Watchtower ONLINE LIBRARY
Ita Ne Thup
ONLINE LIBRARY
Drehu
  • TUSI HMITRÖTR
  • ITRE ITUS
  • ITRE ICASIKEU
  • mwbr18 Semitrepa götrane 1-8
  • Itre Itus Ka Nyitrepene La Mel Me Huliwa Ne Cainöj Pepa Nyine Huliwan

Aucune vidéo disponible pour cette sélection.

Désolé, il y a eu une erreur lors du chargement de la vidéo.

  • Itre Itus Ka Nyitrepene La Mel Me Huliwa Ne Cainöj Pepa Nyine Huliwan
  • Itre Itus Ka Nyitrepene La Mel Me Huliwa Ne Cainöj Pepa Nyine Huliwan—2018
  • Sous-titres
  • 3-9 SEMITREPA
  • ITRE TRENGAMO QA HNINE LA WESI ULA | IOANE 1-2
  • “Pane Iamamanyikeu i Iesu”
  • w15 15/6 4 ¶3
  • Keriso La Mene i Akötresie
  • jy 40 ¶6
  • Pane Iamamanyikeu i Iesu
  • Troa Sine Thel La Itre Mekune Ka Sisitria
  • nwtsty Ithuemacany göi Ioane 1:1
  • nwtsty Ithuemacany göi Ioane 1:29
  • E Tusi Hmitrötr
  • 10-16 SEMITREPA
  • ITRE TRENGAMO QA HNINE LA WESI ULA | IOANE 3-4
  • “Iesu a Cainöj Kowe La Föe Ne Samaria”
  • nwtsty Ithuemacany göi Ioane 4:6
  • Troa Sine Thel La Itre Mekune Ka Sisitria
  • nwtsty Ithuemacany göi Ioane 3:29
  • nwtsty Ithuemacany göi Ioane 4:10
  • E Tusi Hmitrötr
  • 17-23 SEMITREPA
  • ITRE TRENGAMO QA HNINE LA WESI ULA | IOANE 5-6
  • “Xötrethenge Iesu Jë Cememine La Hni Ka Pexej”
  • nwtsty Ithuemacany göi Ioane 6:10
  • nwtsty Ithuemacany göi Ioane 6:14
  • nwtsty Ithuemacany göi Ioane 6:27, 54
  • w05 1/9 21 ¶13-14
  • “Tro Pe Kö Sha Tro Ngöne La Atesiwa i Iehova Akötesi Shë”
  • Troa Sine Thel La Itre Mekune Ka Sisitria
  • nwtsty Ithuemacany göi Ioane 6:44
  • nwtsty Ithuemacany göi Ioane 6:64
  • E Tusi Hmitrötr
  • 24-30 SEMITREPA
  • ITRE TRENGAMO QA HNINE LA WESI ULA | IOANE 7-8
  • “Iesu a Atrune La Keme i nyidrë”
  • cf 100-101 ¶5-6
  • “Ase hë cinyihan”
  • w11 15/3 11 ¶19
  • Tha Tro Kö a Ajojezi Së Hnene La Fen
  • Troa Sine Thel La Itre Mekune Ka Sisitria
  • Pine Nemene Matre Loi e Tro Palahi Sa Nyipici?
  • nwtsty Ithuemacany göi Ioane 8:12
  • E Tusi Hmitrötr
Itre Itus Ka Nyitrepene La Mel Me Huliwa Ne Cainöj Pepa Nyine Huliwan—2018
mwbr18 Semitrepa götrane 1-8

Itre Itus Ka Nyitrepene La Mel Me Huliwa Ne Cainöj Pepa Nyine Huliwan

3-9 SEMITREPA

ITRE TRENGAMO QA HNINE LA WESI ULA | IOANE 1-2

“Pane Iamamanyikeu i Iesu”

(Ioane 2:1-3) Ejë hë e Kana e Galilaia la faipoipo ngöne la drai hnaakönin ; nge e cili la teifenie i Iesu. 2 Nge hna könë Iesu me angete dei nyidë kowe la faipoipo. 3 Nge pe hë waina i angat, ame hnene la teifenie i Iesu hna qaja koi nyidëti, ka hape, Pë hë waina i angat.”

w15 15/6 4 ¶3

Keriso La Mene i Akötresie

3 Hnei Iesu hna kuca la pane iamamanyikeu i nyidrë ngöne lo faipoipo e Kana. Thatre kö së la kepine matre tha ijije ju la waina kowe la nöjei ka traqa. Nyine hmahmane lai kowe la lue trefën, ke qa i nyidro troa hnëkëne la ka ijije kowe la itre hna hën. Maria, thine i Iesu la ketre e angatr. Eahlo a sipo ixatua ju koi Iesu, ke eahlo jë a mekune ka hape, ijiji Iesu hi troa kuca la ka ijij. Eje hi laka, hnei Maria hna mekune hnyawa lo aqane qeje Iesu hnene la itre hna perofetan, nge atre hnyawa hi eahlo ka hape, tro lo a hë nyidrë, ‘Hupuna ne la Kasisitria.’ (Luka 1:30-32; 2:52) Ame la ka mama hnyawa, tre, ene la aja i Maria me Iesu troa xatuane la lue trefën. Celë hi matre, ujëne jë Iesu la 380 lao litë tim koi “waina ka loi.” (E jë la Ioane 2:3, 6-11.) Tha jole i Iesu kö lai troa kuca la iamamanyikeu cili. Ngo ame laka kuca jë nyidrë, tre hnene la etrune la ihnimi nyidrëti kowe la itre atr. Ketre, nyidrëti a nyitipune la aqane ham ne la Tretretro i nyidrë.

(Ioane 2:4-11) Ame hnei Iesu hna ulatine koi nyido, ka hape, Nenë, nemene eapo koi ni ? tha traqa pete kö la ijineng. 5 Ame hnene la teifenie i nyidëti hna qaja kowe la nöjei hlu, ka hape, Ame la ewekë hnei nyidëti hna troa qaja koi nyipunie, kucajë. 6 Nge hna amë e cili la ite ge etë ka cangemene nyine nyihnyawa, thenge la thina i angete Iuda, isa lue me köni bathe la tulun. 7 Öni Iesu koi angat, ka hape, Atiqanejë la nöjei ge hnei tim. Ame hnei angate hna atiqane uti hë la ulan. 8 öni nyidëti koi angat, ka hape, Jöejë enehila, nge xomejë kowe la tane la pui ne xen. Ame hnei angate hna tro fë. 9 Nge ase hë la tane la pui ne xeni deme tupathi la timi hna ujëne mate waina, nge tha’te kö angeice la qa ngön, (ngo ate hë ange hlu angete jöe la tim,) ame hnene la tane la pui ne xeni hna hëne la ate xötei faipoipo,10 me qaja koi angeic, ka hape, Thina ne la nöjei ate troa thawa panane la waina ka loi, nge e ase hë iji atrune, la waina ka ngazo pena ; ngo hnei nyipëti hna amë la waina ka loi uti hë enehila. 11 Celë hi iamamanyikeu hnapane nöi Iesu hna longëtin’ e Kana e Galilaia, me aleuleunyinëti la lolo i nyidë ; ame hnei angete dei nyidë hna lapaune koi nyidë.

