Keme Me Thine Fe Ka Mele “Trenyiwa” —Xatuane Jë La Itre Nekö i Epun

1, 2. (a) Nemene la jol hna melën hnene la itre neköne la atre mele trenyiwa ngöne la nöj? (b) Nemene la lue hnyinge hna troa ithanatan hnene la tane mekune celë?

ÖNI Joshua: “Qaane lo eni a nekönatr, eni a ithanatane la qene hlapa i kaka me nenë ngöne la hnalapa me ngöne la ekalesia. Ngo ame hë la eni a nyiqaane ini, eni ha ithanatane la qene hlapa ne la nöj. Matre, tha qea ju kö, nge tha ithanatane hë ni la qene hlapa hun. Tha trotrohnine kö ni la hna qaja ngöne la itre icasikeu, nge ketre, patre kö theng lo aqane mele ne la nöje i kaka me nenë.” Ala nyimu pi hë la ka melëne la ewekë ka traqa koi Joshua.

² Ame enehila, ase hë sasaithe la 240 000 000 lao atr ka mele trenyiwa ngöne la ketre nöj. Maine epuni la ketre e angatr, nemene la nyine tro epuni a kuca matre tro la itre nekö i epun a inine troa hnimi Iehova me “trongëne [pala hi] la nyipici”? (3 Ioane 4) Nge nemene la aqane tro la itre trejin a hamëne la ixatua i angatr?

KEME ME THINE FE—HAMËNE PI LA TULU KA LOI

3, 4. (a) Nemene la aqane tro la kem me thin a amamai tulu ka loi kowe la itre kuku? (b) Nemene la mekune ka tria nyine troa thipetrij hnene la kem me thin?

³ Keme me thine fe, maine epuni a ajane tro la itre nekö i epun a imelekeu hnyawa me Iehova me hane mele epine palua, nyipiewekë catre tro epun a hamë tulu ka loi. E öhne hi nyudren laka, epuni a ‘thele panëne la Baselaia i Akötesie,’ tro fe nyudreni lai a hane thele ixatua thei Iehova göne la itre aja i nyudren o drai. (Mataio 6:33, 34) Thele jë troa amë panëne la huliwa i Iehova ngöne la mele i epun, ngo the nyinyape thele kö la itre mo. Loi e tro epuni a atreine tuluewekë ngöne la mele i epun, nge the xomi gufa kö. Thele jë pe la “tenga mo e hnengödrai,” ene la itre manathith qaathei Iehova, ngo the nyinyape thele manie kö, memine la “nyine atrune qa thei ate.”—E jë la Mareko 10:21, 22; Ioane 12:43.

⁴ Loi e tro pala hi a hetre ijine i epun kowe la itre nekönatr. E hnei nyudren hna amë panë Iehova ngöne la mele i nyudren, ngo tha thele kö troa hlemu maine hetre mo ngacama thatraqai epuni ju hë, haawe, qaja la madrine i epun koi nyudren. The tro kö a mekune menun ka hape, qa ne la itre kuku troa huliwa thatraqane la mele ne la kem me thin. “Tha qâ ne kö la ite kuku troa xawane thatraqane la ite keme me thin, loi pe ite keme me thine thatraqai ite kuku.”—2 Korinito 12:14.

NYINYINE JË LA ITRE JOL GÖI QENE HLAPA

5. Pine nemene matre nyipiewekë tro la kem me thin a qeje Iehova pala hi kowe la itre kuku?

⁵ Tune la hna perofetane hë ekö, kola lö kowe la organizasio i Iehova hnene la itre atr “qa ngöne la ite qene hlapa asë.” (Zakaria 8:23) Ngo, e tha trotrohnine hnyawa kö la qene hlapa i epun hnene la itre nekönatr, tro lai a jole koi epun troa ini nyudren la nyipici. Nyipici laka, nyudren la itre atr hnei epun hna ini Tus memin, nge nyudreni hi la hnei epuni hna troa nyipiewekën catrën, ke jëne mele i nyudreni hi lai la troa atrepengöi Iehova. (Ioane 17:3) Maine epuni a ajane tro la nekö i epun a atre la itre ini qaathei Iehova, nyipiewekë tro pala hi epuni a “ithanatan’ it’ eje.”—E jë la Deuteronomi 6:6, 7.

