Itre Hna Amekötin Kowe La Itre Trejin Ka Cilëne La Itre Hnëqa Ngöne La Icasikeu Ne La Huliwa
Hna nyiqaane ngöne la Huliwa Ne Baselaia celë, troa saze la itre hnëewekë hna xome ngöne la porogarame ne la Icasikeu Ne La Huliwa. Ame la itre hna amekötine me itre nyine amekunën celë, tre, itre ej a troa amexeje hnyawa hmaca lo itre hna qaja ha ngöne lo hna cinyihan ne la Huliwa Ne Baselaia ne Mei 2009, lo hna hape “Aqane Troa Hnëkë Thatraqane La Icasikeu Ne La Huliwa.”
◼ Cainöj: Kola qaja la ketre cainöj hna eköthe hune la itre mekun hna amekötine hë, ngo thaa hna ce ithanatane kö memine la itre atrene la icasikeu. Loi e troa wanga atrune hnene la atre cile fë la cainöj, la itre mekune ka troa xatuane hnyawa la ekalesia.
◼ Troa Ce Ithanatan: Ceitune hi la aqane xomiujine la hnëqa celë memine la kola kuca la Ini ne La Tour de Garde (la Ita Ne Thup), laka, troa nyiqaane me nyipune hnene la itre xaa hnepe mekun, nge kolo pë hë a hnying ngöne la nöjei paragaraf asë. Thaa tro kö la atre xomiujin a qaja atrune pala ha la itre mekun. Maine ijije hi la traem, loi e troa e la itre xötr ka sisitria. Ame la itre paragaraf, e pëkö hna qaja, tre, thaa tro kö a e.
◼ Troa Qeje Mekun: Ketre cainöj hna cile fë, ngo kolo mina fe a hane qeje mekun hnene la itre xaa atrene la icasikeu. Nyipici laka, thaa ketre cainöje hi, ngo thaa hna ce ithanatane asë pena kö.
◼ Itre Iamacany Me Itre Hna Troa Hnyinge Kow: Ame la itre hna amekötine göi troa kuca la ketre iamacany, tre, kolo lai a hape, hnëqa ne la trejine ka cile fë la götrane qa cili troa hnëkëne amë la ketre iamacany; thaa angeice kö la ka troa kuca la iamacany. Ame la itre trejin hnei angeice hna iën troa kuca lai, tre, kolo itre trejin ka macaj nge ka amamai tulu ka lolo; nge maine ijij, loi e tro angeic a canga wai angatr matre troa hnëkëne amë lai iamacany. Thaa loi kö e troa upe la itre atr ka xötrei cainöj maine itre ka thaa macaje kö, troa kuca la iamacany, göi tro hi a aijijë angatr troa cile ngöne la ita ne cainöj; ngo ijije hi tro la itre xan a elone la itre atrene la hnalapa. Loi e tro la itre trejine ka kuca la iamacany a qëmeke kowe la itre atrene la icasikeu. Ame la itre trejin hna hnying kow, tre, loi e tro angatr a qaja la itre mekune i angatr qa ngöne la ita ne cainöj, ngo thaa qa kö ngöne la itre göhnë i angatr. Loi e tro pala hi sa amexeje la itre iamacany memine la itre mekun hna troa qaja ngöne la kola troa hnyingë së. Maine ase hë sasaith la hawa hna sa thatraqane la icasikeu celë, nge nyipi ewekë tro la ketre trejin a ahopatrene la hnëqa i angeic, haawe, thaa tro pi kö angeic a nue pë hë la itre iamacany maine pena lo itre trejin hna troa hnyinge kow. Qëmekene troa iëne la itre trejine ka troa hane sine la hnëqa, loi e tro la itre drikona a ce ithanatane lai memine la kordinatör ne la lapa ne la itre qatre thup maine ketre qatre thupe pena.
Maine hetre hna amekötin ka ketre pengön hna hamëne thatraqane la ketre hnëqa, loi e troa trongëne itre ej. Nyipici laka, tro hë la itre trejin a eköthe hnyawa me “kuca alolone me amekötin” la itre Icasikeu Ne La Huliwa, ke, ase hë qeje pengöne hnyawa e caha hun la nöjei götran ne la icasikeu cili.—1 Kor. 14:40.