Aqane Troa Hamë Eamo

1. Drei la ka troa hamë eamo, nge pine nemen?

KA HMALOI kö koi eö troa hamë eamo? Ka hmaloi hi koi xan. Ngo ame itre xan, ke xou i angatr. Troa traqa la itre ijine laka, nyipiewekë tro sa eamo ketre. Pine nemen? Öni Iesu lo, troa wangatrehmekun la itretre drei nyidrë, qa ngöne la aqane ihnimikeu i angatr. (Ioa. 13:35) Nge ame la ketre aqane tro sa hnim la itre trejin, ke ene la troa eamo angatr. Öni Tusi Hmitrötr, kola “nyiqaane” maine acatrene la imelekeu së me ketre, hnene la “hna hamë eamo ka nyipici.”​—It. Ed. 27:9.

2. Nemene la nyine tro la itre qatre thup a atreine kuca, nge pine nemen? (Wange ju la hna eköhagen, “Itre Eamo Hna Hamën Ngöne La Icasikeu Ne Nyipine Wiik.”)

² Nyipiewekë tro la itre qatre thup a atreine hamë eamo. Loi e tro fe angatr a inine troa hamëne hnyawan. Hnei Iehova me Iesu hna upi angatr troa thupëne hnyawane la ekalesia. (1 Pet. 5:​2, 3) Ame la ketre aqane tro angatr a eatrëne la hnëqa i angatr, ke ene la troa hamë eamo hna nyitrepene hnei Tusi Hmitrötr, la angatr a cilefë cainöj kowe la ekalesia. Ngo ame itre xaa ijin, tro fe angatr a hën acone la ketre trejin matre eamo angeic, tune fe la itre ka ananyine la ekalesia. Tune kaa la aqane tro la itre qatre thup, me easë mina fe a atreine hamë eamo?

3. (a) Nemene la nyine tro sa kuca matre tro sa atreine hamë eamo? (Isaia 9:6; wange ju la hna eköhagen “Nyitipu Iesu Jë La Eö a Hamë Eamo.”) (b) Nemene la hne së hna troa ce wang ngöne la tane mekun celë?

³ Tro sa atreine hamë eamo, e tro sa xötrethenge la tulu ne la itre hlue i Iehova ekö, tui Iesu. Tusi Hmitrötr a hë nyidrë ka hape, “Atresi Ka Sisitria.” (E jë la Isaia 9:6.) Ame ngöne la tane mekun celë, tro sa ce wang la nyine tro sa kuca, e kola sipo eamo koi së. Nge tro fe sa ce wang la nyine tro sa kuca, e tha hna sipo eamo kö koi së, ngo ka nyipiewekë tro sa hamën. Ketre, tro sa ce wang la aqane tro sa hamë eamo, memine la enyipiewekën troa hamën ngöne la nyipi ijin.

LA KOLA SIPO EAMO KOI SË

4-5. Ame la kola sipo eamo koi së, nemene la nyine tro sa pane kuca? Hamëne jë la ketre ceitun.

⁴ Nemene la nyine tro sa pane kuca la kola sipo eamo koi së? Maine jë, kola ketri së, matre easa canga pi qaja la mekuna së. Ngo loi e tro sa pane hnying ka hape, ‘Ijijinge kö troa hamë eamo göne la götrane cili?’ Ame itre xaa ijin, ka loi tro sa upi angeic troa wang la ketre atr ka ijij troa xatua angeic.

⁵ Tro sa xom la ketre ceitun. Pane mekune jë laka, tru la meci ne la ketre sinee i eö. Hnei angeic hna ithel göne la aqane troa nyinyine la meci angeic, ngo angeic a ajan tro eö a qaja la ka loi koi eö. Maine jë, hetre mekuna i eö, ngo tha droketre kö eö, nge thatre pengöne hnyawa kö eö la ewekë cili. Matre loi e tro pe eö a xatuane la sinee i eö, troa thele la ketre atr ka atre hnyawa la meci angeic, nge ka ijij troa xatua angeic.

6. Pine nemene matre loi e tro sa nue ijin qëmekene troa sa kowe la atr ka sipo eamo koi së?

⁶ Ngacama ijiji easë troa hamëne la eamo, ngo loi e tro sa pane nue ijin qëmekene troa qaja la mekuna së. Pine nemen? Öni Itre Edromë 15:​28, “Ame la hni ne la atr ka meköt, ke ej a pane mekun qëmekene troa sa.” Ngacama atre hi së la nyine troa kuca, ngo loi e tro sa xomi ijin troa pane ithel, me thith, me lapa mekun. Matre troa xecie koi së laka, ka ce tro la mekuna së memine la mekuna i Iehova. Tro sa ce wang la ka traqa koi Nathana perofeta.

