Meken 122

Thei Pilato Me Heroda

THAA hnei Iesu kö hna tupathe troa juetrëne koi Pilato ka hape, joxu nyidrë, ngo nyidrëti pe a qeje pengöne laka, thaa tro kö a xouene hnene la musi Roma, la Baselaia i nyidrë. Öni nyidrëti ka hape: “Tha qa kö la fene la baselaiang, maine qa la fene la Baselaiang, maine tro ange hluenge a ishi, matre tha tro kö a nue ni koi angete Iuda; ngo enehila tha qa kö la la baselaiang.” Haawe, akönia qaja mekötine Iesu laka, hetre Baselaia i nyidrë, ngo thaa baselaia ne fene kö.

Ngo Pilato a qaja catrëne ka hape: “Nemene nyipë, joxu?” Kösë kola hape, hapeu, joxu eö ngacama thaa qa kö celë fene la baselaia i eö?

Iesu a qaja amamane koi Pilato laka, nyipici la mekune i angeic, öni nyidrëti ka hape: “Eje hi la hnei nyipëti hna qaja, joxu ni. Hna hnaho ni thatraqane lai, nge traqa ni e celë fene thatraqane lai, matre tro ni a anyipicine la nyipici. Ame la nöjei ate ne la nyipici asë, te, angat’ a denge la aqane ewekëng.”

Eje hi laka, ame la aliene la traqa i Iesu e celë fen, ke, ene la troa tro fë la “nyipici,” göne la Baselaia i nyidrë. Cile huti la mekune i Iesu troa trongëne pala hi la nyipici, ngacama troa humuthi nyidrëti pine la ewekë cili. Pilato a hnying, ngo thaa nyipi ewekë kö koi angeice troa qeje pengöne atrun; öni angeice ka hape: “Nemene la nyipici?” Ijije hë la itre mekune nyine troa wai meköti Iesu.

Haawe, Pilato a bëeke hmaca kowe la itre atr ka itreqe e tröne la uma. Nyidrëti a ce cile me Iesu, me qaja kowe la itre tane i angetre huj, me kowe fe la itre atr ka xötrethenge angatr, ka hape: “Tha öhne kö ni la kepine thei angeic.”

Ame hna elëhni hnene la ka ala nyim, nge angatre a qaja catrëne ka hape: “Nyëne la ate azikozikone la nöjei ate, me ini e Iuda asëjëihë qan’ e Galilaia uti hë la.”

Maine jë kola sesëkötre hnei Pilato la aqane pi hune fë mekune ne la angetre Iudra. Kolo pala hi a sue hnene la itre tane i angetre huj, me itre qatr, ene pe ujë jë Pilato koi Iesu me qaja ka hape: “Tha denge kö eö laka a nyimu a ati ewekë eö?” Ngo thaa sa pi kö Iesu. Kola haine hnei Pilato la aqane atreine Iesu xomihnine la itre trenga thoi hna atë hui nyidrë.

Atre hë Pilato laka, atre Galilaia Iesu, haawe, angeice a mekune ka hape, hetre aqane tro angeice a nue la hnëqa i angeic. Pine laka, Heroda Anetipa (nekö i Heroda ka tru), gavena ne Galilaia e Ierusalema göi Paseka, haawe, Pilato a upi Iesu jë koi nyidrë. Thaa nanyi pala kö së qa ngöne lo ijine Heroda a thupa la he i Ioane Bapataiso, nge thupene lai, ame ngöne la nyidrëti a drenge ka hape, hnei Iesu hna hane kuca la itre iamamanyikeu, ene pe traqa ju la qou koi nyidrë, pine laka, kola mekune ka hape, maine jë ame Iesu, ke, Ioane a kola mele hmaca qa hna mec.

Enehila, Heroda a madrine troa iöhnyi me Iesu. Thaa hnene kö laka, nyidrëti a hnehengazone la pengöi Iesu, maine kola ajane pena troa atre maine jë ame la itre hna jele ngazo nyidrëti pin, ke trenge nyipici, maine trenga thoi. Ohe, hnene hmekuje hi la pi atre, nge hnene fe laka, nyidrëti a ajane tro Iesu a kuca la itre xaa hnepe iamamanyikeu.

Ngo thaa hnei Iesu kö hna drenge la aja ka eje e kuhu hni Heroda. Ngo ame la Heroda a hnyinge koi nyidrë, pë pi kö hnei nyidrëti hna sa. Ame hna atraqatre la hmahma i Heroda me itre sooce i angeic, matre angatre a hnyimasai Iesu. Angatre a xetrë nyidrëti jë hnene la ketre iheetre ka wië lolo, me tha ipië nyidrë. Thupene lai, angatre a upi nyidrëti hmaca jë koi Pilato. Ene pe iloi pi hi Pilato me Heroda, nyidro lue ka ithupëjia ekö.

Ame la kola bëeke hmaca hnei Iesu, Pilato a hëne jë la itre tane i angetre huj, me tane i angetre Iuda, memine la nöj, me qaja koi angatre ka hape: “Hnei nyipunie hna tro fë koi ni la ate celë, kösë ate amenune la nöj; nge hana wang, ase hë ni hnyingëne hnyawa angeice qëmeke i nyipunie, ngo pëkö ngazo hna öhne ngöne la ate celë ngöne lo nöjei ewekë hnei nyipunie hna nyi ewekë angeic. Kete pëkö hnei Heroda hna öhn, ke ase hë angeice upi nyidëti koi shë, nge hana wang, pëkö ewekë hna kuca hnei angeice matre ijiji angeice troa mec. Qa ngöne lai, tro ni a thaucë angeic, me nue angeice pi.”

Haawe, alua amamane kö Pilato koi angatre ka hape, pëkö ngazo i Iesu. Ame la nyipi aja i nyidrëti, ke, ene la troa nue gufa Iesu, pine laka, trotrohnine hë nyidrëti ka hape, hnei izalukeu la kola thele hnene la itre tane i angetre huje troa wanaxoeë Iesu. Nge nyidrëti petre kö a thele troa nue gufa Iesu, ene pe traqa pi la ketre ithuemacanyi ka troa upe iele nyidrë. Nyidrëti pala kö ngöne la hnaa kootr, nge kola canga iupi fë hnene la föe i nyidrë la ketre maca, hna hape: “The kuca kö la kete ewekë kowe la ate ka meköti cili; ke nyimu ewekë hnenge hna pu ngazo ngöne la drai celë [pu hna hamëne hnei Akötresie] göi nyidë.”

Atre hi Pilato laka, loi e tro angeice a nue Iesu, ke pëkö ngazo i nyidrë. Ngo troa tune kaa? Ioane 18:36-38; Luka 23:4-16; Mataio 27:12-14, 18, 19; 14:1, 2; Mareko 15:2-5.

▪ Tune kaa la aqane sa Iesu la hnyinge göi musi nyidrë?

▪ Nemene “nyipici” la hnei Iesu hna anyipicine ngöne la mele i nyidrë e celë fen?

▪ Nemene la iameköti Pilato, tune kaa la aqane kapa lai hnene la nöj, nge nemene la hna kuca hnei Pilato koi Iesu?

▪ Drei lae Heroda Anetipa, pine nemene matre madrine catre angeice troa iöhnyi me Iesu, nge nemene la hnei angeice hna kuca göi Iesu?

▪ Pine nemene matre kola ajane catrëne hnei Pilato troa nue gufa Iesu?