Hapeu, Easë Kö a Troa Saze Ekalesia?
Maine easë a troa saze ekalesia, haawe, nyimutre la itre nyine tro së a kuca ka nyipi ewekë catr. Maine tro së a xötrethenge cahu itre trepene mekune ka lolo, haawe, tro ha hmaloi koi së troa canga majemi kowe la ekalesia së ka hnyipixe.
(1) Ame la hnapan, ke, ene la troa atre la götrane hne së hna tro kow; atreine hi troa ahnithe koi së hnene la seketere ne la ekalesia së, la hnen la Uma ne Baselaia ne la ekalesia së ka hnyipixe. Ame hë la easë a traqa e cili, loi e tro së a canga thele la uma, me iatrene la itre drai me hawa ne icasikeu. Maine ala nyimu la itre ekalesia ka icasikeu ngöne la Uma ne Baselaia cili, haawe, hnyingëne jë kowe la itre qatre thupe la ekalesia atrekë teritoare ne la götrane hne së hna lapa ngön. The hmitre kö troa hane sine la itre icasikeu, nge loi e troa canga atre së, hnene la itre qatre thupe ne la ekalesia ka hnyipixe.
(2) Tro la itre seketere ne la ekalesia hnapane me ka hnyipixe a ce wange göi troa iupi fë lo itre pepa ne huliwa së me hnepe lapa së. Troa ce iupi fë lai memine la ketre tusi hna troa cinyihane kowe la itre qatre thupe ne la ekalesia së ka hnyipixe. (Wange ju la hna cinyihan, Réponses à vos questions, hnine la Huliwa Ne Baselaia ne Febuare 1991.) Loi e tro la Komite Ne Huliwa Ne Cainöje Ne La Ekalesia, a thuemacane la atre xomiujine la ini tus laka, traqa ha së, matre tro angeice a ce wange me easë me amamane koi së la hnë tro së a hane sine la ini tusi ne la ekalesia së ka hnyipixe.—Rom. 15:7.
(3) Troa hetre madrinene la itretre cainöje asë ngöne la ekalesia së ka hnyipixe, matre tro angatre a thele troa ibozu me easë, me kepe së. (Wange ju la 3 Ioane 8.) Qa ngöne lai, loi e tro së a hane sine la itre icasikeu, matre tro së a hane ithuecatrekeu memine la itre trejine me easë, trahmanyi me föe.
(4) Thaa nyipi ewekë kö tro së a treqene matre traqa asë pi la itre pepa së hnine la ekalesia së ka hnyipixe; loi e tro së a canga hane xome la huliwa ne cainöj, memine la ekalesia së ka hnyipixe. Maine tro së a amë panëne la itre aja ne la Baselaia, haawe, tro ha hamëne koi së la itre xaa ewekë, nge thatreine kö tro së a luelue ngöne la götran easë a nyiqaane mele ngön. (Mat. 6:33) E ase jë së nyiqaane lapane la uma së ka hnyipixe, haawe, ma aja së fe troa könëne la itre xaa trejine ne la ekalesia kowe la hnalapa së, ketre, matre troa imajemikeu hnyawa me angatr.—Rom. 12:13b.
Thaa huliwa ka hmaloi kö la troa saze ekalesia. Ngo maine tro së isa ala caasi a kuca la hna amekötine koi së, eje hi laka, thatreine kö troa hetre jole ka tru ngöne la götrane la ua. Ketre, tro ha haine hnyawa hne së, la ihnimi ka eje the së asë itre trejin.