6. Nemene la eloin kowe la itre nekönatr troa inine la qene hlapa i epun? (Wange ju pane iatr.)

⁶ Tro la itre nekö i epuni lai a inine la qene hlapa ne la nöj ngöne la hna ini, me qaathene la itre xa atr. Ngo, nyudren a inine la qene hlapa i epun la epuni a ithanata lapa me nyudren. E ka ithanatane nyudren la qene hlapa i epun, tha jole kö koi nyudren troa porotrik me epun, me qaja la aliene hni nyudren. Ame la eloine lai, e hetre xa qene hlapa hnei nyudren hna ithanatan, tro ha maca la aqane waiewekë i nyudren. Ketre, atreine fe hë nyudren trotrohnine la mekuna ne la itre xa atr. Jëne tro hi nyudreni lai a hane akökötrene la aqane cainöje i nyudren. Öni Carolina ka mele trenyiwa memine la kem me thine i angeic ka hape: “Lolo pi hë troa nyiatrene la ekalesia ka qaja la ketre qene hlapa. Nge ketre madrine ka tru la troa ixatua ngöne la ketre götrane gaa aja ka cainöj.”

7. Nemene la nyine tro epuni a kuca e thatreine hë la kuku ithanatan la qene hlapa i epun?

⁷ Ame itre xa neköne la itre ka mele trenyiwa, tre, tha ithanatane hë la qene hlapa ne la kem me thine i nyudren, ke kolo ha ithanatan la qene hlapa me xome la aqane mele ne la nöj. Keme me thine fe, maine celë hi lai la pengöne la itre nekö i epun, ijije kö tro epuni a inine la qene hlapa ne la nöj? Tha tro kö lai a jole troa hiane la itre nekö i epun e trotrohnine hi epun la itre porotrike i nyudren, me itre nyine iamadrinë hnei nyudren hna ajan, me itre qa göi ini. Nge ijiji epuni fe troa ithanata kowe la itre ka hamë ini ngöne la itre uma ne ini. Maine nyipici laka, nyipiewekë troa hetre ijin, nge troa catr me hetre ipië matre troa inine la ketre qene hlapa, ngo tha ka gufa kö. Maine ka simi hnangenyë ju la nekö i epun, tha tro kö epuni lai a inine la qene hum matre troa ithanata me nyën? Haawe, ame la nekönatr ka qaja hnyawa la ketre qene hlapa, loi e tro fe a ujë tune lai koi nyën.a—Wange ju la ithuemacany.

8. Tro epuni a xatuane tune kaa la itre nekönatr ngacama thatre hnyawa kö epun la qene hlapa ne la nöj?

⁸ Tha ka hmaloi kö kowe la kem me thin ka mele trenyiwa troa ithanatane hnyawa la qene hlapa ne la nöj. Nge pine laka, celë hi qene hlapa lai ka maca kowe la itre nekönatr troa ithanatan, haawe, jole pi hë kowe la kem me thin troa xatua nyudren troa trotrohnin la Tusi Hmitrötr. (2 Timoteo 3:15) Ngacama epuni hi lai a melën, ngo tro pala kö epuni lai a xatua nyudren troa atre Iehova, me hnimi Nyidrë. Öni Shan, ketre qatre thup ka hape: “Tha trotrohnine hnyawa kö nenë la qene hlapa hnenge memine la itre xa i eni hna ithanatan, nge ame pena eahun, tha ka ithanatane kö la qene hlapa i eahlo. Ngo, ame la eahuni a goeë eahlo a ini Tus, me thith, me isin troa kuca la hmi hnepe lapa e nöjei wiik, eahuni a trotrohnine e cili ka hape, ka nyipiewekë catre la troa atre Iehova.”

9. Nemene la nyine tro la keme me thin a kuca matre troa xatuane la itre nekönatr ka qaja la lue qene hlapa?

⁹ Hetre itre nekönatr laka, loi e troa ini nyudren ngöne la lue qene hlapa, ke cas hna ithanatan ngöne la hna ini, nge cas hna ithanatan ngöne la hnalapa. Celë hi matre, itre kem me thin a e la itre itusi së, me dreng, me goeën la itre video ngöne la lue qene hlapa. Kola mama laka, nyipiewekë catr tro la kem me thin a isin troa xatuane la itre nekönatr troa easenyi catre koi Iehova.

