Loi e Tro Së a Itre Ka Drenge Hnyawa
1 Thaa ka hmaloi kö la troa drenge hnyawa. Kola thele thene la atre ka drenge troa hetrenyi la aja thei angeice troa inine me kepe thangane qa ngöne la hnei angeice hna dreng. Qa ngöne lai, hnei Iesu hna amamane la enyipi ewekëne la troa “wange hnyawa la aqane deng.”—Luka 8:18.
2 Troa thupëne hnyawa la ewekë cili ngöne la easë a sine la itre icasikeu, memine la itre asabele, me itre kovasio. Celë hi itre ijine tro së lai a drenge hnyawa. (Heb. 2:1) Hanawange cahu itre mekune ka troa xatua së troa itre ka drenge hnyawa ngöne la itre ijine traqa itronyi hnene la itre Keresiano.
◼ Loi e troa wangatrune la edraiëne la itre icasikeu. Itre jëne ka sisitria lai hna hnëkëne koi së matre troa ‘ini së hnei Iehova’ jëne la “ate thupe nyipici.”—Is. 54:13; Luka 12:42.
◼ Troa canga hnëkë. Wange hmaca jë la itre mekune nyine troa ithahnatan, nge loi e troa xometrongëne pala hi la Tusi Hmitrötre i nyipunie memine la itusi nyine troa ini ngön.
◼ Ngöne la ijine icasikeu, troa pane thele troa lapa drenge hnyawa la itre hna qaja. Thaa loi kö e troa porotrike memine la itre atr ka lapa ezi së, maine goeëne pena la hna kuca hnene la itre xan. Troa tupathe matre thaa tro kö a mekune la itre hne së hna troa kuca thupene hna icasikeu, maine itre xaa huliwa pena.
◼ Troa thele ewekë hnyawa qa ngöne la itre mekune hne së hna dreng. Thele jë ka hape: ‘Nemene la aqane tro ni a trongëne la mekune celë? Nge eue la tro ni a nyiqaan.’
◼ Fejane hmekuje ju hi la itre mekune ka tru, memine la itre xötr. Nyine tro lai a xatua së troa drenge hnyawa la itre mekune hna ithahnatan, me aijijë së troa mekune hmaca itre eje e thupen.
3 Inine Jë La Itre Nekö Së Troa Dreng: Nyipi ewekë troa inine la itre nekönatre ngöne la götrane la ua. (Deu. 31:12) Ame ngöne la itre hneijine ekö, kola hane e fe e nyipine la itre atre i Akötresie ka drenge la kola e la wathebo, lo “itete deng’ ate hmekun.” (Neh. 8:1-3) Maine tro la itre keme me thine a amamane la madrine i angatre kowe la itre icasikeu, me drenge hnyawa, haawe tro fe hë la itre nekönatre a hane kuca tune lai. Thaa ewekë ka loi kö la troa elo, me ume peeni ne desë, matre troa alapa thaa enijene la itre nekönatr. Ketre thatreine jë kö tro angatre a hane drenge hnyawa, e kolo pala hi a tro lapa koi kabine. Pine laka, “hna atuthe la qene hmo hnine la nekönatr,” loi e tro la itre keme me thine a thele troa ce lapa pala hi memine la itre nekö i angatr, me xatua nyudrene troa drenge hnyawa ngöne la itre ijine icasikeu.—Ite edomë 22:15.
4 Maine tro së a itre atr ka drenge hnyawa ngöne la itre ijine icasikeu, tro ha mama laka, itre ka inamacane së, nge easë a ajane troa “nyi xane la inamacane” hne së hna kapa.—Ite edomë 1:5.