Xatuane Jë La “Itre Ka Hmalahnine”

1. Tune kaa la aqane kapa la itre atr la maca ka loi? (Itre Huliwa 13:​47, 48; 16:​14, 15)

AME ngöne la hneijine la itre pane keresiano, alanyim la itre atr ka kapa la nyipici la angatr a dreng la maca ne la Baselaia. (E jë la Itre Huliwa 13:​47, 48; 16:​14, 15.) Ame enehila mina fe, hetre atr ka madrine la angatr a dreng la maca ka loi. Ame itre xan, tha canga kapa kö angatr, ngo e thupen, “Iehova a fe la hni” angatr matre kapa la nyipici. Nemene la nyine tro sa kuca la easa ixelë memine la “itre ka hmalahnine” ngöne la hna cainöje trootro?

2. Pine nemene matre ceitune hi la huliwa ne inine la itre atr, memine la huliwa ne la atre traa feja?

² Tro sa xom la ketre ceitun. Ceitune hi la huliwa ne inine la itre atr, memine la huliwa ne la atre traa feja. Maine ka macaje hë la itre xaa feja, tro nyidrë a canga menuëne itre ej. Ngo tro pala hi nyidrëti a fi me nyihnyawan la itre xaa feja ka tha macaje pala kö. Ketre tun, maine tro ketre a kapa la maca ka loi, nyipiewekë tro sa canga xatua angeic troa atre drei Iesu. Ngo loi e tro pala hi sa xatuane la itre xaa atr ka tha kapa pala kö la maca. (Ioa. 4:​35, 36) Loi e tro sa atreine waiewekë matre wang ka hape, ajane kö la atr. Ame e cili, tro sa atre la aqane troa xatua angatr. Tro sa ce wang la nyine tro sa kuca la easa xötrei iöhnyi memine la ketre atr ka canga kapa la maca. Tro fe sa ce wang la aqane tro sa xatua angeic tro pala hi a easenyi koi Iehova.

LA KOLA KAPA LA MACA

3. Nemene la nyine tro sa kuca la kola kapa la maca ka loi hnene la atr? (1 Korinito 9:​26)

³ Maine ketre atr a kapa la maca ka loi, the cile kö, xatua angeice jë troa atre Iehova, me hetre imelekeu me Nyidrë. Ngacama epon a xötrei iöhny, ngo sipone jë koi angeic troa ini Tus, nge hë angeice jë kowe la itre icasikeu.​—E jë la 1 Korinito 9:​26.

4. Qaja jë la hna melëne hnene la ketre atr ka canga kapa troa ini Tus.

⁴ Sipone jë koi angeic troa ini Tus. Ame la itre xaa atr hne së hna ithanata memin, ke angatr a canga kapa troa ini Tus. Celë hi ka traqa e Canada. Ame lo jeudi, hnene la ketre föe hna cil ngöne la présentoir, matre xome la boroshür Gojenyi Kowe La Nyipi Mel!. Hnene la trejin föe ka cile fë preséntoir hna qaja koi angeic laka, ijije hi tro angeic a ini Tusi Hmitrötr jëne la boroshür cili. Matre hnene la föe hna hamëne la numero i angeic. Ngöne ju kö la drai cili, hnene la trejin föe hna iupifë message, matre hnyingëne la drai ka loi tro nyidro a nyiqane ini Tus. Hnene la trejin hna sa hawa koi pune wiik, ngo önine la föe: “Tune kaa koi elany? Pëkö joleng.” Matre hnei nyidro hna nyiqane ini Tus lo vadredi. Ame lo pune wiik, angeic a sine la icasikeu, nge nyimenyim angeic acatrene la imelekeu i angeic me Iehova.

5. Tune kaa la aqane tro sa atreine waiewekë la easa sipo ini Tus koi ketre? (Goeëne ju fe la itre foto.)

⁵ Eje hi, tha nöjei atr asë kö la ka troa canga pi ini Tus tune lo föe e caha. Ame itre xan, loi e tro sa xomi ijin troa akökötrene la aja e kuhu hni angatr. Maine jë, tro sa nyiqane ithanatane me angatr la ketre mekun hnei angatr hna pi porotrikën. Maine xele pala kö la atr troa ini Tus, thele jë la itre xaa aqane xatua angeic. Nge nyipiewekë angeice jë. Maine jë, tro angeic a kapa elanyi troa ini Tus. Tune kaa la aqane tro sa sipone kowe la atr troa ini Tus? Tro sa ce wang la hna qaja hnene la itre trejin ka canga nyiqane ini Tus me itre atr.

