Ketre Tus Ka Xatua Së Troa Xomihni Utihë La Pun

1-2. (a) Tune kaa la mel e Iudra, lo Paulo a cinyanyine la tus kowe la angetre Heberu? (b) Hnauëne la easa qaja laka hna traqa ijije la tusi Paulo koi angetre Heberu?

AME ngöne la itre macatre thupene la meci Iesu, tru catre la itre jol ka traqa kowe la itre keresiano ne Ierusalema me Iudra. Ame la kola ase acile la ekalesia, hna axösisine la itretre drei Keriso. (It. Hu. 8:1) Truedre lao macatre thupen, hna lepi angatr hnei jiin, matre hna pë mani la nöj. (It. Hu. 11:​27-​30) Ngo ame lo macatre 61 M.K., kola tingeting la nöj, ngo thatre kö angatr laka, easenyi hë la ketre icilekeu ka tru. Ame ngöne la ijine cili, hnei angatr hna kapa la tusi Paulo, nge ka traqa hnyawa hi ngöne la nyipi ijin.

² Pine nemene matre easa qaja lai? Pine laka tha tro kö a hut la ijine tingeting. Matre hnei Paulo hna hamëne la itre eamo ka troa xatua angatr troa cil qëmekene la itupath ka troa traqa. Easenyi hë troa apatrene la nöje i angetre Iudra, thenge lo hnei Iesu hna perofetan. (Luka 21:20) Eje hi, thatre kö Paulo me itre keresiano ne Iudra la ijine troa traqa lai. Matre loi e tro angatr a hnëkë, me acatrene la lapaune i angatr, me eënyine la itre thiina tune la xomihni.​—Heb. 10:25; 12:​1, 2.

3. Pine nemene matre ka nyipiewekë fe la tusi Heberu kowe la itre keresiano enehila?

³ Easenyi hë tro sa melëne la ketre akötr ka tru catre kö, hune la hna melëne hnene la itre keresiano ne Heberu ekö. (Mat. 24:21; Hna Am. 16:​14, 16) Tro sa ce wange la itre eamo hnei Iehova hna hamë angatr, nge ka troa xatua së fe enehila.

“LOI E TRO SA ISINE TROA MACAJ”

4. Nemene la itre jol hna cile kow hnene la itre keresiano ne Iudra? (Wange ju fe la iatr.)

⁴ Ketrepengöne kö la itre jol hna melën hnene la itre keresiano ne Iudra. Ame ekö, hnei Iehova hna iëne la nöje i angetre Iudra matre nöje i Nyidrë. E Ierusalema hi la hnanyijoxu me hna acile la Baselaia i Akötresie. Nge ame la itre atr ka pi atrunyi Iehova, ke loi e tro angatr a tro kowe la uma ne hmi e Ierusalema. Nge ame asë hi la angetre Iudra, ke angatr a trongëne la itre Wathebo i Mose hna ini angatr hnene lo itre he ne hmi. Celë hi matre, angatr a wangatrune la xötrehatren me thupëne la itre hnei angatr hna xen, me ananyine la itre trenyiwa. Ngo thupene la meci Iesu, tha kapa hmaca kö Iehova la itre huuj hna tro fë ngöne la uma ne hmi. Jole catre kowe la itre keresiano ne Iudra troa kapa la itre hna amekötin ka hnyipixe, ke majemine kö angatr trongëne la itre wathebo i Mose. (Heb. 10:​1, 4, 10) Goi jole fe kowe la itre keresiano ka macaj tui Peteru troa kapa. (It. Hu. 10:​9-​14; Gal. 2:​11-​14) Nge pine laka, hnei angatr hna saze hmi, matre kola nyiqane icilekeu hnene la itre he ne hmi i angetre Iudra.

5. Drei la itre atr nyine tro la angetre Heberu a hmekën?

⁵ Lue gurup ka icilekeu memine la itre keresiano ne Heberu. Ame ngöne la ketre götran, itre he ne hmi i angetre Iudra a jelë angatr ka hape, itre ka iamenumenu. Nge ame ngöne la ketre götran, itre xaa atrene la ekalesia a ukune la itretre drei Keriso tro palahi a trongëne la itre Wathebo i Mose, matre tha tro kö itre xan a icilekeu. (Gal. 6:​12) Nemene la ka xatuane la itre keresiano troa lapa catr ngöne la nyipici?