jy 40 ¶6

Pane Iamamanyikeu i Iesu

Celë hi pane iamamanyikeu i Iesu. Hna acatren e cili la lapaune ne la itretre drei nyidrë. Thupene lai, hnei nyidrë, me thine i nyidrë me itre trejine me nyidrë hna tro kowe la traon e Kaperenauma, ezine la hnagejë ne Galilaia

Troa Sine Thel La Itre Mekune Ka Sisitria

(Ioane 1:1, MN) Ngöne la qaane la Logo nge thei Akötresieti la Logo nge ketre akötresie la Logo.

nwtsty Ithuemacany göi Ioane 1:1

la Logo: Ame la qene Heleni, tre, ho loʹgos. Ame e celë, hna xom la hnëewekë “Logo” göi troa qaja la götrane qa, ketre tune mina fe ngöne Ioane 1:14 me Hna Amamane 19:13. Hnei Ioane hna amamane ka hape, Iesu la Logo. Hnei Iesu hna xom la aqane hë cili ngöne lo nyidrëti a mel e hnengödrai, me uti kowe la fen troa catre cainöj, me ngöne lo nyidrëti a elë hmaca a tro hnengödrai eë. Iesu hi la qene qaja i Akötresie. Jëne nyidrë, Akötresie a ithanata kowe la itre xa angela, me kowe la itre atr. Celë hi matre, qëmekene tro Iesu a traqa e celë fen, Iehova a ithanata memine la itre atr jëne Iesu, ene la Logo maine qene qaja i Akötresie.—Ge 16:7-11; 22:11; 31:11; Es 3:2-5; Ame 2:1-4; 6:11, 12; 13:3.

thei: Ame la hnëewekë qene Heleni hna hape, pros tre, kola qaja la lue atr ka imajemikeu, maine lue ka epe catr. Kolo fe a amamane laka, isa kö la Logo memine la Akötresie ka cas.

ketre akötesie la Logo [maine “ceitu me haze”]: Iesu “la Logo.” (Wange ju la ithuemacanyi göne la Logo). Tha Ioane kö e celë a qaja ka hape, ame “la Logo” tre, Akötresie. Eje hi laka, kola qaja ngöne la xötr ka hape, “thei Akötresieti la Logo,” matre ala lue nyidro. Hna qeje Iesu ceitu me haze ke, nekön haetra i Akötresie, lo hnei Nyidrëti hna pane xup, nge pine pë hë la itre xa ewekë. Nyimutre la itre Tusi Hmitrötr qene Papale, me qene Wiwi, me qene Alema ka ujëne la mekune cili ka hape, “ketre akötresie la Logo; ka ceitu me haze.” Tune la aqane ujën hnene la Traduction du monde nouveau. Kolo fe a qaja ngöne Kolose 2:9 e qeje Iesu ka hape, “hna angöneteine la tiqa asëjëihë i Akötesie,” maine hetrenyi nyidrë la itre thiina i Akötresieti asë. Hna ujën la hnëewekë qene Heleni hna hape, “ceitu me haze” ngöne la Septante [maine “ketre Tusi Hmitrötr qene Heberu hna ujën kowe la qene Heleni”] qa ngöne la hnëewekë qene Heberu “Akötresie” maine “ceitu me haze.” Ame la aliene lai tre, “Ka trene men; Ka catr.” Ka ihmeku la troa hëne la Logo ka hape, “ceitu me haze,” maine “ka trene men,” memine la hna perofetan ngöne Isaia 9:6 göne la Mesia ka hape, troa hë nyidrë “Akötesiwa ka men” (ngo tha “Akötresie Kapucatinasë”).

(Ioane 1:29) Elanyi angeic’ a goeë Iesu kola jötëti koi angeic, nge öni angeic ; ka hape, Hana wange la Arenio i Akötesie, la ate [xome trije] la ngazo ne la fene hnengödrai.

nwtsty Ithuemacany göi Ioane 1:29

la Arenio i Akötesie: Thupene la kola bapataiso Iesu, me tupathi nyidrë hnei Diabolo, hnei Ioane Bapataiso hna hë nyidrë ka hape, “Arenio i Akötesie.” Alua qaja lai ngöne la Tusi Hmitrötr, e celë me ngöne la tusi Ioane 1:36. (Goeëne ju la Itre Hna Egöhagen. A7.) Tha ka ngazo kö e troa aceitunë Iesu me arenio (maine mamoe). Ame ngöne la Tusi Hmitrötr, hna majemine huujëne la itre mamoe matre troa ietran la itre ngazo, me easenyi koi Akötresie. Kola nyihatrene la mel ka pexej hna troa huujëne hnei Iesu thatraqane la itre atr. Kola mama la hnëewekë “Arenio i Akötesie” ngöne la itre xa götrane la Itre Hna Cinyihan. Pine laka, atrepengöne hnyawa hi Ioane Bapataiso la Itre Hna Cinyihan Qene Heberu, angeice jë a amexeje: lo mamoe trahmanyi hnei Aberahama hna huujën, ngo tha Isaka kö (Ge 22:13), la mamoe ne la Paseka hna humuth e Aigupito matre troa thupëne la angetre Isaraela qëmeken troa thapa angatr qa cili (Es 12:1-13), maine pena lo mamoe trahmanyi hna huujëne koi Akötresie ngöne la ita ne huuj e Ierusalema, e hmakanyi me e hej (Es 29:38-42). Maine jë, Ioane a mekun lo hna perofetan hnei Isaia, ngöne la Iehova a hëne ‘la hlue’ i Nyidrë ka “tune la nekö i mamoe troa humuth.” (Isa 52:13; 53:5, 7, 11) Ame la Paulo aposetolo a cinyihane lo pane tusi angeic kowe la angetre Korinito, öni angeic e qeje Iesu ka hape, “paseka shë, ene Keriso.” (1Ko 5:7) Hnei Peteru aposetolo hna qaja “la madra i Keriso ka tru alameken, tune la nekö i mamoe ka pë engazone me ethan.” (1Pe 1:19) Ame ngöne la tusi Hna Amaman, a 25 lao hë Iesu ka hape, “la Arenio.”—Itre xa ceitun: Ama 5:8; 6:1; 7:9; 12:11; 13:8; 14:1; 15:3; 17:14; 19:7; 21:9; 22:1.