6. Tune kaa la aqane tro sa thue aja kowe la atr troa porotrik hmaca me easë?

⁶ Önine la itre xaa trejin me itre pionie, ame ngöne la itre xaa nöj, ame la easa sipo ini Tus koi ketre, tha tro kö a qaja la itre hnëewekë: “inin,” “ini Tusi Hmitrötr,” maine “ini epun.” Hetre thangan la angatr a huliwane la itre hnëewekë: “ce ithanatan,” “porotrik,” me “atre hnyawan la Tusi Hmitrötr.” Maine jë, tro sa thue aja kowe la atr troa porotrik hmaca me easë, e tro sa qaja ka hape, “Tro epuni a öhne la aqane sa la Tusi Hmitrötr la itre hnying ka tru” maine “Ame la Tusi Hmitrötr, ke tha itusi ne hmi casi kö, ngo eje fe a xatua së e nöjei drai.” Nge qaja jë ka hape: “Tha ka qea menu kö, ngo tro lai a xatua epun ngöne la mele i epun.” Ketre, the qeje “isapui” kö maine “e nöjei wiik,” wanga tro angeic a mekune ka hape, easa musinë angeic.

7. Eu la itre xan a wangatrehmekune la nyipici? (1 Korinito 14:​23-​25)

⁷ Hë angeice jë troa sine la itre icasikeu. Kola mekune laka, ame ngöne la hneijine i Paulo, hnene la itre xan hna wangatrehmekune la nyipici la angatr a xötrei sine la itre icasikeu. (E jë la 1 Korinito 14:​23-​25.) Nge celë fe hi ka traqa enehila. Ame la itre ka ini Tus ka sine hë la itre icasikeu, ke canga tro hi a kökötr la ihnimi angatr koi Iehova. Eue la tro sa hë angatr kowe la itre icasikeu? Ngacama kola nyiqane qeje icasikeu ngöne la mekene 10 ne la itus Gojenyi Kowe La Nyipi Mel!, ngo ijije hi tro eö a hë angeic la epon a xötrei iöhny. Hë angeice jë kowe la icasikeu ne pune wiik, qaja jë la tane la cainöj hna troa cile fë, maine ketre mekun ngöne la Ita Ne Thup.

8. Nemene la nyine tro sa qaja kowe la ka ini Tus la easa hë angeic kowe la itre icasikeu? (Isaia 54:13)

⁸ Ame la eö a hëne la ketre atr kowe la itre icasikeu, qejepengöne jë koi angeic la eisapengönene la itre icaskeu së, memine la hnei angeic hna majemine öhn e kuhu trön. Hane hi la hna melëne hnene la ketre ka ini Tus. Angeic petre hi a hane öhne la aqane trongene la Ita Ne Thup, matre öni angeic kowe la ka ini Tus koi angeic: “Atre fe hi nyidrëti caha la ëjene la hnënge atr?” Önine la trejin, atre hi easë la ëjen la itre atrene la fami së, ketre tune fe hi la itre trejin ne la ekalesia. Kola sesëkötr hnene la ka ini Tus ke, tha hna tune fe kö ngöne la hmi angeic. Ketre, alanyimu la itre atr ka thatre la kepin matre easa icasikeu. (E jë la Isaia 54:13.) Easa icasikeu matre atrunyi Iehova, me kapa la ini qaathei Nyidrë, me itö ithuecatr. (Heb. 2:​12; 10:​24, 25) Matre pëkö lo itre hna majemine kuca ngöne la itre xaa hmi. Ngo hna kuca la itre icasikeu matre tro asë hi së a kapa hnyawane la itre ini. (1 Kor. 14:40) Ka lualai hnyawa e hnine la Uma Ne Baselaia, matre hmaloi tro sa ini. Nge pine laka, tha easa kö a lö hnine la politik, matre tha easë kö a qeje politik, maine isi ithanata. Haawe, loi e tro sa amamane kowe la ka ini Tus la video Ka Tune Kaa La Itre Icasikeu Hun? qëmekene tro angeic a sine la icasikeu. Tro angeic e cili a atre la aqane trongen.

