“ Eö La Ketre Atr Hna Wangatrun”!

1-2. Nemene la ka troa xatua së troa trotrohnine laka, Iehova a wangatrunyi së?

NGACAMA Iehova a wangatrune la itre hlue i Nyidrë, ngo hetre itre xan pala hi ka wanganconyi angatr. Maine jë hna lapa thaipië angatr. Hna hane fe traqa lai koi eö? Maine eje hi, nemene la ka troa xatua eö troa trotrohnine laka, Iehova a wangatrunyi eö?

² Loi e tro eö a e la itre hna melëne e hnine la Tusi Hmitrötr, ka amamane la aqane ujë i Iehova kowe la itre atr. Hnei Iesu hna metrötrën me wangatrune la itre atr. Nyidrëti a amaman e cili laka, nyidrë me Keme i nyidrë a wangatrun la itre atr ka wangaconyi angatre kö. (Ioa. 5:19; Heb. 1:3) Ame ngöne la tane mekune celë, tro sa ce wang: (1) la aqane xatuane Iesu la itre atr, matre tro angatr a trotrohnine laka, Iehova a wangatrunyi angatr me (2) la nyine tro sa kuca, matre troa xecie koi së laka, Iehova a wangatrunyi së.—Hag. 2:7.

IESU A XATUANE LA ITRE ATR TROA ATRE LAKA IEHOVA A WANGATRUNYI ANGATR

3. Tune kaa la aqane ujë Iesu kowe la angetre Galilaia ka aja ixatua?

³ Ame lo Iesu a cainöj e Galilaia, alanyimu la itre atr qa ngöne la nöjei götran ka traqa troa drei nyidrë me sipone troa aloine la itre meci angatr. Öhne i nyidrë laka, “ceitu i angatr me itre mamoe ka pë atre thupën.”(Mat. 9:36) Ame koi itre he ne hmi, itre ka tha inamacan la itre atre cili, matre tha nyipiewekë angatre kö, göi jelë angatre fe ka hape, itre “ka hnëjin.” (Ioa. 7:47-49) Ngo hnei Iesu hna loi thiina me metrötrë angatr, me xomi ijine troa ini angatr me aloine la itre meci angatr. (Mat. 9:35) Ketre, hnei nyidrë hna inine la itretre dreng troa cainöj, me aijijë angatr troa aloine la itre sine mec, matre xatuane la ka alanyum.—Mat. 10:5-8.

4. Nemene la ini hne së hna xome qa ngöne la aqane ujë i Iesu kowe la itre ka thele ini thei nyidrë?

⁴ Ame la Iesu a metrötrën me nyipiewekën la itre ka drei nyidrë, ke nyidrëti hi lai a amaman ka hape, nyidrë me Keme i nyidrë a wangatrune la itre atr hna xele ma wang. Maine eö a nyihlue i Iehova, ngo eö a wangaconyi eö, ke lapa mekune jë la aqane ujë i Iesu kowe la itre ka thele ini thei nyidrë. Tro lai a xatua eö troa trotrohnine la aqane wangatrunyi eö hnei Iehova.

5. Qaja jë la hna melën hnene la ketre föe ne Galilaia ka iöhnyi me Iesu.

⁵ Nyipici laka, Iesu a inine la ka alanyim, ngo nyidrëti fe a wangatrunyi angatr isa ala cas. Ame lo Iesu a cainöj e Galilaia, hnei nyidrëti hna iöhnyi memine la ketre föe ka neni hni, a 12 hë lao macatre. (Mar. 5:25) Ketre föe lai ka pui ngazo thenge la hmi i angetre Iudra. Nge ame asë hi la itre ka ketri eahlo, ke tro fe angatre lai a pui ngazo. Matre eahlo casi pala pe hi. Ketre, tha ijiji eahlo kö troa sine la hmi ngöne la sunago, me atrune la itre feet. (Lev. 15:19, 25) Trotrohnine hi easë laka, ketre föe lai ka xomi akötr.—Mar. 5:26.