E Tusi Hmitrötr

(Ioane 1:1-18) Ngöne la qane la Logo nge thei Akötesieti la Logo nge Akötesieti la Logo. 2 Nyidëti thei Akötesie ngöne la qan. 3 Hnei anganyidëti hna xupe la nöjei ewekë asëjëihë, nge pëkö ewekë hna xupe lo tha hna xupe hnei nyidë. 4 Thei nyidëti la mel ; nge ame la mele, te, lai ne la ate. 5 Nge kola wië la lai ngöne la jid ; ngo tha hna kapa kö hnene la jid. 6 Hnei Akötesieti hna upe la ate, Ioane la ëjen. 7 Traqa ha angeice nyine anyipicin, mate troa anyipicine la lai, mate lapaune la nöjei ate asë jëne angeic, 8 Tha angeice kö la lai cili, ngo loi pe, nyine anyipicine la lai. 9 Celë nyipi lai, ene la ate alaine la nöjei ate asë ka traqa e celë fen. 10 Qa i anganyidëti hë la fene hnengödrai, nge hnei nyidëti hna xupe la fene hnengödrai, ngo tha ’te nyidëti kö la fene hnengödrai. 11 Hlepëti hë anganyidë kowe la zi nyidë, ngo tha kepe nyidëti kö hnene la ite sine i nyidë. 12 Ngo ame la angete kepe nyidë, me lapaune kowe la atesi nyidë, hnei nyidëti hna hamë angate la mene mate ite nekö i Akötesieti hë. 13 Nge tha hna hnaho angate kö qa ngöne la madra, nge kete tha qa kö ngöne la aja i ngönetei, nge kete tha qa kö ngöne la aja i at ; ngo celati thawai Akötesie. 14 Hna angöneteine la Logo, nge nyidëti a hunuma the shë, (nge öhne hë huni la lolo i nyidë, ene la lolo ne la Hupuna ka utiwati ne la Tetetro,) tiqa ha hnei tenge ihnimi gufa me nyipici. 15 Ioane a anyipici nyidë, me qaja catën, ka hape, Dei lai nyidëti la hnenge hna qaja, ka hape, Kola tropi hutrönge la ate ka sisitia hung ; ke hna pa i anganyidë, nge pinge pe. 16 Hetenyi asë hë shë la ihnimi gufa hune la ihnimi gufa qa ngöne la tiqa i nyidë. 17 Hna hamëne la wathebo jëne Mose, ngo hna jëne Iesu Keriso la ihnimi gufa memine la nyipici. 18 Pa palua kö ate hna goeë Akötesie ; ngo ame la Hupuna ka utiwatin, nyidëti ngöne la imano ne la Tetetro, hnei nyidëti hna amamai anganyidë.

10-16 SEMITREPA

ITRE TRENGAMO QA HNINE LA WESI ULA | IOANE 3-4

“Iesu a Cainöj Kowe La Föe Ne Samaria”

(Ioane 4:6, 7) E cili la ani Iakobo. Iesu a munëti hune la an, ke kucakuca hna jötë, nge hnaipajö hë. 7 Kola traqa la kete föe ne Samaria troa tha an ; ame hnei Iesu hna ulatine koi nyido, ka hape, Thue imeng.”

nwtsty Ithuemacany göi Ioane 4:6

kucakuca: E cili hi la hna qaja e hnine la Tusi Hmitrötr ka hape, ka “kucakuca” Iesu. Kolo ha traqa koi 12h e hnaipajö, nge hnei Iesu hna trongë ihnadro qa ngöne la hneopegejë ne Ioridriano e Iudra utihë e traqa ngöne la traon e Sikara e Samaria. Ketre gojenyi lai ka elëelë, nge ka sasaith la 900 lao metr.—Ine 4:3-5; goeëne ju la Itre Hna Egöhagen. A7.

(Ioane 4:21-24) Iesu a ulatine koi nyido, ka hape, Fö, lapau ni ju, laka tro ha traqa la ijine tha tro kö nyipunie a hmi kowe la Tetetro ngöne la wete celë, nge kete pëkö e Ierusalema. 22 Tha ’te kö nyipunie la hnei nyipunie hna hmi kow, ngo ate hë huni la hne huni hna hmi kow ; ke qa thei angete Iuda la iamele. 23 Nge tro ha traqa la ijin, nge dei ha la, e tro la nöjei ate nyipi hmi a hmi kowe la Tetetro ngöne la u me nyipici, ke Tetetroti a thele la ite ka tune lai troa hmi koi nyidë. 24 Ua la Akötesie ; nge qâ i angete hmi koi nyidëti troa hmi ngöne la u me nyipici.

(Ioane 4:39-41) Ala nyimu la angete Samaria hna lapaune koi nyidëti ngöne la lapa cili ngöne la hnepe ewekë hnei föe hna qaja, ka hape, Hnei nyidëti hna cengöne ulatine koi ni la nöjei ewekë asëjëihë lo hnenge hna kuca. 40 Traqapi hë angete Samaria koi nyidë, ame hnei angate hna sipo nyidëti troa ce munëti me angat ; ame hnei nyidëti hna munëti e cili a lue pui. 41 Kösaue fe la nöjei ate hna lapaune ngöne la wesiula i nyidëti kö ;

Troa Sine Thel La Itre Mekune Ka Sisitria

(Ioane 3:29) Ame la ate hmalan, angeice la ate xötei faipoipo ; ngo ame la sine ne la ate faipoipo, te, kola cile dei angeice, me madine atraqate qa ngöne la aqane ewekë ne la ate xötei faipoipo ; tune la madinenge a eatë hë.

nwtsty Ithuemacany göi Ioane 3:29

la sine ne la ate faipoipo: Ame ekö, tro la ketre sinee ne la atre faipoipo a qene qaja i angeic, me hnëkëne la faipoipo. Angeic la ka kuca matre troa itronyi la lue ka troa faipoipo. Ame ngöne la drai ne faipoipo, tro la lue ka faipoipo a tro kowe la hnalapa hna hnëkën, thei trahmany, maine thene la keme i angeic. Ame ngöne la ijine kola xeni nyikein, madrine catr la sinee ne la atre faipoipo la kola dreng la trahmanyi a ithanata kowe la föe, ke, ase hë angeic eatrëne la hnëqa i angeic. Hnei Ioane Bapataiso hna aceitunë angeic memine “la sine ne la ate faipoipo.” Ame e celë, Iesu la atre faipoipo, nge ame la itre hna iën tre, angatre hi la föi nyidrë. Hnei Ioane hna hnëkëne la gojenyi kowe la Mesia, hnei angeic hna amamane la itre ka troa pane nyiatrene la “jajinyi tepu” i Iesu Keriso. (Ine 1:29, 35; 2Ko 11:2; Ef 5:22-27; Ama 21:2, 9) Tune “la sine ne la ate faipoipo,” ase hë Ioane eatrëne la hnëqa i angeic, matre tha nyipiewekë hmaca kö angeic hui Iesu memine la itretre drei nyidrë. Öni Ioane e qeje angeice kö me Iesu ka hape: “Tro pala kö nyidëti a kököt, ngo tro kö ni a co.”—Ine 3:30.

