Troa Atrunyi Iehova Ngöne La Drai Ne Faipoipo

1-2. Nemene la hnei Iehova hna ajane kowe la lue ka troa faipoipo?

HAPEU, epuni kö a hnëkë troa faipoipo? Madrine catr eahun koi epon! Ma tru catr hnei jole i epon, ke epon a hnëkëne la drai ne faipoipo. Aja i Iehova tro epon a madrin la epon a mekun hmaca lo drai ne faipoipoa i epon, nge tro fe a tro loi la mele ne trefëne i epon.​—It. Ed. 5:​18; N. i Sol. 3:​11.

² Nyipiewekë catr troa atrunyi Iehova ngöne la drai ne faipoipo. Pine nemen? Nemene la nyine tro epon a kuca matre troa atrunyi Iehova? Ngacama hna kuca la tane mekune celë thatraqane la lue trejin ka hnëkë troa faipoipo, ngo ame la itre trepene meköt ke, thatraqai së asë, itre hna hëne kowe la faipoipo, maine itre ka hamë eamo koi nyidro.

HNAUËNE LA EASA ATRUNYI IEHOVA?

3. Nemene la nyine troa thupëne hnene la itre trejin ka hnëkë troa faipoipo, nge pine nemen?

³ Tru catr la itre mekun nyine troa axeciën hnene la itre trejin ka troa faipoipo. Angatr a thupëne matre tro pala hi itre ej a ihmeku memine la itre trepene meköti Iehova ka mama ngöne la Tusi Hmitrötr. Pine nemen? Pine laka, Iehova la Atrekë Ewekëne la faipoipo. Nyidrëti la ka acile la pane faipoipo, me acasi Adramu me Eva. (Gen. 1:​28; 2:​24) Matre ame la ka sisitria koi së la easa hnëkë troa faipoipo, ke ene la troa atrunyi Iehova.

4. Nemene la ketre kepine matre easa ajan troa atrunyi Iehova la easa hnëkëne la drai ne faipoipo së?

⁴ Hetre ketre kepine matre easa ajan troa atrunyi Iehova la easa hnëkëne la drai ne faipoipo së: Nyidrëti la Keme së me sipu Sinee së. (Heb. 12:9) Nge aja së tro pala hi a catr la imelekeu së me Nyidrë. Ketre, tha aja i easë kö troa akötrë Nyidrë ngöne la ijine faipoipo maine ngöne la itre drai thupen. (Sal. 25:14) Nge ame la easë hmaca a mekun la hnei Iehova hna kuca koi së ekö, me enehila, me elany, easa ajane troa atrunyi Nyidrë ngöne la drai ne faipoipo së.​—Sal. 116:12.

AQANE TRO SA ATRUNYI IEHOVA

5. Tro la Tusi Hmitrötr a xatua së tune kaa troa hnëkëne la drai ne faipoipo së?

⁵ Pëkö hna amekötine hnei Tusi Hmitrötr göne la aqane trongene la faipoipo, maine göne la ijine feet. Matre isa qanyi së kö axecië mekun thenge la hne së hna hetreny, me itre hna majemine kuca ngöne la nöje së, me itre hne së hna ajan. Ngo, itre hlue i Iehova a metrötrëne la itre hna amekötin hnei Kaisara. (Mat. 22:21) Maine tro la lue ka troa faipoipo a trongëne hnyawane la itre trepene meköt, la nyidro a axecië mekun, tro nyidroti lai a atrunyi Iehova me amadrinë Nyidrë. Nemene la itre trepene meköt?

6. Pine nemene matre nyipiewekë tro la lue ka troa faipopo a metrötrëne la itre hna amekötin hnei mus? (Roma 13:​1, 2)

⁶ Troa metrötrëne la itre hna amekötin hnei mus. (Roma 13:​1, 2) Ame ngöne la itre xaa nöj, hetre hna amekötin nyine tro la lue ka troa faipoipo a pane trongën. Matre loi e tro nyidro a atre la itre hna amekötine cili. Maine thatre kö epon la nyine troa kuca, sipo ixatua jë kowe la itre qatre thup.b