6. Hna aloine tune kaa la meci ne la föe ka neni hni?

⁶ Tru la aja ne la föe cili tro Iesu a aloinyi eahlo. Ngo tha hnei eahlo kö hna tro meköt koi nyidrë. Pine nemen? Maine jë, eahlo a hmahma, maine xou tro Iesu a wesitrë eahlo, pine eahlo lö hnine la ka alanyum. Celë hi matre, hnei eahlo hna ketr la pune iheetre i Iesu, ke xecie koi eahlo laka, aqane tro hi lai a amele eahlo. (Mar. 5:27, 28) Hna amanathithi eahlo, ke loi hë la meci eahlo. Ame lo Iesu a hnyinge ka hape, drei la ka ketri nyidrë, ke canga sa jë hi eahlo. Nemene la hnei Iesu hna kuca?

7. Tune kaa la aqane ujë i Iesu kowe la föe ka hace hni? (Mareko 5:34)

⁷ Hnei Iesu hna loi thiina me metrötrëne la föe cili. Öhne hi nyidrë laka, eahlo a ‘xou me hmengöhmengön.’ (Mar. 5:33) Matre hnei nyidrëti hna menyik me ithanata hnyawa koi eahlo. Hnei nyidrëti fe hna hë eahlo ka hape, “neköng,” ketre hnëewekë lai ka amamane la ipië, me loi thiina me ihnim. (E jë la Mareko 5:34.) A ca qaja hi hnei Tusi Hmitrötr laka, Iesu a hëne la ketre föe ka hape, “neköng.” Hnei nyidrë hna qaja la hnëewekë cili ka iakeukawany, ke eahlo meci hnei xou. Drei jë kö la kola akeukawanyi eahlo hnene la hnei Iesu hna qaja! Maine tha ithanata amenyikene ju Iesu koi eahlo, tro eahlo lai a hleuhleu me nyizö eahlo. Ngo hnei Iesu hna xatua eahlo troa trotrohnine laka, eahlo la ketre nekö i Iehova hna hnim catrën.

8. Nemene la itre jol hna cile kow hnene la ketre trejin föe qa Brésil?

⁸ Ame enehila fe, kola tith la itre xaa hlue i Iehova hnene la itre sine mec ka ahleuhleunyi angatr. Ame la kola hnaho Maria,a ketre pionie qa Brésil, ke patre kö la lue iwaca memine la wanakoime mi angeic. Öni angeic: “Ame koilo hna ini, kola qanangazo ni lapa. Angatr a ati ëjeng matre hnyimasai ni. Göi thaipië ni fe hnene la faming.”

9. Nemene la ka xatua Maria troa trotrohnine laka, Iehova a wangatrunyi angeic?

⁹ Nemene la ka xatua Maria troa trotrohnine laka, Iehova a wangatrunyi angeic? Ketre Temoë Iehova ha angeic, nge hnene la itre trejin hna akeukawanyi angeic, me xatua angeic troa goeë angeic, tune la aqane goeë angeic hnei Iehova. Öni angeic: “Tha ijije kö la neköi karneng, matre cinyanyine la ëjen ne la itre ka loi thiina koi ni! Eni a olene catrëne koi Iehova la hna hamë ni la ketre fami ka lolo ngöne la ekalesia.” Jëne la itre trejin, trotrohnine hë Maria laka, Iehova a wangatrunyi angeic.

10. Nemene la jol hna cile kow hnei Maria Magadalena? (Goeëne ju fe la itre foto.)

¹⁰ Tro sa ce wang la aqane xatua Maria Magadalena hnei Iesu, matre tro angeic a trotrohnine la aqane wangatrunyi angeic hnei Iehova. Hna löthi angeic hnene la sevene lao dremoni! (Luka 8:2) Ka ketrepengöne la aqane ujë i angeic, matre itre atr a ananyi angeic. Ame ngöne la ijine cili, kola xele ma wai eahlo, nge pëkö ka hnim me pi xatua eahlo. Hnei Iesu hna helëne la itre dremoni ka akötrë eahlo, nge hnei eahlo hna xötrethenge nyidrë. Ngo nemene la ketre aqane xatua eahlo hnei Iesu, matre troa trotrohnine laka, Iehova a wangatrunyi eahlo?

