Mekuna i Drei La Hne Së Hna Troa Xom?

1, 2. (a) Nemene la aqane sa i Iesu koi Peteru? (Wange ju la pane iatr.) (b) Pine nemene matre Iesu a sa tune lai?

KOLA sesëkötre hnene la itretre drei Iesu! Ame koi angatr, tro Iesu a acile hmaca la Baselaia ne Isaraela. Ngo öni Iesu, ka hape, easenyi hë la ijine troa akötrë nyidrë me humuthi nyidrë. Peteru aposetolo la ka pane ithanata. Öni angeic: ‘Ekölö hi ni nyipë, Joxu ; tha tro kö a traqa lai koi nyipë.’ Öni Iesu e sa: “Satana fe, trojë kowe la hutröng, eö la ate nyi zö ni ; ke tha mekune kö eö la ite ewekë i Akötesie, ngo ite ewekë i ate pe.”—Mataio 16:21-23; Itre Huliwa 1:6.

² Iesu a amamane laka, isapengöne kö la mekuna i Iehova memine la itre mekuna ne la fene celë hna musinën hnei Satana. (1 Ioane 5:19) Peteru a ithuecatre koi Iesu troa ketre sipu meku nyidrëti kö, tune la itre atrene fen. Ngo atre hi Iesu laka, aja i Iehova tro nyidrëti a ketre sipu hnëkë thatraqane la ijine akötre me mec. Kola amamane hnyawa ngöne la aqane sa i Iesu laka, nyidrëti a kapa la mekuna i Iehova me thipetrije la fen.

3. Pine nemene matre jole koi së troa ce mekune me Iehova, me thipëne la itre mekuna i fen?

³ Tune kaa fe së? Easë kö a mekun tui Iehova maine tune la itre atrene fen? Ame easë itre Keresiano, easë palahi a thele troa kuca la itre ewekë ka amadrinë Akötresie. Ngo tune kaa fe la itre mekuna së? Easë kö a hane thele troa axecië mekun tui Iehova? Haawe, nyipiewekë tro sa catr. Ngo, ijije hi troa ajojezi së hnene la itre atre ne la fene celë, pine laka, easa ce mel me angatr. (Efeso 2:2) Ketre, ame itre atrene fen ke, angatre kö a sipu meku angatr. Celë hi matre, ijije hi troa löthe la itre mekuna së, hnene la aqane waiewekë i angatr. Tro ha jole koi së troa ce mekune me Iehova, nge canga tro hi a löthi së hnene la ua ne la itre atrene fen.

4. (a) Nemene la thangan e tro sa mekune tui fen? (b) Nemene la hne së hna troa ce wang ngöne la tane mekune celë?

⁴ Maine tro sa mekune tui fen, tro hë sa ketre sipu meku së kö, me sipu iëne la ka loi me ka ngazo. (Mareko 7:21, 22) Haawe, nyipiewekë tro sa mekune “la ite ewekë i Akötesie,” ngo tha “ite ewekë i ate pe.” Celë hi hne së hna troa ce wang ngöne la tane mekune celë. Tro sa ce wang la itre kepin, matre nyipiewekë troa ce mekun me Iehova. Hetre eloine koi së isa ala caas. Tro fe sa ce wang la nyine tro sa kuca, matre tha tro kö a löthi së me ajojezi së, hnene la itre mekuna i fen. Ame pena ha ngöne la ketre tane mekun, tro sa ce wang la aqane tro sa ce mekun me Iehova.

HETRE ELOINE LA MEKUNA I IEHOVA

5. Pine nemene matre tha ajane kö la itre xan troa musinë angatr?

⁵ Ame itre xan, tha ajane kö angatr troa xome la aqane mekune la itre xan. Öni angatr, “Pëkö ka troa musinë ni.” Ame koi angatr, pëkö ka troa qeje angatr. Tha ajane kö angatr troa musinë angatr maine upi angatr pena troa xome la aqane mekune la itre xan.a (Wange ju la ithuemacany.)

6. (a) Nemene la hnei Iehova hna nue së troa kuca? (b) Hapeu, kolo kö lai a hape, pëkö ifego së?