(Ioane 4:10) Iesu a wetë koi nyidoti, me hape, Maine ate hë nyipo la ahnahna i Akötesie memine la ate qaja koi nyipo, ka hape, Thue imeng, maine ase hë nyipo sipo angeic, nge maine ase hë angeice hamë nyipo la ani ka mel.”

nwtsty Ithuemacany göi Ioane 4:10

ani ka mel: Ame ngöne la qene Heleni, kola qaja la timi ka neni, maine tim hna kuj, maine an ka tro qa ngöne la tim ka qeqe. Tha ceitune kö lai memine la tim e hnine la isima. Ame la hnëewekë qene Heberu ngöne Levitiko 14:5 koi “timi ka lualai,” tre, hna hape, “tim ka mel.” Ame ngöne Ieremia 2:13 me 17:13, hna qeje Iehova ka hape “timi ne mele ka qeqe,” maine tim ka hamën la mel. Ame la Iesu a ithanata kowe la föe ne Samaria, hnei nyidrëti hna qaja la “ani ka mel,” maine tim ka mel, ngo kösë hnei eahlo hna mekun ka hape, nyidrëti a qaja la nyipi tim.—Ine 4:11; goeëne ju la ithuemacany göi Ioane 4:14.

E Tusi Hmitrötr

(Ioane 4:1-15) Nge hnaeatinë hë hnei Joxu la hnei angete faresaio hna denge, laka ala nyimu la angete denge hnei Iesu hna thenge me bapataison, nge xalaithe hnei Ioane ; 2 (ngo tha hnei Iesu hna bapataison, loi pe hnei angete dei nyidë ; ) 3 ame hnei nyidëti hna nue pe e Iuda, me jötëti hmaca Galilaia eë. 4 Nge ijije tro nyidëti a ithuëti nyipin’ e Samaria. 5 Hlepëti hë nyidëti ngöne la kete lapa e Samaria, Sikara la ëjen, eashenyi ne la hnepa dro hnei Iakobo hna hamëne kowe la nekö i angeice Iosefa. 6 E cili la ani Iakobo. Iesu a munëti hune la an, ke kucakuca hna jötë, nge hnaipajö hë. 7 Kola traqa la kete föe ne Samaria troa tha an ; ame hnei Iesu hna ulatine koi nyido, ka hape, Thue imeng. 8 (Nge koilo hë angete dei nyidë kowe la lapa troa itö xen.) 9 Ame hnene la föe ne Samaria hna qaja koi nyidëti, ka hape, Ue lae cilieti ate Iuda a sipo timi theng, nge föe ne Samaria kö ni ? Ke tha itete me sinene kö angete Iuda me Samaria. 10 Iesu a wetë koi nyidoti, me hape, Maine ate hë nyipo la ahnahna i Akötesie memine la ate qaja koi nyipo, ka hape, Thue imeng, maine ase hë nyipo sipo angeic, nge maine ase hë angeice hamë nyipo la ani ka mel. 11 Önine la föe koi nyidëti, ka hape, Joxu, pëkö nyine tha thei cilie, nge jui la an, nge qa kö ka la ani ka mele i cilie ? 12 Hape u, tru cilieti hui Iakobo ame la xötapane hun, ate hamë huni la an, nge ime i nyidëti lai, me ite nekö i nyidë, me ite si nyidë ? 13 Iesu a wetë koi nyido, ka hape, Tro ha pi iji hmaca la angete iji la ani celë ; 14 ngo ame la ate iji la ani hnenge hna troa hamë angeic, te, tha pi iji hmaca kö epine palua ; ngo ame la ani hnenge hna troa hamë angeic, tro ha eje e kuhu hni angeice la ani kola qeqeqeqe kowe la mele ka tha ase palua kö. 15 Ame hnene la föe hna qaja koi nyidëti, ka hape, Joxu, hamë ni pi la ani cili, mate tha pi iji hmaca kö ni, nge mate tha hmaca kö ni kowe la troa tha an.

17-23 SEMITREPA

ITRE TRENGAMO QA HNINE LA WESI ULA | IOANE 5-6

“Xötrethenge Iesu Jë Cememine La Hni Ka Pexej”

(Ioane 6:9-11) Dei lai thöthi tene areto bali ka tripi me lue nene i ; ngo troa tune ka kowe la ka ala nyimu ? 10 Nge Iesu a ulatin, ka hape, Alapaneju la nöjei ate. Atraqate la hnënge haö e cili. Ame hna ilapanyiju la nöjei ate kösë tripi lo tha thausane la emanan. 11 Ame hnei Iesu hna xolomëtine la ite areto, nge ase hë nyidëti olen, nyidëti a thawapi koi angete ilapanyi, nge kete tune la lue nene i, thenge la aja i angat.

nwtsty Ithuemacany göi Ioane 6:10

me hna ilapanyiju la nöjei ate kösë tripi lo tha thausane la emanan: Mataio hmekuje hi la ka qaja ka hape, “tha hna e fe kö la ite föe me nekönat” ngöne la kola amexeje la iamamanyikeu cili. (Ma 14:21) Maine jë, ase hë sasaith la 15 000 lao atr hna thuan hnei Iesu ngöne la ijine cili.

(Ioane 6:14) Nge öhnë hë hnene la nöjei ate la iamamanyikeu hnei nyidëti hna kuca, ame hnei ate hna qaja, ka hape, Nyipici celë hi perofeta hna qaja tro ha uti kowe la Fen.

(Ioane 6:24) ame hna goeëne hnene la ka ala nyimu laka pate kö Iesu e cili me angete dei nyidë, ame hnei angate hna të hune wege he me ea Kaperenauma eë troa thele Iesu.

nwtsty Ithuemacany göi Ioane 6:14

perofeta: Alanyimu la angetre Iudra ngöne la ijine cili ka treqene la perofeta hna qaja ngöne Deuteronomi 18:15, 18, ka ceitu me Mose, ke, ame koi angatr, nyidrëti hi la Mesia. Ame la hnëewekë hna hape, uti kowe la Fen e celë, kola qaja la hna mekun hnene la itre atr göne la pengöne la Mesia. Ioane hmekuje hi la ka amexeje la ewekë ka traqa ngöne la xötre celë.

(Ioane 6:25-27) Nge öhnyi nyidëti hë hnei angate ngöne la kete götrane la hneopegejë, Öni angate koi nyidëti ka hape, Rabi hlepëti hë cilieti e celë eu ? 26 Iesu a wetëti koi angat, ka hape ; Nyipici, nyipici, ini a qaja koi nyipunie, tha thele ni kö hnei nyipunie qa ngöne la hna goeëne la ite iamamanyikeu, ngo ngöne la hnei nyipunie hna hane xeni areto a mejiju kö. 27 The huliwa kö thatraqane la xeni ka troa hnyeqet, ngo loi pe la xeni ka hungë uti hë la mele ka tha ase palua kö, la hna troa hamëne hnei Nekö i ate koi nyipunie ; ke hnei Akötesie Tetetro hna acatenyi angeic.

(Ioane 6:54) Ame la ate xeni la ngöneteing, me iji la mada hetenyi hë angeice la mele ka tha ase palua kö ; ngo tro ni a acilë angeice jë ngöne la drai hnapin.