AQANE TROA AXECIËNE LA EKALESIA HNA TROA SIN

10. (a) Drei la ka troa axeciëne la ekalesia hna troa sine hnene la hnepe lapa? (b) Nemene la aqane troa axecië mekun hnene la he ne la hnepe lapa?

¹⁰ E nanyi la hna lapa hnene la atr ka mele “tenyiwa” qaathene la itre ekalesia ka qaja la qene hlapa i angeic, loi e tro angeic a sine la ekalesia ka qaja la qene hlapa ne la nöj. (Salamo 146:9) Ngo, e hetre ekalesia ka qaja la qene hlapa i angeic nge ka easenyi hi, nyipiewekë tro la he ne la hnepe lapa a axeciëne la qene hlapa ka loi koi angatr. Qëmekene troa axecië mekun, tro angeic a mekune hnyawa me thith thatraqane lai. Tro fe angeic a ce ithanatane me föi angeic, me ha nekö i angeic. (1 Korinito 11:3) Nemene la hnei angeic hna troa wangatrun? Nemene la itre trepene meköt ka troa xatua angeic troa axecië mekune hnyawa?

11, 12. (a) Pine nemene matre ka nyipiewekë la qene hlapa hna ithanatane ngöne la itre icasikeu? (b) Nemene la kepine matre tha thele hë la nekönatr troa atre la qene hlapa i keme me thin?

¹¹ Nyipiewekë tro la keme me thin a wangatrun la aja ne la itre nekönatr. Eje hi laka, nyudren a kapa la itre ini hna hamën ngöne la itre icasikeu e nöjei wiik. E hna sine itre ej ngöne la qene hlapa hnei nyudren hna trotrohnine hnyawa, eje hi laka, tro lai a hetre thangane qa ngön. Tha tro kö a tro tune lai e tha trotrohnine hnyawa kö la nekönatr la qene hlapa. Ame itre xa ijin, tha nyipi mama hnyawa kö lai kowe la keme me thin. (E jë la 1 Korinito 14:9, 11.) Tha hnene kö laka, hna hnaho nyudren ngöne la sipu nöje i nyudren, matre troa ketr la mekun me hni nyudren hnene la qene hlapa hna hnaho nyudren ngön. Itre xa nekönatr a inin troa hamë mekun, me kuca la itre iamacany, me cile fë cainöj ngöne la qene hlapa ne la keme me thine i nyudren, ngo tha mama pe la sipu mekuna i nyudren, me sipu aliene la hni nyudren.

¹² Ketre, tha qene hlapa hmekuje kö la ka troa ketr la hni ne la nekönatr. Celë hi hna melën hnei Joshua, lo hna qaja ha e caha. Öni Esther, xa i angeic, ka hape: “Hna löthe la itre nekönatr hnene la qene hlapa, me hmi, me aqane mele ne la kem me thine i nyudren.” Matre, e patre hë la aqane mele ne la nöj thei nyudren, haawe, tha thele hë nyudreni lai troa atre la qene hlapa me hmi ne la kem me thine i nyudren. Nemene la nyine troa kuca e cili hnene la kem me thin ka mele trenyiwa?

13, 14. (a) Pine nemene matre feke jë la ketre hnepe lapa kowe la ekalesia ka qaja la qene hlapa ne la nöj? (b) Nemene la aqane acatrene la keme me thin la imelekeu i nyidro me Iehova?

