Ita Ne Thup göi 01 Juun e Mont Ravel
Nyima 21 me 16 Qene Drehu
Xelene Jë “La Ite Ka Pë Ixamixam”
“Pë hni la ate xöte thenge la ite ka pë ixamixam [ka pë alien].”—ITE EDOMË 12:11.
1. Nemene la itre xaa ewekë së ka tru alameken, nge nemene la aqane troa huliwane hnyawa itre ej?
Hetrenyi asë hi së la nyimu pengöne ewekë ka tru alameken ngöne la nöjei götrane ne la mele së: ene la egöcatre së, me trengecatre së, me inamacane së, me itre mo së, me itre xane ju kö. Ngöne laka easa hnimi Iehova, eje hi lai laka tru catre la madrine së troa nyipi ewekëne itre ej ngöne la huliwa i Nyidrë, nge easë mina fe a trongëne la trenge ewekë ka ithuecatre celë, kola hape: “Metötë Iehova jë hnene la ite nyi ‘ö.”—Ite edomë 3:9.
2. Nemene la ithuemacany hna hamëne hnene la Tusi Hmitrötr göne la itre ewekë ka gufa, nge nemene la aliene la ithuemacany cili?
2 Ame n̄göne la ketre götran, kola qaja mina fe hnene la Tusi Hmitrötr la itre ewekë ka pë alien, nge eje a hmekë së matre thaa tro kö sa aluuzine la itre ewekë së, hnene la hna nyinyape thele itre ej. Ame ngöne la götrane celë, loi e tro sa ce wange hnyawa la itre hnaewekë ngöne Ite edomë 12:11, kola hape: “Troa meji hnei xeni la ate eëne la dro i angeic; ngo pë hni la ate xöte thenge la ite ka pë ixamixam (ka pë aliene).” Thaa ka jole kö troa wange la aqane troa xötrethengene la edromë celë. Maine tro la trahmanyi a nue la traeme me trenge catre i angeice troa huliwa thatraqane la hnepe lapa i angeic, eje hi lai laka, tro ha mele ka loi la fami angeic ngöne la götrane la ngönetrei. (1 Tim. 5:8) Ngo eje hi laka, e kola huliwaane menune la itre hnei angeice hna hetrenyi kowe la itre ewekë ka pë alien, angeice hi lai a amamane laka, ka “pë hni” angeic, kolo lai a hape, thaa ase kö tuluthe la aqane waiewekë, nge ketre thaa ka loi kö la itre aja i angeic. Eje hi lai laka, tro kö a pë ewekë elanyi la atr cili.
3. Tune kaa la aqane tro sa trongëne la ithuemacanyi hna hamëne hnene la Tusi Hmitrötr göne lo itre ewekë ka gufa kowe la hmi së?
3 Ngo nemene la aliene la edromë celë e tro sa trongëne ej ngöne la hmi së? Kolo lai a hape, ame la Keresiano ka mele nyipici me catre nyihlue i Iehova, tre, tro hë angeic a mele xetietë. Ijiji hi enehila tro angeic a hane mejiune laka, tro Akötresieti a amanathithi angeic, nge ketre, thaa tro kö a kötrekötre la mejiune i angeic kowe la itre drai elany. (Mat. 6:33; 1 Tim. 4:10) Ngo ame la Keresiano ka nyinyape thele la itre ewekë ka pë alien, tre, angeice hi lai a thele troa angazone la aqane imelekeu i angeic me Iehova, nge thaa tro hë angeic a hetrenyi elanyi la mele ka thaa ase palua kö. Tune kaa la aqane tro sa neëne lai? Nyipi ewekë tro sa wange hnyawa ngöne la mele së, la itre ewekë ka “pë ixamixam”, nge loi e tro fe sa catre troa thipetrij itre ej.—E jë la Tito 2:11, 12.