(Ioane 6:60) Dengë hë hnei angete dei nyidëti ka ala nyimu, angate a qaja, ka hape, Hace la tenge ewekë cili ; nge dei la ate ateine troa deng?”

(Ioane 6:66-69) Qa ngöne lai, ala nyimu la angete dei nyidëti a hmaca pe, tha ce tro hmaca kö me nyidë. 67 Ame hnei Iesu hna ulatine kowe la ala luako, ka hape, Aja i nyipunieti fe troa hmaca ? 68 Ame hnei Simona Peteru hna sa koi nyidëti, ka hape, Joxu, ithuëti nyihunieti koi deti ? thawai cilieti la nöjei wesi ula ne shewengönie ka tha ase palua kö. 69 Nyihunieti a lapaun, me wangate hmekune laka cilieti la Keriso la Hupuna i Akötesie ka shewengönie.

nwtsty Ithuemacany göi Ioane 6:27, 54

la xeni ka troa hnyeqet . . . la xeni ka hungë uti hë la mele ka tha ase palua kö: Hnei Iesu hna öhne laka, hetre atr ka xötrethenge nyidrë me itretre dreng, göi thupen. E nöjei drai, itre atr a xen matre troa mel, ngo ame “la xeni” hne së hna kapa qa ngöne la Wesi Ula i Akötresie, kola aijijë së troa mel epine palua. Iesu a thuecatrene la itre atr troa huliwa . . . thatraqane “la xeni ka hungë uti hë la mele ka tha ase palua kö,” ene la troa acatrene la aqane imelekeu i angatr me Iehova, me lapaun kowe la hnei angatr hna inin.—Ma 4:4; 5:3; Ine 6:28-39.

xeni la ngöneteing, me iji la mada: Kola mama ngöne la itre xötr ka tro pa me ka tro pi laka, ame la itre ka xen me ij, tre, kola qaja la itre ka lapaune koi Iesu Keriso. (Ine 6:35, 40) Iesu a qaja la trengewekë celë lo macatre 32 M.K., matre tha nyidrëti kö a qaja La Heji Ne Pui Ne Xeni Ne La Joxu, lo hnei nyidrëti hna troa acil la macatre thupen. Nyidrëti a qaja lai ngöne lo ijin qëmekene la “paseka, kete ne pui xeni angete Iuda” (Ine 6:4), matre hnene la itre ka drei nyidrë hna mekun lo pui ne xen hna troa atrun, memine la aliene la madra ne la mamoe ka amelene la angetre Isaraela e Aigupito (Es 12:24-27). Iesu e cili a qaja la enyipiewekëne la madra i nyidrë, madra ka troa xatuane la itretre dreng troa hetrenyi la mel ka tha ase palua kö.

w05 1/9 21 ¶13-14

“Tro Pe Kö Sha Tro Ngöne La Atesiwa i Iehova Akötesi Shë”

13 Ngo, kola thel agö Iesu, me itretre dreng hnene la ka alanyim. Öni Ioane, hnei angatr hna ithel utihë “ngöne la kete götrane la hneopegejë.” Pine nemene matre angatr a thele nyidrë, nge xele pe nyidrë ma joxu i angatr? Alanyimu thei angatr ka waiewekë tui atr, angatr a qaja la aqane thuane Iehova la itre xötrapane i angatr ngöne la hnapapa lo ijine i Mose. Ame koi angatr, loi e tro Iesu palahi a ithua i angatr. Hnei Iesu hna öhne la ewekë ka ej e kuhu hni angatr, matre hnei nyidrëti hna ini angatr la itre nyipici ka troa xatua angatr troa wenëamekötine la itre mekune i angatr. (Ioane 6:17, 24, 25, 30, 31, 35-40) Ngazo pe, alanyimu thei angatr ka qeje gele nyidrë pine qaja nyidrë la ceitun, kola hape: “Nyipici, nyipici, ini a qaja koi nyipunie ; maine tha xeni kö nyipunie la ngönetei ne la Nekö i ate, me iji la madra i angeic’ tha hetenyi kö la mele e kuhu ite hni nyipunie. Ame la ate xeni la ngöneteing, me iji la mada hetenyi hë angeice la mele ka tha ase palua kö ; ngo tro ni a acilë angeice jë ngöne la drai hnapin.”—Ioane 6:53, 54.

14 Jëne la itre ceitun, Iesu a thel matre tro la itre atr a amamane ka hape, aja i angatr troa ce tro me Akötresie. Celë hi matre, amexeje jë nyidrëti la ceitune celë. Kola mama e cili la aliene hni angatr. Önine la xötr: “Dengë hë hnei angete dei nyidëti ka ala nyimu, angate a qaja, ka hape, Hace la tenge ewekë cili ; nge dei la ate ateine troa deng ?” Hnei Iesu hna upi angatr troa trotrohnine la itre trengewekë i nyidrë ngöne la götrane la u. Öni nyidrë: “Ate iamele la u ; ngo tha nyipi ewekë kö la ngönetei ; ame la nöjei tenge ewekë hnenge, hna qaja koi nyipunie, celë hi u me mel.” Ngo, alanyimu thei angatr ka xele ma drei nyidrë, nge Tusi Hmitrötr a hape: “Qa ngöne lai, ala nyimu la angete dei nyidëti a hmaca pe, tha ce tro hmaca kö me nyidë.”—Ioane 6:60, 63, 66.

Troa Sine Thel La Itre Mekune Ka Sisitria

(Ioane 6:44) Pëkö ate ateine tro koi ni, e tha hna e angeice kö hnei Tetetro ate upi ni ; nge tro ni a acilë angeice jë ngöne la drai hnapin.

nwtsty Ithuemacany göi Ioane 6:44

hna e angeice: Ame la hnëewekë qene Heleni hna hape, “e” tre, kola qaja la ketre eötr hna nue e kuhu hnagejë matre tro la itre ie a jötre ngön (Ine 21:6, 11). Ngo, tha kolo kö lai a qaja ka hape, Akötresie a hulecopene la itre atr, nge tha aja i angatre pe. Ame la hnëewekë celë, tre, kolo fe a qaja la troa “eatrongën.” Maine jë, Iesu a amexeje la hna qaja ngöne Ieremia 31:3, ngöne la Iehova a ithanata kowe la nöje i Nyidrë ekö, me hape: ‘Hnenge hna e eö koi ni hnene la ihnim.’ (Casi hi la hnëewekë hna xom ngöne la Septante.) Ioane 12:32 a amamane ka hape, Iesu fe a ea tune lai la itre atr asë koi nyidrë. Tusi Hmitrötr a qaja ka hape, hnei Iehova hna nue la itre atr troa isa axecië mekun. Maine aja së troa nyihlue i Nyidrë, isa qanyi së kö. (De 30:19, 20) Akötresie a ea trootro la itre ka hetre hni ka ajan koi Nyidrë. (Sa 11:5; Ed 21:2; Hu 13:48) Nyidrëti a kuca lai jëne la maca ne la Tusi Hmitrötr, me jëne la uati hmitrötr. Ame la hna perofetan hnei Isaia 54:13, ka mama ngöne Ioane 6:45, kola qaja la itre hna eatrongëne hnei Iehova.—Xome jë fe la Ioane 6:65.