6. Nemene la ithuecatre i Paulo kowe la itre keresiano ne Heberu? (Heberu 5:14–​6:1)

⁶ Ame ngöne la tusi Paulo kowe la itre keresiano ne Heberu, hnei angeic hna ithuecatr koi angatr tro palahi a sin ajuine la trengewekë i Akötresie. (E jë la Heberu 5:14–​6:1.) Jëne la Itre Hna Cinyihane qene Heberu, hnei angeic hna amamane koi angatr laka, sisitria kö la hmi keresiano hune la hmi i angetre Iudra.a Atre hnyawa hi Paulo laka, maine tro angatr a atre me trotrohnine la nyipici, tro hë angatre lai a nuetrij la itre ini ka thoi.

7. Nemene la itre jol hne së hna ixelë memine enehila?

⁷ Ame enehila, tune la itre keresiano ne Heberu, easë a cile kowe la itre atr ka tro fë la itre mekun me itre ini ka isazikeu memine la itre trepene meköti Iehova. Angatr a icilekeu me easë ke, easa trongëne la itre ini qa hnine la Tusi Hmitrötr. Ame la kola upetröneëne la ketre trejin, angatr a jelë easë ka hape, itre ka nyi ka meköt me ka pë ihnim. Iananyi catr la itre aqane ujë me itre mekuna ne la itre atre ne fen, memine la itre mekuna i Iehova ka pexej. (It. Ed. 17:15) Nyipiewekë tro së a wangatrehmekun la itre ini ka thoi hna tro fë hnene la itre ka icilekeu, me nuetrij itre ej. Matre tha tro kö a ajojezi së me ananyi së qaathei Iehova.​—Heb. 13:9.

8. Nemene la nyine tro sa kuca matre troa macaj?

⁸ Nyipiewekë tro sa wangatrune la eamo hnei Paulo hna hamëne kowe la itre keresiano ne Heberu ka hape, loi e tro sa isin troa macaj. Celë hi matre loi e tro së a pane atre hnyawa la nyipici, nge troa löthi së hnene la aqane waiewekë i Iehova. Nge loi palahi tro së a kuca tun, ngacama ase hë easë nue mel koi Iehova me bapataiso. Ka hekö ju hë së maine ka hnyipi lö ngöne la nyipici, ngo nyipiewekë tro asë hi së a e me inine lapane la Trengewekë i Akötresie. (Sal. 1:2) E hne së hna majemine ini Tusi cas, ke tro ha catr la lapaune së. Thiina lai hnei Paulo hna upe la itre keresiano ne Heberu troa huliwan.​—Heb. 11:​1, 6.

‘LAPAUNE JË MATRE THUPËNE LA MELE SË’

9. Pine nemene matre nyipiewekë tro la itre keresiano ne Heberu a catre lapaun?

⁹ Loi e tro la itre keresiano ne Heberu a catre lapaun matre tro angatr a mel qa ngöne la akötr ka troa traqa e Iudra. (Heb. 10:​37-​39) Hnei Iesu hna qaja kowe la itretre dreng ka hape, e öhne hë angatr la kola lapa xötreith Ierusalema hnene la itre trongene isi, ke ijine lai tro angatr a kötr kowe la itre wetr. Ame la ithuemacanyi cili, ke thatraqane la itre keresiano asë, memine fe la itre ka lapane la itre traon ezine Ierusalema. (Luka 21:​20-​24) Ame ekö, ame la kola traqa la itre trongene isi, ke itre atr a kötr kowe la itre traon ka hetre ihag, tune e Ierusalema. Matre ame kowe la itre keresiano ne Heberu, tha ka inamacane kö la troa kötr kowe la itre wetr. Celë hi matre nyipiewekë tro angatr a catre lapaun.

10. Nemene la nyine tro la itre keresiano a kuca, e ka catr la lapaune i angatr? (Heberu 13:17)

¹⁰ Ka nyipiewekë mina fe tro la itre keresiano ne Heberu a mejiune kowe la itre trahmanyi hnei Iesu hna iëne troa elemekene la ekalesia. Hnene la itre trejin cili hna hamën la itre hna amekötine ka lualai kowe la itre keresiano, matre tro angatr a atre la ijine me aqane troa fek. (E jë la Heberu 13:17.) Ame la hnaewekë qene Geres “idrengethenge” ngöne Heberu 13:​17, ke kola qaja la atr ka drengethenge, ke angeic a mejiune kowe lai ka hamëne la hna amekötin. Ngo tha hnene kö laka, angeic a metrötrëne la hnëqa ne la atr cili. Matre nyipiewekë tro la itre keresiano ne Heberu a acatren la mejiune i angatr kowe la itre ka elemeken la ekalesia qëmeken troa traqa la jol. Maine ka majemine angatr idrengethenge me trongëne la itre hna amekötine ngöne la itre ijine tingeting, ke tro ha hmaloi koi angatr ngöne la ijine jol.