7. Nemene la ini hne së hna xom qa ngöne la ka traqa koi Nathana?

⁷ Ame lo Dravita joxu a qaja koi Nathana la aja i angeic troa xup la uma ne hmi i Iehova, hnei Nathana hna canga sa me upi angeic troa eatrëne la mekuna i angeic. Ngo tha hnei Nathana kö hna pane atre la mekuna i Iehova. Eje hi, tha aja i Iehova kö tro Dravita a xup la uma ne hmi i Nyidrë. (1 Aq. Jo. 17:​1-4) Tune la hne së hna ce wang, ame la kola sipo eamo koi së, tro sa inamacan, e tro sa “hmitre ithanata.”​—Iako. 1:​19.

8. Qaja jë la ketre kepin, matre nyipiewekë tro sa hmek qëmeken troa hamë eamo koi ketre?

⁸ Tro sa ce wang la ketre kepin, matre loi e tro sa hmek la easa troa hamë eamo koi ketre. E hnei angeic hna axecië mekun thenge la eamo së, nge hetre thangane ka ngazo, ke easë fe la atrekëzöne lai. Celë hi matre, nyipiewekë tro sa mekune hnyawan qëmeken troa hamë eamo.

E THA HNA SIPO IXATUA KÖ

9. Qëmeken troa hamë eamo kowe la ketre trejin, nemen la nyine troa pane kuca hnene la itre qatre thup? (Galatia 6:1)

⁹ Ame itre xaa ijin, itre qatre thup a thele troa hamë eamo kowe la ketre trejin ka “nyiqaane kei.” (E jë la Galatia 6:1.) Tha hnei angeic pala kö hna kuca la ngazo, ngo hnei angeic hna xome la ketre mekun ka troa ee angeic koi ngazo. Ajane la itre qatre thup troa xatua angeic tro pala hi a nyihlue i Iehova me mele epine palua. (Iako. 5:​19, 20) Ngo tro la itre eamo i angatr a hetre thangan, e hnei angatr hna pane thele ka hape, hnei angeic kö hna tria. Nyipici, Iehova a nue së troa isa axecië mekun thenge la mekuthetheu së. (Roma 14:​1-4) Ngo tro sa ce wang la aqane tro la itre qatre thup a hamë eamo kowe la ketre trejin ka kei.

10-12. Qejepengöne jë jëne la ketre ceitun la aqane tro la itre qatre thup a hamë eamo, nge tha hna sipo ixatua kö. (Wange ju fe la itre foto.)

¹⁰ Tha ka hmaloi kö kowe la itre qatre thup troa hamë eamo kowe la ketre trejin, e tha hnei angeic kö hna sipo ixatua. Pine nemen? Hnei Paulo aposetolo hna qaja ka hape, ijije hi tro la ketre trejin a nyiqaane kei, nge tha wangatrehmekune kö angeic. E cili, nyipiewekë tro la itre qatre thup a hnëkëne lai trejin troa kapa la eamo.

¹¹ Ame la troa hamë eamo nge tha hna sipo ixatua kö, ke ceitu hi lai memine la kola tupath troa traan la ketre feja ngöne la dro ka catr. Qëmeken troa jume la feja, loi e troa hnëkëne la dro hnene la atre eëny. E cili, angeic a troone la dro, matre pujepuj. E thupen, angeic a jume la itre itine feja. Ase jë hi, angeic a fi, matre tro itre ej a cia lolo. Ketre tun, qëmeken tro la ketre qatre thup a hamë eamo, nge tha hna sipo ixatua kö, loi e tro la qatre thup a kuca la itre xaa ewekë, matre tro lai trejin a kapa hnyawa la eamo. Ame ngöne la nyipi ijin, tro la qatre thup a qaja kowe la trejin ka hape, tru la hnei nyidrë hna meku angeic. Nyipici, canga tro hi a kapa la eamo, e ka loi thiina me ihnim lai ka hamë eamo.

¹² Ame la nyidroti a porotrik, tro la qatre thup a “apujene la dro,” la nyidrëti a qaja ka hape, ka tria asë hi së, nge easë asë hi a besoë eamo. (Roma 3:​23) Ngöne la menyik me metrötr, nge jëne la Tusi Hmitrötr, tro nyidrëti a amaman koi angeic ka hape, hnei angeic hna tria. E trotrohnine hë angeic ka hape, hnei angeic hna tria, e cili, tro hë la qatre thup a “traan la itine feja.” Tro nyidrëti a qaja koi angeic la nyine tro angeic a kuca, matre saze. Ase jë hi, loi e tro nyidrëti a “fi lai itine feja,” la nyidrëti a qaja aloinyi angeic me ce thithi me angeic.​—Iako. 5:​15.