(Ioane 6:64) ngo tha lapaune kö ite xan’ e nyipunie. Qa ngöne la qâne ate kö Iesu la angete tha lapaune kö memine la ate tro ha wanaxoeë nyidë.

nwtsty Ithuemacany göi Ioane 6:64

ate kö Iesu . . . la ate tro ha wanaxoeë nyidë: Iesu a qeje Iudra Isakariota. Hnei Iesu hna thith ngöne la jidr ka pexej qëmekene troa iëne la 12 lao aposetolo. (Lu 6:12-16) Celë hi matre, ka mele nyipici Iudra ngöne la qaan. Ngo, ka atre hnyawa hi Iesu la Itre Hna Cinyihan Qene Heberu, matre tha sihngödri kö koi nyidrë laka, troa wanaxoeë nyidrë hnene la ketre sinee i nyidrë. (Sa 41:9; 109:8; Ine 13:18, 19) Pine laka, atreine hi Iesu e ngöne la itre hni me mekun, canga mama hi koi nyidrë laka, Iudra a nyiqaane nanazij. (Ma 9:4) Ketre, ijiji Akötresie troa atre la itre ewekë ka troa traqa, matre atre hi Nyidrë laka, tro la ketre sinatronge i Iesu a wanaxoeë nyidrë. Ngo, tha ijije kö tro sa qaja ka hape, Iudra hi lo atr ka troa tria, kösë ase hë qaja amë hë, ke, tha ka ihmeku kö lai memine la itre thiina i Akötresie.

ngöne la qâne: Tha kolo a qaja e celë lo ijine kola mala Iudra, maine thupene lo Iesu a thith ngöne la jidr ka pexej, me ië angeic troa hane aposetolo. (Lu 6:12-16) Kolo pe a qaja lo kola nyiqaane cia e kuhu hni Iudra la aja ka ngazo, nge hna canga mama hi koi Iesu. (Ine 2:24, 25; Ama 1:1; 2:23; wange ju fe Ioane 6:70; 13:11.) Kolo hi lai a amamane ka hape, tha hnei Iudra kö hna wanaxoeë Iesu ke, hna aca saze la mekuna i angeic, ngo ekö hë angeic mekun troa ujë tune lai. Ame la aliene la hnëewekë hna hape, “ngöne la qâne” (Qene Heleni, ar·kheʹ) ngöne la Itre Hna Cinyihan Qene Heleni tre, loi e tro sa trotrohnine thenge la itre xötr ka tro pa me ka tro pi. Ame ngöne 2 Peteru 3:4, “ngöne la qane” a qaja lo kola nyiqaane xup la nöjei ewekë. Ngo, tha aqane qaja kö la hnëewekë celë ngöne la itre xa xötr. Hnei Peteru hna qaja ka hape, hna hamëne la uati hmitrötr kowe la angetre ethen “tune koi eëshë ngöne la qan.” (Ite hu 11:15) Tha Peteru kö a qaja lo ijine mala angeic, maine ngöne la kola ië angeic troa aposetolo. Kolo pe a qaja lo drai ne Penetekos macatre 33 M.K., kolo “qan,” lo angatr a xötrei kapa la uati hmitrötr troa kuca la ketre huliwa ka sisitria. (Ite hu 2:1-4) Kolo fe a saze la aliene la hnëewekë “ngöne la qan” ngöne Luka 1:2; Ioane 15:27; me 1 Ioane 2:7.

E Tusi Hmitrötr

(Ioane 6:41-59) Nge angete Iuda a nyi ulili nyidë, qa ngöne la hnei nyidëti hna uIatin, ka hape, Ini la areto hna uti qa hnengödrai. 42 Öni angat, ka hape, Hape u, tha Iesu kö lai lo nekö i Iosefa, lo keme me thine i angeice hne shë hna ate ? hna tune ka laka qaja hnei angeic, ka hape, Hnenge hna uti qa hnengödrai ? 43 Qa ngöne lai Iesu a wetë koi angat, ka hape, The nyi ulili kö nyipunie. 44 Pëkö ate ateine tro koi ni, e tha hna e angeice kö hnei Tetetro ate upi ni ; nge tro ni a acilë angeice jë ngöne la drai hnapin. 45 Hna cinyihane ngöne la ite tusi ange perofeta, ka hape, “Troa ini angate asë hnei Akötesie.” Nge kola tro asë koi ni la nöjei ate denge qa thei Tetetro, me hna inin, 46 Pëkö ate goeë Tetetro, ngo loi pe angeice qa thei Akötesie, hnei angeice hna goeëne la Tetetro. 47 Nyipici, nyipici, ini a qaja koi nyipunie, ka hape, ame la ate lapaune koi ni, te, hetenyi angeice la mele ka tha, ase palua kö. 48 Ini hi la areto ne mel. 49 Hna xeni mana ngöne la hnapapa hnene la ite xötapane i nyipunie nge meci kö angat. 50 Dei la areto hna uti qa hnengödrai, laka e xeni hë hnei ate, te, tha tro kö angeic’ a mec. 51 Ini hi la areto ka mele hna uti qa hnengödrai ; maine xenijë hnei kete ate la areto celë, tro ha angeic’ a mele epine palua ; nge ame la areto hnenge hna troa hamëne, celë hi ngöneteing, nyine mele ne la fene hnengödrai. 52 Ame hna iwatratra angete Iuda, ka hape, Ateine tune ka la ate celë troa hamë shë la ngönetei i angeice nyine xen ? 53 Iesu a ulatine koi angat, ka hape, Nyipici, nyipici, ini a qaja koi nyipunie ; maine tha xeni kö nyipunie la ngönetei ne la Nekö i ate, me iji la madra i angeic’ tha hetenyi kö la mele e kuhu ite hni nyipunie. 54 Ame la ate xeni la ngöneteing, me iji la mada hetenyi hë angeice la mele ka tha ase palua kö ; ngo tro ni a acilë angeice jë ngöne la drai hnapin. 55 Ke nyipi xeni la ngöneteing ; nge nyipi mele la madrang. 56 Ame la ate xeni la ngöneteinge, me iji la madrang, angeic’ a lapa e kuhu hning, nge ini pena e kuhu hni angeic. 57 Hnei Tetetroti ka mele hna upi ni, nge ini a mele qa thei Tetetro ; kete tune la ate xeni ni, tro ha angeic’ a mele qa theng. 58 Dei lola areto hna uti qa hnengödrai ; tha tune kö la ite xötapane hna xeni mana, nge meci kö ; tro ha mele palua la ate xeni la areto celë. 59 Hnei nyidëti hna ulatine la nöjei ewekë cili ngöne la sunago, e kola ini e Kaperenauma.