11. Tune kaa la aqane amamane Iesu laka, ka tru catre Maria Magadalena koi Akötresie? (Goeëne ju fe la itre foto.)

¹¹ Hnei Iesu hna hë Maria Magadalena troa cainöj trootro me nyidrë.b Matre madrine catre Maria troa drei nyidrëti a hamë ini kowe la itre atr. Ketre, hnei Iesu hna mama koi eahlo, lo kola amele nyidrëti hmaca. Ame ngöne la ijine cili, hnei nyidrë hna pane ithanata kowe la itretre dreng, nge ce eahlo fe me angatr. Goi upi eahlo fe troa thuemacane la itre aposetolo laka, mele hmaca ha nyidrë. Kolo hi lai a amaman ka hape, ka tru catre eahlo koi Iehova!—Ioa. 20:11-18.

12. Qejepengöne jë la kepin matre Lidia a mekun ka hape, pëkö ca eloi angeic.

¹² Tui Maria Magadalena, tru hnei atr enehila ka mekun ka hape, pëkö ca eloi angatr. Öni Lidia, ketre trejin föe qa Espagne ka hape, ame lo thine i angeic a upune angeic, hnei eahlo hna mekun troa thi upune. Ame lo co petre kö Lidia, tha hna thupë angeice hnyawa kö hnei thin, goi qaqa angeic fe me qanangazo angeic. Öni angeic: “Ajange catr tro la itre xan a hnimi ni me nyipiewekë ni. Ngo pine laka, hnei nenë hna lapa thaipië ni, matre ame koi ni, tha tro kö a hane hnimi ni hnei itre xan.”

13. Nemene la ka xatua Lidia troa trotrohnine laka, ka tru angeic koi Iehova?

¹³ E thupen, hnei Lidia hna atre Iehova. Jëne la itre thithi angeic, me ini Tusi Hmitrötr, me ihnimi ne la itre trejin, trotrohnine hë angeic laka, ka tru angeic koi Iehova. Öni angeic: “Hnei föeng hna lapa qaja koi ni ka hape, nyidrëti a hnimi ni. Nyidrëti pala hi a amexej la itre thiinang ka lolo. Nge eje fe hi lai hna kuca hnene la itre sineeng.” Hetre atre kö nyine tro epuni a xatuane matre troa trotrohnine laka, Iehova a wangatrunyi angeic?

TRO SA GOEË SË TUI IEHOVA

14. Tune kaa la aqane amamane 1 Samuela 16:7 la aqane goeë së hnei Iehova? (Wange ju la hna eköhagen hna hape “Hnauëne La Iehova a Wangatrun La Itre Hlue i Nyidrë?”)

¹⁴ Mekune kö laka, tha Iehova kö a goeë eö tune la aqane goeë eö hnei fen. (E jë la 1 Samuela 16:7.) Tha Iehova kö a wangatrunyi eö, hnene la pengö i eö, me huliwa i eö, me itre ini hnei eö hna kuca. (Isa. 55:8, 9) Matre, the goeë eö kö tune la aqane goeë eö hnei fen, ngo tune pe la aqane goeë eö hnei Iehova. E jë la itre hna melën e hnine la Tusi Hmitrötr ka amaman laka, Iehova a wangatrun la itre atr ka wangaconyi angatre kö, tui Elia, Naomi me Hana. Makëne jë fe la itre la itre aqane hnimi eö hnei Iehova, me aqane nyipi eö hnei Nyidrë. Ketre, e jë fe ngöne la itusi së, la itre tane mekun ka qaja la aqane tro sa goeë së.c

15. Pine nemen matre, Iehova a goeë Daniela tune la “ketre atr hna wangatrun”? (Daniela 9:23)

¹⁵ Ka tru la aqane mele nyipici ëö koi Iehova. Ame lo Daniela perofeta a easenyine la 100 lao macatre, ke “kucakuca catre” angeic. (Dan. 9:20, 21) Hnei Iehova hna xatua angeic tune kaa? Hnei Nyidrë hna upi Gaberiela ketre angela, matre amexeje koi angeic ka hape, angeic la “ketre atr hna wangatrun,” nge Iehova a dreng la itre thithi angeic. (E jë la Daniela 9:23.) Pine nemen matre, Iehova a wangatrunyi Daniela? Pine la itre thiina ka lolo i angeic, tune la ihnimi angeic kowe la meköt me mele nyipici. (Ezek. 14:14) Hna cinyanyine la hna melëne celë e hnine la Tusi Hmitrötr, matre akeukawanyi së. (Roma 15:4) Ketre tun, Iehova fe a drenge la itre thithi eö, me wangatrunyi eö, pine la ihnimi eö kowe la loi, me aqane mele nyipici eö koi Nyidrë.—Mika 6:8, ith.; Heb. 6:10.