7. Troa tune kaa la drai ne faipoipo?

⁷ Loi e troa hetre ehmitrötrene la drai cili. (1 Kor. 10:​31, 32) Loi e troa mama ngöne la drai ne faipoipo i epon la wene ne la ua, ngo tha ene kö la itre huliwa ne ngönetrei. (Gal. 5:​19-​26) Pine laka, trahmanyi la he ne la föe, matre hnëqa ne la trejin trahmanyi ka troa faipoipo troa thupëne matre tro la faipoipo i nyidro a tro loi me atrunyi Iehova. Nemene la ka troa xatua nyidro? Hetre cainöj hna nyitrepene hnei Tusi Hmitrötr hna cilefë ngöne la ihnim me metrötr. Celë hi ka acatrene la hni ne ole ne la itre ka dreng kowe la faipoipo. Nge kolo fe a amekunë angatr la enyipiewekëne la drai cili. Celë hi matre, alanyim la itre trejin ka iëne troa cile fë la cainöj ngöne la Uma Ne Baselaia. Maine celë fe hi aja i epon, ke canga cinyanyi jë kowe la lapa ne la itre qatre thup.

8. Maine epon a mekun troa feet ngöne la drai ne faipoipo i epon, nemene la nyine tro epon a kuca matre tro pala hi a atrunyi Iehova? (Roma 13:13)

⁸ E jë la Roma 13:13. Maine epon a mekun troa hetre feet, nemene la nyine tro epon a kuca matre tha tro kö a mama la itre huliwa ne la fen? Ame la hnaewekë qene Geres hna hape, “kuci feete qenahmo” ke, kola qaja la itre ijine ca lapa, nge itre atr a iji gorok me drei miuzik utihë hnenyipajidr. (Wange ju la note d’étude Qene Wiwi hna hape, “fêtes débridées” ngöne Roma 13:13.) Maine epuni a mekun troa ami kahaitr, thupëne kö wanga sasaithi tulu jë hnei itre xan.c Nge e kola ami miuzik, wange pala kö la volum, wanga thahe jë la itre ka porotrik. Ketre, wange hnyawa ju la itre pengöne miuzik me itre trengewekë, matre tha tro kö a athixötrëne la itre xan.

9. Maine hetre hna hnëkën, maine hetre ka pi qeje mekun, nemene la nyine tro epon a kuca?

⁹ Hetre fami epuni kö maine sinee i epun ka hane pi qeje mekun? Hetre foto kö, maine video maine itre xaa ewekë hna hnëkën? Itre ewekë lai ka troa amadrinë epon. Ngo thupëne kö, matre tro la itre hna troa qaja me kuca ngöne la ijine cili a ithuecatr. (Fil. 4:8) Isa hnyinge jë ka hape: ‘Tro kö lai a athixötrë itre xan? Kolo kö lai a metrötrëne la faipoipo?’ Nge ame la ka sisitria ke: ‘Tro kö lai a atrunyi Iehova?’ Tha ka ngazo kö troa ihnyima, ngo thupëne kö matre tha tro kö qaja la itre iqenehnyima ka sis. (Efe. 5:3) Maine kola pi qeje mekun hnene la itre fami epon, maine itre sinee, qaja hnyawane jë koi angatr la mekuna i epon.

10. Pine nemen matre loi e tro la lue ka troa faipoipo a atreine tulu ewekë? (1 Ioane 2:​15-​17)

¹⁰ Troa atreine tulu ewekë. (E jë la 1 Ioane 2:​15-​17.) Madrine catre Iehova la easa thel troa atrunyi Nyidrë hune la troa pi mama. Celë hi matre, tha tro kö a aluzi mani matre “pi mama fë la itre ewekë së.” Hetre eloine troa ahmaloeëne la faipoipo së. Öni Mike qa Norvège: “Tha hnei nyio kö hna xomi gufa, matre ka pionie pala hi nyio enehila. Tha ka tru kö la faipoipo i nyio, ngo ka mingöming, nge thatreine kö tro nyio a thëthëhmin.” Öni Tabitha, ka mel e Inde: “Tha hnehengazo menu kö nyio. Pine laka, tha tru kö la faipoipo i nyio, matre co hi la nyine troa hnëkën, nge pëkö iwesitrë.”

11. Tune kaa la aqane tro la lue ka faipoipo a atreine tulu ewekë göi hnaheetr me itre xaa ewekë ju kö? (Goeëne ju fe la itre foto.)

