Tus Qathei Collège Central
Pine laka easë a troa sisedrën la itre pane macatre ne la hnaatruedri waan hadredre ne macatre, haawe, celë hi ketre madrin ka tru koi hun troa cinyanyi koi epun “ange tejin” e cailo fen, me qaja aloinyi nyipunie hnene la aqane catr huliwa i nyipunie. (1 Pet. 2: 17) Kolo ha troa 2000 lao macatre enehila, hnei Iesu hna hnyinge ka hape: “Ngo e traqa ha la Nekö i ate, hape u, tro angeic’ a öhne la lapaun’ e celë fen?” (Luka 18:8) Kola xemin la hnyinge i Iesu hnene la aqane catre xome nyipunie la huliwa ne cainöj ngöne lo macatre ne huliwa hnapan! Ala nyimu thei nyipunie la itre hna methinën me ahmahman pine la lapaune i nyipunie. Ame ngöne la itre götran ka nyimutre, epuni a xomihnine la itre akötre ne la itre isi, me itre mec, maine mecijin pena. (Luka 21: 10, 11) Kola madrine atraqatr la aqane catre nyipunie xome la itre huliwa ka meköt, ijije pala kö tro Iesu a “öhne la lapaun’ e celë fen.” Eje hi lai laka, madrin e koho hnengödrai, qa ngöne la ewekë cili!
Thaa ka hmaloi kö la troa xomihnin la itre akötr cili. Hanawang cahu itre itupath hna cile kow hnene la itre trejin e Azia ngöne la götrane ahuë. Ewekë hna majemin la troa axösisin la Itretre Anyipici Iehova ngöne la nöje cili. Ame e cili lo, tre, kola asabele hnene la itre trejin ngöne la tingeting, ala 700 angatr, nge xulu pi hi polis troa aisaije angatr. Hna thungijën la itre xan, ala 1300 troa hane sin. Hna traqa hnene la itre atr ka juetrë iluemek, ame itre xan, tre itre ka polis, hnei angatr hna acaa utin la hnë asabele, me lep la itre trejin, me manith la itre xaa ihmelekap hna hnëkën thatraqan la asabele. Ame ngöne la itre xaa ijin, hnene la itre hene hmi ka icilekeu catr, hna lepe la itre trejin hnei jia fao.
Itre icilekeu lai ka ajolën la itre mekuna së, ngo thaa sesëkötre kö së. Hna nyi jën thei Paulo hnei uati hmitrötr troa cinyihan ka hape: “Nge tro ha axösisi angat’ asë angete ajane troa lapa fë la thina ka ijiji Akötesie thei Keriso Iesu.” (2 Tim. 3: 12) Ame ngöne lo hneijine i Iesu, hnene la itre Keresiano hna xomihnin la itre akötr, ngöne laka, kola jelë angatr, me lepi angatr, nge ame itre xan, tre, hna humuthi angatr. (Ite Huliwa 5: 40; 12 :2; 16 : 22- 24; 19 : 9) Ceitune hi lai memine la hnaatruedren ne hadredrene macatre, nge thaa tro kö a paatre la icilekeu cili ngöne la hnedrai së enehila. Kola qaja fe hnei Iehova koi së ka hape: “Pëkö ewekë hna kuca nyine ishi me nyipo hna troa ien.” (Is. 54 :17) Drei la ketre mejiun ka lolo catr koi së! Ketre, ka sisitria catre së koi Iehova, ke jën la perofeta i Nyidrë, ene Zakaria, hnei nyidrë hna qaja ka hape: “Ame la ate kete nyipunie, te, kola kete la wene demune alameke i nyidë.” (Zaka. 2 : 8) Thaa tro kö a hun la itre ithupëjia me itre hlue i Iehova. Troa hun la nyipi hmi!
Hanawang la ketre ceitun, ame ngöne lo lai nöj e Azia, tre, atraqatre catr la madrine ne la Itretre Anyipici Iehova, ngöne laka, alua elë kö la etrun la itretre cainöj ngöne la macatre ne huliwa 2001. Eje hi laka, kola catre huliwa pala hi la itre trejin e cili, ngacama catrehnine catr la icilekeu, nge ewekë lai hna öhn ngöne la nöjei götran. Ame ngöne lo macatre ka ase hë, hna e la 5 066 la itretre xom la bapataiso ngöne la nöjei wiik e cailo fen, angatr a hane nyi hatren la ajane i angatr troa hane nyihlue i Iehova. Haawe, hetre aja thene la itre ka xötrei bapataiso celë t, me easë mina fe troa catr “cile huti . . . nge pë ethan, me kapa hnyawa la aja i Akötesie asë.” —Kol. 4: 12.
