Iehova a Atrenamo Së Hnene La Itre Manathithi Qaathei Nyidrë
1 Kola mekune hnei itre xane ka hape, ame la kii ne la hna ie ne la atr, ke, eje e ngöne la etrune la mani hnei angeice hna kapa qa ngöne la hna huliwa. Celë hi kepine lai matre ala nyimu la itre atr ka goeëne la itre trene mani, ceitune me itre atr ka madrin, nge ka manathith. Ngo, kola amenune la itre atr, qa ngöne laka, angatre a mekune ka hape, jëne madrine hi la mani. (Ate Cai. 5:12) Thaa ka cile huti kö la madrine ne la itre atr ka “ajane troa tena mo” ngöne la götrane ngönetrei. (1 Tim. 6:9) Ame pena ha itretre nyihlue i Iehova, hetrenyi thei angatre la nyipi madrin, nge pëkö trenamo ka tui angatre e celë fen. (Ite edomë 10:22; Hna ama. 2:9) Hna Tune kaa lai?
2 Aliene La Itre Trenga Mo Së: Hetrenyi the së la trengamo ngöne la götrane la ua, qa ngöne laka, easë a inamacane me trotrohnine hnyawa la Wesi Ula i Akötresie, ene la Tusi Hmitrötr. Jëne la organizasio i Nyidrë e celë fen, Iehova pala hi a ini së la pengö i Nyidrë, me pengö i Hupuna i Nyidrë matre tro së a hetrenyi la manathithi ka epine palua. Kola aijijë së hnene la nyipi inamacane troa qale koi Iehova, me madrine la elolone la aqane imelekeu së me Nyidrë. (Iako. 4:8) Easë a neëne la itre xaa mec, me itre xaa ethanyine la mel, pine laka, atreine së troa wangatrehmekune la loi qa ngöne la ngazo, nge easë mina fe a xötrethenge la itre wathebo i Akötresie. Easë a mejiune laka tro kö Iehova a hamë së la itre nyipi ewekë thatraqane la mele së, nge tro sa atreine mejihnin, nge tingetinge la itre mekuna së.—Mat. 6:33.
3 Easë a kapa madrine la tingetinge memine la caasi ngöne la aqane imelekeu së me itre trejine me easë ngöne la ua, pine laka easë a catre eënyine la wene ne la uati hmitrötre i Akötresie. Pine laka hna acaasi së jëne la otretre ka catre ne la ihnim, haawe, thatreine kö tro sa mekune ka hape, tro Akötresieti maine itre trejine me easë pena, a nuetriji së ngöne la easë a qëmeke kowe la itre ewekë ka ngazo ka traqa koi së.—Gal. 6:10.
4 Hetre sipu aliene la itre mele së. Easë a wangatrune ngöne la mele së, la ketre hnëqa ka mingöming, ene la troa cainöjëne la maca ka loi ngöne la nöjei götran. Celë hi huliwa lai ka troa hamëne la madrine ka cile hut, pine laka easë a xatuane la itre xane troa hane easenyi Akötresie, me caasi me easë ngöne la hmi ka wië. Kola atrunyi Iehova hnene la trengamo së ka tru alameken, ene la huliwa ne cainöj, nge kolo fe a thuemadrine së pine laka, easë fe a ahmitrötrëne la ëje i Nyidrë. Hetrenyi pala fe the së la ketre aqane waiewekë ka loi, ke, ka xecie koi së laka easenyi catre hë matre eatre jë la mejiune së kowe la itre drai ka calemi.
5 Loi e Tro Së a Amamane La Madrine Së: Epi tro pala hi së a kapa madrine la itre manathithi qaathei Iehova, pine laka itre eje hmekuje hi la ka aijijë së troa itre atr ka tru trengamon e celë fen. (Ite edomë 22:4) Maine tro sa ami ijine e nöjei drai troa lapa mekune la itre hne së hna hetreny, ke, tro lai a upi së troa ole Iehova pine la ihnimi Nyidrë ka tru, me catre hmi pala hi koi nyidrë, cememine la hni ka pexej.