11. Pine nemene matre loi e tro la itre keresiano enehila a catre lapaun?

¹¹ Tune la itre keresiano ne Heberu, nyipiewekë tro sa catre lapaun. Ame enehila, tha mejiune kö la itre atr laka, easenyi hë la pune la fen celë, nge angatre fe a hnyimasai së. (2 Pet. 3:​3, 4) Ngacama Tusi Hmitrötr a qaja la aqane trongene la akötr atraqatr, ngo hetre ewekë kö hne së hna thatre. Matre loi e troa xecie koi së laka, tro kö a traqa la pune la fen celë, ngöne la drai hnei Iehova hna sa. Nge tro kö Nyidrëti a ce me easë.​—Hab. 2:3.

12. Nemene la nyine tro sa kuca e aja së troa mel ngöne la ijine akötr atraqatr?

¹² Loi e tro sa acatrene la mejiune së kowe la itre trejin trahmanyi ka elemeken la organizasio i Iehova, ene la “hlue ka nyipici me ka inamacan.” (Mat. 24:45) Ame hë la kola nyiqan la akötr atraqatr, tro hë së a kapa la itre hna amekötine ka lualai, nge jëne mel koi së tune la itre keresiano ne Heberu, lo kola lapa xötreithi Ierusalema hnene lo trongene isi angetre Roma. Celë hi matre enehila hi la ijine tro sa acatrene la mejiune së kowe la itre ka elemeken, me trongëne la itre hnei angatr hna amekötin. E ka jol koi së enehila troa drengethenge me trongëne la itre hnei angatr hna amekötin, nga tro ha jole catr elanyi ngöne la ijine akötr atraqatr.

13. Pine nemene matre ka nyipiewekë la hna qaja ngöne Heberu 13:5?

¹³ Tha tro kö la itre keresiano ne Heberu ka troa fek qa Ierusalema a “hni koi manie,” ngo loi e tro pe angatr a ahmaloeëne la mele i angatr. (E jë la Heberu 13:5.) Ame ekö, hnene la itre xan hna melëne la pë. (Heb. 10:​32-​34) Ngacama hnei angatr hna melën la itre jol pine la maca ka loi, ngo ame hë enehila, angatr ha wangatrune la mani. Ngo tha tro jë kö la manie a amele angatr ngöne la kola lep apatrenyi Ierusalema. (Iako. 5:3) Eje hi, e tro la ketre atr a hni koi mani, tro ha jole koi angeic troa kötr me nue la hnalapa i angeic, me itre mo.

14. Nemene la nyine tro sa iën, e xecie koi së ka hape, easenyi hë la pun la fene celë?

¹⁴ Tha tro pi kö sa kei kowe la aja mo, e xecie koi së ka hape, easenyi hë la pun la fene celë. Tusi Hmitrötr a qaja ka hape, tro hë la itre atr ‘a trij la itre sileva i angatr e kuhu gojeny,’ ke öhne hë angatr laka, ‘thatreine kö la sileva me gool amele angatr ngöne la drai ne elëhni i Iehova.’ (Ezek. 7:​19) The thele kö troa trene mani, ngo ahmaloeëne jë pe la mele i eö matre troa nyihlue i Iehova. The xomi gufa menu kö, me nue la itre ewekë troa ahacene la mele i eö me thapa la traeme i eö. The wangatrune pi kö la itre ewekë i eö. (Mat. 6:​19, 24) Easenyi hë la pun la fene celë, matre ijije hi troa tupath la lapaune së hnene la pi aja mo me nyine iamadrinë.

“NYIPIEWEKË TROA ATREINE CILE HUT”

15. Pine nemene matre nyipiewekë tro la itre keresiano ne Heberu a cile hut?

¹⁵ Loi e tro la itre keresiano ne Iudra a catre huliwa i Iehova, ke easenyi catre hë la itre jol. (Heb. 10:36) Ame thei angatr, alanyim la ka cile kowe la iaxösisi, ngo ame la itre xan, ke hnei angatr hna kapa la nyipici ngöne la ijine tingeting. Celë hi matre, hnei Paulo hna qaja koi angatr ka hape, ngacama hna tupathe hë la lapaune i angatr, ngo tha ase kö angatr akötr tui Iesu, me mec tui nyidrë. (Heb. 12:4) Alanyimu la angetre Iudra ka wesitr me pi humuth la itre keresiano, ke tru hnei atr ka lö kowe la hmi cili. Itre macatre qëmekene tro Paulo a cinyanyine la tusi angeic koi angetre Heberu, hnene la itre atr ka alanyimu hna thel troa lepi angeic. Traqa koi 40 lao atre Iudra ka “sisinyi ka hape, xeni jë kö angatr me ij e ase jë humuthi Paulo.” (It. Hu. 22:22; 23:​12-​14) Ngacama kola xele ma wai angatr me axösisi angatr, ngo hnene la itre keresiano hna catre sine la itre icasikeu, me cainöje trootro, me acatrene la lapaune i angatr.