4. Nemene la itre ewekë ka pë alien?
4 Qa ngöne lai, nemene la itre ewekë ka pë alien? Kolo itre ewekë ka sewe së troa nyihlue i Iehova ngöne la mele së ka pexej. Kola qaja mina fe lo nöjei pengöne nyine iamadrinë. Eje hi laka, hetre göhnene kö la itre nyine iamadrinë ngöne la mele së. Ngo maine tru catre pala ha la traeme hne së hna xome matre troa kuci madrin, uti fe hë la wanga acone së la itre huliwa thatraqane la hmi së, haawe, ame la nyine iamadrinë cili, tre, ka gufa, nge eje a angazone la aqane imelekeu së me Akötresie. (Ate cai. 2:24; 4:6) Ame la aqane troa neëne lai, tre, tro la Keresiano a atreine tulu ewekë; nge nyipi ewekë tro angeic a wange hnyawa la aqane huliwane angeice la traeme i angeic, celë hi ewekë ka tru alamekene lai. (E jë la Kolose 4:5.) Ngo eje hi laka, hetrenyi la itre xaa ewekë ka pë alien ka ngazo catre kö hune la itre nyine iamadrinë, pine laka hna mecine itre ej. Kola qaja la itre haze ka thoi.
Xelene Jë La Haze Ka Thoi
5. Ame la Tusi Hmitrötr a qaja la hnëewekë, ka hape, “ka pë ixamixam,” tre, kolo lai a qeje nemen?
5 Ka lolo catr, ke, ame la kola xome la hnaewekë hna hape “ka pë ixamixam” ngöne la itre xötre ne la Tusi Hmitrötr, tre, nyine qaja la itre haze ka thoi maine itre idrola. Hanawange la ketre ceitun, öni Iehova koi angetre Isaraela, ka hape: “The tro kö nyipunie a nyi idola i nyipunie, nge the tro kö a acile thatraqai nyipunie la hna shaate me idola etë, me amë ngöne la nöje i nyipunie la hna shaate etë troa thili kow.” (Lev. 26:1) Hnei Davita Joxu hna cinyihane fe, ka hape: “Ke atraqate Iehova, nge troa nyipi atrun ; nge nyine qouene hune la nöjei haze asë. Ke ite idola hi la nöjei haze asë ne la nöjei nöj; ngo hnei Iehova hna xupe la ite hnengödrai.”—1 A. l. ite jo. 16:25, 26
6. Pine nemen matre ame la itre haze ka thoi, tre, kolo hi lo itre idrola?
6 Tune la hnei Davita hna amaman, kola mama xötreithi së la itre ewekë ka anyipicin la edraië i Iehova. (Sal. 139:14; 148:1-10) Drei la ketre hnëqa ka sisitria kowe la angetre Isaraela, ene la troa isisinyikeu me Iehova! Hapeu thaa angatre kö a ujë qene hmo, ngöne la angatr a trotriji Nyidrë me thili kowe la itre hna saatr me idrola etë? Ame ngöne la itre ijine akötr, mama hnyawa pi hi ka hape, ame la itre haze i angatr, tre, itre idrola. Matre tro angatr a amelene tune kaa la itre ka thili koi angatr, nge thatreine pe angatr pane amele angatre kö.—A. ame. 10:14, 15; Is. 46:5-7.
7, 8. Tune kaa la aqane tro “mamona” a ceitu me ketre idrola?
7 Ame ngöne la nöjei nöje enehila, nyimutre la itre atr ka thili pala hi kowe la itre hna saatr, ngo thaa isapengöne kö itre ej memine lo itre haze ekö laka, ka pë aliene asë hi. (1 Ioane 5:21) Ngo thaa itre hna saatre hmekuje kö la hna hëne hnei Tusi Hmitrötr ka hape itre haze; hetrenyi kö la itre xaa pengöne haze. Tro sa ce wange la itre trenge ewekë i Iesu, nyine ceitun: “Pëkö ate ateine troa nyi hlue ne la lue joxu ; ke tro angeic’ a xelene la kete, me hanyine la kete ; nge troa fede kowe la kete, me jakalane la kete. Tha ‘teine kö nyipunie troa nyi hlue i Akötesieti me mamona.”—Mat. 6:24.
