Itus Ini Tusi Hmitrötr—Nyine Tro Sa Pane Xom Troa Etid
1 Drei kö la madrine së ngöne la easa kapa lo itus Nemene La Nyipi Ini Hna Hamën Hnei Tusi Hmitrötr? ngöne lo Kovasio Ne Distrik, “Loi e Troa Drengethenge Akötresie”! Atraqatr la madrine ne la itre atr ka sine lo porogaram ne Mecixen troa isa kapa la itusi cili. Tune kaa la aqane troa huliwane la itusi ka hnyipixe celë? Troa xom panën ej matre troa etid memine la itre atr. Maine kola troa tro fë e treu Maac, ngo kola ithuecatre kowe la itre ka cainöj troa canga nyiqaane etidi ngön.
2 Itre Atr Ka Etidi Hë: Loi e troa atreine waiewekë la itre trejine ka kuca la itre etid ngöne la itus Atrehmekune me ngöne la boroshür Thele. Troa mekune me axeciëne hnyawa la aqane memine la ijine troa nyiqaane etid ngöne la itusi ka hnyipixe. Maine kolo petre hi a nyiqaane la etid, haawe, ijije hi troa nyiqaane pena hnene la itus ka hnyipixe. Maine nango qea ha hna etid ngöne la itus Atrehmekune, maine jë troa sisedrën hnene la itus Ini Tusi Hmitrötr ngöne la ketre meken ka ihmeku memine la topik hna troa nue pë hë ngöne lo itus hnapan. Maine epuni hë a troa nyipune la itus Atrehmekune, the saze itusi kö ngo nyipune pi pe.
3 Eje hi lai laka, nyimutre catr la itre atr ka troa kepe thangane ka loi qa ngöne la hna etid ngöne la itus Ini Tusi Hmitrötr. Ka lolo catr troa etid memine la itre atr ngöne la itusi celë, ke kola troa xatua angatr me akökötrene trootro la nyipici. Drei la ketre ceitun, ame la itre ka etid ngöne lo boroshür Thele me itus Atrehmekune ngo thaa kökötre kö troa sa xepu me xome la bapataiso, tre, ma ka loi tro angatr a etidi fe jëne la itus ka hnyipixe. Loi e tro la itre keme me thin a xome la itus matre troa amamane hnyawa kowe la itre nekö i angatr la nyipi atrehmekune göne la aja i Akötresie.—Kol. 1:9, 10.
4 Loi e Troa Etid Ngöne La Ketre Itus: Hetrenyi kö la ketre hna amekötin thatraqane la hnainin, matre troa xome la hnaaluene itus thupene la hna etid ngöne la itus Nemene La Nyipi Ini Hna Hamën Hnei Tusi Hmitrötr? Eje hi. Maine kola mama hnyawa laka kola kökötre la hnainin, ngacama hmitr, ngo angeic a amamane la hni ole i angeic kowe la itre hnei angeic hna inin, haawe, loi e troa sisedrën la etid hnene la itus Thili Jë Kowe La Nyipi Akötresie Ka Caas. Easë a mejiune laka tro la itus Ini Tusi Hmitrötr a ketre jiane huliwa ka sisitria nyine tro sa xom matre troa eatrëne hnyawa la hnëqa së, ene la troa inine la itre atr.—Mat. 28:19, 20.