Xatuane Jë La Itre Xan Troa Hane Itre Enehmu i Akötresie
1 Ame enehila, kola inine la itre jë i Iehova kowe la itre atr ka xulu qa ngöne la nöjei nöj asë. (Is. 2:2, 3) Ngo maine kola ajane hnene la itre atr cili troa “wa, nge tha sixele kö [me xomihniahoean]”, nyipi ewekë tro angatr a hnimi Iehova. (Luka 8:15; Mar. 12:30) E paatre kö la ihnimi celë, thatreine jë kö tro angatr a hetrenyi la trenge catre troa cile kowe la itre iajojezine la fen maine troa catre kuca pena la loi. Ame la ka troa xatuane la itre atr troa acatrene la aqane imelekeu i angatr me Iehova, tre, ene la troa akökötrene la aqane wanga atrune angatr la itre thiina i Nyidrë. Xatua angatre jë troa wanga atrune hnyawa fe la itre ithuemacanyi e hnine la itus Approchez-vous de Jéhovah.
2 Tulu i Nyipunie: Troa hetre thangane catre la itre huliwa i epuni thene la itre hnainin. Ame la angatr a öhne laka, ka tru koi nyipunie la aqane imelekeu i epuni me Iehova, me öhne la thangane lai ngöne la mele i epun, ene pe angatre hi a hane thele jë troa eköthe la aqane imelekeu ka tune lai. (Luka 6:40) Eje hi laka, hetre thangane catre kö la tulu hne së hna hamën, hune la itre hne së hna qaja.
3 Ame la ini ka sisitria nyine troa xom hnene la itre keme me thin matre tro la itre nekö i angatr a hnimi Iehova, tre, ene hi lo tulu i angatr. (Deu. 6:4-9) Hnene la lue trefën ka ajan troa hiane hnyawa la itre nekö i nyidro ngöne la nyipici, hna kapa la itre eamo ka loi qaathene la itre keme me thin. Hnene la trahmany hna qaja ka hape: “Ame asë hi la itre atr hnenge hna ithanata memin, tre, angatr asë hi a qaja ka hape, nyipi ewekë catr troa amamai tulu ka loi hnene la itre keme me thin.” Celë hi matre, jëne la aqane eköthe i angatr la mele i angatr, ijije hi tro la itre keme me thine a amamai tulu ka loi kowe la itre nekönatr, ngöne la aliene la hna hape “enehmu i Iehova.”—Iako. 2:23.
4 Thithi Qa Kuhu Hni: Ijije mina fe tro epuni a xatua angatr troa akökötrene la aqane imelekeu i angatr me Iehova, hnene la hna ini angatr troa thithi qa kuhu itre hni angatr. Maine jë troa amamai angatre lo tulu ne thithi Iesu, a tune mine fe lo itre thithi ka nyimutre e hnine la Tusi Hmitrötr. (Mat. 6:9, 10) Troa hetre ini hna kapa hnene la itre nekö i epun memine la itre hnainin, jëne la itre sipu thithi nyipunie. Ame la angatr a drenge fe la itre mekuna i epun, ene pe angatr a atrehmekune fe e cili la itre aliene hni nyipunie memine la aqane hnimi Iehova hnei nyipunie. Xatua angatre jë troa “thithi iele” ngöne la angatr a cile kowe la itre itupath. (Rom. 12:12) Ame ngöne la angatr a hane öhne la iwanakoime i Iehova ngöne la itre ijine angatr a aja ixatua, angatre hi a hane mejiune ju koi Nyidrë me hnimi Nyidrë ceitune me ketre nyipi enehmu.—Sal. 34:8; Fil. 4:6, 7.