Loi e Tro Sa Catre Cainöj
1 Easë a melën enehila la itre drai hnapin. Thaa sesëkötre hmaca kö së la kola tru hnei gerev, me isi pi tribu, me itre ewekë ka traqa tune la itre gejë madra maine itre di pena, me itre xaa ewekë ju kö ka iaxouenyi catr ka traqa ngöne la itre götrane gaa tru atr. Celë hi matre nyipi ewekë catr enehila kowe la itre hnepe lapa troa kapa la maca ka loi. Ngo kola mama fe enehila laka, tru catre la itre atr ka thingetröne la itre ewekë ngöne la götrane la ua. Ame ngöne la itre xaa götran, tre, maine jë jole catr troa öhne la itre atr ngöne la itre hnalapa i angatr, nge ketre jole fe la troa öhne la itre atr ka troa drei së maine ka ajane pena troa inine la Tusi Hmitrötr. Ngo thaa tro pi kö sa cile troa cainöjën la maca ka loi ne la Baselaia hna acile hë.—Mat. 24:14.
2 Ihnim Kowe La Itre Atr: Easë a amamane hnyawa jëne la cainöje së, la ihnimi Iehova kowe la itre atr. “Tha ajane kö tro kete ate a hnëjin, loi pe tro angat’ asëjëihë a ietra.” (2 Pet. 3:9; Ezek. 33:11) Haawe, hnei Nyidrëti hna amekötin, tune la hna qaja hnei Iesu ka hape, “troa pane cainöjëne la evangelia kowe la nöjei nöj’ asëjëihë.” (Mar. 13:10) Akötresieti a hëne la itre atr troa ujë koi Nyidrë matre troa mele elanyi ngöne la kola amekötine la fene i Satana. (Ioela 2:28, 29, 32; Zef. 2:2, 3) Hapeu, easë kö a hane olene koi Iehova la hnei Nyidrëti hna hane aijijë së troa kapa elanyi la madrine cili?—1 Tim. 1:12, 13.
3 Kola amamane hnene la rapor ne hna huliwa lo macatre 2004 ngöne la fene hnengödrai asë, laka, hna elë la itre ka etid, 6 085 387 la etrun ngöne la nöjei treu nge kösë ame ngöne la nöjei wiik, tre, 5 000 la etrun la itre hna bapataison, ene la itretre dreng ka hnyipixe! Ame la itre xaa ka xötrei bapataiso tre, kolo hi lo thangane ka loi qa ngöne la hna catre cainöje hnene la itretre cainöj ka catre ithanata pala hi memine la itre atr ngöne la itre teritoar hna athipe koi angatr. Drei la ketre ewekë ka hamë madrine ka tru kowe la itre ekalesia, nge drei mina fe la ketre madrine ka tru e troa ce huliwa me Akötresie ngöne la huliwa ne iamele cili!—1 Kor. 3:5, 6, 9.
4 Atrune Jë Së La Ëje i Akötresie: Easë a catre cainöje pala hi matre troa atrunyi Iehova e nyipine la itre atr me troa ahmitrötrën la ëje i Nyidrë kowe la itre atr asë. (Heb. 13:15) Hnei Satana hna amenun la “fene hnengödrai asëjëihë” me thele matre tro la itre atr a mekun ka hape, thatreine kö troa nyinyin hnei Akötresie la itre jol ne la fen, nge thaa hnehengazone fe kö Nyidrëti la itre akötre ne la itre atr, maine pena thaa ka mele kö Nyidrë. (Hna ama. 12:9) Jëne la aqane cainöje së, easë hi lai a cilëgöline la nyipici göne la Tretretro së ka lolo e koho hnengödrai. Epi tro pala hi sa catre troa atrune la ëje i Nyidrë—enehila nge uti hë epine palua.—Sal. 145:1, 2.