¹¹ Nemene la hnei epun hna troa heetrëne ngöne la drai ne faipoipo? Ketre drai lai tro epon a mingöming. Ame ekö, itre ka faipoipo a isisne troa mingöming ngöne la ijine cili. (Isa. 61:10) Nyipici laka, ketrepengöne kö la aqane heetre së ngöne la drai ne faipoipo, ngo loi e tro pala hi sa atreine tulu ewekë. (1 Tim. 2:9) Tha tro kö a hnehengazone menune pala ha la itre hnaheetr, me itre xaa ewekë ju kö. Tha celë kö ka sisitria ngöne la ijine faipoipo.​—1 Pet. 3:​3, 4.

12. Pine nemen matre tro la itre ka faipoipo a nuetrij la itre hna majemin ka tha ihmeku kö me Tusi Hmitrötr?

¹² Troa nuetrij la itre hna majemin ka tha ihmeku kö me Tusi Hmitrötr. (Hna Am. 18:4) Ame la itre hna majemin kuca enehila ngöne la itre ijine faipoipo, ke hna löth hnene la itre huliwa ne la hmi ka thoi, memine la kuci iöni. Nge Iehova a upi së troa lapa ananyine la itre ewekë cili ka sis. (2 Kor. 6:​14-​17) Maine tha nyipi mama kö koi së la qan la itre xaa hna majemine kuca ngöne la nöje së, pane ithele jë. Nge thele jë fe la itre trepene meköt ka troa xatua së troa axecië mekune ka loi.

13. Tro la itre ka faipoipo a nyitipu Iehova tune kaa la kola hamë ahnahna koi angatr?

¹³ Hna majemine kö thei epun troa hamë ahnahna kowe la itre ka faipoipo? Nyipici laka, easa hamë ahnahna thenge la hne së hna hetreny. Tusi Hmitrötr a ithuecatr koi së troa ham, nge easa madrine la easa ham. (It. Ed. 11:25; It. Hu. 20:35) Ngo, tha tro kö la lue ka faipoipo a musinëne la itre hna hën troa hamë ahnahna, maine amaman ka hape, tha ka nyipiewekë kö la ahnahna, ke tha ka tru thupene kö. Easa nyitipu Iehova, la easa olen kowe la itre ahnahna hna hamën qa kuhu hni.​—2 Kor. 9:7.

AQANE TROA ELËHUNE LA ITRE JOL

14. Nemene la itre jol hna cile kow hnene la itre ka troa faipoipo?

¹⁴ Tha ka hmaloi kö troa atrunyi Iehova la kola faipoipo. Maine jë, jole koi epun troa ahmaloeën la faipoipo. Pine nemen? Öni Charlie, ka mel e Salomon: “Jole koi nyio troa iën la itre hnei nyio hna troa hën kowe la faipoipo. Tru catre la itre sinee i nyio, nge ame ngöne nöje hun, troa hëne asë la itre sinee!” Öni Tabitha, lo hne së hna qaja e kula: “Ame ngöne la nöje hun, nyipiewekë troa tru hnei atr hna hën. Jole koi kaka me nenë troa kapa la mekuna i nyio, troa hëne hi la 100 lao atr.” Öni Sarah, ka mel e Inde: “Itre xan a goeën la hne së hna hetreny me itre hne së hna kuca. Pine laka, ka tru la faipoipo ne la itre xaa sineeng, matre kösë ame koi ni, ka loi troa tru hmaca kö la faipoipong.” Nemene la ka troa xatua epun troa elë hun la itre jole cili?

15. Pine nemen matre nyipiewekë troa thith la kola hnëkëne la faipoipo?

¹⁵ Troa thith la kola hnëkëne la faipoipo. Qaja asë jë koi Iehova la itre mekun nyine tro epon a xom, me itre aliene hni epon. (Fil. 4:​6, 7) Sipo Nyidrëti jë la tingeting, matre xatua epon troa xomi mekune ka loi, memine fe la trengecatr, e tha kapa kö itre xan la mekuna i epon. (1 Pet. 5:7) Nge ame la epon a öhne la ixatua i Iehova, tro ha kökötre la lapaune i epon koi Nyidrë. Öni Tabitha: “Xou i eni tro nyio a iwesitrë, maine troa iwesitrë memine la fami nyio. Matre ame la nyio a ithanatane la faipoipo, nyio a pane thith. Hnei nyio hna öhne la ixatua i Iehova, nge tingetinge pala hi nyio, la nyio a porotrikën la faipoipo.”

16-17. Hnauëne laka, loi e troa ithanata amenyiken me metrötr la kola hnëkën la faipoipo?