24-30 SEMITREPA

ITRE TRENGAMO QA HNINE LA WESI ULA | IOANE 7-8

“Iesu a Atrune La Keme i nyidrë”

(Ioane 7:15-18) Ame hnei angete Iuda hna hain me hape, Ate hnei dei la ate celë la tus, nge tha hna inine kö ? 16 lesu a wetëti koi angat, ka hape, Tha qa kö thenge la ining, ngo qa thei nyidëti ate upi ni. 17 Maine ajane kete ate troa kuca la aja i nyidë, tro ha angeic’ a ate hmekune la hna inin, maine qa thei Akötesie, maine ini a qaja qa kö theng. 18 Ame la ate qaja qa thei angeice kö angeic’ a thele la nyine atrunyi angeice kö ; ngo ame la ate thele troa atrune la ate upi angeic, nyipici angeic, nge pëkö thina ka tha meköti kö thei angeic.

cf 100-101 ¶5-6

“Ase hë cinyihan”

5 Aja i Iesu tro sa atre ka hape, qaathei drei la maca hnei nyidrëti hna tro fë. Öni nyidrë: “Tha qa kö thenge la ining, ngo qa thei nyidëti ate upi ni.” (Ioane 7:16) Öni nyidrëti fe: “Tha kuca xanëne kö ni la kete ewekë, ngo ame lo hnei Tetetroti hna ini ni, te, celë hi hnenge hna qaja.” (Ioane 8:28) Öni nyidrëti hmaca jë e ketre ijin ka hape: “Tha qaja xanëne kö ni la nöjei ewekë hnenge hna qaja koi nyipunie, ngo Tetetroti e kuhu hning’ a kuca la nöjei huliwa i nyidë.” (Ioane 14:10) Ketre, nyidrëti a amexeje lapan la itre xötre ne la Tusi Hmitrötr.

6 Kola mama ngöne la itre trengewekë i Iesu ka hape, hnei nyidrëti hna amexeje utihë la sine la Itre Hna Cinyihan Qene Heberu. Tro sa mekune laka, tha ka tru kö lai, maine ju, tro nyidrëti a qaja asë la aliene la Itre Hna Cinyihan ke, köni macatre i nyidrë e celë fen a cainöj. Ngo, kola mekun laka, hnei nyidrëti hna amexej asë la aliene la Itre Hna Cinyihan Qene Heberu, ke, tha hna amë asë kö la itre hnei Iesu hna kuca, me qaja e hnine la Tusi Hmitrötr. (Ioane 21:25) Itre hawa hi hne tro epuni a xom, matre troa e asë la itre hnei Iesu hna qaja ngöne la itre evangelia. Ngo, pane mekune jë laka, tro epuni a qeje Akötresie, me Baselaia i Nyidrë ngöne la ijine ka xoxopatre hi, nge loi e tro epuni a amexej la itre xötr ne la Itre Hna Cinyihan Qene Heberu. Ketre, the thëthëhmine kö laka, pëkö tusi hna ewathe i Iesu. Ame lo nyidrëti a hamëne la cainöj hune la Wetr e Sinai, ase hë sasaith la treene lao xötr hnei nyidrëti hna amexej, nge pëkö tusi hna ewathi nyidrë!

(Ioane 7:28, 29) Ame hnei Iesu hna ewekë cate hnine la ēnē kolo pete kö a ini, me hape, Ate ni hë nyipunie, nge kete ate fe kö nyipunie la qange ngön ; nge tha traqa xane kö ni, ngo nyipici nyidëti ate upi ni, lo hnei nyipunie hna tha ’te. 29 Ate nyidëti kö ni, ke qange thei nyidë ; nge hnei nyidëti hna upi ni.

(Ioane 8:29) Nge ce ini me nyidëti ate upi ni ; tha hna nue ni kö hnei nyidë, ke ini a kuca pala hi la nöjei ewekë nyine amadi nyidë.

w11 15/3 11 ¶19

Tha Tro Kö a Ajojezi Së Hnene La Fen

19 Loi e pexej la aqane idrengethenge së koi Iehova. Hnei Iesu palahi hna amadrinëne la Keme i nyidrë. Hna traqa la ijin laka, hnei Iesu hna mekune troa kuca la ketre ewekë kö thenge la aja i nyidrë, ngo tha thenge la aja i Akötresieti kö. Ngo, ka mejiune nyidrë koi Iehova, matre öni nyidrë: ‘Loi e aja i Cilieti la nyine troa eatrën, ngo tha ajange pe.’ (Luka 22:42) Isa hnyinge jë ka hape, ‘Eni kö a drengethenge Akötresie, ngacama tha ka hmaloi kö?’ Nyipiewekë catr troa drengethenge Akötresie matre troa hetrenyi la mel. Nyidrëti la nyine tro sa pane drengethenge, ke, Nyidrëti la ka hamëne la mele së, me thupëne ej. (Sa. 95:6, 7) Pëkö ketre ewekë ka troa nyihnane la idrengethenge. Maine tha ka idrengethenge kö së, tha tro kö Akötresieti a kepe së.

Troa Sine Thel La Itre Mekune Ka Sisitria

(Ioane 7:8-10) Trojë nyipunie kowe la pui ne xeni cili ; tha tro fe kö ni kowe la pui ne xeni cili enehila, ke tha traqa pete kö la ijineng. 9 Nge ase hë nyidëti ulatine la tenge ewekë cili koi angat, nyidëti a munëti e Galilaia. 10 Nge koilo hë la ite tejine me nyidëti kowe la pui ne xen, nyidëti a jötëti fe, tha tro amamanyi kö, ngo hna tro juetë.

w07 1/2 6 ¶4

Pine Nemene Matre Loi e Tro Palahi Sa Nyipici?

Nemene la tulu hnei Iesu hna amamane koi së? Ame ngöne la ketre drai, hnei Iesu hna ithanata memine la itr atr ka tha lapaune kö koi nyidrë, ngo angatr a ajan troa atre ekaa la götran hnei Iesu hna tro kow. Öni angatre koi nyidrë: “Nuepi pe la, nge trojë Iuda eë.” Nemene la hna qaja hnei Iesu? “Trojë nyipunie kowe la pui ne xeni [e Ierusalema] ; tha tro fe kö ni kowe la pui ne xeni cili enehila, ke tha traqa pete kö la ijineng.” Ngo, tha qea ju kö e thupen, hnei nyidrëti fe hna tro Ierusalema kowe la pui ne xen. Pine nemene matre qaja jë Iesu la itre trengewekë celë? Pine laka, tha ijiji angatre kö troa atre la götran hnei nyidrëti hna tro kow. Tha ka tria kö la hnei Iesu hna qaja. Ngo tha hnei nyidrëti kö hna qaja asë, matre tha tro kö angatr a akötrë nyidrë, me itretre drei nyidrë. Tha thoi kö Iesu, ke, öni Peteru aposetolo göi nyidrë ka hape: “Tha hane kö kuca la ngazo, kete pë fe kö thoi hna öhne ngöne la ineula i nyidë.”—Ioane 7:1-13; 1 Peteru 2:22.

