Aqane Xatua Së Hnei Iehova Troa Cile Catr

1. Hnauën laka nyipiewekë tro sa atreine cile catr, nge drei la ka troa xatua së? (1 Peteru 5:​10)

PINE laka jole catr la itre drai ne la pun, matre nyipiewekë tro la itre hlue i Iehova a cile catr. Ame la itre xan, hna tithi angatr hnene la ketre mec ka pë nyin. Nge itre xan pala hi a treije pine la sinee i angatr ka mec. Ame pena itre xan, kola icilekeu hnei fami maine itre mus. (Mat. 10:​18, 36, 37) Melëne ju hë eö la nöjei pengöne jol, ngo the luelue kö laka, tro kö Iehova a xatua eö troa cile catr.​—E jë la 1 Peteru 5:​10.

2. Drei la ka aijijë së troa cile catr?

² Ame la troa cile catr, ke kola qaja la troa mele nyipici koi Iehova me catre nyihlue i Nyidrë ngöne la madrin, ngacama easa cile kowe la itre jol tune la iaxösisi me itupath. Nge kolo fe lai a hape, troa mejiun laka, tro kö a tro loi la itre drai elany. Qaathei Iehova la atreine cili. Eje hi, easa atreine cile catr hnene “la men atraqatr” hnei Nyidrëti hna hamën, ngo tha hnene kö la sipu trengecatre së. (2 Kor. 4:7) Ame ngöne la tane mekune celë, tro sa ce ithanatane la 4 lao ixatua hnei Iehova hna hnëkën matre tro sa atreine cile catr. Tro mina fe së a ce wang la aqane tro itre ej a xatua së.

THITH

3. Hnauën la easa qaja ka hape, ketre ahnahna ka tru la thith?

³ Hnei Iehova hna hamë së la ketre ixatua ka aijijë së troa cile catr. Hnei Nyidrëti hna kuca matre tro së a hane ithanata koi Nyidrë, ngacama itre atr ka ngazo së. (Heb. 4:​16) Pane mekune jë la: Ijiji së hi troa thith koi Nyidrë e nöjei ijin, me ithanatane me Nyidrë la nöjei pengöne ewekë. Trotrohnine hi Nyidrë la nöjei qene hlapa, nge drenge së hi hnei Nyidrë, ngacama easë cas, maine e hnine la kalabus. (Iona 2:​1, 2; It. Hu. 16:​25, 26) Ame itre xaa ijin, easa xou me hnehengazo, matre thatreine kö së qaja la aliene hni së. Ngo trotrohnine kö Nyidrë. (Roma 8:​26, 27) Nyipici, ketre ahnahna ka tru la thith!

4. Hnauëne la easa qaja ka hape, ame la easa sipo ixatua koi Iehova troa cile catr, ke aja i Nyidrëti hi lai?

⁴ Ame e hnine la Tusi Hmitrötr, Iehova a anyipicine laka, “e hetre ewekë hne së hna sipon thenge la aja i nyidrë, tro kö nyidrëti a drei së.” (1 Ioa. 5:​14) Matre hapeu, ijije kö tro sa sipo Nyidrë troa xatua së troa cile catr? Öö, ke aja i Nyidrëti hi lai. Hnauëne la easa qaja tun? Pine laka, ame la easa cile catr, kola ajijë Iehova troa sa koi Satana Diabolo, lo ka lapa icilekeu me Nyidrë. (It. Ed. 27:11) Ketre, Tusi Hmitrötr a hape, “Aja i [Iehova] troa amamane la mene i nyidrë kowe la itre ka nyihlue i nyidrë hnene la hni ka pexej.” (2 Aq. Jo. 16:9) Haawe, loi e troa xecie koi së laka, atreine hi Nyidrë, nge aja i Nyidrë troa xatua së troa cile catr.​—Isa. 30:18; 41:10; Luka 11:13.