16. Nemene la ka troa xatua eö troa goeë Iehova tune la Kem ka ihnim?

¹⁶ Goeë Iehova jë tune la kem ka hnimi eö. Tha Iehova kö a thel troa nyizö eö, ngo tro pe a xatua eö. (Sal. 130:3; Mat. 7:11; Luka 12:6, 7) Hnene la itre trejin ka wangaconyi angatre kö hna lapa mekun la nyipici cili, nge celë hi ka akeukawanyi angatr. Tune la hna melën hnei Michelle, ketre trejin föe qa Espagne. Hnene la föi eahlo hna lapa thaipië eahlo, matre ame koi eahlo, pëkö ca eloi eahlo. Öni eahlo, “Ame mina la eni a mekun ka hape, ka pë hnënyöngöne ni, eni a canga meku Iehova, Nyidrëti a nango xepi ni ngöne la lue ime i Nyidrë, me akeukawanyi ni.” (Sal. 28:9) Ame pena Lauren, ketre trejin föe qa Afrique du Sud, eahlo pala hi a mekun ka hape, “E hnei Iehova hna ee ni jëne la itre eno ne ihnim, me xatua ni troa lapa qale koi Nyidrë ngöne la itre macatre, me aijijë ni troa ini Tusi Hmitrötr koi itre xan, ke kolo hi lai a amaman ka hape, Nyidrëti a wangatrunyi ni me hnimi ni.”—Hos. 11:4.

17. Tro eö a atre tune kaa ka hape, Iehova a kepe eö? (Salamo 5:12) (Wange ju fe la foto.)

¹⁷ Loi e xecie koi eö laka, Iehova a kepe eö. (E jë la Salamo 5:12.) Dravita a aceitunëne la aqane kepe së hnei Iehova me ketre “petr atraqatr,” ka thupëne la itre ka meköt. Maine xecie koi së laka, Iehova a xatua së me kepe së, ke tro lai a thupë së qa ngöne la itre mekun ka ngazo, tune la troa wangaconyi së. Tro eö a atre tune kaa ka hape, Iehova a kepe eö? Tune la hne së hna ce wang, Nyidrëti a amaman jëne la Tusi Hmitrötr. Ketre, jëne la itre qatre thup, me itre sinee, me itre trejin, Nyidrëti a amekunë eö ka hape, ka tru eö koi Nyidrë. Tune kaa la aqane tro eö a goeëne lai?

18. Hnauëne la tro eö a kapa la kola qaja aloinyi eö hnei itre xan?

¹⁸ Kapa ju la kola qaja aloinyi eö me felisite eö, hnene la itre atr ka atre eö, me hnimi eö. Mekune kö laka, Iehova a nyijëne angatr, matre amaman ka hape, Nyidrëti a kepe eö. Öni Michelle, lo hna qaja e caha ka hape: “Eni ha nyiqane kapa la itre xan a qaja aloinyi ni. Tha ka hmaloi kö, ngo celë hi aja Iehova.” Ketre, hnene la itre qatre thup hna xatua angeic troa öhne ka hape, Iehova a kepe angeic. Ketre pionie hë Michelle enehila, nge angeice fe a hane ixatua ngöne la Bethela.

19. Hnauëne laka, xecie koi eö ka hape, Iehova a wangatrunyi eö?

¹⁹ Iesu a amexeje koi së laka, Iehova Keme së a wangatrunyi së. (Luka 12:24) Matre, loi e troa xecie koi së ka hape, ka tru catre së koi Nyidrë. The thëthëhmine pi kö lai! Haawe, isine jë së troa xatuane la itre xan troa öhne laka, Iehova a wangatrunyi angatr!