⁶ Easa madrine laka, maine nyipici laka tro sa ce mekune me Iehova, ngo ijije hi tro sa hane sipu ië mekun. Kola qaja ngöne 2 Korinito 3:17, MN, ka hape: “Ame la hnei ua i Iehova hna hne ngön, tre, e cili hi la atr hna nue gufan.” Iehova a nue së troa ketre sipu axecië mekun. Hetre itre ewekë hne së hna isa ajan. Aqane xupi së hi lai hnei Iehova. Ngo hetre ifego së ngöne la easa axecië mekun. (E jë la 1 Peteru 2:16.) Maine easa ajane troa wangatrehmekune la loi memine la ngazo, nyipiewekë tro sa xome la Wesi Ula i Akötresie. Hapeu, kolo lai a hnöthi së maine nyine loi koi së?

7, 8. Hapeu, ka jole kö troa ce mekune me Iehova? Qaja jë la ketre ceitun.

⁷ Hanawang la ketre ceitun. Itre kem me thin a thele troa inine la itre nekö i angatr. Angatr a ini nyudren troa nyipici, me catre huliwa, me wangatrune la itre xan. Tha ka ngazo kö lai. Ketre, itre kem me thin a hnëkëne la itre nekönatr troa mele ka loi elany. Ame la nyudreni a tru me tro trije la hnalapa, nyudreni hi lai a troa ketre sipu axecië mekun. Maine tro nyudreni a mele thenge la itre hna ini nyudren hnei kem me thin, haawe, tro hë nyudreni lai a axecië mekune hnyawa. Nge tro hë nyudreni a atreine cile kowe la itre jol.

⁸ Tune la kem me thin, Iehova a ajane tro la itre nekö i Nyidrëti a mele ka loi. (Isaia 48:17, 18) Celë hi matre hnei Nyidrëti hna hamë së la itre trepene meköt, ka amamane koi së la aqane tro sa ujë koi itre xan. Nyidrëti a upi së troa ce mekun me Nyidrë, me mele thenge la itre trepene meköti Nyidrë. Tha itre eje kö a hnöthi së. Kolo pe a xatua së troa inamacan, me atreine axecië mekune hnyawa. (Salamo 92:5; Ite Edomë 2:1-5; Isaia 55:9) Tro hë sa ketre sipu ië ewekë me atreine axecië mekune hnyawa, me madrin. (Salamo 1:2, 3) Hetre eloine la tro sa ce mekune me Iehova!

KA DRAIË LA ITRE MEKUNA I IEHOVA

9, 10. Nemene la ka amamane laka, ka draië catre kö la mekuna i Iehova hune la mekuna i fen?

⁹ Ame la ketre kepin matre, easa thele troa ce mekun me Iehova, tre, ka draië catre kö la itre mekuna i Nyidrë hune la itre mekuna ne la fen. Itre atrene fen a hamë eamo göne la loi, me aqane troa madrine la hnepe lapa, me aqane troa hetre huliwa ka loi, me itre xane ju kö. Ngo ka isazikeu la itre eamo cili memine la mekuna i Iehova. Drei la ketre ceitun. Itre atrene fen a ithuecatre kowe la itre atr troa kuca la sipu aja i angatr, tune la kuci ngazo. Nge kolo fe a qaja aloine la itre trefëne ka seihnacil, ngacama pëkö nyipi kepin. Ka ifekethe memine la hna qaja hnei Tusi Hmitrötr. Ngo hapeu, ka loi kö la itre eamo ne fen hune la itre eamo hna hamën hnei Tusi Hmitrötr enehila?

¹⁰ Öni Iesu: “Hna qaja amekötine la inamacane hnene la nöjei huliwa ne ej.” (Mataio 11:19) Ngacama kolo palahi a elë la inamacane i fen, ngo hna hmaca pe hi la inamacane i angatr göne la aqane troa mele madrin, me aqane troa apatrene la itre isi, me iwangatrehmekunyi atr, me iakötrë. Ketre, ame kowe la itre atrene fen, pëkö engazone la troa kuci ngazo. Itre xan a mekun laka, celë hi ka thë la itre hnepe lapa. Ketre kepine lai matre hetre ethane kowe la mele së. Tune kaa la itre eamo qaathei Iehova? Ame la itre keresiano ka kapa la mekuna i Iehova, tre, ka madrine la hnepe lapa i angatr, angatr a egöcatr, nge lolo la aqane imelekeu i angatr memine la itre trejin e cailo fen. (Isaia 2:4; Itre Huliwa 10:34, 35; 1 Korinito 6:9-11) Kolo lai a amamane laka, ka draië catre kö la mekuna i Iehova hune la mekuna i fen.