5. Tune kaa la aqane tro la thith a hamë së la tingeting? (Isaia 26:3)

⁵ Öni Tusi Hmitrötr, e tro sa fe la hni së ngöne la thith, ke ‘tro ha thupëne la itre hni me mekuna së hnene la tingetinge qaathei Akötresie, tingetinge hna thatreine trotrohnine hnei atr.’ (Fil. 4:7) Ame la itre atr ka tha nyihlue i Iehova kö a cile kowe la itre itupath, ke angatr a thele jëne matre tingetinge pi la hni i angatr. Ame itre xan, angatr a thel la itre ewekë ka hnyipixe, tune la troa apatrene la itre mekun qa ngöne la he i angatr, tune la itre mekun ka iajolë. Ngo thatre kö angatr ka hape, angatr pe lai a nyi göhnene la itre dremoni. (Wange ju la Mataio 12:​43-​45.) Ketre, ka sisitria catre kö la tingeting qaathei Iehova hune la itre xaa jëne tingeting. Ame la easa thithi koi Nyidrë, easë hi lai a amamane ka hape, ka catre la lapaune së koi Nyidrë. Nge Nyidrëti e cili a hamë së la “tingeting ka cile hut.” (E jë la Isaia 26:3.) Ame la ketre aqane hamëne Iehova la tingeting, ke ene la troa amekunë së la itre trenge nyipici qa hnine la Tusi Hmitrötr. Itre ej a atingetingëne la hni së ke, kola amekunë së ka hape, Iehova a hnimi së, nge aja i Nyidrë tro sa madrin.​—Sal. 62:​1, 2.

6. Nemene la nyine tro epuni a qaja la epuni a thith? (Wange ju fe la foto.)

⁶ Nyine tro eö a kuca. Ame la kola tupath la lapaune i eö, “nue pi koi Iehova la ehnefe i ö” nge sipone jë la tingetinge i Nyidrë. (Sal. 55:22) Sipo Nyidrëti jë fe la inamacan matre xatua eö troa nyinyine la itre jol. (It. Ed. 2:​10, 11) Sipo iele Nyidrëti jë troa hamë eö la trengecatr matre cil kowe la itupath. Nge the thëthëhmine kö troa olene koi Nyidrë. (Fil. 4:6) Mekune hnyawa ju la aqane xatua eö hnei Nyidrë, nge olene jë koi Nyidrë. The nue kö la itre itupath hnei eö hna cile kow troa atimekë eö, matre thëthëhmine la itre manathith hnei eö hna kapa.​—Sal. 16:​5, 6.

TUSI HMITRÖTR

7. Tro la ini Tusi Hmitrötr a xatua së tune kaa troa cile catr?

⁷ Hnei Iehova hna hamë së la Trengewekë i Nyidrë matre xatua së troa cile catr. Ej a qatreng la itre xötr ka amamane ka hape, Nyidrëti a xatua së. Hane hi la ketre ceitun. Mataio 6:8 a hape: “Tha ase petre kö nyipunieti sipone kowe la Keme i nyipunie, nge atre fe hë nyidrëti la hnei nyipunieti hna ajan.” Iesu la ka qaja la trengewekë celë, nge atre hnyawa kö nyidrë la pengöi Iehova hu itre xan. Matre tha tro kö sa luelu laka, atre kö Iehova la ka nyipiewekë koi së, la easa cil kowe la itre itupath. Tusi Hmitrötr a qatreng la itre xaa mekun ka acatrene la aja së troa cile catr.​—Sal. 94:19.

8. (a) Qaja jë la ketre trepene meköt ka troa xatua së troa cile catr. (b) Nemene la ka troa xatua së troa canga mekun la itre trepene meköt ka ihmeku memene la jole së?

⁸ Tusi Hmitrötre fe a qatreng la itre trepene meköt ka troa xatua së troa cile catr. Ka inamacan la itre trepene meköt cili, matre itre ej a xatua së troa axecië mekun ka loi. (It. Ed. 2:​6, 7) Tusi Hmitrötr a ithuecatre koi së tro hi a melëne la drai enehila, nge tha tro kö a hnehengazone la itre ewekë ka troa traqa elany. (Mat. 6:​34) Maine ka majemine së e me lapa mekune la Tusi Hmitrötr, ke canga tro hi sa mekun la itre trepene meköt ka ihmeku memine la jole së.

9. Tro la tulu ne la itre hlue i Iehova ekö a acatrene tune kaa la lapaune së kowe la ixatua i Iehova?

⁹ Ketre, Tusi Hmitrötr a qatreng la itre hna melën hnene la itre hlue i Iehova ekö, nge ka kapa la ixatua i Nyidrë. (Heb. 11:​32-​34; Iako. 5:​17) E tro sa lapa mekun la tulu i angatr, tro lai a acatrene la lapaune së laka, Iehova “la hnë zae me trengecatre së, ketre ixatua ka hmaloi troa öhn ngöne la ijine akötr.” (Sal. 46:1) Ame la easa lapa mekun la hnei angatr hna melën, ke kola uku së troa nyitipune la aqane mele nyipici me cile catre i angatr.​—Iako. 5:​10, 11.