¹⁶ Troa ithanata amenyiken me metrötr. (It. Ed. 15:22) Nyimu mekun nyine tro epon a xom göne la ijine faipoipo. Tro epon a sa la drai ne faipoipo, me budget i epon, memine la itre hnei epon hna troa hën. Qëmekene troa axecië mekun, loi e tro epon a ce wang la nyine tro epon a kuca, me itre trepene meköt nyine troa trongën, me itre eamo hna hamën hnene la itre trejin ka macaj. Ame la epon a ithanatane la hnei epon hna isa ajan, loi e troa menyik, me atreine tulu ewekë, me itrotrohni. Maine hetre hna sipone hnene la ketre atrene la fami epon, tune la keme me thine i epon, ke kapa ju. Ketre drai lai ka ketrepengöne fe koi angatr. Ngo e tha ijiji epon kö troa kapa la sipo i angatr, ke qaja jë koi angatr cememine la metrötr. (Kol. 4:6) Qaja hnyawane jë kowe la fami epon laka, ame la aja i epon, ke troa atrunyi Iehova ngöne la drai ne faipoipo i epon.

¹⁷ Maine tha ka hmi kö la keme me thine i epon, ke troa jol koi epon troa qaja la hnei epon hna axeciën. Ngo ijiji epon hi. Öni Santhosh ketre trejin trahmanyi qa Inde: “Aja ne la fami nyio, tro nyio a kuca la itre xaa hna majemine ngöne la hmi hindouiste. Tha ka hmaloi kö, ngo hnei nyio hna qejepengöne koi nyidro la kepin matre tha ijiji nyio kö. Ame pe, hnei nyio hna kapa la itre xaa sipo i nyidro, ke tha ka ena kö la itre wathebo i Iehova. Hnei nyio hna saze la menu, me amë la itre xen hnei nyidro hna pi xen. Ketre, hnei nyio hna axeciën ka hape, tha tro kö a fia maine nyima, ke tha ka majemine kö nyidro kowe la itre ewekë cili.”

18. Nemene la nyine tro epon a kuca matre troa tro loi la drai ne faipoipo i epon? (1 Korinito 14:40) (Wange ju fe la foto.)

¹⁸ Troa hnëkë hnyawa. Maine tro epon a hnëkë hnyawa, tha tro kö epon lai a hnehengazo menu la drai ne faipoipo. (E jë la 1 Korinito 14:40.) Öni Wayne ka mel e Taïwan: “Itre drai qëmekene la faipoipo, hnei nyio hna icasikeu memine la itre ka xatua nyio troa hnëkëne la drai cili. Hnei eahun hna ce wang hmaca la hna troa kuca ngöne la ijine cili, matre troa tro loi.” Easa amamane la metrötre së kowe la itre hna hën, la easa metrötrëne la hawa.

19. Nemene la ka troa xatua epun matre troa tro loi la feete i epun?

¹⁹ Loi e tro epuni a canga hnëkë, e traqa ju la ketre jol. (It. Ed. 22:3) Maine ame ngöne la nöje i epun itre atr a majemin traqa xan, ngöne la ijine faipoipo, ke mekune jë la nyine tro epuni a kuca. Maine hetre sinee i epun ka tha hmi kö ka hane traqa, qaja jë koi angeic la aqane trongen, memine la itre hna majemine ka ngazo hna tha kuca hnei easë. Amamane jë koi angeic la tane mekun “Comment se passe un mariage chez les Témoins de Jéhovah ?” ngöne jw.org. Ketre, troa tro loi la ijine feet, e tro epun a sipone kowe la ketre trejin trahmanyi ka macaj troa “tane huliwa.” (Ioa. 2:8) Maine tro epuni a qaja hnyawane koi nyidrë la itre hnei epuni hna amekötin, tro nyidrëti a xatua epun matre tro la drai cili a tro loi, me atrunyi Iehova.

20. Nemene la nyine tha tro kö a thëthëhmin hnene la lue ka troa faipoipo?

²⁰ Epuni jë a hnehengazo, la epuni a mekun la nyine troa kuca matre hnëkëne la drai ne faipoipo. Ngo the thëthëhmine kö laka, ame la drai ne faipoipo ke, ca drai hi lai. Kolo lai a nyiqane la mele i epon ngöne la huliwa i Iehova. Isine jë troa ahmaloeëne la ijine cili, me atrunyi Iehova. Mejiune jë koi Nyidrë. Jëne la ixatua i Nyidrë, troa tro loi la drai cili. Nge tro epon lai a madrin la epon hmaca a mekun elany.​—Sal. 37:​3, 4.