11. Drei la ka amekötin la mekuna i Mose, nge nemene la thangane lai?

¹¹ Tha sihngödri kö kowe la itre hlue i Iehova ekö laka, ka draië kö la itre mekuna i Nyidrë. Ngacama “hna ini Mose la nöjei inamacane asë i angete Aigupito,” ngo atre hi angeic laka, thei Iehova la nyipi inamacan. (Itre Huliwa 7:22; Salamo 90:12) Öni angeic koi Iehova: ‘Amamai ni la kala i Cilie.’ (Esodo 33:13) Hnei Mose hna nue Iehova troa amekötine la mekuna i angeic. Celë hi matre hnei Iehova hna upi angeic troa eatrëne la aja i Nyidrë. Ketre, hnei Iehova hna atrunyi angeic me hë angeic, ka hape, ketre atre ka lapaun atrun.—Heberu 11:24-27.

12. Nemene la ka xatua Paulo troa axecië mekune hnyawa?

¹² Ka inamacane Paulo aposetolo. Hnei nyidrëti hna ini, nge ka ithanatane nyidrëti la lue qene hlapa. (Itre Huliwa 5:34; 21:37, 39; 22:2, 3) Ngo hnei nyidrëti hna thipetrij la inamacane i fen, me axecië mekun thenge la Wesi Ula i Akötresie. (E jë la Itre Huliwa 17:2; 1 Korinito 2:6, 7, 13.) Ame la thangan, tru catr la itre manathithi hnei nyidrëti hna kapa ngöne la huliwa ne cainöj, nge nyidrëti a lapa treqene la ketre manathith ka epine palua.—2 Timoteo 4:8.

13. Drei la ka troa amekötine la itre mekuna së matre tro sa ce mekune me Iehova?

¹³ Eje hi, draië catre kö la mekuna i Iehova hune la mekuna i fen. Maine tro sa trongëne la itre hna amekötine hnei Akötresie, tro hë sa mele madrin me mele ka loi. Ngo tha tro kö Iehova a musinë së troa ce mekune me Nyidrë. Ame la “lue ka nyipici me ka inamacan,” tre, tha angatre kö a musinë së, ketre tune fe la itre qatre thup. (Mataio 24:45; 2 Korinito 1:24) Isa qanyi së kö amekötine la itre mekuna së, matre ce mekun me Iehova. Nemene la nyine tro sa kuca?

THA TRO KÖ A LÖTHE LA MEKUNA SË HNENE LA UA NE FEN

14, 15. (a) Nemene la nyine tro sa lapa mekun, e easa ajane troa ce mekun me Iehova? (b) Pine nemene matre tha tro pi kö sa nue la aqane mekuna i fen troa löthi së? Qaja jë la ketre ceitun.

¹⁴ Kola qaja ngöne Roma 12:2, ka hape: “The ce thina kö nyipunie memine la fene hnengödrai ; ngo loi e ujë nyipunie hnene la kola ahnyipixene la ite hni nyipunie, mate ate nyipunie la aja i Akötesie ka loi, me nyine amadin, me ka meköt.” Kola amamane hnene la xötre celë laka, ngacama hetre aqane mekuna së ekö, qëmekene tro sa atre la nyipici, ngo ijije palahi tro sa saze me ce mekun me Akötresie. Eje hi laka, hnene la pengö së memine la hne së hna melën, matre hetre aqane mekuna së hë. Ngo ame pe, ijije hi troa saze. Nge troa saze thenge la itre ewekë hne së hna mekun. Haawe, maine tro sa lapa mekune la itre mekuna i Iehova, easë hi lai a amamane laka, ka lolo la aqane waiewekë i Nyidrë. Tro hë sa ajane troa ce mekune me Nyidrë.

¹⁵ Ngo maine easa ajane troa ce mekun me Iehova, tha tro kö sa ‘ce thina memine la fene hnengödrai.’ Kola amaman, ka hape, tha tro kö sa goeën, maine e, maine drenge pena la itre ewekë ka troa ananyi së qa ngöne la mekuna i Akötresie. Ka nyipiewekë catre lai, tune la xen. Maine ketre atr a ajane troa egöcatr, tro angeic a xeni hmekuje hi la nyipi xen. Ngo troa pë thangan, e hnei angeice fe hna xome la itre xeni ka ngazo! Ketre tune mina fe, troa gufa la trengecatre hne së hna nue troa ce mekun me Iehova, e hne së hna nue la itre mekuna i fen troa löthi së.

