pane mekune jë laka, ketre trejine trahmany a pi faipoipo. Drei la ka ijij troa hamë eamo ka lolo koi angeic? Ijije hi tro la ketre sinee i angeic ka tha i faipoipo pala kö a hamë eamo koi angeic, thenge la itre trepene meköt ne la Tusi Hmitrötr. Ngo the qaja pala ha la lue trefën ka imelekeu hnyawa me Iehova, nge ka atre angeic hnyawa, nge ka madrine nyidro ngöne la faipoipo. Tro nyidroti lai a hamë eamo ka lolo nge ka ihmeku hnyawa.

10. Nemene la hne së hna troa ce wang?

¹⁰ Hne së hna ce wang la lue thiina nyine tro sa hetreny, me itre atr ka ijij troa hamë eamo ka lolo. Tro pena sa ce wange la kepin, matre loi tro sa kapa hnyawan la itre eamo me wang ka hape, tro kö sa nue itre xan troa xomi mekune koi së?

TUNE KAA LA AQANE TRO NI A KAPA HNYAWAN LA ITRE EAMO?

11-12. (a) Nemene la hne së hna pi kuca e xaa ijin? (b) Qëmeken troa xome la ketre mekun ka tru, nemene la hna kuca hnei Reoboama joxu?

¹¹ Maine jë tro la ketre atr a thele eamo thoi, ngo ase hë angeic axecië mekun, me thele sine xöle i angeic. Tha atre kö lai ka aja eamo. Tro sa ce wang la tulu i Reoboama joxu ka troa hmekë së.

¹² Hna acili Reoboama troa joxu thupei Solomona keme i angeic. Ka trenamo e Isaraela, ngo ame kowe la itre atre ne la nöj, kösë hna thahluë angatr hnei Solomona. Matre qa i angatr hna wai Reoboama troa ahmaloeëne la ehnef i angatr. Hnei Reoboama hna sipon troa pane nue ijin koi angeic. Ka lolo la aqane kuca i angeic lo xötrei. Hnei angeic hna thele eamo thene la itre trahmany ka macaj, ka huliwa ekö kowe la keme i angeic. (1 It. Jo. 12:​2-7) Ngo, tha hnei angeic kö hna kapa la itre eamo i angatr. Pine nemen? Maine jë, atre hë angeic la nyine tro angeic a kuca. Ngo angeice hi a thele sine xöle i angeic. Maine eje hi, hnei angeic hna öhne la itre sine xöle i angeic, thene la itre sine xötre i angeic. (1 It. Jo. 12:​8-​14) Hnei Reoboama hna qaja kowe la nöj la trengewekë hnei angeic hna kapa qathene la itre sine xötre i angeic. Ame la thangane lai, hna thawa luëne la nöj, nge hna traqa itrai la itre jol koi Reoboama.​—1 It. Jo. 12:​16-​19.

13. Tro sa atre tune kaa ka hape, easa kapa hnyawan la itre eamo?

¹³ Nemene la hna ini së hnene la tulu ka ngazo i Reoboama? Ame la easa thele eamo, ke loi e tro sa kapa hnene la mekuna së me hni së. Nemene la ka troa amaman ka hape, easa kapa hnyawan la itre eamo? Isa hnyinge jë së ka hape, ‘Ame la eni a thele eamo thei ketre, eni kö a thipetrij e tha ka ihmeku kö memine la mekunang?’ Hane hi la ketre ceitun.

14. Ame la easa thele eamo, nemen la nyine tro sa mekun? Qaja jë la ketre ceitun. (Wange ju fe la foto.)

¹⁴ Pane mekune jë ka hape, hnene la ketre trejin trahmany hna öhnyi huliwa hna nyithupene hnyawan. Qëmeken tro angeic a kapa lai huliwa, hnei angeic hna thele eamo thene la ketre qatre thup. Hnei angeic hna qaja kowe lai qatre thup ka hape, tro la huliwa cili a ananyi angeic qathene la fami angeic koi nyimu drai. Hnene la qatre thup hna amexeje koi angeic, la trepene meköt qa hnine la Tusi Hmitrötr. Ame la pane hnëqa i angeic, ke troa thupëne hnyawane la fami angeic, matre imelekeu hnyawa me Iehova. (Efe. 6:4; 1 Tim. 5:8) Maine tro lai trejin a thele kepin la eamo ne la qatre thup, me thele eamo thene la itre xan uti hë la angatr a qaja la hnei angeic hna pi dreng, ke hapeu, tro kö së lai a qaja ka hape, angeic a thele eamo? Ma ase hë angeice lai axecië mekun, ngo angeic pe a thele sine xöle i angeic. Tha tro kö sa thëthëhmine ka hape, ka iaö la hni së. (Iere. 17:9) Ame la itre eamo ka loi koi së, ke kolo hi lo hne së hna xele ma dreng.

