Hane Kö Së Drenge Ekö La?
1 Eje hi! Iehova a amexeje pala hi la itre ewekë ka nyimutre qa hnine la Tusi Hmitrötr, nyine loi kowe la itre hlue i Nyidrë. Hnei Iesu fe hna hane amexeje la itre ini cili, ngöne la itre aqane mama la Baselaia. Ketre tune mina fe la itre aposetolo i nyidrë, hnei angatre pala hi hna ce wange hmaca la itre mekune ngöne la götrane la ua, ngacama catre hë la lapaune i angatre kowe la nyipici.—Rom. 15:15; 2 Pet. 1:12, 13; 3:1, 2.
2 Ame enehila, hna hnëkëne hnene la organizasio i Iehova la itre topike ka nyipi ewekë catr, nyine troa anyimua ce wange hmaca ngöne la itre ijine icasikeu. Ketre, hna ce wange hmaca la itre xaa itusi me ini ngön. Qa ngöne lai, nyipi ewekë catre troa drenge hmaca la itre ewekë hne së hna drenge hë!
3 Jëne Mele La Troa Amexeje La Itre Ewekë: Kola akökötrene la trotrohnine së hnene la itre eamo hna amexeje lapaane hnei Iehova, me anualaine la aqane waiewekë së, me acatrene la aja së troa lapa huti ngöne la götrane la ua. (Sal. 119:129) Ame la easë a wange hmaca la itre trenge wathebo me itre trepene meköti Akötresie, ke, ceitune me easë a thulu. Eje a xatua së troa ketre waipengö së matre atreine së troa cile kowe la ewekë ka eje the së, ene la troa “denge thëthëhmin.”—Iako. 1:22-25.
4 Maine thaa tro kö së a kapa la itre eamo hna amexeje pala hi koi së, haawe, tro pena ha la itre xaa ewekë a xome la göhnene itre eje ngöne la itre hni së. Kola acatrene la lapaune së hnene la itre ewekë hna amexeje lapaane hnei Akötresie, matre atreine tro së a thipetrije la itre aqane ihuline la fene i Satana. (Sal. 119:2, 3, 99, 133; Fil. 3:1) Kola amekunë së pala hi hnei Nyidrë la aqane eatre la itre aja i Nyidrë, ene pe kola upi së me hape, “Hmekëne jë.” (Mareko 13:32-37) Nyine loi la troa amexeje pala hi la itre nyine anyipicine hnine la Tusi Hmitrötr, pine laka, kola xatua së troa trongëne hnyawa la gojenyi ne tro kowe la mele ka epine palua.—Sal. 119:144.
5 Troa Isa Kepe Thangane Tune Kaa: Loi e tro së a ‘ahmalane la ite hni së kowe la ite nyine anyipicine i cilie.’ (Sal. 119:36) Maine kola troa wange la ketre topike hne së hna atre hnyawa e hnine la icasikeu ne la ekalesia, haawe, loi e tro së a canga hnëkë, me thele la itre xötre hna hamën, me mekune la aqane tro së a trongëne la ithuemacany. Thaa tro kö a wangacone la revizio ne la Ini Ne Cainöje Qaathei Akötresie, ngo troa inine troa hane hnëkëne ej. (Luka 8:18) Thaa tro pi kö së a wangahmaloeëne la itre trepene nyipici hna amexeje ngöne la itre hna icasikeu, me hape, caasi pala hi la hna qaja, ngo loi e troa inine troa kapa hnyawa itre ej.—Heb. 5:11.
6 Epi troa eje the së la mekune ne la atre cinyihane la salamo, kola hape: “Ini a madine la jë ne la ite nyine anyipicine i cilie hune la tenge mo asëjëihë.” (Sal. 119:14) Eje hi, hne së hna drenge hë la itre trenga mo cili, nge easë hmaca a drenge itre ej. Pine nemene matre kola amexeje hmaca koi së? Pine laka, atre hi Iehova ka hape, nyipi ewekë tro pala hi së a drenge itre ej!