(Ioane 8:12) Iesu a ulati hmaca koi angat, ka hape, Ini la lai ne la fene hnengödrai ; ame la ate xöte thenge ni tha tro kö angeic’ a tro ngöne la jid, ngo tro angeic’ a hetenyi la lai ne la mel.

w09 15/7 5 ¶12

“Ini la lai ne la fene hnengödrai.” (E jë la Ioane 8:12; 9:5.) Itre macatre qëmekene troa mala Iesu, öni Isaia perofeta: “Ame la nöje hna trongëne la melöhlem, te, kola wange la lai atraqat, nge angat’ itete lapane la hlapa ahnuene la meci, te, hudumë hë hui angate la lai.” (Is. 9:2) Öni Mataio aposetolo, hnei Iesu hna eatrëne la hna perofetane cili ngöne lo ijine nyidrëti a xejë la huliwa ne cainöj, me hape: “Ietraju nyipunie, ke eashenyi hë la baselaia ne hnengödrai.” (Mat. 4:16, 17) Jëne la cainöje i Iesu, hnene la itre atr hna öhne la “lai,” me nuetrije la itre ini ka thoi hna hamëne hnene la itre hmi ka thoi. Öni Iesu, “Ini la lai a traqa e celë fen, mate tha tro kö a lapa ngöne la jidi la kete e angete lapaune koi ni.”—Ioane 1:3-5; 12:46.

nwtsty Ithuemacany göi Ioane 8:12

la lai ne la fene hnengödrai: Hnei Iesu hna majemine qeje nyidrëti kö ka hape, lai. Itre ka drei nyidrë a mekune lo foa lao waca ne laame ka tru hna amë ngöne la Hnahage Ne La Itre Föe ngöne la ijine Pui Ne Xeni Ne Hunuma. (Ine 7:2; wange ju la App. B11.) Kola hudrum e cailo. Ketre, ame la kola qaja la hnëewekë “lai ne la fene hnengödrai,” easa mekun lo hna qaja hnei Isaia ka hape, tro la “itete lapane la hlapa ahnuene la meci” a öhne “la lai atraqat.” Tro la ‘hlue’ i Iehova a “nyine lai ne la ite ethen.” (Is 9:1, 2; 42:1, 6; 49:6) Ame ngöne la cainöj hune la wetr, hnei Iesu hna xome hmaca la ceitune cili ngöne lo nyidrëti a ithanata kowe la itretre dreng, me hape: “Nyipunieti la lai ne la fene hnengödrai.” (Ma 5:14) Ame la hnëewekë “lai ne la fene hnengödrai” e celë (ame ngöne la qene Heleni tre, koʹsmos kola qaja la itre atr asë) tre, celë hi ka mama ngöne la hna cinyihan hnei Isaia göne la Mesia, ene la “lai ne la ite ethen.” Ame ngöne Ite Huliwa 13:46, 47, Paulo me Banaba a amamane ka hape, ame la itre hna cinyihan ngöne Isaia 49:6 tre, ketre wathebo lai thatraqane la itretre drei Keriso; loi e tro palahi angatr a “nyine lai ne la ite ethen.” Tro Iesu me itretre drei nyidrë a ‘nyine lai’ kowe la itre atr, me thepe angatr qa ngöne la itre ini ka thoi.

E Tusi Hmitrötr

(Ioane 8:31-47) Ame hnei Iesu hna ulatine koi angete Iuda, angete lapaune koi nyidëti, ka hape, Maine tro nyipunie a xome hutine la tenge ewekënge, itete dei ni nyipunie ka nyipici ; 32 nge tro hë nyipunie a ate la nyipici, nge tro ha nue amacai nyipunie hnene la nyipici. 33 Angat’ a sa koi nyidëti, ka hape, Ite matra i Aberahama hun ; nge tha qa kö hna hujedö huni hnei kete ate ; hna tune ka laka öni nyipëti, Tro ha nue amacai hun ? 34 lesu a sa koi angat, ka hape, Nyipici, nyipici, ini a qaja koi nyipunie, ka hape, ame la ate kuca la ngazo, angeice hi la hlue ne la ngazo. 35 Nge ame la hlu, te, tha ka lapa huti kö ngöne la hnalapa, ngo loi pe la neköne ka lapa hut, 36 Nge maine tro ha la Neköne a nue amacai nyipunie, nyipi nue amacai nyipunieti hë. 37 Ate hi ni laka ite matra i Aberahama nyipunie ; ngo nyipunie pe a thele troa humuthi ni, ke pëkö hnene la tenge ewekënge e kuhu ite hni nyipunie. 38 Ini a qaja la hnenge hna öhne thei Tetetro ; nge nyipunie a kuca la hnei nyipunie hna öhne thei keme i nyipunie. 39 Angat’ a sa koi nyidëti, ka hape, Aberahama la keme hun. Iesu a ulatine koi angat, ka hape, Maine ite nekö i Aberahama nyipunie, maine nyipunie a kuca la ite huliwa i Aberahama. 40 Ngo enehila nyipunie a thele troa humuthi ni, ene la ate qaja koi nyipunie la nyipici hnenge hna denge qa thei Akötesie ; tha hnei Aberahama kö hna kuca tune lai. 41 Nyipunie a kuca la ite huliwa ne la keme i nyipunie. Nge öni angate koi nyidëti, ka hape, Tha ite nekö ne gojenyi kö hun ; casi hi la keme hun, ene Akötesie. 42 Iesu a ulatine koi angat, ka hape, Maine Akötesieti la keme i nyipunie, maine nyipunieti a hni ni ; ke traqa ha ni qa thei Akötesie ; nge tha uti xane kö ni, ngo hnei nyidëti hna upi ni. 43 Ue laka tha trotrohnine kö hnei nyipunie la tenge ewekëng ? qa ngöne la tha ‘teine kö nyipunie troa denge la tenge ewekëng. 44 Keme i nyipunie la diabolo, nge pi tro nyipunie a kuca la ite aja i keme i nyipunie. Ate ihumuthi nyëne qa ngöne la qân, nge tha cile huti kö ngöne la nyipici, ke pëkö nyipici thei nyën. E tro nyën a qaja la thoi, te, qa thei nyëne hi, ke ate thoi nyën, nge keme ne ej. 45 Ngo qa ngöne la ini a qaja la nyipici, te, tha lapaune kö nyipunie koi ni. 46 Dei e nyipunie a troa amamane laka hete ngazong ? Maine ini a qaja la nyipici, ue lae nyipunie laka tha lapaune koi ni ? 47 Ame la ate qa thei Akötesie, te, angeic’ a denge la wesi ula i Akötesie ; celë hi mate tha denge kö hnei nyipunie, ke tha qa i nyipunieti kö thei Akötesie.

    Itre Itus Qene Drehu (1997-2025)
    Tha Connecter
    Connecter
    • Drehu
    • Iupi fë
    • Hna ajan
    • Copyright © 2025 Watch Tower Bible and Tract Society of Pennsylvania
    • Itre Hna Amekötin
    • Pengöne La Ka Thele Ithuemacany
    • Hna amekötin
    • JW.ORG
    • Connecter
    Iupi fë