TRO KÖ NI A UPI KETRE TROA AXECIË MEKUN KOI NI?

15. Nemene la nyine tro sa thupën, nge pine nemen?

¹⁵ Isa qanyi easë kö xomi mekun koi së kö. (Gal. 6:​4, 5) Tune lo hne së hna ce wang, ka inamacan la atr ka thele eamo e hnine la Tusi Hmitrötr, me thene la itre trejin ka macaj qëmeken troa axecië mekun. Ngo loi e tro sa thupën, matre tha tro kö sa sipo itre xan troa axecië mekun koi së. Celë hi hna kuca hnei itre xan, la angatr a hnying koi ketre ka hape, “Maine eö ju ni, nemene la hnei eö hna troa kuca?” Ame la itre xan, angatre hi a inyitipu, ngo tha pane thele kö la nyine troa kuca.

16. Nemene la ka traqa kowe la angetre Korinito, nge drei la ka troa axecië mekun göne lai? (1 Korinito 8:​7; 10:​25, 26)

¹⁶ Hane hi la ketre hnying hna amejën ekö ngöne la ekalesia ne Korinito: Tro kö la itre keresiano a öni miitr hna huujën koi idrola? Öni Paulo kowe la angetre Korinito: “Atre hi huni laka, ka gufa hnyawa la itre idrola, nge casi hi la nyipi Akötresie.” (1 Kor. 8:4) Ame koi itre xaa trejin, pëkö engazone la troa öni miitr hna huujëne koi idrola, nge hna salemën e thupen ngöne la hna maketr. Ame pena itre xan, hnei angatr hna iën troa tha öni miitr, matre tha tro kö a athixötrëne la mekuthetheu i angatr. (E jë la 1 Korinito 8:​7; 10:​25, 26.) Isa qanyi angatre kö axecië mekun. Tha hnei Paulo kö hna qaja koi angatr troa axecië mekun koi itre xan, maine inyitipu pena. Tro kö angatre lai a “isa qeje thiinan qëmeke i Akötresie.”​—Roma 14:​10-​12.

17. Nemen la ka troa traqa e tro sa inyitipu? Qaja jë la ketre ceitun. (Wange ju fe la itre foto.)

¹⁷ Tune kaa fe enehila? Tro sa ce wang göne la wamine mutine madra. Qanyine kö la trejin iën ka hape, tro kö angeic a xom maine tha xome la itre wamine mutine madra.b Nyipici laka, tha nyipi trotrohnine kö së la pengöne la itre wamine mutine madra. Ngo nyipiewekë tro sa isa axecië mekun. Ehnef i easë hi lai nyine tro sa isa thu. (Roma 14:4) Maine tro sa inyitipu, ke easa ajolëne la mekuthetheu së. Eje hi, easa acatren me inine la mekuthetheu së, la easa huliwan ej. (Heb. 5:​14) Eu la easa thele eamo thene la ketre trejin ka macaj? Lo easë a ase ithel, nge tha trotrohnine kö së la aqane troa trongën la itre trepene meköt.

THE CILE KÖ TROA THELE EAMO

18. Nemen la hnei Iehova hna kuca koi së?

¹⁸ Tru la hnei Iehova hna mejiune koi së, la Nyidrëti a nue së troa isa axecië mekun. Hnei Nyidrëti hna hamë së la Tusi Hmitrötr me itre sinee së ka inamacan, ka troa xatua së troa trotrohnin la itre trepene meköt. Kolo hi lai a amaman ka hape, Nyidrëti la Keme së ka tru ihnimin. (It. Ed. 3:​21-​23) Tro sa olene tune kaa koi Nyidrë?

19. Tune kaa la aqane tro pala hi sa amadrinë Iehova?

¹⁹ Eje hi, madrine catr la itre kem me thin, la angatr a öhne la itre nekö i angatr a macaje trootro, me inamacan me hnimi itre xan. Ketre tun Iehova a madrin, la Nyidrëti a öhnyi së a macaje trootro, me thele eamo thei itre xan, me xome la itre mekun ka atrunyi Nyidrë.