Hanawange mina fe la aqane kökötr la huliwa ne cainöj e Heleni. Ngacama itre macatre ne pane catrehnin la aqane icilekeu ne la itre hmi ngöne la nöje cili, ngo ase hë hane kepe së Itretre Anyipici Iehova hnei mus, nge kola hane xome ceitu së me ketre “hmi ka tune lo itre xan.” Hna cinyihane fe hnine lai pepa nyine anyipicin göi pengöne la Bethela ne Heleni, kola hape “celë hi ketre götran gaa hmitrötr, nge hna nue xeciëne hë thatraqane la hmi koi Akötresie.” Eahuni mina fe a madrin troa qaja koi nyipunie laka, ame ngöne la macatre ne huliwa ka ase hë, nyimutre la itre kootr pi hmi a hna thapa hne së, e Alema, me Bulgarie, me Etazini, me Kanada, me Roumanie, me Russie, me Zapo. Drei la ole së koi Iehova, ngöne laka, hnei Nyidrëti hna fe gojenyi ne la huliwa ne cainöj ngöne la itre nöje ka tru cili!
Ame la easë a wangatrehmekun la itre aqane xatuan hnei Iehova la nöje i Nyidrë ngöne la itre drai hnapine celë, easë a öhne hnyawa laka, enehmu ka sisitria catr Nyidrëti koi së. Easë a wangatrun catrën la aqane imelekeu së me Nyidrë, ke atre hi se laka, Nyidrëti a hnimi së, me ini së, me haji së. Eje hi lai laka, thaa tro jë kö a paatr la itre itupath kowe la lapaune së. Ngo maine thaa ka luelue kö la lapaune së koi Iehova, eje hi lai laka, atreine hi tro sa cile catr ngöne la itre itupathi cili. Hna cinyihane hnei Iakobo ka hape: “Loi e tro nyipunie a mekune, laka, nyine amadin’ atraqat’ e traqa koi nyipunie la nöjei itupathi ka nyimu pengön; ke ate hë nyipunie, laka ate aciane la xomi hni la kola tupathe la lapaune i nyipunie.” (Iako. 1: 2, 3) Ketre, kola amaman hnene la xomihni së laka, atraqatr la ihnimi së koi Iehova, nge tru catr la madrin hne së hna troa kapa qa ngön! Loi e troa xecie hnyawa e kuhu itre hni nyipunie itre trejin, laka, Iehova a ceme easë isa ala caas. Maine tro sa cile huti ngöne la lapaun, thaa tro kö Nyidrëti a cil troa xatua së me aijiji së troa hane kapa la mel ngöne la fene ka hnyipixe. Ame la aja i Nyidrë, tre, ene la tro sa hun.
Qa ngöne lai, eahuni a sipo nyipunie itre trejin trahmany me föe, itre thöth me itre qatr, troa amë pala hi ngöne la itre he së la itre manathithi ka lolo catr hna ahnithe amë hë. Epi troa eje the së la aqane ujë i Paulo aposetolo, hnei nyidrëti hna cinyihan ka hape: “Tha ijije la aköte ngöne la ijine celë, memine la hadehadeu hna tro ha amamane koi shë.” (Rom. 8: 18) Mejiune jë koi Iehova ngöne la nyipunie a qëmeke kowe la nöjei pengöne itupath. Xomihnine jë itre ej, nge the nuetrije kö la nyipici. Atraqatr la madrine së elany, e tro sa mekune hmaca lo aqane xomihnine së la itre akötr. Kola qaja hnyawa koi së me anyipicin hnene la Wesi Ula i Akötresie, ka hape: “Tro ha mele la ate thina ka meköti hnene la lapaune i angeic.” —Hab. 2 : 4.
Itre Trejin Me Nyipunie,
Collège Central Ne La Itretre Anyipici Iehova