8 Tune kaa la aqane aceitunëne la “mamona” me ketre haze? Tro sa ce xome la ketre ceitun, mekune ju së la ketre ietë ngöne la ketre gaa hlapa ekö e Isaraela. Maine ju troa xome la etë cili matre troa xupe la ketre uma, maine ngöne uma pena. Ngo maine hna xomi ej matre troa xupe la ketre “idola etë”, maine ketre “hna shaate”, eje hi laka tro ha athixötren la itre atr ka nyihlue i Iehova. (Lev. 26:1) Ceitune hi lai memine la mani laka, ka nyipi ewekë catr e troa huliwane hnyawa. Eje a xatua së fe ngöne la easa xome la itre hnëqa së ngöne la mele së. Ketre loi e tro sa huliwane hnyawa fe ngöne la easa nyihlue i Iehova. (Ate cai. 7:12; Luka 16:9) Ngo maine tro sa amë panëne la nyinyape thele mani, nge pine pë hë la itre huliwa ne Keresiano, eje hi lai laka, tro hë la mani a ketre haze koi së. (E jë la 1 Timoteo 6:9, 10.) Ame ngöne la fene celë, kola mama hnyawa laka nyimutre la itre atr ka nyinyape thele mani, celë hi matre loi e tro pala hi sa tuluthe la aqane tro sa waiewekë ngöne la götrane cili.—1 Tim. 6:17-19.
9, 10. (a) Tune kaa la aqane tro la ketre keresiano a goeëne la ini? (b) Nemene la ethanyine e troa sisedrëne la itre ini ka tru?
9 Ame la ketre ceitun ne la ketre ewekë ka loi, ngo troa gufa e hna huliwane menun, tre, ene la ini. Easa ajane tro la itre nekö së a kapa la ketre ini ka loi matre troa hetre thangane ka loi ngöne la mele i angatr elany. Ketre ewekë ka sisitria fe troa ini hnyawa la nekönatr, ke, kola aijijë nyën troa ketre Keresiano elany ka trotrohnine hnyawa la Tusi Hmitrötr, nge ka atreine thele ewekë göne la itre jol, me axeciëne hnyawa la itre mekun, nge thaa tro kö a jole koi angeice troa catre inine la nyipici kowe la itre xan. Thaa tro kö a gufa la itre hawa ka nyimutre, hne së hna xome matre troa kapa la ini ka loi.
10 Ngo tune kaa fe göi troa sisedrëne la itre ini ka tru ngöne université? Hna goeëne pala hi hnene la itre atr la götrane cili, ceitune me ketre ewekë ka troa hetre thangane ka lolo catre kowe la mel. Ngo nyimutre la itre atre nyinyape thele la itre aqane ini cili, nge, ame la kola traqa kowe la pun, ase hë jilapane la itre mekuna i angatr hnene la inamacan ne la fen. Ka sisitria catre kö tro la itre thöthi a xome la itre macatre ne thöthi angatr troa huliwa i Iehova, hune la troa aluzine itre ej ngöne la hna thele troa sisedrëne me kuca la itre ini ka tru. (Ate cai. 12:1) Ame ngöne la itre nöje laka, hna majemine hnene la itre atr troa sisedrëne me kuca la itre ini ka tru, tre, thaa sesëkötre kö së laka co hi la itre atr ka lapaune koi Akötresie. Ame la kola thele hnene la ketre Keresiano troa aejëne la itre aja ka eje thei angeic, tre, thaa angeice kö a mejiune kowe la itre ini ka tru catr, ngo koi Iehova pe.—Ite edomë 3:5.
Thaa Tro Kö Sa Nue La Aja Ne Ngönetrei Troa Ketre Haze
11, 12. Pine nemen matre Paulo a qaja kowe la itre xaa atr, ka hape: “Haze i angate la hni”?
11 Ame ngöne la tusi nyidrë koi angetre Filipi, tre, hnei Paulo aposetolo hna qeje pengöne la ketre ewekë ka ijije troa nyi ketre haze. Öni nyidrëti kowe la itre ka nuetrije hë la ekalesia, ka hape: “Ala nyimu la angete tro, a nyimu a qeje angate ni koi nyipunie, nge ini hmaca a qaja teijëne enehila, laka angate la ite ithupëjia memine la satauro i Keriso; hnëjine la pune koi angat, nge haze i angate la hni, . . . me hnine la ite ewekë [ne] fen.” (Fil. 3:18, 19) Tune kaa la aqane tro la trengenan a ketre haze së?