16. Nemene la hne së hna troa thupën?

¹⁶ Hapeu, ijije kö tro sa neën asë la itre mekuna i fen? Ohea, thatreine jë kö së, pine laka, easa mel e hnine la fen. (1 Korinito 5:9, 10) Ame fe la easa cainöje trootro, itre atr a qaja la itre mekun me itre ini ka thoi. Thatreine kö tro sa neëne la itre mekun ka ngazo, ngo tha tro kö sa lapa mekun itre ej maine kapa pena. Tui Iesu, loi e tro sa canga tripetrije la itre mekuna i Satana. Maine tro sa thipetrije la itre mekuna i fen, tha tro kö lai a löthi së.—E jë la Ite Edomë 4:23.

17. Nemene la aqane tro sa thupëne la mekuna së qa ngöne la mekuna i fen?

¹⁷ Ketre, loi e tro sa iëne hnyawa la itre sinee së. Tusi Hmitrötr a hmekë së laka, maine tro sa nyisineene la itre atr ka tha nyihlue i Iehova kö, tro hë sa nyiqane mekun tui angatr. (Ite Edomë 13:20; 1 Korinito 15:12, 32, 33) Loi e tro fe sa iëne hnyawa la itre nyine iamadrinë. Ame la easa thipetrije la ketre nyine iamadrinë ka amamane la ini évolution, me iakötrë, me kuci ngazo, easë hi lai a thupëne la mekuna së qa ngöne la itre mekune “ka ifekethe memine la ate hmekunyi Akötesie.”—2 Korinito 10:5.

18, 19. (a) Pine nemene matre loi e tro sa thupëne la itre mekuna i fene ka tha canga mama kö? (b) Nemene la hne së hna troa thel, nge pine nemen?

¹⁸ Loi e tro fe sa thupëne me thipetrij la itre mekuna i fen ke, tha ka canga mama kö koi lue mek. Drei la ketre ceitun. Hna kuca la itre xaa reportage matre troa qaja atrune la ketre politik. Maine jë, kola upi së troa thele huliwa me wangatrune la itre ewekë ne fen. Hna kuca la itre xaa film me itre xaa itus, matre upe la itre ka goeëne troa ketre sipu meku angatre kö me itre hnepe lapa i angatr. Ngo tha celë kö lai hna qaja hnei Tusi Hmitrötr. Ej a qaja ka hape, tro hi sa madrin e hne së hna catre hnimi Iehova. (Mataio 22:36-39) Ketre, ngacama ka lolo hi la itre film hna kuca thatraqane la itre nekönatr, ngo troa thupën wanga tro nyudreni a nyitipune la itre xaa aqane ujë ka ngazo.

¹⁹ Tha kolo kö a qaja ka hape, ka ngazo la kuci madrin. Ngo loi e tro sa isa hnying, ka hape: ‘Atreine kö ni wangatrehmekune la mekuna i fen, ngacama tha ka canga mama kö? Eni kö a thupën, eni me itre neköng, matre tha tro kö a goeëne la itre xaa film me itus? Eni kö a xatuane la itre neköng troa ce mekun me Iehova, matre tha tro kö nyudreni a mekune la itre ewekë ne fen, ngöne la kola dreng maine öhne pena?’ Maine tro sa wangatrehmekune la mekuna i Akötresie memine la mekuna i fen, tha tro hë sa ‘ce thina memine la fene hnengödrai.’

DREI LA HNE SË HNA CE MEKUNE MEMIN ENEHILA?

20. Itre mekuna i drei la ka nyitrepene la mekuna së?

²⁰ Loi e tro palahi sa mekun laka, lue mekune hi hne së hna troa kapa. Kola qaja la mekuna i Iehova, memine la itre mekuna ne la fene i Satana. Itre mekuna i drei la ka nyitrepene la mekuna së? Qanyine kö la itre ithuemacany hne së hna kapa. Maine tro sa kapa la itre mekuna i fen, tro ha löthe la mekuna së, nge tro hë sa mekun me ujë tune la itre atrene fen. Haawe, nyipiewekë tro sa iëne hnyawa la itre hne së hna goeën, me e, me dreng, me lapa mekun.

21. Nemene la hne së hna troa ce wang ngöne la ketre tane mekun?

²¹ Ame ngöne la tane mekun celë, hne së hna ce wang ka hape, maine easa ajane troa ce mekun me Iehova, loi e tro sa thipetrije la itre mekuna ne la fen. Ngo nyipiewekë tro fe sa lapa mekune la itre mekuna i Akötresie ke, celë hi ka troa xatua së troa ce mekune me Nyidrë. Ame ngöne la ketre tane mekun, tro sa ce wang la aqane tro sa kuca.