¹³ Itre kem me thin keresiano a amë panëne la aja ne la itre nekönatr, nge pine pë hë la itre sipu aja i angatr. (1 Korinito 10:24) Öni Samuel, keme i Joshua me Esther ka hape: “Hnenge me föeng hna pane thele la qene hlapa ka troa ketr la hni ne la köni nekö i nyio, me thith matre troa hetreny la inamacan. Ame hë la nyio a öhne laka, pëkö thangane thei angatr la hna sine la itre icasikeu ngöne la qene hlapa i nyio, mekune jë hi nyio troa fek kowe la ekalesia ka qaja la qene hlapa ne la nöj. Tha ka ihmeku kö lai memine lo aja i nyio, ngo ame hë la eahuni a sine lapane la itre icasikeu me ce cainöj, me ce xen me ce ngenu memine la itre sinee hun, hetre thangane pi hë. Nyudreni hë e cili a hane atre la itre trejin me atre Iehova Akötresie, lo Kem me Sinee i nyudren. Ame koi nyio, ka nyipiewekë catre kö la hnei nyio hna kuca hune la troa ini nyudren troa ithanatan la qene hlapa i nyio.”

¹⁴ Öni Samuel fe: “Hnenge me föeng hna sine fe la itre icasikeu ngöne la qene hlapa i nyio. Tha ka hmaloi kö, nge kucakuca pi hë nyio. Ngo, nyio a olen koi Iehova, ke, hnei Nyidrëti hna amanathithin la itre trengecatr i nyio. Ame enehila, ka huliwa i Akötresie o drai asë hi la köni nekö i nyio.”

NYINE TROA KUCA HNENE LA ITRE THÖTH

15. Pine nemene matre mekune jë Kristina troa feke kowe la ekalesia ka qaja la qene hlapa ne la nöj?

¹⁵ Ame hë la itre nekönatr a tru trootro, nyudreni ha mekune laka, ka loi tro nyudreni a feke kowe la ekalesia ka ithanatane la qene hlapa hnei nyudreni hna trotrohnine hnyawa. Ame e cili, tha tro kö la itre keme me thin a mekune ka hape, nyudreni a nue angatre pe. Öni Kristina: “Atre hnyawa hi ni ekö la qene hlapa i kaka me nenë, ngo ame la qene hlapa hna ithanatane ngöne la icasikeu tre, jole pi hë koi ni troa trotrohnin. Ame hë la eni a 12 lao macatre, hnenge hna sine la asabele ngöne la qene hlapa hna ithanatane ngöne la uma ne ini. Eni ha trotrohnin e cili ka hape, celë hi la nyipici! Ame la ketre ewekë ka traqa koi ni tre, ene la eni a nyiqaane thith ngöne la qene hlapa cili. Eni a ithanata koi Iehova qa kuhu hning!” (Ite Huliwa 2:11, 41) Ame hë la Kristina a 18 lao macatre, angeice ha qaja la mekuna i angeic kowe la keme me thine i angeic, ene la troa feke kowe la ekalesia ka qaja la qene hlapa ne la nöj. Öni angeic: “Hnenge hna thel troa atrepengöi Iehova ngöne la qene hlapa hnenge hna ithanatane ngöne la uma ne ini, nge celë hi ka upi ni troa catre huliwa i Iehova.” Tha qea ju kö, nge Kristina ha xome la huliwa ne pionie lapa, nge tru catre la madrine i angeic.

16. Pine nemene matre ka madrine Nadia troa lapa ngöne la qene hlapa i keme me thin?

¹⁶ Itre thöthi fe, epuni kö a ajane troa sine la ekalesia ka qaja la qene hlapa ne la nöj? Maine eje hi, isa hnyinge jë ka hape, “Pine nemen?” E feke jë epuni kowe la ekalesia cili, tro kö lai a aeasenyi epuni catre koi Iehova? (Iakobo 4:8) Maine jë, epuni a fek ke, tha ajane kö epun tro la keme me thine i epuni a öhne la nöjei ewekë hnei epun hna kuca. Maine pena, tha ajane kö epun troa catr ngöne la nyipici. Öni Nadia, ka huliwa ngöne la Bethela enehila ka hape: “Ame hë la eni me itre trejin me eni a thöth, eahuni ha pi tro kowe la ekalesia ka qaja la qene hlapa ne la nöj. Ngo atre hi kaka me nenë laka, e feke hë hun, tro ha hetre ethan kowe la lapaune hun. Ame hë enehila, eni ha madrine laka, hnei kaka me nenë hna isine troa ini huni la qene hlapa i nyidro, me lapa sai hun ngöne la ekalesia ka qaja la qene hlapa i nyidro. Itre xa madrine huni lai, ke ka aijiji hun troa xatuane la itre xa atr troa atre Iehova.”

