Meken 39

Itre Ka Ipië Me Itre Ka Pi Draië

THUPENE la hnei Iesu hna qaja la itre thiina i Ioane bapataiso, nyidrëti a xei pena kowe la nöjei atr ka pi draië nge ka thaa mele nyipici kö, kola cile xötreithi nyidrë. Öni nyidrë, ame la “xöte celë, . . . Ceitun’ eje me nöjei nekönate kola lapa ngöne la hnaitö, me ithahnata me ite sine i angat me hape, Ase hë huni ufi hoho koi nyipunie, ngo tha fiafia kö nyipunie; ase hë huni teije koi nyipunie, ngo tha latesi kö nyipunie.”

Nemene la aliene la trenge ewekë i Iesu? Öni nyidrëti ka hape: “Ke taqa ha Ioane nge tha xeni kö me ij, nge öni angat, ka hape, Angeice la tene demoni. Traqa ha la Nekö i ate kola xeni me ij, nge öni angat, ka hape, Hana wang, la ate pi xen, me pi iji waina, sine la nöjei telona me ite ka ngazo.”

Pëkö ka loi kowe la itre atr. Pëkö hna ajane hnei angatr. Hnei Ioane hna mele hnö ceitune memine la nazirea, me xomihni matre atreine angeice troa trongëne la hna qaja hnene la angela, laka, “thaa tro kö angeice a iji waina me ka hait.” Ngo itre atr a qaja ka hape, hna löthi angeice hnei dremoni. Ame pena ha la Iesu a mele tui angatr, laka, thaa hnei nyidrëti kö hna hnöthe menune pala ha la aqane mele i nyidrë, haawe, itre xane pena ha a jele ngazo nyidrë me mekune ka hape, sasaithi tulu menu pala ha la aqane mele i nyidrë.

Pëkö ka loi kowe la itre atr. Ceitui angatre memine la itre nekönatr, laka, itre xane pe a ufi ihoho, xele kö ma fia, nge ame pena la kola hace, thaa latesi pena kö. Ngo öni Iesu ka hape: “Hna qaja amekötine la inamacane hnene la nöjei huliwa ne ej.” Ngo eje hi, kola amamane hnyawa hnene la itre aqane mel, me itre huliwa i Ioane me Iesu laka, trengathoi a hna atë hui nyidro.

Iesu a qeje ejene la köni traone me jele ngazone itre ej: ene Korazin, me Bethesaida, me Kaperenauma, hnei nyidrëti hna kuca e cili la itre iamamanyikeu ka nyimutre. Öni nyidrëti ka hape, maine hnei nyidrëti ju hna kuca e cili la itre iamamanyikeu cili e Turo me Sidona, tro la itre traone ne fenisia cili a ietra fë la sine watrenge me hnatresij. Iesu a qaja angazonyi Kaperenauma, pine laka kola mekune laka, nyimu ijine nyidrëti a lapa e cili troa cainöj; öni nyidrë: “Tro kö a maloe kowe la nöje Sodoma hui’ ö ngöne la drai ne amekötin.”

Iesu a olene kowe la Tretretro i nyidrë e hnengödrai, pine laka, hnei Akötresieti hna juetrëne la itre nyipici ngöne la ua ka tru alamekene kowe la ka inamacane memine la ka macamek; ngo nyidrëti amamane la itre ewekë ka lolo cili kowe la itre ka ipië, tune la itre medreng.

Thupene lai, Iesu a hëne jë la itre atr me hape: “Trohemi koi ni, nyipunieti asë ange ka huliwa me hace, nge tro ni a amanonyi nyipunie. Xomejë la nyine isilikeunge hui nyipunie me inine theng; ke menyike ni, nge ipië la hning; nge tro nyipunie a öhne la hna mano thatraqane la ite u i nyipunie. Ke uqa la nyine isilikeung, nge maloe la ehnefeng.”

Nemene la aqane iakeukawanyi Iesu? Nyidrëti a thapa la itre atr qa ngöne la ithahluëne la itre ini atr hna sili ehnefë angatre hnene la itre hene hmi, tune lo itre wathebo göi sabath. Nyidrëti fe a amamane la aqane troa öhnyi ixatua hnene la itre hna musinëne angazone hnei itre mus, me itre ka huliwa mekuthethewen, pine la hna kuca la itre ngazo ka tru. Nyidrëti a amamane kowe la itre ka latresi, la aqane troa nue la itre ngazo i angatr, me aqane tro angatre a sile hnyawa la aqane imelekeu i angatre me Akötresie.

Ame la otretre ka menyike hna qaja hnei Iesu, ke ene la troa nue la mele së troa nyihlue i Iehova, Nyidrë Atre ihnimi ipitö, nge Atre nue la itre ngazo së. Nge ame la ehnefe ka hmaloi hna hamëne hnei Iesu kowe la itre atr ka tro koi nyidrë, ke, ene la troa drenge thenge la itre trepene meköti hna hamëne hnei Akötresie, lo itre trenge wathebo i Nyidrë hna cinyihane hnine la Tusi Hmitrötr. Nge thaa ewekë ka hace kö la troa drenge thenge la itre trenge wathebo cili. Mataio 11:16-30; Luka 1:15; 7:31-35; 1 Ioane 5:3.

▪ Pine nemene matre, atreine hi troa aceitunëne me itre nekönatre la xötre ne la hneijine i Iesu, ka pi draië me ka thaa mele nyipici kö?

▪ Pine nemene matre atrune jë Iesu la Tretretro i nyidrë e koho hnengödrai?

▪ Tune kaa la aqane thue ehnefëne la itre atr, nge nemene la aqane akeukawanyi angatre hnei Iesu?