“Olene Pala Hi Nyipunie”

¹ Hna ini së ngöne la easë a nekönatre troa qaja ka hape “sipone” me “oleti” ngöne la ketre atr a thiina ka loi me thiina ka menyike koi së. Paulo pala hi a xatua së troa ‘amamane pala hi la ole së,’ nge loi e troa atraqatre la ole së koi Iehova. (Kol. 3:15, 16) Ngo nemene la aqane tro së a amamane la ole së kowe la Atre xupi së ka draië? Nge nemene la sipu kepine matre, loi e tro së a amamane la ole së koi Nyidrë?

² Hna cinyihane hnei Paulo ka hape: “Ngo ole koi Akötesie ate hamë shë la tenge cate ngöne la Joxu shë Iesu Keriso!” (1 Kor. 15:57) Ngöne la nöjei drai ne Amekunën, kola amekunë së hmaca la etrune la ihnimi Akötresie me Keriso, ngöne laka, hna hamëne la thupene mele ka troa aijijë së, troa hetre mejiune kowe la mele ka thaa ase palua kö. (Ioa. 3:16) Pine laka, nyimutre the së la itre ka trene sinee ka meci hë, haawe, drei la ole së kowe la hna thingehnaeane hnei Iesu göi mele hmaca! Atraqatre la ole së ngöne la easë a goeëne la hna ahnithe göi itre ka troa mele pe qa ngöne la pune la fene celë, nge thaa tro hmaca kö a mec. (Ioa. 11:25, 26) Thatreine kö së troa qaja amamane la ole së kowe la nöjei manathithi ka lolo hne së hna troa kapa qa thei Iehova ngöne la paradraiso e cele fen, a ka calemi hë. (Hna Ama. 21:4) Nemene la itre kepine ka sisitria ka troa upe la ketre atr troa ‘ole’ koi Iehova?

³ Aqane Troa Ole Koi Akötresie: Loi e tro pala hi së a thithi matre troa olene koi Iehova la elolo i Nyidrëti koi së. (Sal. 136:1-3) Celë hi ka upi së lai troa amamane la ole së koi Nyidrë ngöne la itre xaa götran. Ene la troa hane sine la Drai ne Amekunëne la meci Keriso e sabathi ne 23 Maac. Ame la easë a hamëne la hne së hna hetrenyi thatraqane la ekalesia memine la huliwa ne cainöje ngöne la fene asë, ke, easë hi lai a amamane la madrine së troa ‘atrunyi Iehova hnene la ite nyi së.’ (Ite Edo. 3:9) Loi e tro fe së a xatuane la itre qatre thupe me ce huliwa me angatr, celë hi aqane tro së lai a olene koi Iehova la ixatua hnei Nyidrëti hna hamëne jëne angatr. (1 Thes. 5:12, 13) Ngöne la nöjei drai, easë a catre kuca la thina ka loi, matre troa atrune la ëje i Akötresie. (1 Pet. 2:12) Troa atraqatre la madrine i Iehova kowe la itre hatrene la ole së.​—1 Thes. 5:18.

⁴ Hetrenyi Kö La Ketre Sipu Aqane Tro Së a Ole: Nyimutre la nöjei aqane troa olene hnene la hni ka pexej, kowe la Atre xupi së memine la nöjei ewekë hnei Nyidrëti hna kuca koi së, maine hnene la troa catre cainöjëne la Baselaia, me troa atrune la ëje i Iehova, troa ole jëne la thith, me troa cilëgöline la nyipici. Atraqatre la madrine i Iehova e tro së a hamëne koi Nyidrë la itre huje ka hmitrötr, nyine troa sajuëne la aja i Nyidrë, ngöne laka, Nyidrëti lo atre ajane “la nöjei ate asëjëihë troa mel.” (1 Tim. 2:3, 4) Celë hi kepine matre, nyimutre catre la itretre cainöje ka nangëne la hë hna cile fë ngöne lo Huliwa ne Baselaia ne treu febuare göi troa pionie ka ixatua, maine ngöne la caa treu maine itre eje asë pena; treu maac, me eiperem, me mei. Ame la troa catre ngöne la huliwa ne cainöj, ke, celë hi katre aqane lai ka lolo, nyine troa ‘amamane la ole së’ koi Akötresie. Hapeu, ijiji epuni kö troa hane pionie ngöne la treu eiperem? me mei?

⁵ Eje hi laka, hna hamë së la ketre mejiune ka catr, ene la troa mele ka thaa ase palua kö. Ame hë la easë a öhne la kola eatre elanyi la ewekë cili, tro ha nyimu kepine koi së troa amamane pala hi ngöne la nöjei drai, la madrine memine la ole së koi Iehova.​—Sal. 79:13.