10. Tune kaa la aqane tro epuni a kepe thangane qa ngöne la Tusi Hmitrötr?

¹⁰ Nyine tro eö a kuca. E jë e nöjei drai la Tusi Hmitrötr, nge cinyanyine jë la itre xötr ka troa xatua eö. Alanyim la itre ka öhne laka, hetre thangane la troa e la topik ne la drai, matre nyiqane la drai memine la ketre mekun ka ithuecatr. Hna jelenyipicine lai hnei Mariea la kola öhne la ketre cancer thene la keme me thine i angeic. Tune kaa la aqane xatua angeic hnene la Topik Ne La Drai matre troa cile catr ngöne la ijin angeic a thupë nyidro me itre treu thupen la nyidroti a mec? Öni angeic, “Ame e nöjei hmakany, eni a e me lapa mekun la Topik Ne La Drai. Matre hetre xötr pala hi hnenge hna lapa mekun. Celë hi ka xatua ni troa meku Iehova, memine la itre ewekë ka mingöming hna qaja hnei Tusi Hmitrötr hune la troa mekune la itre jol ka traqa koi ni.”​—Sal. 61:2.

ITRE TREJIN

11. Hnauëne la kola akeukawanyi së la easa atre ka hape, hnene fe la itre xaa trejin hna cil kowe la itupath ka traqa koi së?

¹¹ Hnei Iehova hna hamë së la lapa ne la itre trejin e cailo fen, matre xatua së troa cile catr qëmekene la itre itupath. Kola akeukawanyi së la easa atre ka hape, “hna traqa fe la itre akötre cili kowe la lapa ne la itre trejin me [easë] e cailo fen.” (1 Pet. 5:9) Hnauëne la easa qaja lai? Pine laka ame la itre itupath hne së hna cile kow ke, hna hane fe traqa kowe la itre xaa trejin, nge hnei angatr hna cile catr. Matre kolo hi lai a amamane ka hape, ijiji së fe troa hane cile catr qëmekene la itre itupath!​—It. Hu. 14:22.

12. Tune kaa la aqane xatua së hnene la itre trejin, nge nemene la nyine tro fe sa kuca koi angatr? (2 Korinito 1:​3, 4)

¹² Ijije hi troa ithuecatre koi së hnene la itre trejin. Celë hi hna öhne hnei Paulo aposetolo. Hnei angeic pala hi hna olene kowe la itre trejin ka xatua angeic lo kola umë angeic ngöne la ketre uma. Nge hnei angeic hna e wengëne la itre ëje i angatr ngöne la tusi angeic. Hnei angatre lo hna akeukawane me ithuecatre koi angeic, me hamë ixatua. (Fil. 2:​25, 29, 30; Kol. 4:​10, 11) Nge celë fe hi hne së hna öhne enehila. Itre trejin pala hi a ce me easë, la easa aja ixatua. Nge e angatre pena la ka aja ixatua, ke ce easë me angatr.​—E jë la 2 Korinito 1:​3, 4.

13. Nemene la ka xatua Maya troa cile catr?

¹³ Hnei Maya ketre trejin föe qa Russie, hna kepe ixatua qaathene la itre trejin. Ame lo 2020, hna fouiller la hnalapa i eahlo, nge e thupen hna utisai eahlo, ke hnei eahlo hna cainöj koi itre xan. Öni eahlo, “Ame lo eni a kucakuca, hnene la itre trejin hna hë ni me cinyanyi koi ni matre qaja la ihnimi angatr koi ni. Atre hi ni laka, eni a sine la ketre fami ka ihnim. Ngo ame hë lo 2020 ke, xecie hnyawa ha lai koi ni.”

14. Nemene la nyine tro sa kuca matre kepe ixatua qaathene la itre trejin? (Wange ju fe la foto.)

¹⁴ Nyine tro eö a kuca. Ce tro lapa jë memine la itre trejin. Nge sipo ixatua jë thene la itre qatre thup, ke angatr la “hnë zae e ijine eny, me ketre hnapo kowe la wene.” (Isa. 32:​2, ith.) Ketre, the thëthëhmine kö laka, itre trejin fe a hane cil kowe la itre jol. Matre ame la eö a kuca la loi kowe la ketre atr ka aja ixatua, nge eö fe e hnine la itupath, ke tro eö lai a madrin me atreine cile catr.​—It. Hu. 20:35.