12 Kola mama hnyawa kowe la itre atr hna qaja hnei Paulo, laka tru catre hë koi angatr la itre aja ne ngönetrei, hune la troa nyihlue i Iehova. Maine jë, nyimutre la itre atr ka sasaithi tulu ngöne la aqane xeni me ij, uti fe hë la ulumi öni me hmo hnei kahaitr. (Ite edomë. 23:20, 21; wange ju la Deuteronomi 21:18-21.) Ame ngöne la hneijine i Iesu, hnene la itre xane hna iëne troa lö hnin me kuca asë la itre aja i fen, ene pe hna sewe angatre troa nyihlue i Iehova. Epi thaa tro pi kö sa nue la ajane troa hetrenyi la ketre “mele ka loi,” troa ananazijëne la aqane catre xome së la huliwa i Iehova.—Kol. 3:23, 24.
13. (a) Nemene la meciun, nge hnei Paulo hna aceitunëne ej me nemen? (b) Tune kaa la aqane tro sa neëne la meciun?
13 Hnei Paulo hna amexeje mina fe la ketre götrane ne la hmi ka thoi. Hnei nyidrëti hna cinyihan, ka hape: “Qa ngöne lai, humutheju hnei nyipunie la ite hnepe ngönetei nyipunie e celë fen; ene la kuci ngazo, me thina ka sis, me qene tratraij, me aja ka ngazo, me meciun, celë hi kola thithi kowe la idola.” (Kol. 3:5) Ame la meciun, tre, kola qaja la easa ajane catrëne la ketre ewekë ka pë the së, ene lo itre mo ne ngönetrei. Ngo ame mina fe la meciun, tre, eje mina fe a qaja la ketre aja ne troa kuci ngazo. (Eso. 20:17) Hapeue la itre aja cili, thaa kolo jë fe kö lai a hmi koi idrola, ene la troa thili kowe la ketre haze ka thoi? Hnei Iesu hna xome la ketre ceitune ka lolo matre troa amamane la enyipiewekëne la troa catre xomihnine la itre aja ka ngazo cili.—E jë la Mareko 9:47; 1 Ioane 2:16.
Thupëne Kö La Itre Trenge Ithanata Ka Pë Thangan
14, 15. (a) Ame ngöne lo hneijine i Ieremia, nemene la itre “ewekë ka pa ‘alien” ka athixötrëne la ka alanyim? (b) Pine nemen matre ka tru alamekene catre la itre trenge ewekë i Mose?
14 Ame ngöne lo itre ewekë ka gufa, tre, kolo fe a qaja la itre trenge ithanata. Hanawange la ketre ceitun, öni Iehova koi Ieremia, ka hape: “Ite perofeta a perofetan la thoi ngöne la ëjeng; tha hnenge hna upi angat, me qaja koi angat; angate pe a perofetan koi nyipunie la hna amamane ka thoi, me nyi haze me ewekë ka pa ‘alien, me iaö qa kuhu ite hni angat.” (Iere. 14:14) Ame la itre perofeta thoi cili, tre, angatr a suene ka hape, angatre la itretre tro fë la ëje i Iehova, ngo kolo pe a tro fë la itre sipu mekune me inamacane i angatre kö. Qa ngöne lai, ame la itre trenge ewekë i angatr, tre, itre “ewekë ka pa ‘alien.” Itre trenge ewekë ka gufa, nge ketre, ka hetre ethanyin kowe la nyipi hmi. Ame ngöne lo macatre 607 M.P.K., nyimutre lo itre hna canga humuthi hnene lo itre sooce ne Babulona, pine laka hnei angatre hna drenge lo itre trenge ewekë ka pë alien.