IXATUA QAATHENE LA ITRE XA TREJIN

17. (a) Hnëqa i drei la troa hiane la itre nekönatr? (b) Nemene la ixatua hna kapa hnene la keme me thin matre troa inine la itre nekönatr la nyipici?

¹⁷ Hnene la keme me thin hna kapa la hnëqa qaathei Iehova, ene la troa inine la nyipici kowe la itre nekönatr. Tha hna nue kö la hnëqa cili kowe la itre qaqa hmunë, maine ketre pena. (E jë la Ite Edomë 1:8; 31:10, 27, 28.) Ngo, tro nyidroti lai a aja ixatua göi troa ketr la hni ne la nekö i nyidro ke, tha nyipi atre kö nyidro la qene hlapa ne la nöj. E sipo ixatua jë hnei nyidro, tha kolo kö lai a hape, nyidroti a kötrene la hnëqa i nyidro. Ngo, ketre aqane tro nyidroti lai a hiane la itre nekö i nyidro “ngöne la ini me ihaji ne la Joxu [Iehova].” (Efeso 6:4) Maine jë, tro nyidroti lai a easenyine la itre qatre thup matre troa kapa la itre ixatua göi aqane troa kuca la hmi hnepe lapa, me thel la itre xa sinee ka lolo thatraqane la itre nekönatr.

18, 19. (a) Nemene la aqane tro la itre trejin a xatuane la itre nekönatr? (b) Nemene la hnëqa ne la keme me thin?

¹⁸ Loi e tro la keme me thin a könën, e itre xa ijin, la itre xa hnepe lapa troa ce kuca me angatr la hmi hnepe lapa. Ketre, hetre itre ini hnene la itre thöth hna kapa qaathene la itre trejin ngöne la angatr a ce cainöj, me ce kuca la itre xa huliwa. (Ite Edomë 27:17) Öni Shan, lo hna qaja ha e caha, “Tha thëthëhmine kö ni la itre trejin ka xatua ni ekö. Ame la angatr a xatua ni ngöne la itre xötre qang ngöne la itre icasikeu, hetre hnenge pala hi hna inin. Nge, hne huni pala hi hna ce kuci madrin.”

¹⁹ Eje hi laka, ame la itre trejin hna iëne hnene la keme me thin troa xatuane la itre nekönatr tre, loi e tro angatr a thuecatre i nyudreni pala hi troa metrötrëne la keme me thine i nyudren. Matre, loi e tro angatr a qaja aloine la keme me thin, ngo tha tro kö a xom la hnëqa i keme me thin, ene la troa hiane la itre nekönatr. Ketre, ame la itre ka hamë ixatua, tro angatr a thupëne la aqane ujë i angatr, matre tha tro kö a mekuhnine menu angatr hnene la itre trejin, maine hnene la itre xa atr. (1 Peteru 2:12) Ngacama kola aja ixatua hnene la keme me thin, ngo hnëqa i nyidro pala hi la troa inine la nyipici kowe la itre nekönatr. Nge, tro pala hi nyidroti a alamekëne la ixatua hna hamëne hnene la itre xa trejin.

20. Nemene la aqane tro la keme me thin a xatuane la itre nekönatr troa nyihlue i Iehova?

²⁰ Keme me thine fe, sipo ixatua jë thei Iehova ngöne la thith, nge catre pi. (E jë la 2 Aqane lapa ite joxu 15:7.) Wangatrune jë la imelekeu ne la nekö i epun me Iehova, nge pine pë hë la sipu aja i epun. Isine jë matre troa ketr la hni ne la nekö i epun hnene la Wesi Ula i Akötresie. The mano pi kö troa mejiune laka, tro la nekö i epuni a hane nyihlue i Iehova elany. E tro la itre nekönatr a xötrethenge la hna qaja ngöne la Wesi Ula i Akötresie, memine la tulu i epuni ka lolo, tro ha ce mekuna i epuni me Ioane göne lo itre hnei angeic hna xome ceitunëne me itre nekö i angeic, lo kola hape: “Pëkö madinenge ka sisitia hune laka e tro ni a denge la ite nekönge a trongëne la nyipici.”—3 Ioane 4.