MEJIUNE SË

15. Nemene la thangane la mejiune i Iesu, nge nemene la thangane la mejiune së? (Heberu 12:2)

¹⁵ Hnei Iehova hna hamë së la mejiune ka catr, matre xatua së troa cile catr. (Roma 15:13) Nemene lo ka xatua Iesu troa cile catr ngöne la drai tixenuë i nyidrë e celë fen? Hnei Iesu hna mekune la itre ewekë ka mingöming ka treqe nyidrë e hnengödrai. (E jë la Heberu 12:2.) Atre hi nyidrë ka hape, tro la aqane mele nyipici nyidrë a ahmitrötrëne la ëje i Iehova. Nge tru la aja i nyidrë troa iöhnyi hmaca memine la Keme i nyidrë, me ce mus memine la itre jini nyidrë. Ketre tun, tro la mejiune së, ene la troa mel epine palua ngöne la fene ka hnyipixe a xatua së troa cile catr kowe la itre itupath ngöne la fene i Satana.

16. Hnene la mejiune së hna xatuane tune kaa la ketre trejin föe troa catr, nge nemene la ini koi së?

¹⁶ Tro sa ce wang la aqane xatua Alla, ketre trejin föe ne Russie hnene la mejiune i angeic kowe la fen ka hnyipixe. Ame la kola akalabusine la föi angeic, öni angeic: “Ame la eni a lapa mekun la mejiuneng me thithi fë, ke kola aegöcatrenyi ni. Atre hi ni laka, hetre ijine jol, ngo e thupen, troa traqa la hao drai. Tro kö Iehova a hun, tu së fe.”

17. Tro sa amamane tune kaa la hni ne ole së kowe la mejiune së? (Wange ju fe la foto.)

¹⁷ Nyine tro eö a kuca. Xomi ijine jë troa lapa mekun la mele i eö elanyi hnei Iehova hna hnëkëne koi eö. Pane mekune jë la ijine eö a kapa la itre manathith ngöne la fene ka hnyipixe. Ame e cili, kösë “tha cile palua kö . . . nge ka hmaloi hi” la itre itupath hnei eö hna cile kow. (2 Kor. 4:​17) Ketre, thele jë troa ce thawa me itre xan la lapaune i eö. Pane mekune jë la mele ne la itre atr. Jole catr koi angatr troa cil kowe la itre jol ngöne la fene i Satana. Ketre, thatre kö angatr la aja i Akötresie göne la itre drai elany. Ngacama tha qea ju kö la hne së hna porotrike me angatr, ngo ijije hi tro sa thue aja i angatr troa atrepengöne la Baselaia i Akötresie me itre hnei Nyidrëti hna thingehnaean.

18. Pine nemene matre xecie koi së laka, tro kö Iehova a eatrën la itre hnei Nyidrëti hna thingehnaean?

¹⁸ Thupene la hnei Iobu, atr ka mele nyipici, hna cil kowe la itre itupath, öni angeic koi Iehova: “Atre hë ni laka, atrein asë hi nyipë, nge pëkö ewekë hnei nyipëti hna thatreine kuca.” (Iobu 42:2) Tune la hnei Iobu hna qaja, pëkö ka atreine sewe Iehova troa eatrëne la itre hnei Nyidrë hna thingehnaean. Tro la nyipici celë a xatua së troa cile catr. Tro sa xom la ketre ceitun: Kola kucakuca la ketre atr ka wezipo ke, pëkö ca droketre hnei angeic hna öhne ka atreine aloine la meci angeic. Ngo ame la ketre drai, hnene la ketre droketre ka lolo, nge hna mejiune kow, hna qejepengöne la meci angeic memine la aqane tro nyidrëti a aloin. Ngacama, atre hi angeic ka hape, tha tro kö angeic a canga loi, ngo lolo hë la mekuna i angeic. Pine laka, hetre mejiune i angeic hë, ene la troa aloine la meci angeic ke, hmaloi hë koi angeic troa cile catr. Ketre tun, e xecie koi së ka hape, tro kö a eatr la mejiune së göne la paradraiso, ke tro hë lai a hmaloi koi së troa cile catr.

19. Nemene la ka troa xatua së troa cile catr?

¹⁹ Tune la hne së hna ce wang, Iehova a xatua së troa cile catr jëne la thith, me Tusi Hmitrötr, me itre trejin, memine la mejiune së. Maine tro sa kapa me trongëne hnyawane la itre ixatua celë, tro kö Nyidrëti a xatua së ngöne la nöjei itupath, utihë la ijine tro Nyidrëti a apatrene la fene i Satana memine la nöjei akötr.​—Fil. 4:​13.