15 Ngo pane goeëne jë pe së, la hnei Mose hna qaja koi angetre Isaraela: “Tro nyipunie a aköte hnine la nöjei tenge ewekë asë hnenge hna qaja koi nyipunie ngöne la drai celë. . . Ke tha ewekë ka maloe kö lai koi nyipunie, ke mele i nyipunie lai; nge ngöne hi la ewekë cili tro nyipunie a anyimune la ite drai nyipunie ngöne la nöje nyipunie a shashaithe Ioridano mate lapan.” (Deu. 32:46, 47) Nyipici, ngöne laka qaathene la Uati Hmitrötre i Akötresie la itre trenge ewekë i Mose, eje hi lai laka, itre ka tru alamekene catr. Ka nyipi ewekë catre ite ej, nge hetre thangane ka loi kowe la nöj. Ame la itre atr ka trongëne itre ej, tre, hnei angatre hna mele aqeane nge eje thei angatre ekö la ketre mele ka lolo. Epi tro pala hi sa catre troa thipetrije la itre trenge ithanata ka gufa, me fedre catre kowe la itre trenge ithanata ka nyipici.
16. Tune kaa la aqane wange së la aliene la itre hna qaja hnene la itre ka ini sias, ka isazikeu memine la Wesi Ula i Akötresie?
16 Hane kö së drenge ngöne la hneijine së la trenge ithanata ka gufa? Eje hi. Hanawange la ketre ceitun, nyimutre la itre ka ini sias, ka qaja ka hape, ame la ini hna hape Evolisio, memine la itre xaa hna öhne kö ngöne la götrane cili, tre, nyine amamane laka ame la itre ewekë hna xup, tre, ka xulu xan, celë hi matre thaa nyipi ewekë kö troa lapaune koi Akötresie. Tro kö sa hnehengazone la itre trenge ithanata cili ka hetre hni ne pi tru ngön? Ohea! Ka isapengöne kö la inamacan ne la atr memine la inamacane i Akötresie. (1 Kor. 2:6, 7) Ngo atre hi së laka, ame la kola isazikeu la itre ini ne la itre atr memine la itre hna qaja hnei Iehova, tre, kolo pala hi lo itre ini ne la itre atr la ka ngazo. (E jë la Roma 3:4.) Ngacama tru la itre huliwa ka loi hna kuca hnene la sias ngöne la itre götrane ka nyimutre, ngo ka nyipici pala hi la trenge ewekë ne la Tusi Hmitrötr göne la inamacane i atr, ka hape: “Ke hmo xajawa i Akötesie la inamacane ne fen.” Ame la easa goeëne la ejuine la inamacane i Akötresie, ijije hi tro sa qaja ka hape, ka gufa hnyawa la inamacane i atr.—1 Kor. 3:18-20.
17. Tune kaa la aqane tro sa goeëne la itre trenge ithanata ne la itre hene ne hmi, memine la itre ka iamenumenu?
17 Hna qaja mina fe hnene la itre hene ne hmi la itre trenge ithanata ka gufa. Ame la itre trenge ithanata hnei angatre hna qaja, tre, thaa hna nyitrepene kö hnei Tusi Hmitrötr, nge ketre itre ka gufa itre ej. Hna qaja mina fe hnene lo itre ka iamenumenu la itre trenge ithanata ka gufa; angatr a sieje fë ka hape, ka inamacane kö angatr hune la “hlue ka nyipici me ka inamacan,” lo hnei Iesu hna acil. (Mat. 24:45-47) Ngo eje hi laka, ame lo itre ka tro trije la ekalesia i Keresiano, hna hëne ka hape itre ka iamenumenu, angatr a qaja la itre sipu mekuna i angatr, nge ka gufa la itre trenge ithanata i angatr; nge canga tro hi angatre a athixötrëne la nöjei ka troa drei angatr. (Luka 17:1, 2) Tune kaa la aqane tro sa neëne matre thaa tro kö a iaö së hnene la itre trenge ithanata cili?
