Mekun Palahi Së?

Hnei epuni kö hna e la itre Ita Ne Thup ne la macatre celë? Atreine kö epuni sa la itre hnyinge celë:

Nemene la ka upi së troa atrunyi Iehova?

Easa atrunyi Iehova ke, tru la metrötr me ihnimi së koi Nyidrë, nge aja i easë tro la itre atr a hane atre Nyidrë.​—w25.01, g. 3.

Maine tro ketre a akötrë së, nemene la ka troa xatua së troa nue la ngazo?

Tha tro kö sa lapafë trengehni. Matre tha tro kö a löth la hni së hnene la elëhni me wesitr.​—w25.02, g. 15-​16.

Hnauëne laka, tulu ka lolo la tulu i Mareko kowe la itre trejin nekö trahmany?

Hnei Mareko hna kapa la hnëqa. Ngacama hna hane akötrë angeic, ngo hnei angeic hna catre huliwa koi Iehova. Hnei angeic hna nyisinee Paulo me itre xaa trejin ka macaj.​—w25.04, g. 27.

Nemene la aliene la Iesu a qaja ka hape: “Hnenge hna qaja amamane la ëje i nyipë koi angatr”? (Ioane 17:26)

Atre asë hi la itretre dreng la ëje i Akötresie. Matre, hnei nyidrë hna qejepengöne koi angatr la itre aja i Iehova, me itre huliwa me itre thiina i Nyidrë.​—w25.05, g. 20-​21.

Maine ka atreine tulu ewekë së, nemene la hne së hna trotrohnin?

Tro sa trotrohnine laka, hetre ewekë hne së hna thatre. Thatre kö së la drai ne troa traqa la  pun, maine la hnei Iehova hna troa kuca koi së. Nge thatre kö së la ka troa traqa elany, maine aqane atrepengö së hnei Iehova.​—w25.06, g. 15-​18.

Tune kaa la aqane tro sa kepe thangan qa ngöne la ketre tane mekun, maine ketre cainöj?

Isa hnyinge jë ka hape: ‘Nemene la itre mekun hna qaja, matre qejepengöne la nyipici? Hetre ceitune kö hna hamën ka troa xatua ni troa hamë ini koi itre xan? Drei la nyine tro ni a xatuane memine la mekune celë?’​—w25.07, g. 19.

Nemene la ini hne së hna xom qa ngöne la aqane nue Iehova la ngazo i Dravita?

Hnei Dravita hna kei kowe la itre ngazo ka tru. Ngo ame la angeic a ietra, hnei Iehova hna nue la ngazo i angeic. (1 It. Jo. 9:​4, 5) Ame la Iehova a nue la ngazo, tha Nyidrëti kö a amexej, maine mekun hmaca.​—w25.08, g. 17.

Maine jol kowe la ka ini Tus troa kapa la ketre ini, nemen la nyine tro epuni a kuca?

Maine hnei epun hna anyimua qejepengön jëne la Tusi Hmitrötr, ke pane nue pi la ini cili, tro pë epun a bëek hmaca e ketre ijin.​—w25.09, g. 24.

Tusi Hmitrötr a qaja la “mene ka iaö ne la ngazo.” (Heb. 3:​13) Kola hapeu?

Tro la ngazo a uku së troa kuca la itre ewekë ka ngazo. Tro fe ej a acian the së la mekun laka, tha hnimi së kö hnei Akötresie.​—w25.10, g. 16.

Qaja jë la köni ewekë ka troa xatua së troa easenyi Iehova la easa thith?

(1) Troa lapa mekun la itre thiina i Iehova. (2) Troa mekun la itre jol hne së hna melën, tune la troa nue la ngazo i ketre. (3) Troa thithi aqeany. Tro së lai a atreine qaja hnyawan la ka ej e kuhu hni së.​—w25.10, g. 19-​20.

Tro sa xatuane tune kaa la itre qatr?

Tro sa wai angatr maine telefon lapa. Ijije hi tro sa ce tro me angatr troa wai droketre, me ce cainöj me angatr.​—w25.11, g. 6-7.

Nemene la nyine tro la itre keresiano a kuca matre troa atrunyi Iehova ngöne la drai ne faipoipo i angatr?

Loi e troa trongëne la itre hna amekötin hnei mus. Nge loi e troa hetre metrötr me mama la itre thiina ne la wene ne la ua ngöne la ijine feet. Ketre, troa atreine tulu ewekë la kola ië hnaheetr, me nuetrij la itre hna majemine ka ngazo, me hnëkë hnyawa.​—w25.12, g. 21-​24.