9-10. Ame la easa hëne la ketre atr kowe la icasikeu, nemene la nyine tro sa kuca matre tha tro kö angeic a xou? (Wange ju fe la foto.)

⁹ Itre xan a cile troa sine la itre icasikeu së, ke xou i angatr troa hane Temoë Iehova. Matre qaja jë kowe lai atr ka hape, easë a madrine troa kapa la nöjei atr, nge tha easë kö a musinë angatr troa hamë mekun. Easë fe a kapa la itre fami, me itre ka trene nekönatr ngöne la itre icasikeu. Itre kem me thin me itre nekönatr a ce lapa me ce kapa la itre ini. Matre öhne hi la itre kem me thin la itre ka ce tro memine la itre nekö i angatr, me itre ini hnei nyudren hna kapa. (Dreut. 31:12) Ketre, pë fe kö tro fë itrapet. Ngo easë pe a trongëne la trengewekë i Iesu ka hape: “Ase hë nyipunie kapa gufan, hamëne gufane pi fe.” (Mat. 10:8) Qaja jë fe kowe lai atr ka hape, tha ka nyipiewekë kö troa heetrë iheetr ka tru thupen, ke tha Akötresieti kö a goeëne la ka mama, ngo hni së pe.​—1 Sam. 16:7.

¹⁰ Ame la angeic a traqa ngöne la hnë icasikeu, kepe angeice hnyawa jë. Tro sai angeice jë kowe la itre qatre thup me itre trejin. Maine drenge hi angeic ka hape, easa kepe angeice hnyawa me loi thiina, ke tro angeice lai a pi bëek hmaca. Maine pëkö Tusi Hmitrötre i angeic, ke amamane jë la itre xötr ngöne la Tusi Hmitrötre i eö, matre tro angeic a trotrohine la cainöj maine aqane ini Tusi së.

LA KOLA NYIQAN INI TUS

11. Tune kaa la aqane tro eö a metrötrëne la ijine hna sa hnene la atr?

¹¹ Nemene la nyine tro sa lapa mekun la easa ini Tus me ketre? Metrötrëne ju la ijine hnei angeic hna sa. Ngacama ame ngöne la nöje së, tha ka nyipiewekë kö troa metrötrëne la hawa, ngo e hnei epon hna isapui, loi e troa traqa ngöne la hawa hna sa. Ketre, pane ahopatrene ju la epon a xötrei ini Tus. Hnene la itre xaa trejin ka macaj hna qaja ka hape, ka loi hi la troa ahopatren, ngacama ajane hi la atr troa sisedrën. Nge the ithanata atrune kö. Nue angeice pi pe troa fe la hni angeic me qeje mekun.​—It. Ed. 10:19.

12. Nemene la nyine tro sa kuca la easa nyiqane ini Tus me ketre?

¹² Ame la eö a nyiqane ini Tus me ketre, xatua angeice jë troa atre Iehova me Iesu, me hnimi nyidro. Troa tune kaa? Amamane jë koi angeic la hna qaja e hnine la Tusi Hmitrötr, ngo the qaja kö la itre sipu mekuna i eö. (It. Hu. 10:​25, 26) Ame la Paulo aposetolo a ini itre xan, angeic a qaja atrunyi Iesu Keriso, lo atr hnei Iehova hna up, matre xatuane la itre atr troa atre Nyidrë me hnimi Nyidrë. (1 Kor. 2:​1, 2) Ketre, Paulo a xatuane la itre trejin troa huliwane la itre thiina hna aceitunëne me gool, me sileva, me etë mo ka tru thupen. (1 Kor. 3:​11-​15) Nemene thiina? Ene la lapaun, me inamacan, me wangatrehmekun, me xoue Iehova. (Sal. 19:​9, 10; It. Ed. 3:​13-​15; 1 Pet. 1:7) Nyitipu Paulo jë, nge xatuane jë la itre ka ini Tus troa catre lapaun, me imelekeu me Iehova, Keme së ka tru ihnimin.​—2 Kor. 1:​24.

