Atreine Troa Kökötre La Madrine Së Jëne La Itre Icasikeu
1 Jëne iamele koi së ngöne la götrane la ua, la itre icasikeu. Troa hetrenyi la madrine së, qa ngöne la hne së hna kuca qëmeken, me ngöne la ijine icasikeu me e thupene ej. Nemene la aqane tro së a kuca, matre troa kökötre pala hi la madrine së, memine la itre xaa trejin, qa ngöne la hna sine la itre icasikeu?
2 Qëmekene La Itre Icasikeu: Troa hetre madrine së qa ngöne la itre icasikeu, e hne së hna hnëkë hnyawa. Maine tro së a hnëkë hnyawa, eje hi laka, troa hetre aja the së troa drenge hnyawa me hane qeje mekun. Nge maine hetre hnëqa së, haawe, loi e tro së a hnëkë hnyawa me ajane troa hamëne la itre ini ka nyipici, me xomexatuane la aja ne la itre ka drei së. Loi e tro së a anyimua amacane, la hnëqa së. Maine tro asë hi së a thele troa akökötrene la madrine me manathithi ngöne la itre icasikeu, haawe, tro ha mama la aqane kökötre së, nge troa atraqatre fe la madrine së.—1 Tim. 4:15, 16.
3 E Ijine Icasikeu: Troa atraqatre la madrine së ngöne la itre ijine icasikeu, e hne së hna hane anyimua hamë mekune ngön. Loi e troa xome la itre hna cinyihane hna troa ce ithahnatan, ceitune me ketre xötreqa hne së isa ala caasi hna troa kuca. Troa hetre thangane ka loi la itre mekune ka jui nge ka thaa qea menu kö. Ketre sisitria mina fe la itre ewekë hna melëne hnene la itre trejin, ngöne laka, kola xatua së me ithuecatre koi së; nge maine ijij, loi e tro së a thele troa hane qaja fe itre ej. (Ite edomë 15:23; Ite Huliwa 15:3) Maine hetre hnëqa së ngöne la ketre ijine icasikeu, loi e troa keukawa, me hetre hni ne ajane la aqane ithuecatre së, nge troa hamëne la itre ini ka lolo thatraqane la mele së.
4 Thupene La Icasikeu: Troa hetre manathithi the së asë, e hne së hna ce thawa memine la itre atrene la icasikeu, la ketre hnepe hnëewekë ka lolo, me ibozu, me ithahnatane fe la itre xaa hnepe mekune ka tru hne së hna ce wange ngöne la ijine icasikeu. Maine tro së a amamane la madrine së ngöne la easë a öhne la kola qeje mekune hnene la ketre thöth, maine ketre qatr, maine ketre hnainin, haawe, tro ha akökötrene la ihnimi thene la itre trejine asë. Thaa loi kö e troa qaja angazone la itre trejine ka thaa traqa kö troa hane sine la itre icasikeu, ngo loi e tro pe së a ithahnatane me angatre la madrine hne së hna kapa qa ngöne la itre icasikeu, me hane thuecatre koi angatre troa hane sine itre ej.—Heb. 10:24, 25.
5 Loi e thaa tro pi kö së a cipane kowe la mele së, la enyipi ewekëne la hna amekötine cili, hna hnëkëne koi së matre tro së a ithuecatrekeu. (Rom. 1:11, 12) Maine tro së a catre thele troa hane hamëne hnyawa fe la ixatua së, haawe, tro ha hetrenyi the së asë la madrine hna kapa qa ngöne la itre icasikeu ne la itre keresiano.