13. Nemene la nyine troa kuca hnene la qatre thup matre atre ka hape, trotrohnine hnyawa hi la trejin la eamo?

¹³ Ame itre xaa ijin, ame la hna qaja hnene la ka hamë eamo, ke ketre aqane trotrohnine kö hnene la atr ka kapa. Nemene la nyine tro la qatre thup a kuca, matre tha tro kö a traqa kowe lai? Loi e tro nyidrëti a huliwane hnyawan la itre hnying. (A. Cai. 12:11) Tro ha mama qaa ngöne la hna sa hnene la trejin ka hape, trotrohnine hnyawa hi angeic la eamo hna hamën.

NGÖNE LA NYIPI IJIN ME AQANE KA LOI

14. Ka loi kö troa hamë eamo la easa elëhni? Qejepengöne jë.

¹⁴ Pine laka itre atr ka tha pexeje kö së, matre ame itre xaa ijin, easa qaja maine kuca la ketre ewekë ka akötrën la itre trejin. (Kol. 3:​13) Tusi Hmitrötr a qaja ka hape, ame itre xaa ijin, tro sa elëhni maine aelëhni itre xan. (Efe. 4:​26) Ngo tha tro pi kö së a hamë eamo la easa elëhni. Pine nemen? Pine laka, “ame la elëhni ne la atr, tha eje kö a eatrëne la meköti Akötresie.” (Iako. 1:​20) Maine tro sa hamë eamo, nge ka elëhni së, ke loi ju kö lo tro hnapan. Tha kolo kö lai a hape, tha tro kö sa fe la aliene hni së me mekuna së kowe la atr ka akötrë së. Ngo e tro sa treqene la ijin tha elëhni hë së, ke tro lai a tro loi la easa ithanata me angeic. Tro sa ce wange la aqane kuca i Elihu, matre hamë eamo koi Iobu.

15. Nemene la ini hne së hna xom qa ngöne la tulu i Elihu? (Wange ju fe la foto.)

¹⁵ Nyimu drai ne Iobu a thel troa amekötine la itre hna qaja göi angeic, hnene la itre sinee ka iaö. Nge Elihu a nango drei Iobu. Tru la hna utipi angeic hnei Elihu. Ngo hna jele fe la trenge hni Elihu, ke hnei Iobu hna qaja la itre trengewekë ka tria göi Iehova, me eetre lapa. Eloine pe, hnei angeic hna treqene la nyipi ijine troa ithanata koi Iobu, me hamë eamo cememine la menyik me metrötr. (Iobu 32:2; 33:​1-7) Tulu i Elihu a ini së la trenge nyipici celë, ene la troa hamë eamo ngöne la nyipi ijin, nge troa hamëne hnyawan, cememine la ihnim me metrötr.​—A. Cai. 3:​1, 7.

CATRE JË HAMËN ME KEPE EAMO

16. Nemene la ini ka mama ngöne Salamo 32:8?

¹⁶ Ame la xötre tan ne la tane mekun celë, ke kola hape, Iehova a ‘eamo së, me thupë së.’ (E jë la Salamo 32:8.) Kolo lai a hape, tro kö Nyidrëti a xatua së. Nyidrëti a hamë eamo koi së, me xatua së troa trongën itre ej. Drei la ketre tulu ka lolo! Ame la easa hamë eamo koi ketre, ke loi e tro sa nyitipu Iehova. Tro sa thupë angeic, me hamëne la ixatua hnei angeic hna besoë, matre tro angeic a ujë cememine la inamacan.

17. Ame la itre qatre thup a hamë eamo hna nyitrepen hnei Tusi Hmitrötr, hna aceitunë angatr me nemen? Qejepengöne jë. (Isaia 32:​1, 2)

¹⁷ Enehila la ijin tro sa hamën me kapa la itre eamo ka lolo. (2 Tim. 3:1) Ame la itre qatre thup a hamëne koi së la itre eamo hna nyitrepen hnei Tusi Hmitrötr, ke angatr a “tune la itre tim ngöne la gaa qaqacil.” (E jë la Isaia 32:​1, 2.) Ame la itre sinee së a qaja la hne së hna besoën, ngo tha hne së kö hna ajane troa dreng, ke angatre hi lai a hamë së la ketre ahnahna ka sisitria catre kö hune “a itre wene pom gool, hnine la itre itrengene sileva.” (It. Ed. 25:11) Haawe, loi e tro së asë a inamacan, matre hamë eamo ka lolo, me kapa la itre eamo hna hamë së.