16. Tro la tusi Heberu a xatua së tune kaa troa öhne la eloine troa xomihnine la itre itupath? (Heberu 12:7)

¹⁶ Nemene la ka troa xatuane la itre keresiano ne Heberu troa xomihnine la icilekeu? Aja i Paulo troa xatuane la itre keresiano troa öhne la eloine troa xomihnine la itre itupath. Matre hnei angeic hna qejepengöne koi angatr ka hape, hnei Iehova hna nue troa tupath la lapaune i angatr, matre troa xomi ini qa ngön. (E jë la Heberu 12:7.) Itre ini hi lai ka troa aijijë angatr troa huliwane la itre thiina ka nyipiewekë. Maine tro angatr a mekune hnyawane la eloine troa cil kowe la itre itupath, ke tro ha hmaloi koi angatr troa xomihnine itre ej.​—Heb. 12:11.

17. Nemene la aqane ini Paulo hnene la itre itupath?

¹⁷ Hnei Paulo hna ithuecatr kowe la itre keresiano ne Heberu troa xomihni me cile catr qëmekene la itre itupath. Angeice hi la ka ijij troa ithuecatr koi angatr. Pine laka, hnei angeic hna axösisine ekö la itre keresiano, matre atre hnyawa hi angeic la hnei angatr hna troa ixelë memin. Nge atre fe hi angeic la aqane troa xomihnine la itre itupath. Ame hë la angeic a nyihlue i Iehova, nyimu jole hë hnei angeic hna ixelë memin. (2 Kor. 11:​23-​25) Matre ijije hi tro angeic a qaja la nyine troa kuca matre cile catr. Öni angeic kowe la itre keresiano ne Heberu ka hape, tha tro kö a mejiun kowe la itre sipu trengecatre i angatr, ngo koi Iehova pe. Celë hi matre hnei Paulo hna qaja ka hape: “Iehova la ixatuang, tha tro kö ni a xou.”​—Heb. 13:6.

18. Nemene la ka troa xatua së elanyi troa atreine cil kowe la itre itupath?

¹⁸ Ame la itre xaa trejin me easë, angatr a melëne la itre itupath e nöjei drai. Loi e tro sa thithi sai angatr me hamëne la ixatua ka ijij. (Heb. 10:33) Tusi Hmitrötr a qaja amamane ka hape, “ame la itre ka ajane troa mele thenge la aja i Akötresie, me casi me Keriso Iesu, tro fe a hane axösisi angatr.” (2 Tim. 3:​12) Celë hi matre, loi e tro easë asë hi a hnëkë kowe la itre ewekë ka troa traqa. Troa tune kaa? Qale jë së koi Iehova, me mejiun laka, tro kö Nyidrëti a xatua së troa xomihnine la nöjei pengöne jol hne së hna ixelë memin. Tro kö a traqa la ijine tro Iehova a aupune la itre akötr ne la itre ka nyihlue i Nyidrë.​—2 Thes. 1:​7, 8.

19. Nemene la ka troa hnëkë së kowe la akötr atraqatr? (Wange ju fe la iatr.)

¹⁹ Eje hi, ame la itre eamo hnei Paulo hna hamën kowe la itre keresiano ne Heberu, ke hna hnëkë angatr kowe la akötr hnei angatr hna troa melën. Hnei Paulo hna ithuecatr koi angatr troa atre me trotrohnine hnyawane la Itre Hna Cinyihan. Celë hi lai ka troa xatua angatr troa wangatrehmekun me ananyine la itre ini ka troa ananazijëne la lapaune i angatr. Hnei angeic mina fe hna ithuecatre koi angatr troa acatrene la lapaune i angatr, ke celë hi ka troa uku angatr troa drengethenge la itre hna amekötin hnei Iesu me itre ka elemekene la ekalesia. Hnei Paulo hna ithuecatr koi angatr troa xomihnine la itre jol, nge jëne itre ej, Iehova a ini angatr. Loi e tro fe sa trongëne la itre eamo cili qaathei Iehova. Tro hë së lai a atreine cile hut utihë la pun.​—Heb. 3:​14.