Meken 97
Itretre Huliwa Ngöne La Hnënge Vine
HNEI Iesu hna qaja ka hape: “Ala nyimu angete pa a troa pi, nge ame angete pi, te, pa pena ha.” Iesu a qaja jë la ketre mekune matre troa trotrohnine la hnëewekë celë. “Cei tune la baselaia ne hnengödrai memine la tixene uma, ate löpi e kaqa ne lai troa upe la itete huliwa kowe la hnënge vine i nyidë.”
Nyidrëti a sisedrëne ka hape: “Ce xecië hë e nyidëti me angete huliwa troa isa ca denari ngöne la drai, nyidëti a upi angate kowe la hnënge vine i nyidë. Ame hnei nyidëti hna löpi ngöne la macamekeijö, me öhnyi ite xan’ a icilenyi menu ngöne la hnaitö; öni nyidëti koi angat, ka hape, Ue lae nyipunieti laka icilenyi menu a pexejeju kö la drai? Öni angate koi nyidëti, ka hape, qa ngöne la pëkö ate upi hun. Öni nyidëti koi angat, ka hape, Trojë nyipunieti fe kowe la hnenge vin.”
Iehova Akötresie la tixene uma, ene la atrekë vin, nge nöje Isaraela la vin. Nge ame la itretre huliwa hna upe kowe la hnënge vin, ke, kolo itre atr ka hane sine la isisinyikeu ne la wathebo; ene la angetre Iudra ka mele ngöne la hneijine i anga aposetolo. Kolo hmekuje hi lo itretre huliwa hna upe kowe la drai la hna ce axeciëne la thupen, ene la caa denari ngöne la drai. Qa ngöne laka ame la “macamekeijö,” ke, kola hape 9 heures, haawe, ame la itre hna hëne ngöne la macamekeijö, me hnaipajö, me hnaipajöhej, me hejihej, ke, angatre a isa huliwa a 9 lao hawa, 6 lao hawa, 3 lao hawa, me caa hawa.
Kola nyihatrene la itre hene hmi Iudra hnene la itretre huliwa ka huliwa 12 lao hawa, ene la drai ka pexej, pine laka angatre a catre huliwa pala hi kowe la hmi, thaa ceitu kö me itretre drei Iesu, laka ame ngöne la mele i angatr, ke, tru kö la hnei angatre hna huliwa kowe la nyi ie maine itre xaa huliwa ju kö. Hnene la “tixene uma” hna upi Iesu Keriso troa acaasi angatre matre tro angatre a itretre drei nyidrë, ngöne la ijine li xaji ne macatre 29 M.K. Qa ngöne lai, angatre la angetre “pi,” ene la itretre huliwa e hejihej.
Eje hi laka, kola nyipune la drai ne huliwa hnene la meci Iesu, nge kola traqa la ijine troa nyithupene la itretre huliwa. Thaa ceitune kö memine la hna majemine kuca, kola pane nyithupene la angetre pi. Hanawange la aqane kuca: “Nge ömömë hë, ame hna qaja hnene la tixene la hnënge vine kowe la ate thupë hlapa i nyidë, ka hape, Hënejë la itete huliwa, me hamë angate jë la jun, qane ange hnapine uti hë ange hnapan. Nge traqa ha ange hna upe e hejihej, ame hnei angate hna isa xomi denari. Nge ase hë xom, angat’ a nyi uliline la tixene uma, me hape, Ame ange hnapine lo hna huliwa e hejihej, te, ase fe jë cilieti kuca koi angate ceitune me eëhuni lo itete xomi ka hace ngöne la drai memine la ideuth. Nge nyidëti a sa kowe la kete e angat, ka hape, Sinenge fe, tha qali kö ni koi ’ö; hape u, tha hnei nyisho hna ce axeciëne ngöne la denari? Xomejë la nyi ’ö, nge trojë, qânge kö troa hamëne la hnapine cei tune me eö. Hape u, tha ijije kö koi ni troa kuca la ajange hnene la ite ewekëng? Nge ngazo la inemeke i ’ö ngöne laka ini la ate ham?” Nge Iesu a nyipune me qaja hmaca la hnëewekë celë: “Kete tune lai ame la hnapi, te, troa pa, nge ame la hnapa, te, troa pi pena.”
Ame göi denari, ke, tro pë hë a kapa ej, ngöne la Penetekos ne la macatre 33 M.K., ngöne la ijine tro Keriso, ene lo “ate thupë hlapa,” a troa hamëne la uati hmitrötre hune la itretre drei nyidrë. Hna aceitunëne la itretre drei Iesu me “angete pi,” ene la itretre huliwa ne hejihej. Thaa kolo kö a nyihatrene la ahnahna ne la uati hmitrötre hnene la denari, ngo kolo pe a nyihatrene la ketre ewekë hna troa huliwane hnene la angetre drenge e celë fen, ketre ewekë ka troa aijijë angatre troa kapa la mel, ene la mele i angatre ka thaa ase palua kö. Ketre manathithi troa sine la angetre isaraela ngöne la ua, hna iëne troa cainöjëne la Baselaia i Akötresie.
Ame lo itre hna pane upe troa huliwa, ke, tro hë angatre a öhne laka ase hë nyithupene la itretre drei Iesu, kola öhne qa ngöne laka, kolo ha huliwane la denari ngöne la ua. Thaa hnene kö la itre hna pane upe hna ajane hmekuje la uati hmitrötre me itre hnëqa ne la Baselaia. Hnene la itre mejene wesitre i angatre hna kökötr, ene pe akötrëne ju la itretre drei Iesu, ene la itretre huliwa “hnapine” hna upe kowe la hnënge vin.
Hapeue la ceitune i Iesu, hnene eje hmekuje hna eatre ngöne la hneijine i nyidrë? Ohe, ngöne la hneijine së, ke, hna upe “panëne” la itre hene hmi ka sipu qeje angatre ka hape, itre keresiano kowe la hnënge vine i Akötresie ngöne la ua, jëne la göhmeku i angatr, me itre hnëqa i angatr. Nge Nyidrëti a goeëne la itretre catre tro fë la maca ka loi, ene la itre ka ce huliwa me Société Watch Tower tune la “angetre pi,” ka hetre hnëqane ngöne la huliwa i Akötresie. Ngo, eje hi laka, angatre hi la itre hna methinëne hnene la itre hene hmi, nge angatre fe la itre ka kapa la denari: ene la hnëqa ka tru troa hane tro fë maca nge hna iëne kowe la Baselaia i Akötresie e koho hnengödrai. Mataio 19:30–20:16.
▪ Nemene la hna nyihatrene hnene la vin? Drei la hna nyihatrene hnene la atrekë vin, itretre huliwa ka kuca la 12 lao hawa, me itre ka huliwa caa hawa?
▪ Eue la pune la drai ngöne la götrane la ua, nge eue la ijine hna nyithupe i angatr?
▪ Nemene la hna nyihatrene hnene la kola nyithupene hnei denari?