13. Tune kaa la aqane tro sa atreine itreqe me itrotrohni la easa hamë ini? (2 Korinito 10:​4, 5) (Wange ju fe la foto.)

¹³ Tui Iesu, loi e tro eö a atreine itreqe me itrotrohni la eö a hamë ini. Troa tune kaa? The hnyinge menu kö koi angeic. Maine tha trotrohnine kö angeic la ketre ini, sisedrëne jë kö la ini Tusi epon, nge wange hmaca jë e thupen la ini hnei angeic hna tha trotrohnin. Ketre, e nango jole pala kö koi angeic troa kapa la ketre ini, the forse angeice kö. Nue ijine pi kowe la nyipici troa ketr la hni angeic. (Ioa. 16:12; Kol. 2:​6, 7) Tusi Hmitrötr a aceitunëne la itre ini thoi me itre itra etë atraqatr hne së hna thel troa akein. (E jë la 2 Korinito 10:​4, 5) The thele kö troa saze angeic me itre ini hnei angeic hna kapa qane ekö, ngo xatua angeice jë pe troa goeë Iehova tune la Hnë Zae me Itra Etë Atraqatr.​—Sal. 91:9.

LA KOLA NYIQANE SINE LA ITRE ICASIKEU

14. Tune kaa la aqane tro sa ujë kowe la itre ka xötrei sine la itre icasikeu së?

¹⁴ Aja i Iehova tro sa hnim me loi thiina koi nöjei atr, ngacama isa nöje së kö, me aqane mel, me hane ngönetrei maine ka trene mani maine ka pë. (Iako. 2:​1-4, 9) Matre, tro sa amamane tune kaa la ihnimi së kowe la itre ka traqa troa sine la itre icasikeu së?

15-16. Tune kaa la aqane tro sa kapa hnyawa la itre ka xötrei traqa kowe la itre icasikeu?

¹⁵ Ame la itre xaa atr, angatr a traqa kowe la itre icasikeu së ke, angatr a pi atre la aqane trongene itre ej. Maine pena, hna upi angatr kowe la itre icasikeu hnene la ketre sinee i angatr ka lapa gaa nany. Matre the cile kö troa ibozu memine la atr ka xötrei traqa, ngo tha tro kö a iahlë menu wanga xou jë angeic. Ketre, hë angeice jë troa lapa ezi eö. Nge amamane jë koi angeic la itus hne së hna inin, memine la itre xötre ngöne la Tusi Hmitrötre i eö. Maine pena, hamë itusi angeice jë. Ketre, thele jë troa akeukawanyi angeic. Hnene la ketre trahmany ka xötrei traqa hna qaja kowe la trejin ka ikep ka hape, hmahma catre angeic, ke mingöminge pala ha la hnaheetre i itre xan. Matre hnene la trejin hna akeukawanyi angeic me sa ka hape, ame la itre Temoë Iehova, ke itre atr ka tui angeice hi. Bapataiso hë angeic enehila, ngo tha thëthëhmine kö angeic la hna qaja hnene la trejin ka ikep. Matre qëmeken me thupene la itre icasikeu, loi e tro sa thel troa atrepengöne la itre ka xötrei traqa. Ngo tha tro kö sa lö hnine la mele i angatr.​—1 Pet. 4:​15.

¹⁶ Ketre, loi e tro sa thupëne la easa qaja la itre ka tha hmi kö, la easa porotrik, maine hamë mekun, maine cilefë hnëqa. Tha tro kö sa qaja la itre trengewekë ka troa akötrë angatr, me sewe angatr troa bëeke hmaca. (Tito 2:8; 3:2) Eje hi, tha tro kö sa qaja angazone la hmi angatr. (2 Kor. 6:3) Ka nyipici catre lai kowe la itre trejin ka cile fë cainöj. Ketre, loi e tro fe angatr a qejepengöne la itre hnëewekë maine itre ini ka jole troa trotrohnin.

17. Nemene la nyine tro sa kuca la easa öhne la itre atr “ka hmalahnine troa kapa” la nyipici?

¹⁷ Nyipiewekë catr enehila tro sa inine la itre atr. Nge e nöjei drai, easa öhne la itre atr “ka hmalahnine troa kapa la mele ka pë pun.” (It. Hu. 13:48) Matre the cile kö troa sipo ini Tus koi angatr, me hë angatr kowe la itre icasikeu. Eje hi lai aqane tro sa xatua angatr troa xome la “jë ne tro kowe la mel.”​—Mat. 7:​14.