Tui Iehova Thaa Tro Kö a Iwangatrehmekunyi Atr
1 Iehova a hnehengazone la mele ne la itre atr. Thaa ka iwangatrehmekunyi atr kö Nyidrë, ngo madrine Nyidrë la atr ka kuca la aja i Nyidrë. (Ite Huliwa 10:34, 35) Ketre tui Iesu, hnei nyidrë hna cainöje kowe la nöjei atr asë. (Luka 20:21) Nyipi ewekë troa xötrethenge la tulu i nyidro, tune lo hna kuca hnei Paulo; hnei angeice hna cinyihane ka hape: “Alacasi la Joxu ne asë ate ihabane koi angat’asë angete hë nyidë.”—Rom. 10:12.
2 Easë a atrunyi Akötresie, ngöne la easë a cainöjëne la maca ka loi ne la Baselaia, kowe la itre atr hne së hna öhn. Nyipi ewekë tro pala hi së a ce thawa me itre xane la maca ka sisitria celë, ngacama isa hane ikupeine kö, me isa aqane mel, me isa aqane hetru së kö, maine trene manie ju hë maine pë ewekë pena. (Rom. 10:11-13) Haawe, kolo lai a hape, troa cainöje kowe la itre ka drei së—trahmany, me föe, me thöth, me qatr. Nyipi ewekë troa fenafena ngöne la nöjei qëhnelö asë, matre ijije troa drenge la nyipici hnene la nöjei atr.
3 Loi e Troa Hetre Ajane Troa Ixatua: Ame la aja së ke, ene la troa ithahnata koi angatr, isa ala caas. Celë hi matre, hetre thangane ka loi la hna cainöje hnene la itre xaa trejine ngöne la itre hna itreqe thei droketre, me ngöne itre pital, me ngöne hna thupë nekönatr, me thene la itre assistances sociales, me ngöne la itre hna triji zane dorog, me ka haitr. Ketre, hnei itre xane hna cainöje kowe la itretre cilëne la itre hna kele wezipo, itretre cilëne la itre uma ne ini me itretre ithupë, me itretre amekötin. Nyipi ewekë troa pane amamane kowe la itre atr cili la madrine së koi angatr, qa ngöne la ixatua hnei angatre hna hamëne kowe la nöj. Loi e tro së a metrötr, me iëne la itre hna cinyihane hnine la itre itusi së, ka ihmeku memine la huliwa i angatr, memine fe la itre jole ka eje ngön.
4 Hnene la trejine föe hna thele troa ithahnata memine la ketre atre amekötine ngöne la biero i nyidrë. Lolo catre la porotrike i nyidro, matre öni nyidrë: “Atre hi nyipo la ewekë hnenge hna madrine thene la Itretre Anyipici i Iehova? Hetrenyi angatre la itre trepene meköt, nge angatre a xötrethenge hnyawa.” Haawe, hetre thangane ka loi la hna cainöje kowe la atr ka hlemu celë.
5 Thatre kö së la mekune ne la itre atr. Ngo maine tro së a thele la nöjei atr, me ithahnata koi angatre isa ala caas, haawe, hatrene hi lai la lapaune së koi Akötresie, Nyidrë ka atreine troa elemekene la huliwa së. Ketre, kola aijijëne la itre atr troa hane drenge me kapa la maca ka hamë mejiun. (1 Tim. 2:3, 4) Loi e troa huliwane inamacanëne la traeme së, me catre troa xome la tulu i Iehova; ene laka, thaa tro kö a iwangatrehmekunyi atr, ngo troa cainöjëne la maca ka loi kowe la nöjei atr asë.—Rom. 2:11; Efe. 5:1, 2.