Tune Kaa La Aqane Troa Xelene La Itre Trenge Ithanata Ka Gufa
18. Tune kaa la aqane tro sa xötrethenge hnyawa la eamo hna hamëne ngöne 1 Ioane 4:1?
18 Ame ngöne lo qatre hë nyidrë, hnei Ioane aposetolo hna hamëne la ketre eamo ka lolo catre ngöne la götrane cili. (E jë la 1 Ioane 4:1.) Jëne la eamo celë easë pala hi a ithuecatre kowe la itre atr hne së hna cainöje kow, matre tro angatr a cengöne goeëne la itre hnei angatre hna inin me wange ka hape, ka ceitune jë kö memine la ini hna hamëne hnene la Tusi Hmitrötr. Ketre hna amekötine lai ka nyipi ewekë mina fe koi së. Thaa tro pi kö sa kapa la itre trenge ithanata ka qaja angazone la nyipici, maine ka xöjetrije pena la ekalesia, ene la itre qatre thup maine ketre trejine pena me easë. Loi e tro pe sa thel, ka hape: “Tune kaa la atre kötre fë la ithanata, angeice kö a ujë thenge la hna qaja hnei Tusi Hmitrötr? Tro kö la itre trenge ithanata cili a sajuëne la aja i Iehova? Tro kö itre eje a akökötrene la tingetinge e hnine la ekalesia?” Ame la trenge ithanata hna qaja nge kola mama laka kola xöjetrije la itre trejine me easë, ngo pëkö hni ne ixatua ngön, tre, ka gufa hnyawa la trenge ithanata cili.—2 Kor. 13:10, 11.
19. Troa xecie tune kaa kowe la itre qatre thup ka hape, ame la itre trenge ithanata i angatr, tre, thaa ka gufa kö?
19 Ijije tro fe la itre qatre thup a hane xomi ini ka sisitria catr qa ngöne la eamo hna hamëne hnei Ioane, ngöne la angatr a drenge la itre trenge ithanata ka gufa. Ame ngöne la nöjei angatre a troa hamë eamo, loi e troa atrehmekune hnyawa hnene la itre qatre thup la itre ifego i angatr, nge thaa tro pi kö angatr a nyitrepene la itre eamo i angatr ngöne hmekuje hi la itre ewekë hnei angatre hna sipu melëne hë. Loi e tro pala hi angatr a nyi trepene la itre mekuna i angatre hnene la hna qaja hnei Tusi Hmitrötr. Kola mama ngöne la itre trenge ewekë i Paulo aposetolo, la ketre trepene meköti ka loi kowe la itre qatre thup, kola hape: “The mekune kö koi ate hune la hna cinyihan.” (1 Kor. 4:6) Thaa tro kö la itre qatre thup a elë hune la itre hna cinyihane e hnine la Tusi Hmitrötr. Nge ketre, thaa tro pi kö angatr a thele troa nyixane la hna qaja hnei Tusi Hmitrötr, memine lo itre hna cinyihane hnene la hlue ka nyipici me ka inamacan.
20. Nemene la ixatua hne së hna kapa matre troa thipetrije la itre ewekë ka gufa?
20 Ame la itre ewekë ka ixamixam maine ka gufa, tune la itre “idrola”, me itre trenge ithanata, maine itre xane ju kö, tre, ka hetre ethanyine catre itre ej. Celë hi matre nyipi ewekë tro pala hi sa thithi koi Iehova matre tro Nyidrëti a xatua së troa wanga atrehmekune hnyawa la itre ewekë cili, me nue koi Nyidrëti troa eatrongë së matre atreine së troa thipetrije itre ej. Maine tro sa ujë tune lai, tre, easë hi lai a cengöne qaja memine la atre cinyihane la Salamo, ka hape: “Ezineju la lue mekenge mate tha tro kö ni a goeëne la thoi, amele ni jë ngöne la ite jë i cilie.” (Sal. 119:37) Ame ngöne la hna cinyihane ka troa xulu, tre, easa troa qeje pengöne la eloine la troa nue Iehova tro Nyidrëti a eatrongë së.
Atreine Hi Nyipunieti Troa Qeje Pengön?
• Nemene la itre ewekë “ka pë ixamixam [ka gufa]” nyine tro sa thipetrij?
• Tune kaa la aqane tro sa neëne matre thaa tro kö la mani a ketre idrola koi së?
• Nemene la aqane tro la itre aja ne ngönetrei a nyi ketre idrola?
• Tune kaa la aqane tro sa thipetrije la itre trenge ithanata ka gufa?